मोहा प़मा
८
ब़ब़,
नाना खोन्कि निछाचि ओ,
माकेदोनियादाओ साम्भुङ्चिदा निनाम्हाङ्आ सोम्तुक्मा खाङ्म़मेत्तुचिओ अ़तुक्वादा आन्कान्का खानानिन खाएत्मा स़न्येन्का।
२ मोचि अ़चाअ़त्माओ तोक्पो चिन्माखाङ्मादाछाङ च़लोक सेवाङ्नि म़मुवाङा,
खोन्कि अ़न्नुनु मान्तोक्कादा म़मुवाङानुछाङ मोचि प़मा मिन्मादा अ़न्नुनु अ़चुमिन्मा सेङाङा।
३ देकिनालो अ़ङ्का सालुम्स़ङ प़मा ऱङ,
खोचिआ अ़चुओ ऱमाओन खोन्कि ऱमादाङ्काछाङ च़लोक अ़चुओ मिन्मावा म़प़चि।
४ मोचिआ निनाम्हाङ्ओ अ़चुम़नाचि ब़त्मा निम्पाङ लोक्ओ अ़वाखाम तोक्तुम्काने निकिना आन्कान्का अ़दु-अ़दु ऩलोन्युङ्सिन्का।
५ आन्कान्का मिनिन्काओदाङ्का च़लोक मोचिआ अ़मुवा,
मेन मोचि बुया आप्पि हाङ्पाएदा म़पुवान्चिन,
खोन्कि निनाम्हाङ्ओ अ़चुमिन्मावा आन्कान्का ऩप़न्का।
६ खोन्ओसा तितस्आ खानानिन्एदा बुया मोवात्नि च़मा यायोक त़प़न्ओसा मो अ़नुवाक काचि मुमाचिन्मा त़फासिन्ने निकिना खो आन्कान्का लोम्का।
७ हान देत्नि खानानिन सोम्कुवादा,
चेप्मादा,
तायादा,
राक्दा खोन्कि आन्कान्काएदाओ आम्नुओ सोम्तुक्मादा देत्नि नुलोक त़च़न्येन,
मोवात्निङा प़मा काचिदाछाङ च़लोक पोन्याङ्सा खारानिन।
८ अ़ङ्का खानानिन लोमाय़ङ्वा लोनाङ्नानिन्ओ माआङ,
मेन निचिओ अ़चुराक्एनान तोङ्खाङ्याङ्सा आम्नुओ सोम्तुक्माछाङ अ़छ़ङ मुयाङ्नि खाङ्मुमाओ निम्पाङ अ़ङ्का लोनानिन्ओ।
९ देकिनालो आन्हाङ्पा येसु ख्रिस्तओ अ़चुसोमातुक्मा खानानिन त़सिन्तुम्योम।
खोक्को कातोक म़मुवाङानुछाङ आम्नुओ निम्पाङ खोक्को मान्तोक्कादा म़लिसा,
खोन्ओसा खोक्कोसोओ अ़मान्तोक्दामादाङ्का खानानिन कातोक लिमा रुवानिन।
१० ओ य़ङ्दा अ़ङ्का यायोक प़नानिन,
खानानिन्आ दि अ़क दोङ बुया त़पुङ्सुम्ओ,
ओन्ग़रिङा चिन्मा अ़नुवाक मु,
प़मा ओन्ङा माआङ,
मेन मुमामिन्माछाङ तासालानुम।
११ आम्नुओ मिन्मादा चुम्मान्चिन देत्नि मुवाङा,
मोवात्निङा आम्नुओ ऱमावा पुवानुम्कि ओ काचि तासालानुम।
१२ प़मा मिन्मा याक्याङ्नालो म़नाएदा युङ्याङ्ओवात्नि छुक्तुप्मा लोक्मा खान्तु,
खोएदा मात्द़ङ्ओदाङ्का माआङ।
१३ खानानिन चाअ़त्लो त़लिसिन्ने,
खोन्कि निचि म़फोङ्नेनि अ़ङ्मिन्मा माआङ,
मेन झाराकापाङ अ़क्निवा लिने निकिना ओ।
१४ आइमित्ओ आम्नुओ च़लोक तोक्मादाङ्का मोचिओ अ़चुमान्तोक्दामादा त़फासुम्च़म,
खोन्किना मोचिओ च़लोक अ़चुतोक्माआ आम्नुओ मान्तोक्दामादा ऩफासिन।
खोन्किना मोदा अ़क्निवा लिने।
१५ ओवात्नि छाप्तायुङ्सा:
“साङ्आ ब़द्धे कोउ,
खोसोओ ब़द्धे मान्लि,
खोन्कि चुक्लो काकोप मान्तोक्कादा मान्लि।”a
तितस कोरिन्थदा
१६ मेन निनाम्हाङ आलाङ्ने,
खोक्कोसाआ तितस्ओ अ़साकोङ्वादा आम्नुओ निम्पाङ मो अ़ङ्काएदाओ राक अ़पाक्तापुवा।
१७ देकिनालो खोसाआ आन्काओ यायोक काङ्साओ ओन्ङा माआङ,
मेन खोछाङ अ़न्नुनु अ़राक्एनान खोन्कि खोसोओङा अ़मिन्माआ खानानिन्एदा बान्याङ।
१८ खोन्कि आन्कान्का खोएनान अ़क्छा निछा बाइसुम्योम्का,
खो नुय़ङ्खान खालुमादा झारा साम्भुङ्चिदा अ़ऩङ ऱङाओ ओ।
१९ मोन ओन्ङा माआङ,
खो ना कोप्माय़ङ छुक्दाम यरुसलेम्दा आन्कान्काएनान छोङ्सि काखात साम्भुङ्आ छेन्माय़ङ म़ना ओ।
ओ काचि हाङ्पाओ अ़चुओ ऩङ्लोङ्माओ निम्पाङ खोन्कि आन्कान्काएदा म़नाचि फामा मिन्मा याक्याङ्निओ खाङ्मुमाओ निकिना मुम्काओ।
२० तोक्पो छुक्तुप्मा कोप्कि खात्याङ्हिदा मोसोओ अ़तुक्वादा साङ्आछाङ लाहि ऩपाक्तिमिन्कानेनि आन्कान्का मिनिन्का।
२१ देकिनालो आन्कान्का हाङ्पाओ अ़चुखाङ्मादा ओन्ङा माआङ,
मेन म़नाचिओ अ़चुखाङ्मादाछाङ दि सायामेत्मा खान्तुओ मुयाङ,
मो मुमा मित्चिऩङ मुन्का।
२२ मोचिएनान आन्काओ निछा बाइसुम्योम्का,
खो आन्कान्का ब़द्धेकादु चिन्तुम्खोम्का,
खोन्कि ब़द्धे य़ङ्चिदा अ़राक्एनान्ओ आन्कान्का खो धिरुम्युङ्सुम्का।
खानानिन्एदाओ अ़धिवा अ़सोम्कुवाआ खो च़लोक राक्एनान्ओ लिसायुङ्सा।
२३ तितस अ़ङ्काएनान काचि कामु,
खोन्कि खानानिन फामा अ़ङ्काएनान काचि मु,
खोन्कि आन्काओ नि निछाचि साम्भुङ्चिआ बान्माय़ङ खोन्कि ख्रिस्तओ अ़चुऩङ कालोङ्चिओ।
२४ खोन्ओसा,
आम्नुओ सोम्तुक्मा खोन्कि आम्नुओ तुक्वादा आन्काओ ऩङानुमाओ अ़सालुम्स़ङ साम्भुङ्चिओ अ़चुबुदा ओ म़नाचि खाङ्मेत्तानुम्च़म।