कोरिन्थिचि पावल्आ छाप्तुओ ह्वातात्ओतात छाप्लावा
१
निनाम्हाङ्ओ अ़चुमिन्मालाम्पा ख्रिस्त येसुओ अ़चुछाम्माय़ङ पावल,
खोन्कि आन्निछा तिमोथिएदाङ्का कोरिन्थदा कायुङ निनाम्हाङ्ओ अ़चुसाम्भुङ,
खोन्कि झारादात्नि अखैयादा कायुङ झारा निनाम्हाङ्ओ अ़चुम़नाचि।
२ आन्निनाम्हाङ पापा खोन्कि हाङ्पा येसु ख्रिस्तएदाङ्का खानानिन सोम्तुक्मा खोन्कि सेवाङ्नि लिसानिन।
झारा सोम्कासेत निनाम्हाङ
३ आन्हाङ्पा येसु ख्रिस्तओ अ़चुपापा निनाम्हाङ्ओ अ़चुऩङ चोन्ने।
खोक्को सोमाकातुक पापा,
खोन्कि झारा सोम्कासेत निनाम्हाङ म़युङ्याङ।
४ खोक्कोसाआ आन्कान झारा आन्दुखाचिदा आन्सोम्म़सेत।
खोन्ओसा आन्कान्छाङ निनाम्हाङ्एदाङ्का तोक्तुम्ओ मो सोम्सेत्मालाम्पा दियाकोछाङ दुखादा म़छुक्ताओचि अ़चुसोम्सेत्मा ऱम्च़म।
५ देत्नि आन्कान ख्रिस्तओ अ़चुदुखादा च़लोक वाङिन,
मोवात्निङा ख्रिस्तलाम्पा सोम्सेत्मादाछाङ च़लोक्ङा आन्कान वाङिन।
६ आन्कान्का दुखा आङ्तुम्कानालो मो आम्नुओ सोम्सेत्मा खोन्कि लेन्मा निम्पाङ ओ।
आन्कान्का सोम्सेत्मा तोक्तुम्कानालो मो आम्नुओ सोम्सेत्माओ निम्पाङ ओ।
दियाको दुखाचि आन्कान्का आङ्तुम्च़म्का मोवाको दुखाचि खानानिन्आछाङ हुङ्याङ्सा त़आङ्तुम्हिदा खानानिन्आछाङ मो सोम्सेत्मा त़सिन्तुम।
७ खोन्कि आम्नुओ निम्पाङ आन्काओ सोम्कुवा अ़छ़ङ मुयाङ,
देकिनालो आन्कान्का सिन्तुम्योम्का,
देत्नि खानानिन आन्काओ दुखाचिदा त़वाङिन,
मोवात्निङा आन्काओ सोम्सेत्मादाछाङ खानानिन त़वाङिन।
८ ब़ब़,
नाना खोन्कि निछाचि ओ,
आन्कान्का एसियादा आङ्तुम्च़म्काओ दुखाचिओ अ़तुक्वादा खानानिन मान्सिन्दानुम्नि आन्कान्का अ़मिनिमिन्का।
देकिनालो आन्कान्का आङ्माङा मान्ऱदोम्कालो अ़न्नुनु चात्लो ऩतिमिन्काओसा आन्काओ ह़ङ्म़ङ्दा आन्काओ मिन्माङा सुवा।
९ अ़नुछ्याङा आन्कान्का ना स़माओ दन्दा तोक्तिन्ओवाङा लुन्का।
ओवात्नि लिसाओ ना आन्कान्का आप्पिएदा सोम्कुवा मुन्काने निम्पाङ माआङ,
मेन म़सुवादाओचि काखोन्लोन निनाम्हाङ्एदा सोम्कुवा मुन्काने निकिना ओ।
१० खोक्कोसाआ आन्कान्का ओवाको स़मादोराङाओ क़माकात्तुओदाङ्का ऩलेइसिन्का,
खोन्कि खोक्कोसाआ आन्कान्का ऩलेइसिन्का।
खोक्कोएदा आन्कान्का सोम्कुवा मुन्युङ्सिन्का,
मोवात्नि खोक्कोसाआ आन्कान्का ऩलासिन्लेइसिन्युङ्सिन्का।
११ खानानिन्आछाङ आन्कान्का यामात्मालाम्पा फामादोत।
खोन्कि ब़द्धे यामात्माओ अ़लामाय़ङ्दा आन्कान्का तोक्तुम्काओ आसिखाओ निम्पाङ ब़द्धे म़नाचिआ आन्लिप्पादा आलाङ अ़प़।
पावल्आ अ़मित्चिऩङ फान्तुओ
१२ हेन्खामादा खोन्कि च़लोक्वा खानानिन्एनान्ओ आन्काओ तुप्मादा आन्कान्का काचि मुम्काहिदा ओ हेन्खामादाओ चाप्चाआ माआङ,
मेन सेङ्लो खोन्कि अ़छ़ङ्दा आन्कान्का मुम्का।
ओ य़ङ्दा आन्काओ ऩङानु,
खोन्किना आन्काओ छेन्खातायाआछाङ मोसोओ अ़सालुम्स़ङ प़।
१३-१४ खानानिन्आ खिप्मा खोन्कि तुप्मा त़ऱन्मिन्ओ दित्छाङ आन्कान्का खानानिन अ़छाप्तिमिन्का।
खोन्कि खानानिन्आ आन्कान्का अ़चित त़तुप्नियुङ्निनुछाङ आदेङ खानानिन झारासा नुलोक त़तुप्तुम निकिना अ़ङ्का सोम्कुवा मुङा।
ओवात्निङा आन्हाङ्पा येसुओ अ़चुलेन्दा खानानिन्आ आन्कान्का झारा त़तुप्नि,
खोन्कि खानानिन आन्काओ निम्पाङ ऩङानुमान्चिन त़ऱन,
देत्नि आन्कान्का आम्नुओ निम्पाङ ऩङानुमा ऱन्का।
१५ ओ य़ङ्दा अ़ङ्का अ़छ़ङ मुङाङाओसा,
खानानिन ह्वास़रो आसिखा त़तोक्तुम्ने निकिना खानानिन्एदा बुया बान्मानि अ़ङ्का मिनाङ।
१६ माकेदोनिया खात्ङाहिदा खानानिन्एदा बान्माकि तुप्मा खोन्कि माकेदोनियादाङ्का खानानिन्एदा लामाबान्माकि यहुदियादाओ अ़ङ्कोन्मादा खानानिन्आ अ़ङ्का खान्मा त़ऱङाऩङ्नि अ़ङ्का मिनाङ।
१७ ओ मित्चिऩङ मुङ्हिदा दि अ़ङ्ऩङ्छुन्ता कि?
अ़ङ्का अ़ङ्मित्चिऩङ मुङ्हिदा हेन्खामादाओ म़नावात्नि ओ अ़ङ्दोआङा “अ़नुछ्याओ”नि य़ङ्याङ्सा अ़ङ्मिन्मादा “माआङ”निछाङ य़ङाङ्ओ कि?
१८ अ़नुछ्याङा निनाम्हाङ सोम्कुवा मुमा खान्तुओ म़मुयाङ्ओसा आन्काओ य़ङ “अ़नुछ्याओ”नि य़ङ्याङ्सा “माआङ”नि अ़लिनिन।
१९ देकिनालो सिलास,
तिमोथि खोन्कि अ़ङ्का आम्नुओ रादा आन्कान्का खालुसुम्काओ निनाम्हाङ्ओ अ़चुओ छा येसु ख्रिस्त “अ़नुछ्या” खोन्कि “माआङ”ओ मान्मुयाङ।
मेन खोक्कोएदा अ़धुन “अ़नुछ्या” ओन्ङा मुवाङा।
२० देकिनालो निनाम्हाङ्ओ झारा अ़चुहिप्माय़ङ्चि खोक्कोएदा “अ़नुछ्या” म़मु।
खोन्ओसा खोक्कोलाम्पा निनाम्हाङ्ओ अ़चुऩङ्लोङ्माओ निम्पाङ आन्कान “आमेन”नि य़ङिन।
२१ खोन्कि आन्कान्का खानानिन्एनान ख्रिस्तदा काछो कामु खोन्कि आन्कान काछेन निनाम्हाङ म़युङ्याङ।
२२ खोक्कोसाआ आन्कान्एदा अ़चुसेप्मा म़पाक्तायुङ्सा,
खोन्कि आन्साकोङ्वादा चिनोयाङ्वात्नि खोक्कोसोओ अ़चुलावा म़पुवायुङ्सा।
२३ अ़ङ्सालुम्स़ङ्ओ निम्पाङ अ़ङ्का निनाम्हाङ्एदा फालुङा,
खानानिन च़लोक दन्दा प़मा अ़दोत्निन्ने निम्पाङ अ़ङ्का कोरिन्थदा मान्लाङाबान्ङा।
२४ आम्नुओ सोम्कुवादा आन्कान्का हाङ अ़मुन्मिन्का।
मेन आम्नुओ सेवाङ्निओ निम्पाङ खानानिन्एनान तोङ्याङ्सा काचि आन्कान्का मुन्का।
देकिनालो आम्नुओ सोम्कुवादा खानानिन काछो त़मुन्येन।