यावायोक्ओ निम्पाङ यामात्मा
२
झारादाङ्का बुया अ़ङ्का यायोक प़नाङ्नानिन,
झारा म़नाचिओ निम्पाङ यामारानिन।
निनाम्हाङ्आ मोचि म़फासुचिने निकिना यामात्तापुवानुम्च़म,
निनाम्हाङ्ओ खोन्कि म़नाओ अ़चुरादा काचेप्प़ लिसानिन।
२ हाङ्चि खोन्कि अ़छोङ्छान्दु कायुङ हाङ्काचि कामुचिओ निम्पाङ्छाङ यामारानिन,
खोन्ओसा आन्कान वाइवेत खोन्कि सेवाङ्निओ ह़ङ्म़ङ्आ झारा ग़रि साम्योक्मि खोन्कि निनाम्हाङ साया मेत्मादा ह़ङ्मा ऱन्ने।
३ आन्कान कालेन्पा निनाम्हाङ्ओ अ़चुखाङ्मादा ओ अ़नुवाक खोन्कि लोक्माखान्तुओ मुयाङ।
४ झारा म़नाचि म़लेन्ने,
खोन्कि मोचि अ़छ़ङ चिन्माय़ङ्दा म़तानेनि खोक्को म़मिन।
५ देकिनालो निनाम्हाङ अ़क्छा ओन्ङा म़युङ्याङ,
निनाम्हाङ खोन्कि म़नाचिओ अ़चुरादा कातुम अ़क्छा ओन्ङा म़युङ्याङ,
म़ना ख्रिस्त येसु।
६ झारा म़नाचि फोङ्माओ निम्पाङ खोक्को आप्पि म़पुवान्लावान्चिन,
मो य़ङ्ओ सालुम्स़ङ तोङाङाओ ग़रिदा निनाम्हाङ्आ अ़पुवा।
७ ओ सालुम्स़ङ्ओ निम्पाङ साकोङ्छ़ङ खोन्कि अ़छ़ङ्ओ अ़तुक्वादा निरावाचि नुय़ङ्खान खाएत्माचि निम्पाङ अ़ङ्का खाकालु खोन्कि छाम्माय़ङ्दा ऩछेन्ताङ्ओ।
अ़ङ्का अ़नुछ्या य़ङ्ङाङा,
अ़ङ्का अ़म़प्ऩङ्ऩङ!
८ खोन्ओसा झारादाओ दुवाछाचिआ सेङ्याङ्ओ अ़चुछुक अ़थेन्कि अ़चुमाइसुङ मान्कात्माङ खोन्कि दुम मान्छ़न्माङ याम़मात्नेनि अ़ङ्का मिन्ङा।
९ मोवात्निङा मेत्छामाचिछाङ खान्तुचिलो ताक्पेत्निओ तित म़हुम्नेनि अ़ङ्का मिन्ङा।
अ़चुताङ्मुवा अ़न्नुनु अ़चोङ्कि हाराक्वा माङ्लो वाचेत्लुङ्चि खोन्कि ब़द्धे अ़लुङ्छुक्ओ तित्चि म़हुम्कि माआङ,
१० मेन निनाम्हाङ्ओ अ़नुवाक काचिचिलाम्पा म़चोङ्नान्चिन्ने,
ओसाआ निनाम्हाङ काब़क मेत्छामाचि खान्तुचि।
११ अ़क्छा मेत्छामा साऩङ्वाएनान खोन्कि वाइवेत युङ्कि खेङ्सुने।
१२ मेन मेत्छामाआ दुवाछाएदा पाङ मुमा खोन्कि चिन्मा अ़ङ्का अ़प़ऩङ,
मो मेत्छामा वाइवेत युङ्ने।
१३ देकिनालो निनाम्हाङ्आ बुया आदम अ़मुया,
खोन्किना आदेङ हव्वा।
१४ आदम धान्ताओ माआङ,
मेन मेत्छामाङा धान्ताकि हेवा कामु लिसाओ।
१५ खोन्नुछाङ,
मो नुलोक साकोङ्छ़ङ्दा,
सोमातुक्मादा खोन्कि सेङ्लो युङ्नालो मो छा तोक्मादा लेन।