अ़छ़ङ साम्योक्मि
३
अ़सेत्मादिमादा,
अ़ङ्ब़ब़,
नाना खोन्कि निछाचि ओ,
हाङ्पाएदा ऩङानुसानिन्चिन!
खानानिन मो य़ङ्चि छाप्मायुङ्मा अ़ङ्का अ़ङ्नाप्मा अ़लुनिन,
खोन्कि मो आम्नुओ रात्मा निम्पाङ ओ।
२ कुतिवाचिदाङ्का चाप्चेत्तानिन्चिन,
अ़त्लो काचि कामुएदाङ्का चाप्चेत्तानिन्चिन,
पोक काक़प्चिएदाङ्का चाप्चेत्तानिन्चिन।
३ देकिनालो सेङ्लावालाम्पा काब़क आन्कान्ङा ओ,
खोन्कि ख्रिस्त येसुआ दि अ़मुवायुङ्सा मोदा आन्कान तोक्पो कालि खोन्कि च़माथाङ्मादा सोम्कुवा मान्मुकादा अ़नुछ्याओ सिप्मायाम्बुन कापाक आन्कान्ङा ओ।
४ मेन अ़ङ्का आप्पि पोक्दा सोम्कुवा मुमाओ अ़तुक्वा युङ्याङ।
खाक्को म़नाआ अ़पोक्दा सोम्कुवा मुमाओ अ़तुक्वा युङ्याङ्नि मिन्नालो अ़ङ्को अ़क्चित च़लोक अ़तुक्वा पोक्दा सोम्कुवामुमायु युङ्याङ।
५ देकिनालो अ़ङ्का ना लिसाङ्ओ आथ्कालेन्दा सिप्मायाम्बुन ऩपाक्ताङ्ओ।
अ़ङ्का इस्राएलि रावाओ बेन्यामिन भुङ्दाओ ओ,
अ़ङ्का खाक्कोछाङ हिब्रुचिदाङ्का च़लोक हिब्रु ओ।
य़ङ्हुप अ़तुक्वादाओनालो अ़क्छा फरिसि ओ।
६ राक्ओ अ़तुक्वादाओनालो साम्भुङ दुखाकाप,
साम्योक्मिओ अ़तुक्वादाओनालो य़ङ्हुप्वात्नि लाहि मात्द़ङ्ओ अ़ङ्का मुवाङ्याङ।
७ मेन देम य़ङ्चि अ़ङ्को निम्पाङ अ़च़वाङ म़मुवाङा,
मोचि अ़ङ्का ख्रिस्तओ निम्पाङ अ़काचि मात्द़ङ्ओ मित्तुङ्च़ङ।
८ अ़नुछ्या ख्रिस्त येसु अ़ङ्हाङ्पा निकिना सिन्मा तोक्पो अ़वाखाम तोक्तुङ्ओदा नि झारा य़ङ्चि अ़काचि मात्द़ङ्ओनि मित्तुङ्च़ङ।
ख्रिस्त तोक्मा ऱङ्ने निकिना खोक्कोसोओ निम्पाङ अ़ङ्का झारा य़ङ्चि छिरुङ्युङ्सुङ्च़ङ,
खोन्किना झारा मोचि सिप्भाङ्वा मित्तुङ्च़ङ,
९ खोन्ओसा अ़ङ्का झारा खोक्कोएदा अ़क्नि मुमान्चिन ऱङाने।
य़ङ्हुप मुयाङ्सा अ़ङ्का साम्योक्मि लिमा अ़ऱऩङ,
मेन अ़ङ्साम्योक्मि ओङा ओ,
मो ख्रिस्तएदा याक,
मो साकोङ्छ़ङ्लाप्मा निनाम्हाङ्एदाङ्का ताओ साम्योक्मि ओ।
१० अ़ङ्का ख्रिस्त खोन्कि खोक्कोसोओ अ़चुलामाखोन्मालोन्मा सावा सिन्मानि मिन्ङा,
खोन्कि खोक्कोसोओ अ़चुस़मादा खोक्कोवात्निङा लिङाकि खोक्कोसोओ अ़चुदुखा आङ्मादा वाङ्मा ऱङाने,
११ खोन्ओसा लिमा ऱनालो स़मादाङ्का अ़ङ्का लामाखोन्मालोन्मा ऱङाने।
मित्चिऩङ्दा लोत्मा
१२ अ़ङ्का मो मित्चिऩङ्चि झारा बुयाङा तोक्तुङ्चिउङ्युङ्सुङ्च़ङ माङ्लो अ़ङ्का बुयाङा तासुङ्लोङ्युङ्सुङ्च़ङ निकिना माआङ,
मेन मो मित्चिऩङ्चि लाप्माचिओ निकिना अ़ङ्का बुया खात्ङाङा।
मो मित्चिऩङ्चिओ निकिना ख्रिस्तआ अ़ङ्का ऩलावाङ!
१३ अ़ङ्ब़ब़,
नाना खोन्कि निछाचि ओ,
मो अ़ङ्का झारा तोक्तुङ्चिउङ्युङ्सुङ्च़ङ्नि अ़ङ्का अ़मिन्ऩङ,
मेन अ़ङ्का ओ मुङ,
मेन देङ्याओ य़ङ्चि मान्तुङ्केसुङ्च़ङ्कि बुयाओ य़ङ्चिह्यात्नि तामालामा लाम्ङा।
१४ खोन्ओसा निनाम्मादुओ सिरिफा तोक्मा मित्चिऩङ्आ बुया लोत्ङाङा।
निनाम्हाङ्आ ओसोओ निम्पाङ ख्रिस्त येसुलाम्पा निनाम्मादुत्नि ऩबुत्ताङ्ओ।
१५ आन्कान लावामिदा पोयिन्ओचि झारा ओवाको मिन्माओ मुन्ने।
मेन खानानिन दि-दिसु य़ङ्दा नि मिन्माओ त़मुन्येन्नालो निनाम्हाङ्आ खानानिन मोछाङ नुलोक तुप्मा ऩप़न।
१६ दि आन्कान निनाम्हाङ्आ खाङ्म़मेत्तायुङ्सा,
मो नुलोक क़क्तुम्युङ्सुम्ने।
१७ ब़ब़,
नाना खोन्कि निछाचि ओ,
खानानिन अ़ङ्मात्ऩङ त़ङ्तानुम।
खा-खाक्कोचिआ आन्काओ अ़मात्ऩङ अ़त़ङ खानानिन्आ मोचिएदाङ्का चिन्तानिन्चिन।
१८ अ़ङ्का ब़द्धेकादु खाएत्नानिन्ओ म़नाचिओ अ़तुक्वादा हान्छाङ खानानिन खाप्याङ्सा लानालोनाङ्नानिन,
ब़द्धे म़नाचि ख्रिस्तओ अ़चुक्रुस्ओ ङेङ्चिवात्नि म़ह़ङ।
१९ आदेङ्माङ निनाम्हाङ्आ मोचि म़लुक्तुचि,
अ़चुबुक मोचिओ अ़चुमाङ ओ,
खोन्कि मोचि लेजो य़ङ्चि म़मुओदा तोक्पो म़लि,
खोन्कि मोचिओ अ़चुमिन्मा हेन्खामादाओ य़ङ्चिदा याक्याङ।
२० मेन आन्ताङ्युङ निनाम्मादु युङ्याङ।
खोन्कि मोदाङ्का म़ताओ आन्कालेन्पा,
हाङ्पा येसु ख्रिस्त आन्कान राक्स़रि हुङुम।
२१ खाक्को सावालाम्पा झारा खोक्कोसोओ अ़चुक़म्मादा तात्मा म़ऱचि,
आन्को अ़ऱनिन्ओ स़दाओ पोक खोक्कोसो आप्पिओ अ़चुसाम्स़रिओ पोक्वात्नि लिसि अ़फान।