थेसलोनिकिचि पावल्आ छाप्तुओ बुयाओ छाप्लावा
छाप्लाखाओ अ़सिन्खा
थेसलोनिकि रोमि धिहाङ्होन्दाओ माकेदोनिया धिखाहुप्ओ हाङ्युङ्खा ओ। फिलिप्पि छिरुदोकि पावल्आ मो सहरादा साम्भुङ पुङ्सुयुङ्सु। मेन मोदा यहुदिचिआ पावल फित्चि अ़मुवा। मोचि यहुदि साम्योक ऩङाकानु मान्यहुदिचिआ पावल्आ खाएत्तुचिओ ख्रिस्तियान नुय़ङ्खान्दा साकोङ्छ़ङ कामुचि खाङ्मा मान्ऱम़दोङुचि। ओवात्नि मोचि फित्चि म़मुवाओसा पावल्आ थेसलोनिकि छिरुदोकि बेरिया खारा। आदेङ कोरिन्थदा तादिसाहिदा खोएनान्ङा काचि कामु तिमोथिएदाङ्का थेसलोनिकेदाओ साम्भुङ्ओ अ़तुक्वादा य़ङ्खान एनु।
ओ बुदाओ छाप्लावा पावल्आ थेसलोनिकेदाओ साकोङ्छ़ङ कामुचि सोम्कुवा म़मुने निकिना छाप्तुओ। पावल्आ मोचिओ अ़चुसाकोङ्छ़ङ खोन्कि अ़चुसोम्तुक्माओ अ़तुक्वादा एनुओ य़ङ्खान्ओ निकि आलाङ प़चि। पावल मोचिएनान अ़क्नि युङाङाहिदा अ़ह़ङ्म़ङ्दा दियाको अ़च़माथाङ्मा मुवाङा, मो मित्मेत्तुचिकि पावल्आ साम्भुङ्दा ख्रिस्त म़लाताओ अ़तुक्वाओ सेन्माय़ङ्चिओ अ़सिन्खा प़चि। दि ख्रिस्त लामातामा बुया कास़ साकोङ्छ़ङ कामुआ ख्रिस्त म़लाताओ ग़रिदा अ़लुक्निन्ओ ह़ङ्म़ङ तोक्मा ऱ? ख्रिस्त देम्खा म़लाता? खोन्कि ख्रिस्तओ अ़लामातामा हुङुम्योम्हिदा वाइवेत खानानिन खोक्कोसोओ अ़चुकाचि मुवायुङ्सानुम्नि पावल्आ लोचि।
थुत्मेत्लो अ़तुक्वा ऩङ
अ़सिन्खा १:१
आलाङ्मि खोन्कि चोन्मा १:२–३:१३
ख्रिस्तियान च़माथाङ्माओ निकि ताया ४:१-१२
ख्रिस्तओ अ़लातामाओ अ़तुक्वादा ताया ४:१३–५:११
आदेङ्ओ यायोक ५:१२-२२
अ़चिन्मा ५:२३-२८