कोरिन्थिचि पावल्आ छाप्तुओ बुयाओ अ़छाप्लावा
१
ओ छाप्लावा निनाम्हाङ्आ अ़चुमित्चिऩङ्लाम्पा ख्रिस्त येसुओ अ़चुछाम्माय़ङ लिसि ऩबुत्ताङ्ओ अ़ङ्का पावल,
खोन्कि आन्काओ निछा सोस्थेनेस्दाङ्का ओ।
२ अ़ङ्का ओ छाप्लावा खानानिन कोरिन्थ सहरादा कायुङ निनाम्हाङ्ओ अ़चुसाम्भुङ्चिदा छाप्नाङ्नानिन।
खानानिन निनाम्हाङ्आ अ़चुओ म़सेङ्याङ्ओ म़नाचि लिसि ऩबुत्तिन।
हाङ्पा येसु ख्रिस्तओ अ़चुऩङ काबुत झारादात्निओ म़नाचि खोक्कोसाआ म़सेङ्सुचिओवात्नि खानानिन्छाङ ख्रिस्त येसुलाम्पा सेङ्लो ऩमुन्युङ्सिन।
येसुङा मोचिओ खोन्कि आन्हाङ्पा म़युङ्याङ।
३ आन्पापा निनाम्हाङ खोन्कि हाङ्पा येसु ख्रिस्तदाङ्का खानानिन सोमातुक्मा खोन्कि सेवाङ्नि लिसानिन।
निनाम्हाङ आलाङ प़माय़ङ
४ ख्रिस्त येसुदा निनाम्हाङ्आ खानानिन सोमा ऩतुक्तिन्ओसा आम्नुओ निकि अ़ङ्का अ़धुन निनाम्हाङ आलाङ प़ङ।
५ ख्रिस्तदा खानानिन झाराकापाराआ झारा य़ङ चेप्मा खोन्कि झारा तायादा कातोक त़लिसिन्युङ्सिन।
६ देकिनालो ख्रिस्तओ अ़तुक्वादाओ आन्काओ सालुम्स़ङ खानानिन्एदा अ़छ़ङ मुवायुङ्सा।
७ खोन्ओसा आन्हाङ्पा येसु ख्रिस्त म़लाताओ य़ङ राक्एनान हुङ्मादा खानानिन खाक्कोछाङ लावामि सावाओ य़ङ्दा त़हाप्तिन्दिसिमिन।
८ आन्हाङ्पा येसु ख्रिस्तओ अ़चुलामातामा लेन्दा खानानिन ऩङ्छिन मान्मुमाङ युङ्मा खोक्कोसाआ खानानिन आदेङ्तारि साकोङ्छ़ङ्दा नुलोक ऩयुङ्सिन।
९ निनाम्हाङ साकोङ्छ़ङ मुमा खान्तुओ म़मुयाङ।
खोक्कोसोओ अ़चुछा आन्हाङ्पा येसु ख्रिस्तएनान यावायोक मुसि खोक्कोसाआ खानानिन ऩबुत्तिन।
साम्भुङ्दा मान्तोङ्दामा
१० ब़ब़,
नाना खोन्कि निछाचि ओ,
आन्हाङ्पा येसु ख्रिस्तओ अ़चुऩङ्लाम्पा खानानिन अ़ङ्का लोनाङ्नानिन,
खानानिन झारा अ़क्छा निएदा तोङानिन खोन्कि आम्नुओ रादा मान्फेक्दानिन,
मेन खानानिन अ़क्मिन्माओ खोन्कि अ़क्मित्चिऩङ्ओ लिसानिन।
११ अ़ङ्ब़ब़,
नाना खोन्कि निछाचि ओ,
आम्नुओ तुक्वादा क्लोएओ अ़खिम्लुम्पादाङ्का आम्नुओ रादा त़खिन्येन्निओ य़ङ अ़ङ्का एनुङ्युङ्सुङ।
१२ अ़ङ्का य़ङ्मा लाम्ङाङाओ य़ङ ओङा ओ,
खानानिन्एदा खा-खाक्कोसाआ “अ़ङ्का पावल्ओ ओ”,
“अ़ङ्का अपोल्लोस्ओ ओ”,
“अ़ङ्का केफास्ओ ओ” खोन्कि “अ़ङ्का ख्रिस्तओ ओ”नि त़य़ङिन्येन्नि।
१३ दि ख्रिस्त म़हासायुङ्सा?
दि पावल आम्नुओ निम्पाङ क्रुस्दा म़सुवायुङ्सा?
माङ्लो दि खानानिन पावल्ओ अ़ऩङ्दा बप्तिस्मा त़लोइन?
१४ निनाम्हाङ आलाङ्ने,
देकिनालो क्रिस्पस खोन्कि गायस्दाङ्का नि साङ्छाङ अ़ङ्का बप्तिस्मा मान्प़ङाच़ङ।
१५ खोन्ओसा अ़ङ्ऩङ्दा बप्तिस्मा त़लोइन्ओ निकिना खानानिन साङ्छाङ य़ङ्मा त़तोक्तिमिन।
१६ उवा,
अ़ङ्का स्तिफनास्ओ अ़खिम्लुम्पाछाङ बप्तिस्मा प़ङ।
मोदाङ्का नि साङ्छाङ बप्तिस्मा प़ङ्ओ अ़ङ्का अ़सिन्ऩङ्ऩङ।
१७ ख्रिस्तआ अ़ङ्का बप्तिस्मा प़सि माआङ,
मेन नुय़ङ्खान खालुसि ऩछाम्साङ्ओ।
हेन्खामादाओ तायाआ माआङ,
माङ्नालोना क्रुस्दाओ ख्रिस्तओ अ़चुसावा सोज्जे लि।
ख्रिस्त निनाम्हाङ्ओ अ़चुसावा खोन्कि अ़चुताया
१८ देकिनालो क्रुस्ओ नुय़ङ्खान म़लुक्याङ्ओचिओ निम्पाङ खामान्सिन य़ङ ओ,
मेन आन्कान म़लेन्याङ्ओचिओ निम्पाङ ओक्को ना निनाम्हाङ्ओ अ़चुसावा ओ।
१९ देकिनालो साम्कालिन्दा छाप्तायुङ्सा,
“अ़ङ्का खारु कातोक्चिओ अ़चुखारु लुक्तुङ,
खोन्कि चाप्चाचिओ अ़चुचाप्चा लारुङ्खाइसुङ।”a
२० खारु कातोक म़ना खादा युङ्याङ?
य़ङ्हुप काचिन खादा युङ्याङ?
ओ जुगाओ दुम्कातु खादा युङ्याङ?
दि निनाम्हाङ्आ हेन्खामादाओ खारु खामान्सिन मान्मुअ़दाकि?
२१ हेन्खामादाओ म़नाचिआ आप्पि अ़चुतायाआ निनाम्हाङ सिन्मा मान्ऱअ़दाओसाआ निनाम्हाङ्ओ अ़चुतायालाम्पा आन्कान्का खालुसुम्काओ नुय़ङ्खान्ओ खामान्सिन्लाम्पा साकोङ्छ़ङ कामुचि लेन्मा निनाम्हाङ्आ अ़छ़ङ अ़मुवा।
२२ यहुदिचि बुन म़दोत खोन्कि ग्रिक्चि ताया म़लाम।
२३ मेन आन्कान्काआ ना क्रुस्दा ख़न्माय़ङ्ओ ख्रिस्त खालुसुम्का।
यहुदिचिओ निम्पाङ अ़चुधुङ्खा खोन्कि ग्रिक्चिओ निकिना खामान्सिन लिसा।
२४ मेन निनाम्हाङ्आ म़बुत्तुचिओ यहुदिचि खोन्कि ग्रिक्चिओ निकिना ख्रिस्तङा निनाम्हाङ्ओ अ़चुसावा खोन्कि निनाम्हाङ्ओ अ़चुखारु म़युङ्याङ।
२५ देकिनालो निनाम्हाङ्ओ अ़चुखामान्सिन्दामा म़नाचिओ अ़चुखारुदाङ्का तोक्पो मुयाङ,
खोन्कि निनाम्हाङ्ओ अ़चुमान्ऱदामा म़नाचिओ अ़चुछोमादाङ्का सावापोरिओ मुयाङ।
२६ ब़ब़,
नाना खोन्कि निछाचि ओ,
निनाम्हाङ्आ खानानिन ऩबुत्तिन्ओ ग़रिदा देत्नि त़मुन्येन,
मो मित्तानुम।
हेन्खामादाओ पोक्दावात्नि खानानिन्एदा ब़द्धेकापाङ खारु कातोक मान्मुत़दान्येन ब़द्धेकापाङ सावापोरिओ मान्मुत़दान्येन खोन्कि ब़द्धेकापाङ अ़च़वाङ खिम्लुम्पादाओ माआङ।
२७ मेन निनाम्हाङ्आ ताया कातोक्चि लेजो मेत्माचि निकिना हेन्खामादाओ खामान्सिन य़ङ्चि म़छेन्तुचि,
खोन्कि काछोचि लेजो मेत्माचि निकि हेन्खामादाओ मान्ऱकादा य़ङ्चि म़छेन्तुचि।
२८ हेन्खामादाओ अ़मुलोनि कान्माय़ङ य़ङ्चि सोज्जे मुमाचि निम्पाङ हेन्खामाआ अ़चुप्पो खोन्कि चिप्मा म़कात्तुओ य़ङ्चि खोन्कि अ़काचि मात्द़ङ्ओ य़ङ्चि निनाम्हाङ्आ म़छेन्तुचि।
२९ खोन्ओसा निनाम्हाङ्ओ अ़चुबुदा साङ्छाङ ऱक्भाक अ़मुनिन्ने।
३० निनाम्हाङ्आ खानानिन ख्रिस्त येसुएनान अ़क्तात ऩमुन्युङ्सिन।
खोक्कोङा आन्को निम्पाङ निनाम्हाङ्एदाङ्काओ ताया माङ्लो आन्कान साम्योक्मि काकान,
आन्कान कासेङ खोन्कि आन्कान कालेन्पा म़लिसायुङ्सा।
३१ खोन्ओसा साम्कालिन्दा छाप्याङ,
“साङ तोक्पो लिमा लाम्नालो,
मो हाङ्पा तोक्तुओदा तोक्पो लिने।”b