९
निनाम्हाङ्ओ अ़चुम़नाचि छुक्दाम प़माय़ङ्ओ अ़तुक्वादा अ़ङ्का खानानिन छाप्मा अ़दोत्निन।
२ देकिनालो अ़ङ्का आम्नुओ मिन्मा सिन्तुङ्योङ।
खोन्कि आनेम्ऩङ्दाङ्का अखैया धिखाहुप्दाओ म़नाचि छुक्दाम प़मा म़चुम्सान्यान्चिन निकिना आम्नुओ तुक्वादा माकेदोनियादाओ म़नाचि अ़ङ्ऩङानुयाङ्सा मोचि अ़ङ्का लोङ्च़ङ्ओ।
आम्नुओ राक्आ मोचिएदाओ ब़द्धेकापाङ अ़चुचोङ्माङ काइसुयुङ्सुचि।
३ मेन ओ य़ङ्दा आम्नुओ तुक्वादा आन्काओ ऩङानुमा सोज्जे अ़कान्निन्ने निकिना,
अ़ङ्का लोनानिन्वा खानानिन चुम्सायुङ्सानिन्चिन निम्पाङ निछाचि अ़ङ्का बाइसुङ्योङ्च़ङ।
४ खा-खाक्को माकेदोनियादाओचि अ़ङ्काएनान म़बान्कि खानानिन मान्चुम्त़युक्तिन्चिन्ओ ऩधिरिन्नालो आन्कान्का लेजोदा छुक्तिन्का,
खोन्कि खानानिन ओन्ङा माआङ,
मेन आन्कान्काछाङ लेजोदा त़छुक्तिन,
देकिनालो आन्कान्का खानानिन ब़द्धे सोम्कुवा मुनिओ।
५ खोन्ओसा खानानिन्आ त़हिप्तुम्ओ छुक्तुप्मा बुयाङा तोङ्मा निकिना अ़ङ्कादाङ्का बुया निछाचि खानानिन्एदा बान्माचि दोत्नि अ़ङ्का मिनाङ।
खोन्किना ओ छुक्तुप्मा राकाङ्थेत्निआ अ़चुम्निन्ने,
मेन मिन्मादाओ छुक्तुप्मावा लिने।
अ़नुवाक मिन्माआ वेत्मा
६ य़ङ ओङा ओ: “अ़क्चिलोक कापाक्आ अ़क्चिलोक्ङा कोउ,
खोन्कि च़लोक कापाक्आ च़लोक्ङा कोउ।”a
७ झारा म़नाआ अ़साकोङ्वादा अ़छ़ङ मुओवा प़ने,
अ़ऩङाछित्सा माआङ ना राकाङ्थेत्नि।
देकिनालो अ़ऩङानुयाङ्सा काप़ निनाम्हाङ्आ सोमाअ़तुक।
८ निनाम्हाङ्आ खानानिन झारा आसिखा च़लोक प़मा ऩऱन।
खोन्ओसा खानानिन्एदा अ़धुन झारा य़ङ च़लोक युङ्ने,
खोन्कि झारा अ़नुवाक काचिओ निम्पाङ च़लोक प़मा रुवानिन।
९ ओवात्नि छाप्याङ,
“साङ्आ पाक्तु,
खोन्कि मान्तोक्कादाचि प़चि,
खोसोओ अ़साम्योक्मि अ़धुन युङ्युङ।”b
१० कापाक्ओ निकि बिउ खोन्कि चामाओ निकि चा काप़आ खानानिन बिउ ऩप़न,
खोन्कि आम्नुओ ताखालाम ऩपोइसिन्प़न,
खोन्कि आम्नुओ साम्योक्मिओ अ़सिवा अ़पोन।c
११ आम्नुओ तोक्पो सोमातुक्माओ निम्पाङ झारा य़ङ्दा खानानिन कातोक ऩमुन,
मो सोमातुक्माआ आन्कान्कालाम्पा यरुसलेम्दाओ मान्तोक्कादा म़नाचिआ निनाम्हाङ आलाङ अ़प़।
१२ ओ काचिआ निनाम्हाङ्ओ अ़चुम़नाचिओ मान्तोक्दामा तेम्तु ओन्ङा माआङ,
मेन च़लोक निनाम्हाङ आलाङ प़मायु चोङ्माङ्छाङ लोइसु।
१३ खानानिन्आ त़मुम्ओ ओ काचि सिवाआ मोचिआ निनाम्हाङ अ़लोङ।
देकिनालो मोचिआ अ़नुवाक मिन्माआ मोचि खोन्कि झारा साकोङ्छ़ङ कामुचि त़फासुम्च़म्ओ काचिआ ख्रिस्तओ अ़चुनुय़ङ्खान्दा साकोङ्छ़ङ त़मुम्ओ य़ङ खोन्कि निनाम्हाङ्ओ अ़चुलोमाय़ङ्वा त़च़न्ओ अ़छ़ङ मुयुङ्सुयुङ्सु।
१४ खोन्कि निनाम्हाङ्ओ च़लोक अ़चुसोमातुक्मा खानानिन्एदा याक्याङ्ओसा,
मोचिआ खानानिन च़लोक सोम्ऩतुक्तिन खोन्कि आम्नुओ निकिना याऩमात्तिन्प़न।
१५ अ़लुङ छाम्मा अ़ऱन्मिन्ओ छुक्तुप्मा निम्पाङ निनाम्हाङ आलाङ्ने!