युहन्‍ना 13

येसुआ अ़चुकाखेङ्‌पाचिओ अ़चुलाङ्‌थेम वाम़स़त्‍तुप़चिओ

काक्‍माखात्‍मा चानुचाओ बुया, ओ हेन्‍खामा छित्‍मादामाकि पापा निनाम्‍हाङ्‌एदु खात्‍मा खोक्‍कोसोओ अ़चुग़रि तादिसायुङ्‌सानि येसुआ अ़सिन्‍ता। खोन्‍कि ओ हेन्‍खामादाओ अ़चुकाखेङ्‌चि अ़धुन सोमाम़तुक्‍तुचि, खोन्‍कि खोक्‍कोसाआ झारा अ़चुसोम्‍तुक्‍माआ मोचि सोमाम़तुक्‍तुचि।

२ खोन्‍कि अ़नाम्‍प़क्‌ओ चा-चामा ग़रि दियाबलस्‌आ सिमोन्‌ओ अ़छा यहुदा इस्‍करियोत्‌ओ अ़मिन्‍मादा येसु धान्‍मा मिन्‍मा बुयाङा पाक्‍तुप़युङ्‌सु। ३ निनाम्‍हाङ पापाआ झारा सामा खोक्‍कोसोओ अ़चुछुक्‌दा अ़पुवाओ खोन्‍कि खोक्‍को निनाम्‍हाङ्‌लाम्‍पा म़ताओ खोन्‍कि निनाम्‍हाङ्‌एदा म़खात्‌याङ्‌नि येसुआ अ़सिन्‍ताङा। ४ खोन्‍किना खोक्‍को चा-चाखादाङ्‌का म़पुवालोन्‍ताकि अ़दुङ्‌दाओ अ़चुतित अ़हुराकि अ़क्‌तात मुन्‍जेत अ़चुछुमाय़क्‌दा अ़रिप्‍ता। ५ खोन्‍किना खोक्‍कोसाआ खुङ्‌दा चाक्‌वा अ़लेन्‍ताकिना अ़चुकाखेङ्‌पाचिओ अ़चुलाङ्‌थेम वास़मा अ़पुङ्‌सा, खोन्‍कि अ़चुछुमाय़क्‌दा अ़रिप्‍ताओ मुन्‍जेत्‌आ मोचिओ अ़चुलाङ्‌थेम त़क्‍मा अ़पुङ्‌सा। ६ खोक्‍को सिमोन पत्रुस्‌एदा म़ता, मोसाआ येसु लो, “हाङ्‌पो, दि खानानिन्‌आ अ़ङ्‌लाङ्‌थेम वात़स़म ओ?”

७ येसुआ मो अ़लासालोवा, “अ़ङ्‌का दे च़ङाङा खाना ओन्‍ग़रि त़सिन्‍तुन, मेन माय़ङ त़तुप्‍तु।”

८ पत्रुस्‌आ खोक्‍को लो, “खानानिन्‌आ अ़ङ्‌लाङ्‌थेम देम्‍खाछाङ वास़मा अ़नुनिन।”

येसुआ मो अ़लासालोवा, “अ़ङ्‌का आम्‍लाङ्‌थेम वाअ़स़त्‍नान्‍प़नान्‌नालो अ़ङ्‌काएदा आम्‍को दित्‍छाङ काचि अ़याक्‍निन।”

९ सिमोन पत्रुस्‌आ खोक्‍को लो, “हाङ्‌पो, खोन्‍नालो ना अ़ङ्‌लाङ्‌थेम ओन्‍ङा माआङ, अ़ङ्‌छुक खोन्‍कि अ़ङ्‌ताङ्‌छाङ वास़त्‍ताङ्‌पुवाङ्‌ऩङ!”

१० येसुआ मो अ़लासालोवा, “वाचाआचिआओ म़नाओ अ़लाङ्‌थेम्‌दाङ्‌का नि दित्‍छाङ वास़मा अ़दोत्‍निन। मो झारा सेङ्‌याङ। खोन्‍कि खानानिन त़सेङिन्‌येन, मेन खानानिन झारा ना माआङ।” ११ देकिनालो साङ्‌आ खोक्‍को धान्‍मा मुङु, मो खोक्‍कोसाआ अ़सिन्‍ताङा। खोन्‌ओसा खोक्‍कोसाआ म़लोचि ओ, “खानानिन्‌एदा अ़क्‍छादाङ्‌का झारा त़सेङिन्‌येन।”

१२ मोचिओ अ़चुलाङ्‌थेम वाम़स़त्‍तुचिउचिकि खोक्‍कोसाआ अ़चुतित अ़लासाहुम्‍सा, खोन्‍कि म़युङा। खोन्‍कि खोक्‍कोसाआ मोचि म़सेनुचि, “दि खानानिन त़तुप्‍तुम्‌योम, आम्‍नुओ निम्‍पाङ अ़ङ्‌का दि मुङ? १३ खानानिन्‌आ अ़ङ्‌का ‘काचिन्‍पो’ खोन्‍कि ‘हाङ्‌पो’नि त़लोङाङाऩङ, मो खानानिन तोङ्‌लो त़य़ङिन्‌येन। देकिनालो अ़ङ्‌का खोक्‍कोङा ओ। १४ अ़ङ्‌का आम्‍नुओ हाङ्‌पा खोन्‍कि आम्‍नुओ काचिन्‍पा लिसाङ्‌किछाङ अ़ङ्‌का आम्‍नुओ लाङ्‌थेम वास़ङ्‌नालो खानानिन्‌आछाङ मोवात्‍नि अ़क्‍छा निएदा आम्‍नुओ लाङ्‌थेम वास़त्‍प़मुमादोत। १५ अ़ङ्‌का खानानिन अ़क्‌तात अ़मात्‍ऩङ खाङ्‌मेत्‍नायुङ्‌नानिन, खोन्‍कि अ़ङ्‌का देत्‍नि आम्‍नुओ निम्‍पाङ चुवाङ, खानानिन्‌छाङ मोवात्‍निङा चुवानिन। १६ अ़नुछ्‍याङा अ़ङ्‌का खानानिन लोनानिन, हारुक अ़हाङ्‌पाएदाङ्‌का तोक्‍पो अ़लिनिन, खोन्‍कि य़ङ्‌खान काखात य़ङ्‌खान काखान्‌दाङ्‌का तोक्‍पो अ़लिनिन। १७ खानानिन ओ य़ङ्‌चि त़तुप्‍तुम्‍च़म। हान मो त़मुम्‍च़म्‌नालो खानानिन आसिखा त़तोक्‍तुम।

खोक्‍कोसोओ अ़चुलाप्‍खावाओ अ़तुक्‌वादा खालुमाय़ङ

मत्‍ति २६:२०-२५; मर्कुस १४:१७-२१; लुका २२:२१-२३

१८ अ़ङ्‌का खानानिन झारासोओ आम्‍नुओ तुक्‌वादा य़ङ्‌ङाङाओ माआङ। अ़ङ्‌का साङ छेन्‍तुङ्‌युङ्‌सुङ, मो अ़ङ्‌का सिन्‍तुङ। मेन ‘अ़ङ्‌काएनान अ़क्‍नि पेम्‍पाक काचा अ़ङ्‌देङ्‌सालाप्‍पादा पुवालोन्‍ता’नि साम्‍कालिन्‌दा छाप्‍ताओ य़ङ तालाने निम्‍पाङ ओवात्‍नि लिसा। १९ ओ लिमा बुया ओन्‍ग़रि अ़ङ्‌का खानानिन लोनानिन, खोन्‍किना देम्‍खा मो लि, अ़ङ्‌का खोक्‍कोङा ओ निकिना खानानिन साकोङ्‌छ़ङ त़मुन्‍ने। २० अ़नुछ्‍याङा अ़ङ्‌का खानानिन लोनानिन, साङ अ़ङ्‌का छुत्‍तुङ, खो कालोक्‌आ अ़ङ्‌का अ़लोक्‍ङा, खोन्‍कि अ़ङ्‌का कालोक्‌आ अ़ङ्‌का काछुत्‍पा लोउ।”

२१ ओ य़ङ म़य़ङाचिआकि येसुओ चाअ़त्‍लो अ़चुदुखाखारा, खोन्‍कि खोक्‍कोसाआ सालुम्‍स़ङ म़प़चि, “अ़नुछ्‍या अ़ङ्‌का खानानिन लोनानिन, खानानिन्‌एदाओ अ़क्‍छाआ अ़ङ्‌का अ़धान्‍ङा।”

२२ खोक्‍कोसाआ साङ्‌को अ़तुक्‌वादा म़य़ङ्‌याङ्‌ओ निकिना मान्‍सिन्‌अ़दाओसा काखेङ्‌पाचि अ़क्‍छा निएदा चोप्‍का-चोप म़मुवा। २३ खोक्‍कोसोओ अ़चुकाखेङ्‌पाचिएदाओ येसुआ सोमाअ़तुक्‍ताओ अ़चुकाखेङ्‌पा खोक्‍कोसोओ अ़चुकोङ्‌कोम्‌दा नालान्‍चिन्‌कि युङाङा। २४ खोन्‍कि सिमोन पत्रुस्‌आ छुक्‌चालाआ मो सेनु, “खोक्‍को साङ्‌को अ़तुक्‌वादा म़चेप्‌याङ ओ?”

२५ खोन्‍किना येसुओ अ़चुकोङ्‌कोम च़क्‌दा मेङ्‌नान्‍चिन्‍सा मोसाआ खोक्‍को सेनु, “हाङ्‌पो, मो साङ ओ?”

२६ येसुआ अ़लासालोवा, “साङ अ़ङ्‌का पेम्‍पाक्‌ओ अ़धाङ लुप्‍तुङ्‌कि प़ङ, मोङा ओ।” खोन्‍कि खोक्‍कोसाआ पेम्‍पाक्‌ओ अ़धाङ अ़लुम्‍ता, खोन्‍कि मो सिमोन्‌ओ अ़छा यहुदा इस्‍करियोत अ़पुवा। २७ पेम्‍पाक्‌ओ अ़धाङ चोचिउङुवा सैताना मो हुत्‌दा वाङा।

खोन्‍कि येसुआ मो अ़लोवा, “खाना दे च़मा त़लाम्‌याङ, मो च़क्‍नि मु।” २८ मेन येसुआ देकि मो ओवात्‍नि अ़लोवा निकिना चा-चासि म़युङाओ नि काखेङ्‌पाचिएदाओ साङ्‌आछाङ मान्‍तुप्‌अ़दा। २९ खा-खाक्‍कोसाआ ओवात्‍नि अ़मित्‍ता, यहुदादा अ़फेक्‌वाओ बेखा युङ्‌याङ, खोन्‌ओसा येसुआ खो चानुचाओ निम्‍पाङ दोत्‌ओ सामा खित्‍ने माङ्‌लो मोसाआ मान्‍तोक्‍कादाचि दिदि प़चिनेनि अ़लोवाओ। ३० खोन्‍किना पेम्‍पाक चोकि यहुदा इस्‍करियोत मोन्‍ग़रिङा बुङ्‌खाह्‍यात्‍नि लोन्‍ताखारा। खोन्‍कि मोन्‍ग़रि खाखुत्‍तायुङ्‌सा।

पत्रुस्‌आ ऩङाछिरुओ येसुआ खालुसु

मत्‍ति २६:३१-३५; मर्कुस १४:२७-३१; लुका २२:३१-३४

३१ मो बुङ्‌खाह्‍यात्‍नि लोन्‍ताखाराकिना येसु म़य़ङा, “हान म़नाओ अ़छाआ अ़साऩङ्‌वा तोक्‍तु, खोन्‍कि खोलाम्‍पा निनाम्‍हाङ्‌आछाङ अ़चुसाऩङ्‌वा अ़तोक। ३२ म़नाओ अ़छालाम्‍पा निनाम्‍हाङ अ़चुसाऩङ्‌वा अ़तोक्‌नालो निनाम्‍हाङ आप्‍पिआ म़नाओ अ़छाओ अ़चुसाऩङ्‌वा म़प़चि, खोन्‍कि खोक्‍कोसाआ च़क्‍निङा अ़चुसाऩङ्‌वा म़प़चि। ३३ अ़चुप्‍पो छाचिओ, अ़क्‌ग़रि अ़ङ्‌का खानानिन्‌एनान युङ्‌ङा! खानानिन्‌आ अ़ङ्‌का त़लाम्‍ङाऩङ, खोन्‍कि देत्‍नि अ़ङ्‌का यहुदि बुसुवाचि लोङ्‌च़ङ, हान खानानिन्‌छाङ अ़ङ्‌का लोनानिन, ‘खादा अ़ङ्‌का खात्‍ङाङा, खानानिन तामा त़ऱन्‍मिन।’

३४ अ़क्‌तात अ़ऩङ्‌वा लोमाय़ङ अ़ङ्‌का खानानिन प़नानिन: खानानिन अ़क्‍छा निएदा सोमातुक्‍कातुक मुवानिन। खानानिन अ़ङ्‌का देत्‍नि सोमातुक्‍नानिन, खानानिन्‌आछाङ अ़क्‍छा निएदा मोवात्‍निङा सोमातुक्‍कातुक मुवानिन। ३५ खानानिन्‌आ अ़क्‍छा निएदा सोमातुक्‍कातुक त़मुन्‌नालो ओवात्‍नि झारा म़नाचिआ खानानिन अ़ङ्‌काखेङ्‌पाचिओनि अ़सिन।”

३६ सिमोन पत्रुस्‌आ खोक्‍को अ़सेना, “हाङ्‌पो, खानानिन खात्‍नि त़खारिन्‌येन?”

येसुआ अ़लासालोवा, “अ़ङ्‌का खादा खात्‍ङाङा, खाना ओन्‍ग़रि अ़ङ्‌का त़ङ्‌मा त़ऱऩङ, मेन माय़ङ ना खाना अ़ङ्‌का त़त़ङ्‌ङा।”

३७ पत्रुस्‌आ येसु लासुलो, “हाङ्‌पो, अ़ङ्‌का देकिना ओन्‍ग़रि खानानिन त़ङ्‌मा अ़ऱनान्‍निमिन ओ? आम्‍नुओ निम्‍पाङ अ़ङ्‌का स़मा ऱङा।”

३८ खोन्‍किना येसुआ अ़लोवा, “दि खाना अ़ङ्‌को निम्‍पाङ स़मा त़ऱ कि? अ़नुछ्‍या अ़ङ्‌का खाना लोना, वापापा ओक्‍मा बुया खाना अ़ङ्‌का सुम्‌कादु ऩङात़छित्‍ङा।”