थेसलोनिकिचि पावल्आ छाप्तुओ बुयाओ छाप्लावा
१
पावल,
सिलास खोन्कि तिमोथिएदाङ्का निनाम्हाङ पापा खोन्कि हाङ्पा येसु ख्रिस्तएदा साकोङ्छ़ङ कामु थेसलोनिकेदाओ साम्भुङ्एदा ओ छाप्लावा छाप्तुम्योम्का।
निनाम्हाङ्आ खानानिन आसिखा ऩप़न्ने खोन्कि सेवाङ्नि ऩमुन्ने!
थेसलोनिकिचिओ साकोङ्छ़ङ्ओ निम्पाङ आलाङ प़माय़ङ
२ आन्कान्का अ़धुन खानानिन झारासोओ निम्पाङ निनाम्हाङ आलाङ प़म्योम्का,
खोन्कि आन्काओ यामात्माचिदा खानानिन मित्नियुङ्निङ्नि।
३ आन्निनाम्हाङ पापाओ अ़चुबुदा आम्नुओ साकोङ्छ़ङ्दाङ्का त़मुम्ओ काचि,
खोन्कि सोमातुक्माआ त़मुम्ओ काचि खोन्कि आन्हाङ्पा येसु ख्रिस्तएदा त़मुम्ओ सोम्कुवाआ खानानिन त़छोसिन्ओ आन्कान्का अ़धुन मित्तुम्युङ्सुम्का।
४ ब़ब़,
नाना खोन्कि निछाचि ओ,
निनाम्हाङ्आ सोमाऩतुक्तिन्युङ्सिन,
खोक्कोओसो अ़चुम़नाचि लिमा निम्पाङ ऩछेन्तिन्ओ आन्कान्का सिन्तुम्योम्का।
५ देकिनालो आन्कान्का खानानिन्एदा नुय़ङ्खान तारुम्काहिदा य़ङ्चिदा ओन्ङा माआङ,
मेन सावा खोन्कि सेङ्लावादाछाङ अ़नुछ्या तारुम्काओ त़सिन्तुम्युङ्सुम।
आम्नुओ निम्पाङ आन्कान्का आम्नुओ रादा देत्नि युङिन्काओ खानानिन नुलोक त़सिन्तुम्योम।
६ खानानिन आन्कान्का खोन्कि हाङ्पा काखेङ त़लिसिन,
देकिनालो ब़द्धे दुखा त़आङ्तुम्किछाङ सेङ्लावाआ ऩप़न्ओ ऩङानुयाङ्सा खानानिन्आ य़ङ्खान त़लोउम।
७ खोन्ओसा माकेदोनिया खोन्कि अखैयादाओ झारा साकोङ्छ़ङ कामुचिएदा खानानिन अ़मात्ऩङ त़लिसिन।
८ देकिनालो खानानिन्एदाङ्का निनाम्हाङ्ओ अ़य़ङ माकेदोनिया खोन्कि अखैयादा ओन्ङा थ़ङाओ माआङ,
मेन निनाम्हाङ्एदाओ आम्नुओ साकोङ्छ़ङ झारासाआ अ़सिन्तायुङ्सा,
खोन्ओसा आन्कान्का ओसोओ अ़तुक्वादा देत्छाङ य़ङ्मा अ़दोत्निन।
९ देकिनालो देत्नि आन्कान्का खानानिन तुप्निहिदा साऩङ्वा त़मेत्निओ,
खोन्कि देत्नि सेम्पोक्चिदाङ्का अ़ह़ङ खोन्कि अ़छ़ङ निनाम्हाङ ब़त्सि त़लासिन्ओ,
मोसोओ अ़तुक्वादा झारादात्निओ म़नाचिआ खाअ़लु।
१० खोन्कि निनाम्मादुङ्का काय़ निनाम्हाङ्ओ अ़चुछा येसु त़हुङुम्योम्निछाङ मोचि म़य़ङ्याङ।
खोक्को निनाम्हाङ्आ म़सुवादाओदाङ्का अ़लासाखोन्तालोइसा,
खोक्कोसाआङा तामा मुयाङ्ओ निनाम्हाङ्ओ अ़चुमाइसुङ्दाङ्का आन्कान म़लेन।