पाङ्कामुचि साया मेत्तानुम्च़म
१३
हाङ्काचि कामुचिओ अ़चुपाङ्दा झारा युङ्मादोत।
निनाम्हाङ्दाङ्का ताओ पाङ्दाङ्का नि खाक्कोछाङ पाङ मात्द़ङ।
खाक्को हाङ्काचि कामुचि म़युङ्याङ,
मोचि निनाम्हाङ्आ म़पाउचिओ।
२ खोन्ओसा साङ हाङ्काचि कामुचिओ अ़चुदेङ्सालाप्पादा फित्चि मु,
मोसाआ निनाम्हाङ्आ अ़युङ्साओसो अ़देङ्सालाप्पादा फित्चि मु,
खोन्कि साङ्चि फित्चि म़मु,
मोचिआ दन्दा अ़तोक।
३ देकिनालो अ़नुवाक काचिओ निम्पाङ माआङ,
मेन अ़अ़त्पा काचि कामुचिआ हाङ्काचि कामुचि कित्तुम्च़म।
दि खाना हाङ्काचि कामुचिओ कित्मादा युङ्मा त़स़नानान?
खोन्नालो अ़नुवाक काचि मुवा खोन्कि खाना खोसाआ त़चोन।
४ देकिनालो खाना नुलोक मुमाओ निम्पाङ खो निनाम्हाङ्ओ अ़चुकाब़त्पा ओ।
मेन खाना अ़त्लो त़च़नालो क़सा,
देकिनालो मोसाआ बान्छोन मोहा अ़बित्तुन।
अ़त्लो काचि कामुचिएदा निनाम्हाङ्ओ अ़चुदन्दा कातात खो निनाम्हाङ्ओ अ़चुकाब़त्पा ओ।
५ खोन्ओसा,
निनाम्हाङ्एदाङ्का दन्दा मान्तोक्दामाओ निम्पाङ ओन्ङा माआङ,
मेन खानानिन त़सिन्तुम्योम दि मुमा तोङ्याङ मोसोओ निम्पाङ्छाङ खानानिन हाङ्काचि कामुचिओ अ़चुपाङ्दा युङ्मादोत।
६ खोन्ओसा खानाछाङ दाम्दु छोन्मादोत,
देकिनालो पाङ्कातोक्चि हाङ्काचिओ निम्पाङ अ़धुन काचिदा कावाङ्युङ निनाम्हाङ्ओ अ़चुकाब़त्पाचि ओ।
७ छोन्मादोत्ओ झारा छोरानुम्च़म।
दाम्दु छोन्मादोत्ओदा दाम्दु,
नि अ़लुङ्चि छोन्मादोत्ओदा नि अ़लुङ्चि छोरानुम्च़म,
सायामेत्मा दोत्ओचि साया मेत्तानुम्च़म खोन्कि साऩङ्वा मेत्मा दोत्ओचि साऩङ्वा मेत्तानुम्च़म।
लेन च़क्दा युङ्याङ सोमातुक्मुवानिन
८ अ़क्छा निएदा सोम्तुक मुमादाङ्का नि दिदाछाङ नाक्दा मान्छुक्दानिन।
देकिनालो साङ्आ नि म़नाचि सोमातुक्तुचि मोसाआ य़ङ्हुप तासुला।
९ देकिनालो य़ङ्हुप य़ङ्याङ,
“खाना ताङ्लान मान्मुदा,
खाना म़ना मान्सेत्दा,
खाना मान्ख़दा,
खाना च़क्ख़य़ मान्मुदा।”
ओ लोमाय़ङ्चिदा खोन्कि नि ब़द्धे लोमाय़ङ्चि म़याक्याङ,
मो झारासोओ अ़चुमुलोय़ङ्चि ओदाङा थुत्मेत्लोदा म़याक्याङ,
“खाना आम्तेन्पाङ आप्पिवाङा सोमातुक्तु।”
१० सोमाकातुक्आ अ़तेन्पाङ अ़त्लो अ़मुन।
खोन्ओसा य़ङ्हुप्आ सोमातुक्मा तासुला।
११ ग़रि नेक्तातायुङ्सा,
मो खानानिन त़सिन्तुम्योम।
हान आम्नुओ निम्पाङ दुखुप्दाङ्का थिन्मा ग़रि तादिसायुङ्सा,
देकिनालो आन्कान बुया साकोङ्छ़ङ मुम्ओदाङ्का आइमित आन्लेन्मा च़लोक नेक्तातायुङ्सा।
१२ अ़खाखुत खाराचिआ खोन्कि लेन च़क्दा ताचिआ।
खोन्ओसा कुन्यामादाओ काचिचि छिरुम्च़म्कि आन्कान साम्ओ अ़बान्छुबिछु लोउम्ने।
१३ अ़खोलेन्वा आन्कान नुलोक च़न्ने।
ताकावा च़मा,
सेत्चावादा,
ताङ्लान्दा,
लुत्माचामादा,
खिमादा खोन्कि ऩङ्च़दा माआङ।
१४ मेन हाङ्पा येसु ख्रिस्तओ अ़मात्ऩङ त़ङ्तानुम खोन्कि हेवामि च़माथाङ्माओ मित्माचिदा देत्नि सोम्सेत्मान्चिन्ओ अ़तुक्वादा मिन्मा मान्पाक्दानुम।