हाङ्पाओ अ़चुतामा लेन्ओ निकिना चुम्सानिन्चिन
५
हान ब़ब़,
नाना खोन्कि निछाचि ओ,
ओ झारा य़ङ्चि देम्खा म़लिनिओसो अ़तुक्वादा आन्कान्का खानानिन छाप्मायुङ्मा अ़दोत्निन।
२ देकिनालो खानानिन्आङा नुलोक त़सिन्तुम्योम,
हाङ्पाओ अ़चुलेन ना अ़खाखुत काख़पा तान्वा ता।
३ म़नाचि “झारा सेवाङ्नि खोन्कि रात्पाला आन्कान्एदा युङ्याङ”नि म़य़ङ्याङ्हिदा मोग़रिङा बुक्खुन्दिमाचि छा दाप्मा दुखाआ लाउचिवात्नि च़क्नि मोचिएदा अ़चुलुक्मा ता।
खोन्कि मोचि मोदाङ्का फुङ्मा ऩऱनिन।
४ मेन ब़ब़,
नाना खोन्कि निछाचि ओ,
खानानिन कुन्यामादा त़याइमिन्येन,
खोन्ओसा हाङ्पा म़ताओ लेन आम्नुओ निम्पाङ काख़पा तान्वा त़दोम्तिन्दान्मिन।
५ देकिनालो झारा खानानिन साम खोन्कि अ़खोलेन्ओ अ़छाचि ओ।
आन्कान अ़खाखुत माङ्लो कुन्यामाओ अ़छाचि माआङ।
६ खोन्ओसा आन्कान निचिवा अ़इम्सिमिन्ने,
मेन चाप्चाप्चाप्वा खोन्कि क़म्नान्चिन्सा युङिन्ने।
७ देकिनालो काइम्चि अ़खाखुत्ङा म़इम,
खोन्कि खाबात कादुङ्चि म़दुङ्कि अ़खाखुत्ङा सेरुचि।
८ मेन आन्कान अ़खोलेन्ओ म़ना लिसिन्ओसा चाप्चेत्तिन्चिन्ने,
खोन्कि सोम्कुवा खोन्कि सोमातुक्माओ कोङ्कोम रात्खा,
खोन्कि ताङ्बोप्खावा लेन्माय़ङ्ओ सोम्कुवा आन्कान बोम्सिन्ने।
९ देकिनालो निनाम्हाङ्आ आन्कान दन्दा प़मा निम्पाङ माआङ,
मेन आन्हाङ्पा येसु ख्रिस्तलाम्पा लेन्मा तोक्तुम्ने निम्पाङ बुयाङा म़छेन्ता।
१० खोक्को म़लाय़हिदा आन्कान स़न्दान्नुछाङ ह़ङिन्येन्नुछाङ खोक्को आन्कान्एनान अ़क्नि युङ्मा निकिना हाङ्पा येसु आन्को निम्पाङ म़सुवा।
११ खोन्ओसा अ़क्छा निएदा राक प़काप़ मुवानिन खोन्कि अ़क्छा निएदा निनाम्हाङ साकोङ्छ़ङ मुमादा फाकाफा मुवानिन,
अ़नुछ्या मोवात्निङा खानानिन त़च़न्येन्छाङ।
आदेङ्ओ यायोक खोन्कि हामान्चिन
१२ मेन ब़ब़,
नाना खोन्कि निछाचि ओ,
आन्कान्का खानानिन लोनिङ्नि,
आम्नुओ रादा काचि कामु आम्नुओ बुसुवाचि साङ्आ खानानिन हाङ्पाएदा ऩतित्तिन खोन्कि ऩरेन्तिन,
मोचि साया मेत्तानुम्च़म।
१३ मोचिआ अ़मुवाओ अ़चुकाचिओ निकिना सोमातुक्याङ्सा तोक्पो साया मेत्तानुम्च़म।
खोन्किना खानानिन अ़क्छा निएदा तोङानिन्कि युङानिन।
१४ ब़ब़,
नाना खोन्कि निछाचि ओ,
आन्कान्काआ खानानिन यायोक प़निङ्नि,
कासोचि चाप्चेत्तानुम्च़म।
अ़चुराक सुवाओचि,
मान्ऱकादाचि फासानुम्च़म।
झाराचिएनान नुलोक चेवानिन।
१५ खानुम,
साङ्छाङ अ़त्लोओ अ़फान्दा अ़त्लो अ़च़निन्ने,
मेन अ़क्छा निएदा खोन्कि झारा म़नाचिएनान अ़धुन नुलोक च़मालामानिन।
१६ अ़धुन आम्नुओ ऩङानुने,
१७ अ़धुन यामारायुङ्सानिन,
१८ झारा ग़रिचिदा निनाम्हाङ आलाङ पुवानुम।
देकिनालो ख्रिस्त येसुलाम्पा आम्नुओ निम्पाङ निनाम्हाङ्ओ अ़चुमिन्मा ओङा ओ।
१९ सेङ्लावाओ अ़काचि मान्छेक्दानुम।
२० निनाम्हाङ्य़ङ ऩङामान्छित्दानुम।
२१ झारा य़ङ्चि चिन्ताखानुम्च़म।
खाक्को य़ङ अ़नुवाक मुयाङ,
मो य़ङ लावायुङ्सानुम।
२२ खोन्कि झारा अ़अ़त्पा य़ङ्चिदाङ्का अ़थाया युङानिन।
२३ सेवाङ्निओ निनाम्हाङ्आङा खानानिन झारा ऩसेङ्सिन्ने,
खोन्कि झारा आम्नुओ लावा,
साक्मा खोन्कि पोक आन्हाङ्पा येसु ख्रिस्त म़लाय़याङ्हिदा लाहि मात्द़ङ्ओ लिने।
२४ निनाम्हाङ्आ ओ झारा य़ङ्चि अ़मु,
देकिनालो खानानिन काबुत निनाम्हाङ सोम्कुवा मुमा खान्तुओ म़मुयाङ।
२५ ब़ब़,
नाना खोन्कि निछाचि ओ,
आन्काओ निम्पाङ्छाङ यामारानिन।
२६ झारा ब़ब़,
नाना खोन्कि निछाचि सेङ्याङ्ओ चुप्माआ सेवा मेत्मुवानिन।
२७ अ़ङ्का खानानिन हाङ्पाओ अ़चुऩङ्दा लोनाङ्नानिन,
ओ छाप्लावा झारा ब़ब़,
नाना खोन्कि निछाचि खिप्तापुवानुम्च़म।
२८ आन्हाङ्पा येसु ख्रिस्तओ अ़चुसोमातुक्मा खानानिन्एदा युङ्ने!