पावल्ओ अ़सेन्चि खोन्कि साम
१२
अ़ङ्का अ़ङ्चेप्मादा तोक्पो लिमायुङ्माङादोत।
मेन ओदाङ्का दित्छाङ अ़तोक्तिमिन्नुछाङ,
हाङ्पाआ तुप्मा ऩपुवाङ्ओ सेन्चिचि खोन्कि साम्चिओ अ़चुतुक्वादा अ़ङ्का य़ङ्ङा।
२ ख्रिस्त कात़ङ अ़ङ्का अ़क्छा म़ना सिन्तुङ्योङ,
खो चौधकादोङ बुया सुम्कातात्ओतात निनाम्मादुतारि थेन्ताखात्ता।
खो अ़पोक्दा खात्ता हे अ़पोक्दा माआङ,
मो अ़ङ्का अ़सिन्ऩङ,
निनाम्हाङ्आ अ़सिन्याङ।
३ खोन्कि अ़ङ्का ओ म़ना सिन्तुङ्योङ,
अ़पोक्दाङा हे अ़पोक्दा माआङ,
मो अ़ङ्का अ़सिन्ऩङ्ऩङ,
ओ य़ङ निनाम्हाङ्आ अ़सिन्याङ।
४ मेन मो म़ना निनाम्मादुतारि थेन्ताखात्ता।
खोसाआ खालुमा अ़ऱन्मिन्ओ य़ङ्चि एनुचि।
म़नाआ मो य़ङ्चि य़ङ्माङा अ़नुनिन।
५ ओ म़नाओ अ़तुक्वादा अ़ङ्का तोक्पो लिङा,
मेन अ़ङ्तुक्वादा अ़ङ्मान्ऱदामादाङ्का नि य़ङ्दा अ़ङ्का तोक्पो अ़लिऩङ।
६ मोवात्नि अ़ङ्का तोक्पो लिमा स़ङानालो अ़ङ्का खामान्सिन अ़लिऩङ,
देकिनालो अ़ङ्का अ़छ़ङ चेप्ङायुङ्ङा।
मेन म़नाचिआ अ़ङ्काएदा अ़खाओ खोन्कि अ़ङ्काएदाङ्का अ़एनाओदाङ्का साङ्आछाङ अ़ङ्का च़लोक ऩमित्ऩङ्ने निकिना तोक्पो लिमादाङ्का अ़ङ्का अ़थाया युङ्ङा।
७ मेन च़लोक म़दोम्दाओ साम्चिओ अ़तुक्वाआ तोक्पो लिमाआ अ़पुन्ऩङ्दाऩङ्ने निकिना अ़ङ्का दुखा प़सि खोन्कि तोक्पो लिमादाङ्का अ़ङ्छेक्सि सैतानाओ अ़य़ङ काखुन्वाको अ़क्तात त़ङ्खोक्वा अ़ङ्पोक्दा ऩपुवाङ।
८ ओ अ़ङ्काएदाङ्का माङ्खात्ने निकिना अ़ङ्का सुम्कादु हाङ्पा लोङ।
९ मेन खोक्कोसाआ अ़ङ्का ऩलोवाङ,
“अ़ङ्सोम्तुक्मा आम्को निम्पाङ च़लोक युङ्याङ,
देकिनालो खाना मान्ऱकादा त़मुयाङ्हिदा म़नाचिआ अ़ङ्सावा नुलोक अ़खाङ।”
खोन्ओसा ख्रिस्तओ अ़चुसावा अ़ङ्काएदा याक्ने निकिना अ़ङ्का अ़ङ्मान्ऱदामादा अ़न्नुनु अ़ङ्ऩङानुयाङ्सा तोक्पो लिङा।
१० खोन्ओसा ख्रिस्तओ निम्पाङ अ़ङ्मान्ऱदामाचिदा,
सुङ्माचिदा,
चाअ़त्लो लिमाचिदा,
दुखा प़माय़ङ्चिदा,
हाप्मादिमाचिदा अ़ङ्का अ़ङ्सोम्सेत्ङान्च़ङ।
देकिनालो खाउग़रि अ़ङ्का अ़ऱऩङ,
मोन्ग़रि अ़ङ्का सावापोरि मुङा।
कोरिन्थिचिओ निम्पाङ पावल्ओ अ़मिन्राक
११ अ़ङ्का खामान्सिन्कादा लिसाङ्युङ्साङ!
खानानिन्आ अ़ङ्का ओवात्नि च़मा राकाङ्थेत्नि त़मुवाङ्ऩङ,
देकिनालो खानानिन्आ अ़ङ्ऩङ्चोन्मा दोराङाओ।
देकिनालो अ़ङ्का दित्छाङ माआङ्नुछाङ “अ़धिवा छाम्माय़ङ्चि”नि काय़ङ्चिदाङ्का अ़ङ्का अ़चुप्पो अ़मुऩङ्ऩङ।
१२ अ़ङ्का खानानिन्एनान युङाङ्याङ्हिदा अ़ङ्का हुङ्याङ्सा म़दोम्दाओ काचिचि,
खोन्कि सावाओ काचिचि मुङ्च़ङ्किना अ़ङ्का अ़क्छा अ़छ़ङ छाम्माय़ङ ओ निकिना खानानिन्एदा बुन्चि खाङ्मुसुङ्च़ङ।
१३ नि साम्भुङ्चिदाङ्का खानानिन्आ दिसु य़ङ्दा चुक्लो सोम्तुक्मा त़तोक्तुम?
अ़क्तात य़ङ्दा ओन्ङा खानानिन्आ अ़ङ्का लेत्मादोत,
अ़ङ्का खानानिन छेन्बिदा दुखा मान्प़दानानिन।
१४ हान सुम्कादुओदु खानानिन्एदा बान्मा निकिना अ़ङ्का चुम्साङ्युङ्साङ्च़ङ।
अ़ङ्का खानानिन दुखा अ़प़नानिमिन,
देकिनालो अ़ङ्का आम्नुओ चासुम्छेन्बि माआङ,
मेन अ़ङ्का खानानिन लाम्नानिन।
देकिनालो अ़चुमामा-पापाचिओ निम्पाङ अ़चुछाचिआ च़क्मा अ़दोत्निन,
मेन अ़चुछाचिओ निम्पाङ अ़चुमापाचिआ च़क्मादोत।
१५ अ़ङ्का आम्नुओ निम्पाङ अ़न्नुनु अ़ङ्ऩङानुयाङ्सा अ़ङ्सामाचि याङुङ्च़ङ,
खोन्कि अ़ङ्का आप्पि अ़ङ्ह़ङ्म़ङ्छाङ प़नानिन।
अ़ङ्का खानानिन च़लोक सोमातुक्नानिन्नालो दि खानानिन्आ अ़ङ्का चुक्लो सोमात़तुक्ङाऩङ?
१६ मेन खानानिन काङ्मादोत,
अ़ङ्का खानानिन दुखा मान्प़दानानिन।
खोन्नुछाङ अ़ङ्का चाप्चा मुवाङ्कि धान्नानिन्नि खानानिन्एदाओ साङ-साङ त़य़ङिन्येन।
१७ अ़ङ्का खानानिन्एदा बाइसुङ्च़ङ्ओ म़नाचिलाम्पा अ़ङ्का खानानिन्एदाङ्का दि तोक्तुङ कि?
१८ तितस खानानिन्एदा खारानि अ़ङ्का लोङ,
खोन्कि आन्निछा खोएनान अ़क्नि बाइसुङ।
तितस्आ खानानिन्एदाङ्का दि तोक्माओ निम्पाङ त़म़प्तिन म़ल़क?
दि आन्कान्का अ़क लावादा मान्तुङ्दान्का?
दि आन्कान्का अ़क याङ्युप्दा मान्कोन्दान्का?
१९ दि खानानिन त़मित्तुम्युङ्सुम्योम,
ओन्तारि आन्कान्का आम्नुओ बुदा आन्कान्का आप्पि रात्तिन्येन्चिन्का ओ?
सोमातुक्नाङ्नानिन्ओ यावाचि ओ,
आन्कान्का निनाम्हाङ्ओ अ़चुबुदा ख्रिस्तओ अ़चुपाङ्आ चेविन्येन्का,
खोन्कि झारा खानानिन काछो मुमा निम्पाङ ओ।
२० देकिनालो अ़ङ्का ताङाहिदा अ़ङ्का मिन्ङावात्नि खानानिन अ़धित्नान्निमिन हे,
खोन्कि खानानिन्आछाङ त़मिनिन्येन्वा अ़ङ्का त़धित्नाङ्ऩम़ङ हे निकिना अ़ङ्का क़ङाङा।
आम्नुओ रादा खिमा,
ऩङ्च़,
माइसुङ,
फेक्मान्चिन,
सुङ्मा,
दुम्लुमा,
ऱक्भाक खोन्कि ङेन लि हे निकिना अ़ङ्क़मा कात्याङ।
२१ अ़ङ्का लाङाबान्ङाहिदा अ़ङ्निनाम्हाङ्आ अ़ङ्का आम्नुओ तुक्वाआ लेजो ऩमुङा हे निम्पाङ खोन्कि साङ्चि बुया हेवा म़मुवा ओ,
खोचि ब़द्धेकापाङ्आ अ़चुपोप्मान्चिन,
ताङ्लान,
हेवा खोन्कि राकादाङ्का मान्लाम़युक्नान्चिन्ओसा अ़ङ्का सोखा मुमादोत हे निकिना अ़ङ्क़माकात्याङ।