येसु म़खोन्तालोन्ताओ
१५
हान ब़ब़,
नाना खोन्कि निछाचि ओ,
अ़ङ्का खानानिन खाएत्नानिन्ओ नुय़ङ्खान अ़ङ्का खानानिन मित्मेत्नानिन।
मो नुय़ङ्खान खानानिन्आ त़लोउम,
खोन्कि मोदा खानानिन त़युङिन।
२ अ़ङ्का खानानिन खाएत्नानिन्ओ य़ङ्दा नुलोक त़युङिन्नालो ओ नुय़ङ्खान्लाम्पा खानानिन त़लेरिन्युङ्सिन।
माङ्नालोना खानानिन मोहाङा साकोङ्छ़ङ त़मुम।
३ देकिनालो साम्योक छाप्लावावात्नि ख्रिस्त आन्हेवाचिओ निम्पाङ म़सुवानिओ नुय़ङ्खान अ़ङ्का तोक्तुङ,
मो अ़ङ्का झारादाङ्का तोक्पो अ़च़वाङ्वा खानानिन प़नानिन।
४ खोक्को म़खुम्ता,
खोन्कि साम्कालिन्वा सुम्कालेन्दा खोक्को म़लासाखोन्तालोन्ता।
५ खोन्कि खोक्को केफास्एदा,
खोन्किना झारा बारकापाङ्माङ्एदा खाङ्म़मुसान्चिन।
६ खोन्कि आदेङ्माङ,
खोक्को अ़क्धुवा पाच सयेकापाङ्दाङ्का च़लोक ब़ब़,
नाना खोन्कि निछाचिएदा खाङ्म़मुसान्चिन।
मोचिएदाओ खा-खाक्कोचि म़सुवादाचिआनुछाङ ब़द्धेकापाङ आइमित्तारि म़युङ्याङ।
७ खोन्किना याकुब खोन्कि झारा छाम्माय़ङ म़नाचिएदा खोक्को खाङ्म़मुसान्चिन।
८ खोन्कि झारादाङ्का आदेङ अ़ग़रि मान्तामाङ पुक्तान्चिन्ओ म़नावाको अ़ङ्काएदाछाङ खोक्को खाङ्म़मुसान्चिन।
९ छाम्माय़ङ म़नाचिएदाङ्काओ अ़ङ्का अ़चुप्पाङ ओ।
अ़ङ्का छाम्माय़ङ म़नानि लोमा अ़खान्ऩङ,
देकिनालो अ़ङ्का निनाम्हाङ्ओ अ़चुसाम्भुङ दुखा प़ङ।
१० मेन अ़ङ्का देत्नि मुङाङा,
मो निनाम्हाङ्ओ अ़चुसोमातुक्मालाम्पा मुङाङा,
खोन्कि निनाम्हाङ्आ अ़ङ्का सोमा ऩतुक्ताङ्ओ सोज्जे मान्लि।
मेन अ़ङ्का ना मोचि झाराएदाङ्का च़लोक काचि मुवाङ।
खोन्नुछाङ ओवाको च़लोक काचि मुमा ऱङाओ ना अ़ङ्सावाआ माआङ,
मेन अ़ङ्काएदा कायुङ निनाम्हाङ्ओ अ़चुसोम्तुक्माआ ओ।
११ खोन्ओसा अ़ङ्कानुछाङ माङ्लो खोचिआनुछाङ आन्कान्का दि खालुसुम्का,
मो नुय़ङ्खान्दा खानानिन साकोङ्छ़ङ त़मुम्युङ्सुम।
स़मादाङ्का खोन्मालोन्मा
१२ म़सुवादाओदाङ्का ख्रिस्त म़खोन्तालोन्तानि खालुसुम्कानालो खानानिन्एदाङ्का खा-खाक्को देत्नि म़सुवादाओचि ऩखोन्निन्लोन्निन्नि य़ङ्मा त़ऱन?
१३ म़सुवादाओचि ऩखोन्निन्लोन्निन्नालो ना ख्रिस्त्छाङ म़सुवादाओदाङ्का म़खोन्तालोन्ताओ माआङ।
१४ ख्रिस्त म़सुवादाओदाङ्का मान्खोन्लोन्चिओदे आन्काओ खालुमाय़ङ सोज्जे लि,
खोन्कि आम्नुओ साकोङ्छ़ङ्छाङ मोहा लि।
१५ मोदाङ्का च़लोक,
आन्कान्का निनाम्हाङ्ओ अ़चुतुक्वादा सोज्जेओ सालुम्स़ङ काप़ लिसिन्का देकिनालो ख्रिस्त म़सुवादाओदाङ्का म़खोन्तालोन्ताओ आन्कान्का निनाम्हाङ्ओ अ़चुतुक्वादा सालुम्स़ङ प़म्युङ्सुम्का।
मेन अ़नुछ्याङा म़सुवादाओचि ऩखोन्निन्लोन्निन्नालो निनाम्हाङ्आ ख्रिस्त मान्खोन्लोन्अ़दा।
१६ म़सुवादाओचि ऩखोन्निन्लोन्निन्नालो ना ख्रिस्त्छाङ म़सुदाओदाङ्का मान्खोन्लोन।
१७ ख्रिस्त मान्खोन्लोन्ओनालो आम्नुओ साकोङ्छ़ङ सोज्जेओ मुयाङ,
खोन्कि खानानिन हान्छाङ आम्नुओ हेवाचिदाङा त़याइन्येन्ओ।
१८ खोन्नालो खा-खाक्को ख्रिस्तदा म़सुवादाओचिछाङ म़लुक्ताखाराओ।
१९ ओ ह़ङ्म़ङ्ओ निम्पाङ ओन्ङा आन्कान ख्रिस्तएदा सोम्कुवा मुन्येन्ओनालो आन्कान झारा म़नाचिदाङ्का च़लोक दुखा तोक्तिन्ओ।
२० अ़नुछ्याङा ख्रिस्त म़सुवादाओदाङ्का म़खोन्तालोन्तायुङ्सा।
स़मादा म़इम्सादाओचिएदाओ खोक्कोङा बुयाओ अ़सिवा म़मुयाङ।
२१ अ़क्छा म़नाएदाङ्का स़मा ताओसाआ,
म़सुवादाओचिओ अ़चुखोन्मालोन्माछाङ अ़क्छा म़नाएदाङ्काङा ता।
२२ देकिनालो देत्नि आदम्एदा झारा म़स़,
मोवात्निङा ख्रिस्तदा झारा म़लाह़ङ।
२३ मेन झाराकापाङ आ-आप्पिओ अ़स़वा ख्रिस्त झारादाङ्का बुया म़खोन्तालोन्ता,
खोन्कि खोक्को म़लाय़हिदा खोक्कोसोओ अ़चुम़नाचि म़खोन्लोन।
२४ खोन्किना अ़लुक्मा ता,
खोन्कि खोक्कोसाआ झारा हाङ्काचिचि,
पाङ्चि खोन्कि सावाचि म़लुक्तुचिकिना पापा निनाम्हाङ हाङ्होन अ़प़।
२५ देकिनालो खोक्कोसाआ झारा अ़चुङेङ्चि अ़चुलाङ्थेम्यु मान्मुम़युक्तुचितारि खोक्कोसाआ हाङ मुमादोत।
२६ झारादाङ्का आदेङ अ़लुक्ओ ङेङ स़माओ।
२७ देकिनालो “निनाम्हाङ्आ झारा य़ङ्चि खोक्कोसोओ अ़चुलाङ भेन्यु अ़क़म्तायुङ्सा”aनि छाप्तायुङ्सा।
मेन ओ छेङ्छेङ्छेङ्वा मुयाङ,
“झारा य़ङ्चि खोक्कोसोओ अ़चुपाङ्दा म़युङ्सायुङ्सा”निओ य़ङ्दाङ्का आन्कान छेङ्छेङ्छेङ्वा सिन्तुम्योम: झारा य़ङ्चि ख्रिस्तओ अ़चुपाङ्दा अ़युक्तायुङ्साओ निनाम्हाङ मोसोओ अ़पाङ्दा ऩयाक्निनिन।
२८ झारा य़ङ्चि निनाम्हाङ्ओ अ़चुपाङ्दा म़तात्हिदा अ़चुछा ख्रिस्त्छाङ खोक्कोसोओ अ़चुपाङ्दा म़युङ,
देकिनालो निनाम्हाङ्आ झारा य़ङ्चि खोक्कोसोओ अ़चुपाङ्दा म़युङ्सुचि,
मोवात्नि निनाम्हाङ्ङा झारा य़ङ्चिओ झारादाङ्का तोक्पो म़लिने।
२९ हान म़सुवादाओचि ऩखोन्निन्लोन्निन्नालो ना म़सुवादाओचिओ निम्पाङ बप्तिस्मा म़लोआओदाङ्का दि अ़तोक?
म़सुवादाओचि ऩखोन्निन्लोन्निन्ओङानालो म़नाचि मोचिओ निम्पाङ देकिना बप्तिस्मा म़लोक्याङ?
३० खोन्किना आन्कान्का आप्पि देकिना अ़धुन क़माकात्तुओदा छुक्तिन्येन्का?
३१ ब़ब़,
नाना खोन्कि निछाचि ओ,
देम च़लोक आन्हाङ्पा ख्रिस्त येसुएदा आम्नुओ तुक्वाआ अ़ङ्ऩङानुङान्च़ङ,
खोन च़लोक सोम्कुवाएनान अ़ङ्का य़ङ्ङा,
अ़लेन्खिन्तुम अ़ङ्का स़ङा!
३२ म़नाओङा अ़मित्चिऩङ्दा एफिसस्दाओ खोक्लि सायाम्पोक्चिएनान ङेन मुवाङ्कि अ़ङ्का दि तोक्तुङ कि?
म़सुवादाओचि ऩखोन्निन्लोन्निन्ओनालो ना “आन्कान चान्ने,
दुङिन्ने,
देकिनालो माङ्कोलेन ना आन्कान स़न्दान्लाविन!”
३३ धान्मादा मान्छुक्दानिन।
“अ़अ़त्पा यावायोक्आ अ़नुवाक च़माथाङ्मा लुक्तु।”
३४ नुलोक आम्नुओ खारुच़ङ्तानुम,
खोन्कि हेवा मुमा छिरानुम।
खानानिन्एदा देम्कापाङ्आ ना निनाम्हाङ्ङा मान्सिन्त़युक्तुम्ओसा खानानिन लेजो मेत्मा निम्पाङ अ़ङ्का ओवात्नि य़ङाङ्ओ।
खोन्मालोन्माय़ङ पोक
३५ मेन खाक्को अ़क्छा खासेन,
“म़सुवादाओचि देत्नि म़लाखोन्लोन,
खोन्कि मोचि दियाको अ़चुपोक्दा म़ता?”
३६ खाना खामान्सिन म़ना!
खाना दि त़लित्तु,
मो मान्स़दामाङ्तारि अ़ह़ङ अ़लिनिन।
३७ खाना छुमाचा माङ्लो नि चा त़लित्तुहिदा मो आदेङ लिओ पोक माआङ,
मेन बिउ ओन्ङा त़लित्तु।
३८ मेन खोक्कोसोओ अ़चुऩङानुओवा निनाम्हाङ्आ मो अ़क्तात पोक अ़प़,
खोन्कि झाराकाखालाओ बिउओ मोसोओङा अ़पोक खोक्कोसाआ अ़प़।
३९ झारा पोक अ़क खालाओङा अ़मुनिन।
म़नाचिओ अ़चुपोक अ़क खालाओ खोन्कि सायाम्पोचिओ नि खालाओ,
छोङ्वाचिओ नि खालाओ,
खोन्किना ङाचिओ नि खालाओ अ़चुपोक मु।
४० खोन्कि पोक्चिछाङ निनाम्मादुओ खोन्कि हेन्खामादाओ पोक्चि म़युङ।
मेन निनाम्मादुओ पोक्ओ अ़लेत्मा अ़क खालाओ,
खोन्कि हेन्खामादाओ पोक्ओ अ़लेत्मा अ़क खालाओ मु।
४१ नाम्ओ अ़छुवाक अ़क खालाओ,
लादिप्माओ अ़छुवाक नि खालाओ,
खोन्कि साङ्केन्माचिओ अ़चुछुवाक नि खालाओ मु।
खोन्कि अ़क्तात साङ्केन्मा नि साङ्केन्मादाङ्का नि पाराओ अ़छुवाक मु।
४२ खोन्ओसा म़सुवादाओचिओ अ़चुखोन्मालोन्माछाङ मोवात्निङा लि।
मो पोक लुक्माखात्मादा खुम,
मो देम्खाछाङ अ़लुक्निन्खात्निन्ओदा अ़ह़ङ लि।
४३ सायापेप्मादा मो खुम,
साम्दा मो ह़ङ्लोन।
मान्ऱदामादा मो खुम,
सावादा मो अ़ह़ङ लि।
४४ हेन्खामादाओ पोक्दा मो खुम,
लावामि पोक्दा मो खोन्लोन।
मोवात्नि हेन्खामादाओ पोक युङ्नालो लावामि पोक्छाङ युङ।
४५ खोन्ओसा ओवात्नि छाप्याङ: “बुयाओ म़ना आदम अ़ह़ङ म़ना लिसा।”b
आदेङ्ओ आदम ह़ङ्म़ङ काप़ लावा म़लिसा।
४६ बुयाओ लावामि माआङ ओ,
मेन पोक्दा ओ,
खोन्किना आदेङ्ओ लावामि ओ।
४७ बुयाओ म़ना बाखादाङ्का अ़मुवाओसा हेन्खामादाओ ओ।
आदेङ्ओ म़ना निनाम्मादुङ्काओ ओ।
४८ बाखाआ मुवाओ म़ना दियाको मुवाङा,
बाखाआ म़मुवाओचिछाङ मोवात्निङा म़मु।
खोन्कि निनाम्मादुङ्काओ म़ना दियाको मुयाङ,
निनाम्मादुओ म़नाचिछाङ मोवाकोङा म़मु।
४९ आन्कान देत्नि बाखादाओ म़नाओ अ़कात्मा लोउम्युङ्सुम,
मोवात्निङा निनाम्मादुङ्काओ म़नाओ अ़कात्मा आन्कान्छाङ लोउम।
५० हान ब़ब़,
नाना खोन्कि निछाचि ओ,
अ़ङ्का खानानिन ओवात्नि लोनानिन,
सा खोन्कि ह़ निनाम्हाङ्ओ अ़चुहाङ्होन्दुओ पाङ्यि लिमा अ़ऱनिन।
ओ म़स़दाओ पोक्चिआ अ़धुन युङ्युङ्ओ पाङ्यि तोक्मा ऩऱन।
५१ एनानुम,
अ़ङ्का अ़क्तात अ़कोङ्दुम खानानिन खाएत्नानिन,
आन्कान झारा अ़इम्सिन्दान्मिन,
५२ मेन आदेङ्ओ थुथुरि साङ्हिदा अ़क्म़प्च़क़क्दा खोन्कि अ़क्चिम़क्दा आन्कान झारा फान्तिन।
थुथुरि साङ,
खोन्कि म़सुवादाओचि देम्खाछाङ ऩलुक्निन्खात्निन्ओ म़लिकि म़खोन्लोन।
खोन्किना आन्कान फान्तिन।
५३ देकिनालो ओ लुक्खात्ओ पोक्आ अ़लुक्निन्खात्निन्ओ खोन्कि ओ स़दाओ पोक्आ अ़स़निन्दानिन्ओ लोक्मादोत।
५४ मोन्ग़रि लुक्खात्ओसाआ अ़लुक्निन्खात्निन्ओ खोन्कि स़दाओसाआ अ़स़निन्दानिन्ओ लोउ,
खोन्कि “स़मा छोमाआ ख़ङ्सुखात्तु”cनि साम्कालिन्दा छाप्तायुङ्साओ य़ङ ताला।
५५ “स़मा,
आम्छोमा खादा?
स़मा,
आम्केप्खा सावा खादा?”d
५६ स़माओ अ़केप्खा हेवा ओ,
खोन्कि हेवाओ अ़सावा य़ङ्हुप ओ।
५७ मेन निनाम्हाङ आलाङ्ने!
खोक्कोसाआ आन्हाङ्पा येसु ख्रिस्तलाम्पा आन्कान छोमा म़प़।
५८ खोन्ओसा,
अ़ङ्का सोमातुक्नाङ्नानिन्ओ अ़ङ्ब़ब़,
नाना खोन्कि निछाचि ओ,
नुलोक युङानिन।
दिसाआछाङ ओह्यात्नि-मोह्यात्नि त़मुन्मिन्ने।
हाङ्पाओ अ़चुकाचिदा अ़धुन पोइसा खारानिन।
देकिनालो खानानिन त़सिन्तुम्योम,
निनाम्हाङ्एदा आम्नुओ काचि सोज्जे अ़लिनिन।