मत्‍ति 10

बारकापाङ ख्रिस्‍तओ अ़चुछाम्‍माय़ङ्‌चिओ काचि

मर्कुस ३:१३-१९; ६:७-१३; लुका ६:१२-१६; ९:२-६

येसुआ बारकापाङ अ़चुकाखेङ्‌पाचि म़बुत्‍तुचि खोन्‍कि पोप्‍ताओ लावाचि लोन्‍माखान्‍मा खोन्‍कि झारा सारिमाचि खोन्‍कि कातुक्‌चि नुमा मोचि पाङ म़प़चि।

२ बारकापाङ छाम्‍माय़ङ्‌चिओ अ़चुऩङ्‌चि ओचिङा ओ, बुया पत्रुस्‌नि लोवाङाओ सिमोन खोन्‍कि खोसोओ अ़निछा अन्‍द्रियास, जब्‍दियाओ अ़छा याकुब खोन्‍कि खोसोओ अ़निछा युहन्‍ना, ३ फिलिप खोन्‍कि बारथोलोमाइ, थोमा खोन्‍कि दाम्‍दु कालात मत्‍ति, अल्‍फयस्‌ओ अ़छा याकुब खोन्‍कि थेदियस, ४ सिमोन कनानि खोन्‍कि यहुदा इस्‍करियोत, खोसाआ येसु लाप्‍तुप़चि।

५ येसुआ मो बारकापाङ अ़चुकाखेङ्‌पाचि म़लोचिउचिकि म़छुत्‍तुचि, “निरावाचिएदा मान्‍खात्‍दानिन, खोन्‍कि सामरिचिओ अ़चुसहरादा मान्‌वाङ्‌दानिन। ६ मेन इस्राएल्‌दाओ म़नाचि म़माखाराओ भेरा वाकोचिएदा खारानिन। ७ खारानिन्‌कि ‘निनाम्‍हाङ्‌होन च़क्‌दा तायुङ्‌सा’नि य़ङ्‌सा नुय़ङ्‌खान खालुसानुम। ८ कातुक्‌चि नुसानुम्‍च़म, म़सुवादाओचि ह़ङ्‌सालोइसानुम्‍च़म, क़माधामा सारिमाआ लाउचिओचि सेङ्‌सानुम्‍च़म, खोन्‍कि चाकावालावाचि लोइसानुम्‍च़म। खानानिन्‌आ मोहा त़तोक्‍तुम, मोहाङा पुवानुम्‍च़म। ९ खानानिन आम्‍नुओ दोन्‍दिदा हाराक्‌वा, रुपा खोन्‍कि ताबोओ फेक्‌वा मान्‍खुन्‌दानिन, १० आम्‍नुओ हुमाओ निम्‍पाङ ना बेखा, ना ह्‍वातात लोक्‍छुम्‌चि, ना फेङ्‌ता, ना तोप्‍मालि खुयानिन। देकिनालो काचि कामुआ अ़चामायु तोक्‍मा खान्‍तु।

११ खाउ सहरा माङ्‌लो तेन्‌दा खानानिन त़वाङिन, मोदा साङ खान्‍तुओ म़ना युङ्‌याङ, खो लामानुम, खोन्‍कि मोदाङ्‌का त़हासिमिन्‍चिन्‌तारि मोदाङा युङानिन। १२ मो खिम्‌दा त़वाङिन्‌येन्‌हिदा सेवामेत्‍तानुम्‍च़म। १३ खोन्‍कि मो खिम्‍लुम्‍पाआ साऩङ्‌वा ऩमेत्‍तिन्‌नालो आम्‍नुओ सेवाङ्‌निओ आसिखा मो खिम्‌दा ताने। मेन मोचिआ साऩङ्‌वा ऩमेत्‍तिमिन्‌नालो खानानिन्‌आ त़प़म्‍च़म्‌ओ सेवाङ्‌नि खानानिन्‌एदा लाताने। १४ खोन्‍कि साङ्‌आछाङ खानानिन साया ऩमेत्‍तिमिन माङ्‌लो आम्‍नुओ य़ङ ऩएनुन्‌नालो मो खिम माङ्‌लो सहरा त़छिरुम्दाम्‌योम्‌हिदा आम्‍नुओ लाङ्‌थेम्‌दाओ बाखा थुलि धाम्‍साधान्‍तादानुम। १५ अ़नुछ्‍या, अ़ङ्‌का खानानिन लोनानिन, छ़ङ्‌छेन्‍खा लेन मो सहरादाओ म़नाचिदाङ्‌का सदोम खोन्‍कि गमोरादाओ म़नाचिआ च़लोक निनाम्‍हाङ्‌ओ अ़चुदन्‍दा आङ्‌मा अ़ऱलो लि।

तामा मुयाङ्‌ओ दुखाओ अ़तुक्‌वादा

मर्कुस १३:९-१३; लुका २१:१२-१७

१६ खानुम, अ़ङ्‌का खानानिन बेन्‍पाचिओ अ़चुरादा भेराचिवात्‍नि छुत्‍नाङ्‌नानिन। खोन्‌ओसा खानानिन प़वात्‍नि चाप्‍चा खोन्‍कि साप्दुकुत्‌वावात्‍नि सोत्‍सोत्‌वाओ मुवानिन। १७ मेन म़नाचिदाङ्‌का खानानिन चाप्‍चेत्‍तानिन्‍चिन, देकिनालो म़नाचिआ खानानिन छ़ङ्‌छेन्‍खाचिदा ऩखात्‍तिन, खोन्‍कि मोचिआ अ़चुओ यावायोक्‍खिम्‌चिदा खानानिन य़हुप ऩपाक्‍तिन। १८ खानानिन अ़ङ्‌का कात़ङ्‌चिओसा हाङ्‌कामुचिओ खोन्‍कि हाङ्‌चिओ अ़चुबुदा ऩसारिन्‍खात्‍तिन। मोचिओ खोन्‍कि निरावाचिओ निम्‍पाङ अ़चुसालुम्‍स़ङ त़लिसिन। १९ मोचिआ खानानिन ऩलाविन, मेन मोन्‍ग़रि देत्‍नि चेप्‍मा माङ्‌लो दे य़ङ्‌माओ निकिना मिन्‍राक मान्‍मुदानिन। देकिनालो खानानिन्‌आ दि चेप्‍मादोत ओ, मोन्‍ग़रिङा खानानिन निनाम्‍हाङ्‌आ ऩप़न। २० देकिनालो काचेप खानानिन माआङ, मेन आम्‍नुओ निनाम्‍हाङ पापाओ अ़चुलावा खानानिन्‌लाम्‍पा म़चेप।

२१ अ़द़क्‍छाआ अ़द़क्‍छाङा लाप्‍मेत्‍तुकि सेत्‍मेत्‍तु, खोन्‍कि अ़पाआ अ़छा खोन्‍कि अ़चुछाचि अ़चुमा पाचिओ अ़चुदेङ्‌सालाप्‍पादा म़पुक्‍लोन्‌कि सेत्‍म़मेत्‍तुचि। २२ अ़ङ्‌का कात़ङ्‌चिओसा झारासा खानानिन ऩङाऩछिरिन। मेन साङ आदेङ्‌तारि आङ्‌तुकि युङ, खो लेन। २३ मोचिआ खानानिन अ़क्‌तात सहरादा दुखा ऩप़न्‌हिदा खानानिन नि सहरादा फुङ्‌सानिन। देकिनालो अ़नुछ्‍या अ़ङ्‌का खानानिन लोनानिन, म़नाओ अ़छा तामा बुया खानानिन्‌आ इस्राएल्‌दाओ झारा सहराचिदा आम्‍नुओ काचि त़मुन्‍चिइमिन।

२४ काखेङ अ़काचिन्‍पाएदाङ्‌का तोक्‍पो अ़लिनिन, खोन्‍कि हारुक अ़हाङ्‌पाएदाङ्‌का तोक्‍पो अ़लिनिन। २५ काखेङ अ़काचिन्‍पावात्‍नि खोन्‍कि हारुक अ़हाङ्‌पावात्‍नि लिमादा अ़सोम्‍स़ने। मेन मोचिआ अ़ङ्‌का खिम्‍हाङ्‌पाङा चाकावालावाचिओ अ़चुहाङ बालजिबुलनि ऩलोङाङानालो अ़ङ्‌खिम्‍लुम्‍पाचि देम च़लोक अ़त्‍लो म़लोचि!

साङ्‌एदाङ्‌का क़मा?

लुका १२:२-७

२६ खोन्‌ओसा मोचिएदा मान्‍क़दानिन। देकिनालो दिप्‍तुम्‌कि अ़दात्‍निन्‌ओ खोन्‍कि कुम्‍सुम्‌कि अ़सिन्‍तिमिन्‌ओ दित्‍छाङ मात्‍द़ङ। २७ दि अ़ङ्‌का खानानिन कुइयामादा लोनानिन, मो खानानिन साम्‌दा लोवानुम्‍च़म, खोन्‍कि दि खानानिन्‌आ सोप्‌य़ङ्‌दा आम्‍नुओ नाबाक्‌दा त़एनुम, मो खिम्‌चोक्‌दुङ्‌का खालुसानुम। २८ पोक ओन्‍ङा कासेत्‍चिदाङ्‌का मान्‍क़दानिन, देकिनालो मोचिआ लावा सेत्‍मा ऩऱन। मेन लावा खोन्‍कि पोक ह्‍वातात्‍माङ मिराक्‌यु कालुक्‌एदा क़सानिन। २९ दि अ़क फेक्‌दा ह्‍वातात खोक्‌वाचि अ़वाङ्‌चिन कि? मोचिएदाओ अ़क्‌तात्‌छाङ आम्‍नुओ निनाम्‍हाङ पापाओ अ़चुमिन्‍मा मात्‍द़ङ बाखादा अ़धानिन। ३० आम्‍नुओ ताङ्‌दुओ ताङ्‌मुवाछाङ निनाम्‍हाङ्‌आ झारा अ़खिप्‍तायुङ्‌सा। ३१ खोन्‌ओसा खानानिन मान्‍क़दानिन, खानानिन ब़द्‍धे खोक्‌वाचिदाङ्‌काछाङ आम्‍नुओ लुङ छ़याङ।

३२ अ़ङ्‌का लोनानिन, साङ्‌आ म़नाचिओ अ़चुबुदा अ़ङ्‌का अ़लोक्‍ङा, अ़ङ्‌काछाङ मो निनाम्‍मादु कायुङ अ़ङ्‌पापाओ अ़चुबुदा मो लोउङ। ३३ मेन साङ्‌आ अ़ङ्‌का म़नाचिओ अ़चुबुदा ऩङाअ़छित्‍ङा, अ़ङ्‌काछाङ मो निनाम्‍मादु कायुङ अ़ङ्‌पापाओ अ़चुबुदा ऩङाछिरुङ।

काखेङ्‌आ छोन्‍मादोत्‌ओ अ़लुङ

लुका १२:५१-५३; १४:२६-२७

३४ अ़ङ्‌का हेन्‍खामादा सेवाङ्‌नि तात्‍सि ताङ्‌ओनि मान्‍मिन्‍दानिन! सेवाङ्‌नि तात्‍सि माआङ, मेन बान्‍छोन याङ्‌सि ताङ्‌ओ। ३५ मो दिओनालो, अ़पाओ अ़देङ्‌सालाप्‍पादा अ़दुवाछा छा, अ़माओ अ़देङ्‌सालाप्‍पादा अ़मेत्‍छाछा छा खोन्‍कि अ़छादिमाओ अ़देङ्‌सालाप्‍पादा अ़नाम्‍मित हासि अ़ङ्‌का ताङ्‌ओ। ३६ खोन्‍कि म़नाओ अ़ङेङ्‌चि खोसोओ अ़खिम्‍लुम्‍पादाओचिङा म़लि।

३७ साङ्‌आ अ़ङ्‌कादाङ्‌का च़लोक अ़पा माङ्‌लो अ़मा सोमातुक्‍तु, मो अ़ङ्‌काखेङ लिमा अ़खान्‍तुन। साङ्‌आ अ़ङ्‌काएदाङ्‌का च़लोक अ़दुवाछा छा माङ्‌लो अ़मेत्‍छाछा छा सोमातुक्‍तु, मो अ़ङ्‌काखेङ लिमा अ़खान्‍तुन। ३८ खोन्‍कि साङ्‌आ अ़क्रुस खुयुकि अ़ङ्‌का अ़त़ङ्‌ऩङ, मो अ़ङ्‌काखेङ लिमा अ़खान्‍तुन। ३९ साङ्‌आ अ़ह़ङ्‌म़ङ रात्‍मालाप्‍तु, मोसाआ अ़नुछ्‍याओ ह़ङ्‌म़ङ मासु, खोन्‍कि अ़ङ्‌को निम्‍पाङ अ़ह़ङ्‌म़ङ कामाआ अ़नुछ्‍याओ ह़ङ्‌म़ङ लेइसु।

काखेङ्‌आ तोक्‍माय़ङ सिरिफा

मर्कुस ९:४१; लुका १०:१६

४० खानानिन कालोक्‌आ अ़ङ्‌का अ़लोक्‍ङा, खोन्‍कि अ़ङ्‌का कालोक्‌आ अ़ङ्‌का काछुत्‍पा लोउ। ४१ निनाम्‍हाङ्‌य़ङ खाकालु, खो निनाम्‍हाङ्‌य़ङ खाकालु ओ निकिना कालोक्‌आ निनाम्‍हाङ्‌य़ङ खाकालुओ सिरिफा तोक्‍तु। साम्‌योक्‍मि म़नाआ, खो साम्‌योक्‍मि म़नाओ निकिना कालोक्‌आ साम्‌योक्‍मि म़नाओ सिरिफा तोक्‍तु। ४२ साङ्‌आ ओ अ़चुप्‍पोचिएदाओ अ़क्‍छा अ़ङ्‌काखेङ अ़क खुङ ओन्‍ङानुछाङ केङ्‌याङ्‌ओ चाक्‌वा दुङ्‌मा प़, अ़नुछ्‍या अ़ङ्‌का खानानिन लोनानिन, देम्‍खाछाङ खोसाआ अ़सिरिफा अ़मासुन।”