मर्कुस 3

अ़छुक छोवाखाराओ म़ना नुवाओ

मत्‍ति १२:९-१४; लुका ६:६-११

येसु आदेङ्‌माङ्‌छाङ यावायोक्‍खिम्‌दा म़लासावाङा। मोदा अ़क्‍छा अ़छुक छोवाखाराओ म़ना युङाङा। २ खोन्‍कि खोक्‍कोसाआ मो म़ना सावातोम्‍खा-लेन्‌दा नुसुनालो लाहि पाक्‍मा निकिना मोचिएदाओ खा-खाक्‍कोचिआ खोक्‍को अ़सुक्‍ताङा। ३ खोन्‍कि येसुआ अ़छुक छोवाखाराओ म़ना अ़लोवा, “झारासोओ अ़चुबुदा पुवालोन्‍ताकि बाना।” ४ खोन्‍किना येसुआ मोचि म़सेनुचि, “सावातोम्‍खा-लेन्‌दा य़ङ्‌हुप्‌वा नुलोक च़मा नु हे, अ़त्‍लो च़मा माङ्‌लो ह़ङ्‌म़ङ लेन्‍मा नु हे, ह़ङ्‌म़ङ सेत्‍मा नु?” मेन मोचि वाइवेत म़लिसा। ५ खोक्‍कोसोओ अ़चुच़ऱपाआ मोचिओ अ़चुऱङ्‌कोप्‍नि म़चोउचि, देकिनालो खोक्‍को मोचिओ अ़चुऱक्‍भाक साकोङ्‌वाआ अ़न्‍नुनु अ़चुमिन्‍मा तुआ। खोन्‍किना खोक्‍कोसाआ मो म़ना अ़लोवा, “आम्‍छुक फेसु।” खोसाआ अ़छुक फेसु, खोन्‍कि बुयावाङा लासालिसा! ६ खोन्‍कि फरिसिचि बुङ्‌खाया म़लोन्‍ता खोन्‍कि येसु देत्‍नि सेत्‍मा निम्‍पाङ हेरोद कात़ङ्‌चिएनान खोक्‍कोसोओ अ़चुदेङ्‌सालाप्‍पादा च़क्‍नि थालि म़बाङ्‌ता। ७ येसु अ़चुकाखेङ्‌पाचिएनान धियाङ्‌वामाह्‍यात्‍नि म़खारा, खोन्‍कि गालिल्‌किना यहुदियायाङ्‌का अ़धिवाङ म़ना मुक्‍लाचिआ खोक्‍को अ़त़ङ्‌ता। ८ खोन्‍कि खोक्‍कोसाआ झारा म़दोम्‍दाओ काचिचि अ़मुवाङाओ मोचिआ अ़एनाकि यहुदिया, यरुसलेम, इदुमिया, यर्दन याङ्‌वामाओ बुसुहोन्‌दाङ्‌का खोन्‍कि तुरोस खोन्‍कि सिदोन्‌ओ ओह्‍यात्‍नि मोह्‍यात्‍निदाङ्‌का अ़धिवाङ म़ना मुक्‍लाचि खोक्‍कोएदा म़ता। ९ खोन्‍कि म़ना मुक्‍लाचिआ ऩछ़रुन्‍ने निकिना खोक्‍कोसोओ निम्‍पाङ अ़चुकाखेङ्‌पाचि अ़क्‌तात नावा चुम्‍म़मेत्‍तुचि। १० देकिनालो खोक्‍कोसाआ ब़द्‍धे म़नाचि म़नुसुयुङ्‌सुचि, खोन्‌ओसा सारिमाआ लाउचिओचिआ खोक्‍को बुया नोप्‍मा छ़न्‍काछुछुरुप म़चुवाङा। ११ पोप्‍ताओ लावाचिआ म़लाउचिओ म़नाचिआ येसु अ़खाओ ग़रि खोक्‍कोसोओ अ़चुबुदा मोचि बोम्‍नान्‍चिन्‍सा म़पाराङा, “खानानिन निनाम्‍हाङ्‌ओ अ़चुछा ओ।” १२ मेन येसुआ खोक्‍को साङ्‌ओ निकिना साङ्‌छाङ खामान्‌एत्‌दानुम्‍च़म्‌नि मो पोप्‍ताओ लावाचि चात्‍लो चाप्‍म़चेत्‍तुचि।

येसुआ बारकापाङ अ़चुकाखेङ्‌पाचि म़छेन्‍तुचिओ

मत्‍ति १०:१-४; लुका ६:१२-१६

१३ खोन्‍किना येसु अ़क्‌तात भ़ऱदु म़लोन्‍ता, खोन्‍कि खोक्‍कोसाआ खा-खाक्‍को छेन्‍मा म़सुवा खो-खोचि म़बुत्‍तुचि, खोन्‍कि खोचि खोक्‍कोएदा म़ता। १४ खोन्‍कि खोक्‍कोएनान अ़क्‍नि युङ्‌मा खोन्‍कि नुय़ङ्‌खान खालुसि खान्‍माचि निकिना खोक्‍कोसाआ बारकापाङ म़छेन्‍तुचि खोन्‍कि खोक्‍कोसाआ मोचि छाम्‍माय़ङ्‌नि ऩङ्‌छाङ म़पाक्‍तुचि, १५ खोन्‍कि खोक्‍कोसाआ खोचि चाकावालावाचि लोन्‍माखान्‍मा पाङ्‌छाङ म़प़चि। १६ मो बारकापाङ म़छेन्‍तुचिओ छाम्‍माय़ङ्‌चि ओचिङा ओ, सिमोन खोसोओ अ़ऩङ पत्रुस्‌निछाङ अ़पाक्‍ता, १७ जब्‍दियाओ अ़छा याकुब खोन्‍कि याकुब्‌ओ अ़निछा युहन्‍ना येसुआ खोचिओ अ़चुऩङ बोअनर्गेस म़पाक्‍तुचि, मोसोओ अ़तुप्‍माय़ङ कुलुङ्‌धिप्‍पावाको म़नाचि। १८ खोन्‍कि अन्‍द्रियास, फिलिप, बारथोलोमाइ, मत्‍ति, थोमा, अल्‍फयस्‌ओ अ़छा याकुब, थेदियस, सिमोन कनानि: अरामिक य़ङ्‌दा यहुदिचि हेन्‍कोप सोमाकातुक कनानि, १९ खोन्‍कि यहुदा इस्‍करियोत खोसाआ येसु लाप्‍तुप़चि।

मोसाओ अ़य़ङ्‌हुप काचिन्‍पाचिआ येसु अ़चुमान्‍केङ अ़कात्‍ताओ

मत्‍ति १२:२२-३२; लुका ११:१४-२३; १२:१०

२० खोन्‍किना येसु खिम्‌दा म़लासाखारा, खोन्‍कि मोदा म़ना मुक्‍लाचि म़लासान्‍कोवान्‍चिन, खोन्‌ओसा येसु खोन्‍कि अ़चुकाखेङ्‌पाचिआ चा-चामाछाङ मान्‍तोक्‌अ़दा। २१ खोन्‍कि येसुओ अ़चुखिम्‍लुम्‍पाङ्‌आ ओसोओ अ़तुक्‌वादा अ़एनाकिना खोक्‍को खिम्‌दा लाप्‍मातात्‍मा निकिना म़खारा, देकिनालो “खोक्‍कोसोओ अ़चुखारु माखारायुङ्‌सा”नि म़नाचिआ अ़लोवाङा। २२ खोन्‍कि यरुसलेम्‌दुङ्‌का म़युवाओ य़ङ्‌हुप काचिन्‍पाचि म़य़ङा, “खोक्‍कोएदा चाकावालावाचिओ अ़चुहाङ बालजिबुल याक्‌याङ, खोन्‍कि मोसोओ अ़सावालाम्‍पा खोक्‍कोसाआ चाकावालावाचि लोइसुङुचि।” २३ खोन्‍किना येसुआ खोचि म़बुत्‍तुचि, खोन्‍कि दोय़ङ्‌लाचिदा मोचि म़लोचि, “सैतानाआ सैताना देत्‍नि लोन्‍मा ऱ? २४ खाक्‍को हाङ्‌होन्‌ओ अ़देङ्‌सालाप्‍पादा ङेन मुकि केत्‌नालो मो हाङ्‌होन्‌ङा लुक्‍खात। २५ खाक्‍को खिम्‍लुम्‍पा अ़देङ्‌सालाप्‍पादाङा ङेन मुकि केत्‌नालो मो खिम्‍लुम्‍पा लुक्‍खात। २६ खोन्‍कि सैतानाआ सैतानाओ अ़देङ्‌सालाप्‍पादा ङेन मुसि पुक्‍लोन्‌कि फेक्‍नान्‍चिन्‌नालो मो लुक्‍खात, मेन मोसोओ अ़लुक्‍मा तादिसायुङ्‌सा। २७ अ़नुछ्‍याङा, साङ्‌आछाङ काछोपा म़नाओ अ़खिम्‌दा वाङ्‌कि अ़चासुम्‍छेन्‍बि ङाप्‍माखात्‍मा अ़ऱन, खोसाआ बुया मो काछोपा म़ना छ़मादोत, खोन्‍किना ओन्‍ङा खोसाआ मोसोओ अ़खिम्‌दाओ अ़चासुम्‍छेन्‍बि ङाप्‍माखात्‍मा ऱ। २८ अ़नुछ्‍या अ़ङ्‌का खानानिन लोनानिन, निनाम्‍हाङ्‌आ म़नाचिओ झारा अ़चुहेवाचि खोन्‍कि निनाम्‍हाङ्‌ओ अ़चुसायापेप्‍माय़ङ य़ङ्‌चिछाङ म़लेत्‍तुप़चि। २९ मेन साङ सेङ्‌लावाओ अ़चुदेङ्‌सालाप्‍पादा अ़त्‍लो चेप, निनाम्‍हाङ्‌आ देम्‍खाछाङ ऩलेत्‍तुन, देकिनालो मो म़ना अ़लुक्‍निन्‌ओ हेवाओ ऩङ्‌छिन कामु कान।” ३० खोक्‍कोसाआ ओ य़ङ म़लोचि, देकिनालो “खोक्‍कोएदा पोप्‍ताओ लावा याक्‌याङ”नि मोचि म़य़ङाङा।

येसुओ अ़चुमा खोन्‍कि अ़चुनिछाचि

मत्‍ति १२:४६-५०; लुका ८:१९-२१

३१ खोन्‍किना येसुओ अ़चुमा खोन्‍कि अ़चुदुवाछा निछाचि खोक्‍कोसाआ म़चिन्‍तुङुचिओ खिम्‌दा म़तादिसा। मोचि बुङ्‌खाया म़एवाकि येसु बुत्‍सि अ़क्‍छा अ़छुत्‍ता। ३२ येसुओ अ़चुऱङ्‌कोप्‍नि म़ना मुक्‍लाचि म़युङाङा, खोन्‍कि मोचिआ खोक्‍को अ़लोवा, “आम्‍नुओ मामा खोन्‍कि आम्‍नुओ दुवाछा निछाचिआ बुङ्‌खाया खानानिन ऩलामिन्‌येन।” ३३ येसुआ मोचि म़लासुलोचि, “अ़ङ्‌मा खोन्‍कि अ़ङ्‌निछाचि साङ्‌चि ओ?” ३४ खोन्‍किना खोक्‍कोसाआ अ़चुऱङ्‌कोप्‍नि म़युङाङाओ म़नाचिह्‍यात्‍नि म़खाचिकि म़य़ङा, “खानुम! अ़ङ्‌मा खोन्‍कि अ़ङ्‌निछाचि ओचिङा ओ! ३५ साङ निनाम्‍हाङ्‌ओ अ़चुमिन्‍मावा च़, मोङा अ़ङ्‌निछा, अ़ङ्‌छेत्‍कुमा खोन्‍कि अ़ङ्‌मा ओ।”