सोम्तुक्मा
१३
अ़ङ्का म़नाचि खोन्कि निनाम्हाङ काफाचिओ अ़चुय़ङ्चिदा चेप्ङानुछाङ,
मेन अ़ङ्काएदा सोम्तुक्मा मात्द़ङ्नालो अ़ङ्का किङ्किलिङ्लिङ साङ्ओ घन्ता माङ्लो झेम-झेम साङ्ओ मानि ओन्ङा लिङा।
२ अ़ङ्काएदा निनाम्हाङ्य़ङ खालुमा सावा याक्याङ खोन्कि झारा अ़कोङ्दुम्चि खोन्कि झारा ताया तुप्मा ऱङ्च़ङ,
खोन्कि भ़ऱचि सोत्मातारिओ झारा सोम्कुवा अ़ङ्काएदा याक्याङ्नुछाङ अ़ङ्काएदा सोम्तुक्मा मात्द़ङ्नालो अ़ङ्का दित्छाङ माआङ।
३ अ़ङ्काएदा युङ्याङ्ओ झारा अ़ङ्चासुम्छेन्बि हात्तुङ्च़ङ,
खोन्कि अ़ङ्याम्छाङ ह़त्मा प़ङ्च़ङ,
मेन अ़ङ्काएदा सोम्तुक्मा मात्द़ङ्नालो अ़ङ्का दित्छाङ अ़तोक्ऩङ।
४ सोम्तुक्मा हुङ्मा काऱ खोन्कि फामामिन्मा मु,
सोम्तुक्मा ऩङ्च़ अ़मुनिन,
ना ऱक्भाक्ङा मु ना तोक्पो लि।
५ सोम्तुक्मा चाप्चिरोङ अ़मुनिन,
अ़नुलोक अ़लामुन,
अ़नाप्मा अ़लुनिन,
अ़अ़त्पा य़ङ्चि अ़मित्तुन्युङ्सुन्चिन।
६ सोम्तुक्मा अ़अ़त्पादा अ़ऩङाअ़नुनिन,
मेन अ़छ़ङ य़ङ्दा अ़ऩङानु।
७ सोम्तुक्माआ झारा य़ङ्चि दिप्तुचि,
झारा य़ङ्चिदा साकोङ्छ़ङ मु,
झारा य़ङ्चिदा सोम्कुवा मु,
झारा य़ङ्चि आङ्तुचि।
८ सोम्तुक्मा देम्खाछाङ अ़लुक्निन।
निनाम्हाङ्य़ङ खालुमा सावाचि म़लुक्खात,
निय़ङ्चि म़छेक्खात,
तायाचि म़माखात।
९ आन्ताया मान्याक्युक,
आन्निनाम्हाङ्य़ङ् चेप्मा मान्याक्युक।
१० मेन याक्ओ खाउग़रि म़ता,
खोन्कि मान्याक्युक्ओ माखात।
११ अ़ङ्का छा युङाङ्याङ्हिदा छाआवात्निङा चेवाङ,
छावात्निङा मिनाङ,
छावात्निङा दुम तुसाङ,
अ़ङ्का थाङाछा लिसाङ्किना छावात्नि च़मा छिरुङ।
१२ ओन्ग़रि आन्कान दर्पनादावा थेम्बुवारिरि खाम,
मेन मोन्ग़रि छेङ्छेङ्छेङ्वा खाङ्मुन।
ओन्ग़रि अ़ङ्का अ़क्चिलोक ओन्ङा तुप्तुङ,
देत्नि निनाम्हाङ्आ अ़ङ्का नुलोक ऩसिन्ताङ्युङ्साङ मोवात्नि मोन्ग़रि अ़ङ्का झारा तुप्तुङ।
१३ साकोङ्छ़ङ मुमा,
तामामित्मा,
खोन्कि सोम्तुक्मा,
ओचि सुम्कातात अ़धुन्तारि म़युङ्युङ।
मेन ओचिदाओ तोक्पो सोम्तुक्मा ओ।