आप्पिओ निम्पाङ येसुओ अ़चुयामात्मा
१७
ओ य़ङ म़य़ङाचिआकि येसुआ निनाम्मादुत्नि खाङ्याङ्सा म़य़ङा,
“आपो,
ग़रि ताचिआयुङ्सा,
आम्नुओ छाओ अ़ऩङ्लोङ्सानुम,
खोन्कि आम्नुओ छाआ आम्नुओ ऩङ्लोङ्सुने।
२ देकिनालो खानानिन्आ खो त़प़म्ओ झारा म़नाचि खोसाआ अ़लुक्निन्ओ ह़ङ्म़ङ प़चिने निकिना खानानिन्आ खो झारा म़नाचिएदा पाङ त़प़म्युङ्सुम।
३ खानानिन अ़क्छा ओन्ङा ओ अ़नुछ्याओ निनाम्हाङ त़युङिन्येन,
खोन्कि खानानिन्आ येसु ख्रिस्त त़छुत्तुम।
खानानिन खोन्कि खो सिन्मालाम्पा अ़लुक्निन्ओ ह़ङ्म़ङ अ़तोक।
४ खाक्को काचि खानानिन्आ अ़ङ्का मुमा त़प़नि,
मो तासुङ्लोङ्कि हेन्खामादा अ़ङ्का आम्नुओ ऩङ लोङ्सुङ्युङ्सुङ।
५ आपो,
हेन्खामा मुन्मा बुया आन्काचिएदा याआङाओ आन्चुओ साऩङ्वा हान अ़ङ्का लानिप़नि।
काखेङ्पाचिओ निम्पाङ येसुओ अ़चुयामात्मा
६ हेन्खामादाङ्का खाक्को म़नाचि अ़ङ्का त़प़नियुङ्नि,
मोचि अ़ङ्का खानानिन खाङ्मेत्तुङ्युङ्सुङ्च़ङ।
मोचि आम्नुओचि म़मुवाङा,
खोन्किना खानानिन्आ मोचि अ़ङ्का त़प़नि,
खोन्कि मोचि आम्नुओ य़ङ म़काङ्सायुङ्सा।
७ खानानिन्आ अ़ङ्का त़प़निओ झारा य़ङ खानानिन्एदाङ्का ता ओ निकिना मोचिआ हान अ़सिन्याङ।
८ देकिनालो खाक्को य़ङ खानानिन्आ अ़ङ्का त़प़नि,
अ़ङ्का मोचि प़ङ्युङ्सुङ्च़ङ,
खोन्कि मोचिआ मो अ़लोआयुङ्सा।
अ़ङ्का खानानिन्एदाङ्का ताङ्ओ निकिना मोचिआ अ़नुछ्या अ़सिन्तायुङ्सा,
खोन्कि खानानिन्आ अ़ङ्का त़छुत्निओ निकिना मोचि साकोङ्छ़ङ म़मुवायुङ्सा।
९ अ़ङ्का मोचिओ निम्पाङ यामात्ङा,
हेन्खामाओ निम्पाङ अ़ङ्का याअ़मात्ऩङ,
मेन साङ-साङ्चि खानानिन्आ अ़ङ्का त़प़नियुङ्नि,
देकिनालो मोचि आम्नुओचिङा ओ।
१० अ़ङ्काएदा म़युङ्याङ्ओचि आम्नुओचिङा ओ,
खोन्कि खानानिन्एदा म़युङ्याङ्ओचि अ़ङ्कोचिङा ओ।
मोचिलाम्पा अ़ङ्ऩङ लोङ्सायुङ्सा।
११ अ़ङ्का हान हेन्खामादा ब़द्धे अ़युङ्ऩङ,
मेन ओचि ना हेन्खामादा म़युङ।
अ़ङ्का खानानिन्एदा ताङाङा।
त़सेङिन्येन्ओ आपो,
खानानिन्आ त़प़निओ म़नाचि आम्नुओ सावाआ रात्तानुम्च़म,
खोन्कि आन्कान्वात्निङा मोचिछाङ अ़क्तात म़लिने।
१२ देम्खातारि अ़ङ्का मोचिएदा युङाङ,
खानानिन्आ अ़ङ्का त़प़निओ आम्नुओ सावाआ मोचि रात्तुङ्च़ङ।
खोन्किना मोचिएदाओ कालुक्दाङ्का नि खाक्कोछाङ मान्लुक्चि,
खोन्ओसा साम्कालिन तामालामा दोराङा।
१३ मेन हान अ़ङ्का खानानिन्एदा ताङाङा।
हेन्खामादा युङ्ङाङाहिदा ओ य़ङ्चि अ़ङ्का चेप्ङा,
खोन्ओसा अ़ङ्काएदा याक्याङ्ओ अ़ङ्ऩङानुमा मोचिएदा झारा याक्ने।
१४ अ़ङ्का मोचि आम्नुओ य़ङ प़ङ्च़ङ,
खोन्कि हेन्खामाआ मोचि ऩङाछिरुचि,
देकिनालो मोचि हेन्खामादाओचि माआङ,
देत्नि अ़ङ्काछाङ हेन्खामादाओ माआङ।
१५ खानानिन्आ मोचि हेन्खामादाङ्का खात्तानुम्च़म निकिना अ़ङ्का याअ़मात्ऩङ,
मेन मोचि अ़त्सावादाङ्का रात्तानुम्च़म।
१६ देत्नि अ़ङ्का हेन्खामादाओ माआङ,
मोवात्नि मोचिछाङ हेन्खामादाओचि माआङ।
१७ आम्नुओ य़ङ अ़छ़ङ ओ।
आम्नुओ अ़छ़ङ य़ङ्लाम्पा मोचि खानानिन ब़त्सि सेङ्सानुम्च़म।
१८ देत्नि खानानिन्आ अ़ङ्का हेन्खामादा त़छुत्नि,
मोवात्नि अ़ङ्काछाङ मोचि हेन्खामादा छुत्तुङ्योङ्च़ङ।
१९ खानानिन ब़त्सि आम्नुओ अ़छ़ङ य़ङ्आ मोचि सेङ्मा ऱचिने निकिना अ़ङ्का आप्पि मोचिओ निम्पाङ अ़ङ्का हेन्खोक्वावा प़ङ।
झारा साकोङ्छ़ङ कामुचिओ निम्पाङ येसुओ अ़चुयामात्मा
२० अ़ङ्का काखेङ्चिओ निम्पाङ ओन्ङा याअ़मात्ऩङ,
मेन मोचिओ अ़चुनुय़ङ्खान्लाम्पा अ़ङ्काएदा साकोङ्छ़ङ कामुचिओ निम्पाङ्छाङ यामात्ङा,
२१ मोवात्नि मोचि झारा अ़क्तात म़लिने।
आपो,
देत्नि खानानिन अ़ङ्काएदा त़याइन्येन,
खोन्कि अ़ङ्का खानानिन्एदा मोवात्निङा मोचिछाङ आन्काचिएदा म़याक्ने,
खोन्कि खानानिन्आ अ़ङ्का त़छुत्ताङ्ऩङ्ओ निकिना हेन्खामादाओ म़नाचि साकोङ्छ़ङ म़मुने।
२२ खाक्को साऩङ्वा खानानिन्आ अ़ङ्का त़प़नि,
अ़ङ्का मोचि प़ङ्च़ङ,
मोवात्नि आन्काचि अ़क्तात मुचिङ्चिवा मोचिछाङ अ़क्तात म़लिने।
२३ अ़ङ्का मोचिएदा खोन्किना खानानिन अ़ङ्काएदा,
खोन्कि मोचि झारा अ़क्तात म़लिने,
खोन्किना खानानिन्आ अ़ङ्का त़छुत्निओ,
खोन्किना अ़ङ्का सोमा त़तुक्निओवा खानानिन्आ मोचिछाङ सोमात़तुक्तुम्च़म्ओ हेन्खामाआ मो सिन्तुने।
२४ आपो,
अ़ङ्का मिन्ङाङा,
खानानिन्आ अ़ङ्का त़प़निओचि अ़ङ्का खादा युङ्ङा,
अ़ङ्काएनान म़युङ्ने,
खोन्कि अ़ङ्साऩङ्वा अ़खाङ्ने,
मो साऩङ्वा,
हेन्खामा मुन्मा बुयाङा अ़ङ्का सोमात़तुक्निओसा खानानिन्आ अ़ङ्का त़प़निओ।
२५ साम्योक्मि आपो,
हेन्खामादाओ म़नाचिआ खानानिन ऩसिन्तिमिन,
मेन अ़ङ्का खानानिन सिन्नानिन,
खोन्कि खानानिन्आ अ़ङ्का त़छुत्निओ ओ काखेङ्पाचिआ अ़सिन।
२६ अ़ङ्का खानानिन मोचिएदा खाङ्मुनायुङ्नानिन,
खोन्कि अ़ङ्का अ़धुन ओवात्नि च़ङायुङ्ङा,
मोवात्नि मो सोमातुक्माआ अ़ङ्का खानानिन्आ सोमात़तुक्नियुङ्नि,
मो मोचिएदा याक्ने,
खोन्कि अ़ङ्का मोचिएदा याक्ङाने।”