३
खोन्ओसा खानानिन ख्रिस्तएनान त़खोन्तिन्लोन्तिन्ओसाआ,
निनाम्मादुओ य़ङ्चि लामानुम।
मोदा निनाम्हाङ्ओ अ़चुचुप्ताङ्छुक्लिप्पा ख्रिस्त म़युङ्याङ।
२ निनाम्मादुओ य़ङ्चिओ अ़तुक्वादा मिन्मा पाक्तानुम,
हेन्खामादाओ सामाचिदा माआङ।
३ देकिनालो ख्रिस्त म़सुवाहिदा खानानिन अ़क्नि त़स़न्युङ्सिन,
खोन्कि हान निनाम्हाङ्आ आम्नुओ ह़ङ्म़ङ ख्रिस्तएनान अ़रात्तायुङ्सा।
४ ख्रिस्तआ आम्नुओ ह़ङ्म़ङ खानानिन ऩप़न।
खोन्कि खोक्को खाङ्म़मुनान्चिन्हिदा खानानिन्छाङ खोक्कोएनान सायादा खाङ्त़मुसिन्चिन।
बुयाओ खोन्कि अ़ऩङ्वा ह़ङ्म़ङ
५ खोन्ओसा खानानिन्एदा म़युङ्याङ्ओ हेन्खामादाओ मिन्माचि सेरानुम्च़म।
मोचि पोप्मुमा,
मान्सेङ्दामा,
राका मित्मा,
अ़त्लो मित्मा ओ।
च़क्ख़य़ मान्मुदानिन,
देकिनालो मो सेम्पोक ब़क्मावाको ओ।
६ ओ अ़अ़त्पा य़ङ्चिओ अ़तुक्वाआ निनाम्हाङ्ओ अ़चुच़ऱपा लोमावा मान्च़कादाचिएदा तायाङ।
७ खानानिन आप्पिछाङ बुया अ़क्दु अ़अ़त्पा लावाचिओ तायाओ अ़क़म्मादा त़युङिन्येन्हिदा ओवाको लाम्चिदा त़कोलिन्येन।
८ मेन हान खानानिन आप्पि ओवाको झारा य़ङ्चि छिरानुम्च़म: माइसुङ,
च़ऱपा,
ऩङ्च़,
सुङ्मा खोन्किना आम्नुओ दोदाङ्का लोन्ओ चिप्मानाम य़ङ।
९ अ़क्छा निएदा म़प्मान्मुदानिन,
देकिनालो बुयाओ हेवामि आम्नुओ ह़ङ्म़ङ खोन्कि मोसोओ अ़च़माथाङ्माछाङ खानानिन्आ त़छिरुम्युङ्सुम।
१० खोन्कि ओन्ग़रि अ़ऩङ्वा ह़ङ्म़ङ त़लोउम्युङ्सुम।
खानानिन च़लोक आम्नुओ कामुन्पाओ अ़चुकात्मावा लियाङ्सा त़खारिन्येन,
खोन्कि खोक्को नुलोक त़तुप्तुम।
११ ओक्को य़ङ्दा ग्रिक माङ्लो यहुदि,
सिप्मायाम्बुन पाक्माय़ङ माङ्लो सिप्मायाम्बुन मान्पाक्कादा,
मान्लेकादा माङ्लो खोक्लिदा कायुङ्चि,
हारुक माङ्लो लेत्वा हान्दाङ्का ऩफेक्निन।
मेन ख्रिस्तङा झारादाङ्का तोक्पो म़मुयाङ खोन्कि खोक्को खानानिन झारादा म़युङ।
१२ ओवात्नि निनाम्हाङ्आ ऩछेन्तिन्ओ सेङ्याङ्ओकि सोमा ऩतुक्तिन्ओ म़नाचि त़लिसिन्ओसा खानानिन नोत्चिचिवाओ,
सोमाकातुक,
अ़नुवाक,
कासिम्नान्चिन खोन्कि काहुङ लिसानिन।
१३ अ़क्छा निएदा आङ्मुवानिन,
म़नाचिओ अ़चुदेङ्सालाप्पादा दिदि दुम पाक्माय़ङ याक्याङ्नालो अ़क्छा निएदा लेत्कालेत मुवानिन।
देत्नि हाङ्पाआ खानानिन ऩलेत्तिन्युङ्सिन,
मोवात्नि खानानिन्आछाङ लेत्माचिदोत।
१४ ओ झारादाङ्का च़लोक सोम्तुक्मा लोआनुम,
मोसाआ खानानिन झारा अ़क्तात लिमादा अ़क्नि म़छुम।
१५ अ़नुछ्या,
खानानिन सेवाङ्निओ निम्पाङ अ़क्तात पोक्दा त़बुत्तिन्ओ।
ख्रिस्तआ प़माय़ङ सेवाङ्निआ आम्नुओ साकोङ्वादा हाङ मुने।
खोन्कि आलाङ्मि लिसानिन।
१६ ख्रिस्तओ अ़चुय़ङ खानानिन्एदा च़लोक याक्ने।
झारा खारुएनान अ़क्छानिएदात्नि चिन्मुवानिन खोन्कि चाप्चेत्मुवानिन।
चोन्मा छाम,
साम्ऱङ,
खोन्कि लावामि छाम लुवानिन।
आम्नुओ साकोङ्वादाओ आलाङ्एनान निनाम्हाङ्एदा छाम लुवानिन।
१७ दे-दे त़य़ङिन,
दे-दे त़च़न,
मो झारा हाङ्पा येसुओ अ़चुऩङ्दा खोक्कोलाम्पा निनाम्हाङ पापा आलाङ प़याङ्सा मुवानुम।
ख्रिस्तियान खिम्लुम्पादाओ यायोक
१८ खिम्हाङ्माचि ओ,
हाङ्पाओ अ़चुबुदा त़खान्तिन्लो अ़धुन आम्नुओ खिम्हाङ्पाचिओ अ़चुक़म्मादा युङानिन।
१९ खिम्हाङ्पाचि ओ,
आम्नुओ खिम्हाङ्माचि सोमातुक्तानुम्च़म खोन्कि मोचिएदा छाक्लो मान्लिदानिन।
२० छाचि ओ,
झारा य़ङ्चिदा आम्नुओ मामा-पापाचिआ ऩलोन्ओ य़ङ्दा काङ्सानिन।
देकिनालो ओ य़ङ्आ हाङ्पाओ अ़चुऩङानुसु।
२१ मामा,
पापाचि ओ,
आम्नुओ छाचिओ अ़चुमाइसुङ मान्कान्दानुम्च़म,
मोवात्नि त़मुम्च़म्नालो मोचिओ अ़चुराक स़।
२२ हारुक्चि ओ,
झारा य़ङ्चिदा ओ हेन्खामादाओ आम्नुओ हाङ्पाचिआ ऩलोन्वा चुवानिन।
अ़चुओ म़क्साम्दा ओन्ङा खाङ्मुमा काचि मान्मुदानिन,
मेन अ़नुछ्याओ साकोङ्वाआ अ़धुन अ़चुओ ऩङानुसानुम्च़म।
मोवात्नि हाङ्पा निनाम्हाङ्ओ अ़चुसाया मेत्तानुम।
२३ खानानिन दे त़च़न,
म़नाओ निम्पाङ मुयाङ्ओवा माआङ,
मेन हाङ्पाओ अ़चुकाचि मुन्येन्वा आम्नुओ मिन्मा पाक्तानुम्कि मुवानिन।
२४ खानानिन त़सिन्तुम्योम,
निनाम्हाङ्आ आप्पिओ अ़चुम़नाचिओ निम्पाङ अ़युङ्साओ सिरिफा त़तोक्तुम।
मित्तानुम,
खानानिन्आ हाङ्पा येसु ख्रिस्त त़ब़रुम्योम।
२५ खोन्कि आप्पि मुमाय़ङ अ़अ़त्पा काचिओ अ़सिवा अ़त्लो काच़चिआ अ़लातोक,
देकिनालो निनाम्हाङ्लिप्पा मान्वाङ्माङ छ़ङ म़छेन।