आदेङ्ओ चाप्चेत्माय़ङ
१३
ओ सुम्कादुओदु अ़ङ्का खानानिन्एदा बान्ङाङाओ।
साम्कालिन य़ङ्याङ,
“झारा लाहि ह़वाङ माङ्लो सुम्पाङ सालुम्स़ङ्चिओ अ़चुसालुम्स़ङ्लाम्पा झारा य़ङ अ़छ़ङ कान्मादोत।”a
२ ह्वादुओदु आम्नुओ रादा युङाङ्याङ्हिदा अ़ङ्का खानानिन चाप्चेत्नानिन्वात्नि हान आम्नुओ रादा अ़ङ्का अ़युङ्ऩङ्ऩङ्हिदाछाङ खानानिन चाप्चेत्नाङ्नानिन।
अ़ङ्का लाङाताङाहिदा बुया हेवा कामुचि खोन्कि नि साङ्चिछाङ अ़लेत्ऩङ्च़ङ।
३ मोन्ग़रि ओ य़ङ्आ अ़ङ्का ख्रिस्तओ अ़चुपाङ्लाम्पा चेप्ङाङाओ सालुम्स़ङ खानानिन ऩप़न।
आम्नुओ च़माथाङ्मादा ख्रिस्त मान्ऱकादा ऩमुनिनिन,
मेन खोक्को आम्नुओ रादा सावापोरिओ म़मुयाङ।
४ अ़नुछ्याङा,
मान्ऱदामादा खोक्को क्रुस्दा म़ख़न्तानुछाङ खोक्को निनाम्हाङ्ओ अ़चुसावादा ओन्ग़रि म़ह़ङ्याङ।
मोवात्निङा,
आन्कान्काछाङ ख्रिस्त मान्ऱकादा म़मुवाङावात्निङा मुन्येन्का,
मेन ओन्ग़रि आन्कान्का खोक्कोएनान ह़ङिन्का,
खोन्ओसा खानानिन्एनान आन्काओ च़माथाङ्मादा निनाम्हाङ्ओ अ़चुसावा आन्कान्का तोक्तुम्का।
५ खानानिन साकोङ्छ़ङ्दा त़युङिन्येन हे माआङ निकिना खानानिन आप्पिङा चिन्ताखानिन्चिन।
आप्पि चिन्तानिन्चिन।
येसु ख्रिस्त खानानिन्एदा म़युङ्याङ्नि खानानिन य़ङ्मा त़ऱन्मिन्नालो ओसोओ अ़तुम्माय़ङ,
खानानिन चिन्माखाङ्मादा त़धान्खारिन्युङ्सिन।
६ अ़ङ्का साकोङ्छ़ङ मुङाङा,
आन्कान्का मान्धान्खारिन्युक्तिन्काओ खानानिन्आ त़सिन्तुम।
७ मेन खानानिन दित्छाङ अ़त्लो मान्च़दानिन निकिना आन्कान्का निनाम्हाङ्एदा यामारिन्येन्का।
आन्काओ नुलोक लिओ खाङ्मुमा निम्पाङ माआङ,
मेन आन्काओ पाङ खाङ्मुमा मान्ऱदोम्कावा दात्नुछाङ दि तोङ्लो मुयाङ मो मुमा रुवानिन निम्पाङ ओ।
८ देकिनालो आन्कान्का अ़छ़ङ्ओ अ़देङ्सालाप्पादा देत्छाङ च़मा अ़ऱन्मिन्का,
अ़छ़ङ्ओ निम्पाङ ओन्ङा मुमा ऱम्का।
९ आन्कान्का मान्ऱकादा मुन्येन्कानुछाङ खोन्कि खानानिन काछो त़लिसिन्हिदा आन्काओ ऩङानु।
खानानिन उन्निज़ङ्नि लिसानिन निम्पाङ आन्कान्का यामारिन्का।
१० खोन्ओसा,
खानानिन्एदाङ्का अ़थाया युङ्ङाङाहिदा अ़ङ्का ओ छाप्तुङ्योङ,
मोवात्नि खानानिन्एदा लाङाताङाहिदा हाङ्पाआ अ़ङ्का ऩपुवाङ्ओ पाङ चाअ़त्लो अ़ङ्का याङ्मा अ़दोत्निन्ने।
ओ पाङ खोक्कोसाआ अ़ङ्का खानानिन काऱ मुमा निम्पाङ ऩपुवाङ ओ,
भुङ्माखान्माओ निम्पाङ माआङ।
पावल्ओ देङ्दाओ अ़सेवा
११ देङ्दा,
ब़ब़,
नाना खोन्कि निछाचि ओ,
हासिन्चिन्ने।
अ़च़वाङ्ओ निम्पाङ मित्चिऩङ मुवानिन।
अ़ङ्य़ङ एनानुम!
अ़क्छा निएदा तोङानिन।
सेवाङ्नि युङानिन।
खोन्कि निनाम्हाङ्ओ अ़चुसोमातुक्मा खोन्कि सेवाङ्नि खानानिन्एनान युङ।
१२ अ़क्छाआ निएदा सेङ्याङ्ओ चुप्माआ सेवा मेत्मुवानिन।
१३-१४ झारा निनाम्हाङ्ओ अ़चुम़नाचिआ खानानिन सेवा ऩछोक्तिन्युङ्सिन।
हाङ्पा येसु ख्रिस्तओ अ़चुसोमातुक्मा,
निनाम्हाङ्ओ अ़चुसोम्नुमा खोन्कि सेङ्लावाओ अ़चुयावायोक खानानिन झाराएदा युङ्युङ्ने।