एफिसिचि पावल्आ छाप्तुओ छाप्लावा
छाप्लाखाओ अ़सिन्खा
ओ छाप्लावा पावल्आ एफिसि सहरादाओ साकोङ्छ़ङ कामुचिओ निम्पाङ छाप्तुओ। झारादाङ्का बुया मोचि निनाम्हाङ्ओ अ़चुलाम खाएत्माचि खोसोओ अ़मिन्मा याआङा। मो लाम निनाम्हाङ्आ ख्रिस्त अ़छोङ अ़मुवाकि झारा अ़मुया माङ्लो निनाम्मा खोन्कि हेन्खामा झारा सामाचि खोसोओ अ़चुपाङ्दा तात्मा ओ छाप्लावा निनाम्हाङ्ओ अ़चुम़नाचिएदा पावल्ओ अ़लोमाय़ङ ओ। मोचि ख्रिस्तदा अ़क्भोम लिमाकि रावाचि अ़क्भोम मुमा, मो तोक्पो लाम अ़तुप्माय़ङ्स़रिओ मुमा निम्पाङ ओ।
ओ छाप्लावाओ बुयाओ अ़धाङ्आ अ़क्भोम्ओ अ़तुक्वादा ओवात्नि म़लो: निनाम्हाङ पापाआ खोक्कोसोओ अ़चुम़नाचि म़छेन्तुचि, खोन्कि मोचि अ़चुछा येसु ख्रिस्तलाम्पा अ़चुहेवा म़लेत्तुचिकि म़फोङ्सुचि। खोन्किना निनाम्हाङ्ओ तोक्पो अ़चुहिप्माय़ङ सेङ्लावालाम्पा अ़छ़ङ अ़मुवा। नितात अ़धाङ, ओ छाप्लावा काखिप्चि ओवात्नि ह़ङ्मा दोत्नि म़लो, देकिनालो ख्रिस्तदाओ मोचिओ अ़क्भोम्आ मोचि म़तोङाकि म़ह़ङाओ अ़चुह़ङ्म़ङ अ़छ़ङ लिने।
निनाम्हाङ्ओ अ़चुम़नाचि अ़क्भोम म़मुचिओ खाङ्मुमा ओवाको दोय़ङ्लाचि म़प़युङ्सुचि: साम्भुङ पोक्वाको ओ, मोसोओ अ़छोङ ख्रिस्त म़युङ्याङ। साम्भुङ मो खिम्वाको ओ, मोसोओ अ़खुचुरोङ्ओ अ़छोङ लुङ ख्रिस्त म़युङ्याङ माङ्लो साम्भुङ अ़क्छा साया काकाम्मावाको ओ। मोसोओ अ़साया काकाम्पा ख्रिस्त म़युङ्याङ। ओ छाप्लावादा अ़तुप्य़ङ्भोम्ओ चिन्माय़ङ्चि, मोवात्निङा हेन्खोक्वा, लेत्मा, सोमातुक्मा, पोप्माय़ङ खोन्कि ख्रिस्तओ अ़चुसोम्तुक्माओ साम याक्याङ।
थुत्मेत्लो अ़तुक्वा ऩङ
अ़सिन्खा १:१-२
ख्रिस्त खोन्कि साम्भुङ १:३–३:२१
ख्रिस्तएदा याक्याङ्ओ अ़ऩङ्वा ह़ङ्म़ङ ४:१–६:२०
अ़चिन्मा ६:२१-२४