रिदुम्पादुम्ओ अ़तुक्वादा
७
आदेङ थोरेत्कापाङ फरिसिचि खोन्कि य़ङ्हुप काचिन्पाचि यरुसलेम्दाङ्का म़ता,
खोन्कि येसुओ अ़चुऱङ्कोप्नि म़कोवान्चिन।
२ खोन्कि खा-खाक्को येसुओ अ़चुकाखेङ्पाचिआ मान्सेङ्याङ्ओ माङ्लो अ़चुछुक वामान्स़माङ चा म़चाङाओ मोचिआ म़खाचि।
३ देकिनालो फरिसिचि खोन्कि झारा यहुदिचि अ़चुसुन्तुम्चिदाङ्का अ़मुवाताराओ अ़चुच़माथाङ्मावा मोचि अ़चुछुक वामान्स़माङ चा ऩचानिन।
४ खोन्कि बजारादाङ्का म़ताकि मोचि मान्सेङ्मान्चिन्तारि दित्छाङ ऩचान्चिन।
मोन्ओन्ङा माआङ,
मोचिआ नि ब़द्धे च़माथाङ्माचिछाङ म़मुचि,
मोवात्निङा लाङ्चोक्खुङ्चि,
भागुनाचि खोन्कि कासाओ खुङ्चि वामान्स़माङ मान्याङ्म़दोङुचि।
५ खोन्किना फरिसिचि खोन्कि अ़य़ङ्हुप काचिन्पाचिआ येसु अ़सेना,
“देकि आम्नुओ काखेङ्पाचिआ आन्सुन्तुम्चिआ अ़मुवाताराओ अ़चुथाप्स़ङ्वा ऩच़निनिन,
मेन अ़सेङ्निनिन्ओ अ़चुछुक्आ चा म़चा?”
६ येसुआ मोचि म़लोचि,
“निनाम्हाङ्य़ङ खाकालु यसैया तोङालो खानानिन कोङ्क़त्वाचिओ अ़तुक्वादा निनाम्हाङ्य़ङ खालुवायुङ्सा,
खोसाआ छाप्तुयुङ्सु,
‘ओ म़नाचिआ अ़चुदोसिवाआ ओन्ङा अ़ङ्का साया ऩमेत्ङा,
मेन मोचिओ अ़चुसाकोङ्वा अ़ङ्कादाङ्का अ़थाया युङ्याङ।
७ मोचिआ सोज्जे अ़ङ्का ऩब़क्ङा,
मेन मोचिओ अ़चुचिन्मा म़नाचिआ म़चिन्तुचिओ अ़चुय़ङ्हुप ओन्ङा ओ।’
८ खानानिन्आ निनाम्हाङ्ओ अ़चुलोमाय़ङ त़छिरुम,
खोन्कि म़नाचिओ अ़चुच़माथाङ्माचि त़मुम्योम्च़म।”
९ खोन्किना येसुआ मोचि म़लोचि,
“आम्नुओ च़माथाङ्माचि मुमाचि निकिना खानानिन निनाम्हाङ्ओ अ़चुलोमाय़ङ्चि मान्काङ्त़दान।
१० देकिनालो निनाम्हाङ्य़ङ खाकालु मोसा य़ङायुङ्सा ‘आम्नुओ पापा खोन्कि मामाचि साया मेत्तानुम्च़म,
खोन्कि साङ अ़पा माङ्लो अ़माओ अ़देङ्सालाप्पादा अ़त्लो चेप,
मो सेत्माङादोत।’a
११ मेन खानानिन त़य़ङिन,
खाक्को म़नाआ अ़पा माङ्लो अ़मा लो,
‘खानानिन्आ अ़ङ्काएदाङ्का त़तोक्तुम्ओ ना कुर्बान ओ’नि (माङ्लो मो निनाम्हाङ प़माय़ङ साम्द़ङ ओ) लोचिनालो,
१२ मोसाआ अ़पापा-मामाचि फामा अ़दोत्निन निकिना त़चिन्तुम्च़म।
१३ ओवात्नि निनाम्हाङ्ओ अ़चुय़ङ त़छिरुम्कि खानानिन्आ त़तोक्तुम्ओ आम्नुओ थाप्स़ङ्चि खोन्कि नि ब़द्धे ओवाको य़ङ्चि खानानिन त़मुम्च़म।”
म़ना कापोप य़ङ्चि
१४ खोन्किना येसुआ म़ना मुक्लाचि खोक्कोएदा म़बुत्तुचि खोन्कि मोचि म़लोचि,
“खानानिन झारासा नुलोक अ़ङ्य़ङ एनानुम,
खोन्कि तुप्तानुम।
१५ म़नाआ चाओ खाक्कोछाङ चामायु खो हुत्या वाङ्कि अ़पोप्तुन,
मेन,
अ़साकोङ्वाहुत्याङ्का बुङ्खादा लोन,
मो य़ङ्आ खो पोप्तु।
१६ [साङ्को अ़एन्खा नाबाक याक्याङ,
मोसाआ एनुने!”]
१७ येसुआ म़ना मुक्लाचि म़छिरुदोचिकिना खिम्हुत्दा म़वाङा,
खोन्कि अ़चुकाखेङ्चिआ खोक्को मो दोय़ङ्लाओ अ़तुक्वादा अ़सेना।
१८ खोन्कि येसुआ मोचि म़सेनुचि,
“दि खानानिन्आ मान्तुप्त़युक्तुम?
दि म़नाओ अ़कोङ्हुत्या वाङ मोसाआ पोप्मा अ़ऱन निकिना खानानिन त़सिन्तिमिन्येन?
१९ देकिनालो चामायु साकोङ्वादा अ़वाङ्निन,
मेन मो बुक्हुत्दा वाङ्किना पोक्दाङ्का बुङ्खाया लोन्खात।”
(ओवात्नि य़ङ्याङ्सा,
“झारा चामायुचि म़सेङ्याङ”नि येसु म़य़ङा।)
२० खोन्कि येसुआ म़लोचि,
“म़नाओ अ़साकोङ्वाहुत्दाङ्का दि लोन,
मो य़ङ्चिआ मो म़ना पोप्तु।
२१ देकिनालो म़नाओ अ़साकोङ्वाहुत्याङ्काङा अ़अ़त्पा मित्माचि,
म़ना सेत्मा,
ताङ्लान,
चान्माचामा,
ख़मा,
२२ च़क्ख़य़,
अ़त्लो काचि,
म़प्मा,
चान्माचामा,
ऩङ्च़,
सुङ्मा,
ऱक्भाक खोन्कि खामान्सिन य़ङ्चि म़लोन।
२३ ओ झारा अ़त्लो य़ङ्चि साकोङ्वाहुत्दाङ्का म़लोन,
खोन्कि मो य़ङ्चिआ म़नाचि पोप्तुचि।”
निरावा मेत्छामाओ अ़साकोङ्छ़ङ
२४ खोन्किना येसुआ गालिल अ़छिरादाकि तुरोस खोन्कि सिदोन धिखाहुप म़खारा।
साङ्आछाङ ऩसिन्तुन्नेनि म़मिनाकि खोक्को अ़क्तात खिम्दा म़वाङा,
खोन्नुछाङ खोक्को कुम्मा मान्ऱ।
२५ मेन मोन्ग़रिङा अ़क्छा पोप्ताओ लावाआ लाउओ मेत्छाछा छाओ अ़माआ येसुओ अ़तुक्वादा एनु,
खोन्कि खोक्कोएदा ताकि खोक्कोसोओ अ़चुलाङ्दा बोम्सान्चिन।
२६ मो सिरियाओ फोनिके धिखाहुप्दाङा पुक्तान्चिन्ओ अ़क्छा ग्रिक मेत्छामा ओ।
खोन्कि मोसाआ “अ़ङ्छा मेत्छाछाएदाङ्का चाकावालावा लोन्निप़नि!”
नि येसु लो।
२७ मेन येसुआ मो मेत्छामा अ़लोवा,
“बुया यहुदि अ़ङ्छाचि चान्माचिदोत,
देकिनालो अ़ङ्छाचिओ अ़चुपेम्पाक खात्माकि कुतिवाचि वेत्माछोक्मा अ़नुवाक माआङ।”
२८ मेन मोसाआ लासुओ,
“उवा हाङ्पो!
मेन कुतिवाचिआछाङ तेबलाओ अ़भेन्यु छाचिआ अ़धान्खान्ओ अ़चेत्वाचि अ़चा!”
२९ खोन्किना येसुआ मो अ़लोवा,
“खाना नुलोक त़य़ङाओसा खाना आम्खिम लासाखारा,
आम्छा मेत्छाछाएदाङ्का चाकावालावा लोन्ताखारायुङ्सा!”
३० मो मेत्छामा अ़खिम तालाहिदा अ़छा मेत्छाछा अ़इम्खादा नुलोक धुवाङा।
खोन्कि अ़छादाङ्का चाकावालावा लोन्ताखारायुङ्सा।
येसुआ क़वा म़ना अ़नुसाओ
३१ खोन्किना येसु तुरोस्दाङ्का म़लासा,
खोन्कि सिदोन सहरादाङ्का देकापोलिस्ओ लाम लियाङ्सा गालिल धियाङ्वामा म़खारा।
३२ म़नाचिआ मोदा अ़क्छा खामान्एन्कादाकिना नुलोक चेप्मा मान्ऱकादा म़ना येसुएदा अ़तारा।
खोन्कि म़नाचिआ येसुओ अ़चुछुक मो म़नाएदा युङ्अ़मेत्ताकि नुनिप़नि निकिना छुक्म़फाङ्ता।
३३ येसुआ मो म़ना मुक्लादाङ्का सुकुलादा अ़खात्ताकिना खोसोओ अ़नाबाक्दा अ़चुछुक कुसिप अ़पाआ,
खोन्किना येसुआ अ़चुछुक्कुसिप्दा अ़थुक्ताकि खोसोओ अ़लेम अ़नोप्तापुवा।
३४ खोन्किना येसुआ निनाम्मादुत्नि खाङ्याङ्सा ह़त्पा म़लुवाकिना खो अ़लोवा,
“इफ्फाता!”
ओसोओ अ़तुप्माय़ङ “होरालोन्ता!”
३५ मोन्ग़रिङा मो म़नाओ अ़नाबाक्चि म़होरालोन्ता,
खोन्कि अ़लेम चात्मापुङ्सुकिना खो नुलोक चेवालोन्ता!
३६ येसुआ “साङ्छाङ खामान्एत्दानुम्च़म”नि म़नाचि म़लोचि।
मेन खोक्कोसाआ देम खामान्लुदानिन्नि म़लोचि,
खोन्ङा च़लोक म़नाचिआ मोसोओ अ़तुक्वादा राक्एनान खाअ़लुसा।
३७ खोन्कि म़नाचि अ़न्नुनु दोम्तुदोचिकि य़ङ्मा अ़पुङ्सा,
“येसुआ झारा काचिचि म़दोम्दालो अ़मुवायुङ्सा।
खोक्कोसाआ खामान्एन्कादा म़नाचिछाङ खाकाएन खोन्कि मान्चेप्कादा म़नाचि काचेप म़मुचि।”