बेथानियादा येसु
१२
काक्माखात्मा चानुचाओ छकालेन बुया येसु बेथानियादा म़ता।
मो तेन्दा लाजरस युङाङा,
मो येसुआ सुवादाओदाङ्का अ़ह़ङ्सालोइसायुङ्साओ।
२ येसुओ निम्पाङ मो तेन्दा अ़नाम्प़क्ओ अ़धिवा चा म़कुक्ता।
मार्थाआ ब़रुचि,
खोन्किना लाजरस येसुएनान चासि म़नालान्चिन््कि कायुङ्चिएदाओ अ़क्छा याआङा।
३ खोन्किना मरियम्आ अ़दाक्वा लितरालेका अ़लुङ्छ़साङाओ जतामसिओ नाम्नुवाङाओ सुङ तारुकि येसुओ अ़चुलाङ्थेम्दा थोक्तु,
खोन्कि खोक्कोसोओ अ़चुलाङ अ़ताङ्मुवाआ त़उकि नाम्नुवाङाओ सुङ्आ खिम थ़क्तुखात्तु।
४ मेन खोक्कोसोओ अ़चुकाखेङ्पाचिएदाओ अ़क्छा,
खोक्को लाप्माकालाम यहुदा इस्करियोत्आ लो,
५ “दि ओ नाम्नुओ सुङ सुम्कासये रुपाओ फेक्वादा इनाकि मो फेक्वा मान्तोक्कादाचि म़पुवाओदे मान्नुयाङ्ओ कि?”
६ मेन मोसाआ मान्तोक्कादाचि मित्तुचिकि ओवात्नि य़ङाओ माआङ।
देकिनालो मो काख़पा ओ,
खोन्कि फेक्वाओ बेखा मोसाआङा युङ्सुङु,
खोन्कि मोदा याआङाओ आप्पिओ निम्पाङ याङुङु।
७ येसुआ म़लोचि,
“मो देत्छाङ मान्लोदानुम!
ओसाआ अ़ङ्पोक खुम्माओ निम्पाङ चुम्सुङुओ।
८ मान्तोक्कादाचि ना खानानिन्एनान अ़धुन म़युङ्युङ,
मेन अ़ङ्का ना खानानिन्एनान अ़धुन अ़युङ्ऩङ।”
९ यहुदिचिओ अ़धिवो मुक्लाआ खोक्को मोदा म़युङ्याङ निकिना अ़सिन्ता,
खोन्कि येसु खाङ्सि ओन्ङा माआङ,
मेन खोक्कोसाआ सुवादाओदाङ्का अ़ह़ङ्साओ लाजरस्छाङ चोप्सि मोचि म़तायुङ्सा।
१० मुलो काब़क्पाचिआ लाजरस्छाङ सेत्मा निकिना याम़योआ।
११ देकिनालो खोसोओ अ़तुक्वाआङा यहुदिचिएदाओ ब़द्धेकापाङ्आ म़छिरुदोचिकि येसुएदा साकोङ्छ़ङ म़मुवाङा।
यरुसलेम्दा येसु म़वाङाओ
१२ अ़माङ्कोलेन चानुचादा काता अ़धिवो म़ना मुक्लाचिआ येसु यरुसलेम्दा म़तायाङ निकिना अ़एना।
१३ खोन्किना मोचिआ खजुराताङ्ओ अ़खेक्चि अ़खात्ताकि खोक्को साऩङ्वा मेत्सि पात्याङ्सा म़लोन्ता,
“होसन्नाba!
खोक्को निनाम्हाङ्आ आसिखा अ़प़ने,
साङ हाङ्पा निनाम्हाङ्ओ अ़चुऩङ्दा म़ता!c
खोक्को इस्राएलिचिओ अ़चुहाङ ओ!”
१४ खोन्किना गधाओ अ़क्तात अ़छा अ़धिरा खोन्कि येसु मोसोओ अ़दुङ्दा म़युङा।
ओसोओ अ़तुक्वादा ओवात्नि छाप्याङ,
१५ “मान्क़दानिन,
सियोन्दाओ म़नाचि ओ।d
खानुम,
आम्नुओ हाङ गधाओ अ़क्तात अ़छादा म़वाङ्कि म़तायाङ।”e
१६ ओ य़ङ्चिओ अ़तुप्य़ङ खोक्कोसोओ अ़चुकाखेङ्पाचिआ बुया मान्तुप्अ़दा।
मेन निनाम्हाङ्आ येसु साऩङ्वा अ़मेत्ताचिआकि ओन्ङा ओ य़ङ खोक्कोसोओ अ़चुतुक्वादा छाप्ताओ खोन्कि ओ काचि खोक्कोसोओ निम्पाङ मोचि आप्पिआ अ़मुवाओ निकिना अ़सिन्ता।
१७ खोक्कोसाआ लाजरस एप्मादाङ्का अ़बुत्ताकि सुवादाओदाङ्का अ़ह़ङ्सालोइसाहिदा खोक्कोएनान अ़क्नि कायुङ मुक्लादाओ म़नाचिआ खोक्कोसोओ अ़चुसालुम्स़ङ अ़पुवा।
१८ खोक्कोसाआ ओ म़दोम्दाओ बुन अ़मुवाओ अ़एनाओसाछाङ म़ना मुक्लाचि खोक्को तुप्सि म़ताओ।
१९ खोन्किना फरिसिचि अ़क्छा निएदा य़ङ्मा अ़पुक्ता,
“खानुम,
आन्कान्एदाङ्का दित्छाङ लिमा अ़ऱनिन।
खा-खानुम,
झारासाआ खोक्को त़ङ्मा अ़पुङ्सा!”
अ़चुस़माओ अ़तुक्वादा येसुआ खाअ़लुसाओ
२० चानुचादा निनाम्हाङ ब़क्सि काखात्चिएदाओ खा-खाक्कोचि ग्रिक य़ङ काचेप्चिछाङ म़याआङा।
२१ मोचि गालिल्ओ बेथसेदादा कायुङ फिलिप्एदा म़ताकि अ़लोवा,
“काचिन्पो,
आन्कान्का येसु तुप्मा स़न्येन्का।”
२२ फिलिप खाराकि अन्द्रियास लो,
खोन्कि अन्द्रियास खोन्कि फिलिप खाराचिकि येसु अ़लोवाचु।
२३ येसुआ म़लासुलोचि,
“म़नाओ अ़छाओ अ़साऩङ्वा तोक्मा ग़रि तायुङ्सा।
२४ अ़नुछ्याङा अ़ङ्का खानानिन लोनानिन,
छुमाचाओ अ़ल़वा बाखादा धाकि अ़स़निन्नालो मो अ़क्बोप ओन्ङा लि।
मेन मो स़नालो मोसाआ ब़द्धे अ़सिवा सिसु।
२५ आप्पि अ़ह़ङ्म़ङ सोमाकातुक्आ मो मासु,
मेन आप्पि अ़ह़ङ्म़ङ ओ हेन्खामादा ऩङाकाछित्आ अ़धुन्तारिओ अ़नुछ्याओ ह़ङ्म़ङ रात्तु।
२६ साङ अ़ङ्का ब़त्मास़नालो मोसाआ अ़ङ्का अ़त़ङ्ङाने,
खोन्कि अ़ङ्का खादा युङ्ङा,
अ़ङ्का काब़त्छाङ मोदाङा युङ।
साङ्आ अ़ङ्का अ़ब़त्ङा,
अ़ङ्पापाआ मो साया अ़मेत।
२७ हान अ़ङ्साकोङ्वा दुखादा छुक्तायुङ्सा,
खोन्कि अ़ङ्का देत्नि य़ङ्मा?
‘आपो,
अ़ङ्का ओ दुखादाङ्का लेन्नि’?
मेन ओ दुखा तोक्माओ निम्पाङ्ङा अ़ङ्का ताङ्ओ।
२८ आपो,
आम्नुओ ऩङ लोङ्सानुम!”
खोन्किना निनाम्मादुङ्का अ़क्तात य़ङ ता,
“अ़ङ्का आप्पि लोङ्साङ्युङ्साङ्च़ङ,
खोन्कि हान्छाङ लाङालोङ्ङान्च़ङ।”
२९ मोदा काएप म़ना मुक्लाचिआ ओ अ़एनाकि म़य़ङा,
“ओ कुलुङ्धिप्पा मुक्तुङु ओ!”
निचि म़य़ङा “निनाम्हाङ काफा खोक्कोएनान म़चेवाओ।”
३० येसुआ म़लासुलोचि,
“ओ य़ङ अ़ङ्को निम्पाङ ताओ माआङ,
मेन आम्नुओ निम्पाङ ओ।
३१ हान ओ हेन्खामाओ अ़छ़ङ छेन।
ओ हेन्खामादा हाङ काचि कामु सैताना बुङ्खाया लोन्खान।
३२ खोन्कि अ़ङ्का हेन्खामादाङ्का ऩथेन्ङाकिना अ़ङ्का झारा म़नाचि अ़ङ्काएदात्नि सारुङ्च़ङ।”
३३ खोक्कोसोओ अ़चुस़मा देत्नि लिओ,
मो खाङ्मुमा निम्पाङ खोक्को ओवात्नि म़य़ङा।
३४ म़ना मुक्लाचिआ खोक्को अ़लासालोवा,
“ख्रिस्त अ़धुन म़युङ्ओ य़ङ आन्कान्का य़ङ्हुप्दाङ्का एनुम्युङ्सुम्का।
खानानिन देत्नि य़ङ्मा त़ऱन,
‘म़नाओ अ़छा थेन्मादोत’?
ओ म़नाओ अ़छा साङ ओ?”
३५ येसुआ मोचि म़लासुलोचि,
“हान्छाङ अ़क्चित्तारि साम खानानिन्एदा युङ।
साम खानानिन्एदा युङ्याङ्तारि कोलानिन,
खोन्ओसा कुइयामाआ खानानिन त़भुक्तिमिन्ने।
साङ कुइयामादा कोन,
मोसाआ खो खादात्नि खात्ओ अ़सिन्तुन।
३६ देम्खातारि साम खानानिन्एदा युङ,
साम्दा साकोङ्छ़ङ मुवानिन,
खोन्कि खानानिन साम खाङ्कामेत त़लिसिन।”
ओ म़य़ङाचिआकि,
येसु मोदाङ्का म़खारा,
खोन्कि मोचिएदाङ्का म़कुमा।
३७ खोक्कोसाआ मोचिओ अ़चुबुदा ब़द्धे म़दोम्दाओ बुन्चि म़मुचिनुछाङ मोचिआ खोक्कोएदा साकोङ्छ़ङ मान्मुचि।
३८ खोन्ओसा निनाम्हाङ्य़ङ खाकालु यसैयाओ अ़य़ङ तामालामा दोराङा,
“हाङ्पा निनाम्हाङ,
आन्य़ङ्खान साङ्आ साकोङ्छ़ङ मुयुङ्सु कि?
खोन्कि हाङ्पा निनाम्हाङ्ओ अ़चुसावा साङ्आ खाकिना?”f
३९ मोचि साकोङ्छ़ङ मुमा मान्ऱचि।
देकिनालो यसैया ओवात्नि लासाय़ङा,
४० “खोक्कोसाआ मोचिओ अ़चुम़क्चि दोप्म़क म़मेत्तुप़युङ्सुचि,
खोन्कि मोचिओ अ़चुसाकोङ्वाचि छाक्लो म़मेत्तुप़युङ्सुचि।
ओवात्नि मोचिआ अ़चुम़क्चिआ ऩखान्ने,
खोन्कि अ़चुसाकोङ्वाचिआ ऩतुप्तुन्ने,
खोन्कि मोचि नुमाचिओ निम्पाङ अ़ङ्काएदा ऩलानिन्नेनि निनाम्हाङ म़य़ङ्याङ।”g
४१ यसैयाआ ओ य़ङ खालुसु,
देकिनालो खोसाआ येसु देम तोक्पो लि निकिना खा,
खोन्कि खोक्कोसोओ अ़चुतुक्वादा चेवा।
४२ खोन्नुछाङ ब़द्धे यहुदि बुसुवाचिआ खोक्कोएदा साकोङ्छ़ङ म़मुवा,
मेन फरिसिचिएदाङ्का म़क़साकि मोचिआ यावायोक्खिम्दाङ्का म़लोन्खान निकिना अ़चुक़माआ मो साङ्छाङ खामान्एत्अ़दा।
४३ देकिनालो निनाम्हाङ्आ प़माय़ङ सायादाङ्का म़नाचिआ प़माय़ङ साया तोक्मा मोचिओ च़लोक अ़चुऩङा नुवाङा।
४४ खोन्किना येसुआ अ़धिवा य़ङ्आ म़लोचि,
“अ़ङ्का साकोङ्छ़ङ कामुआ अ़ङ्काएदा ओन्ङा माआङ,
मेन अ़ङ्का काछुत्एदाछाङ साकोङ्छ़ङ मु।
४५ साङ्आ अ़ङ्का अ़खाङ्ङा,
मोसाआ अ़ङ्का काछुत खा।
४६ अ़ङ्का हेन्खामादा साम्वात्नि ताङ्युङ्साङ,
खोन्ओसा अ़ङ्काएदा साकोङ्छ़ङ कामु कुइयामादा अ़युङ्निन्ने।
४७ साङ्आ अ़ङ्य़ङ एनु,
खोन्कि मोवात्नि अ़च़निन,
अ़ङ्का मोसोओ अ़छ़ङ अ़छेन्ऩङ।
देकिनालो अ़ङ्का हेन्खामाओ अ़छ़ङ छेइसि ताङ्ओ माआङ,
मेन हेन्खामा लेइसि ताङ्ओ।
४८ अ़ङ्का ऩङाकाछित खोन्कि अ़ङ्य़ङ मान्लोक्कादाओ निम्पाङ अ़क्छा छ़ङ्काछेन म़युङ्याङ।
खाक्को य़ङ अ़ङ्का चेउङ मो य़ङ्आङा आदेङ्ओ लेन्दा मोसोओ अ़छ़ङ छेन्तु।
४९ देकिनालो अ़ङ्का अ़ङ्आप्पिओ पाङ्दाङ्का मान्चेप्ङा,
मेन अ़ङ्का दे य़ङ्मादोत्ओ खोन्कि दि चेप्मादोत्ओ,
अ़ङ्का काछुत पापा निनाम्हाङ्आ अ़ङ्का ऩलोवाङ्युङ्साङ।
५० अ़ङ्का सिन्तुङ्योङ,
खोक्कोसोओ अ़चुलोमाय़ङ्आ अ़लुक्निन्ओ ह़ङ्म़ङ्दा म़तित।
खोन्ओसा अ़ङ्का दि चेउङ,
पापा निनाम्हाङ्आ अ़ङ्का ऩलोङाओ ओन्ङा चेप्ङा।”