निचि सोमातुक्मा
१५
आन्कान साकोङ्छ़ङ्दा नुलोक पोइन्ओचिआ मान्पोन्म़युक्ओ म़नाचि आङ्मादोत खोन्कि आन्कान आप्पि ओन्ङा ऩङानुमान्चिन अ़नुनिन।
२ आन्कान झारासाआ आन्तेन्पाङ मित्मादोत,
खोन्कि अ़नुवाक य़ङ्चिआ खोसोओ साकोङ्छ़ङ पोन्मा फासु।
३ देकिनालो ख्रिस्तआ खोक्को आप्पि अ़चुऩङा मान्नुम़दान्चिन,
मेन ओवात्नि छाप्याङ,
“खानानिन कासुङ्चिओ अ़चुसुङ्मा अ़ङ्काएदा छुक्ता।”a
४ बुया म़छाप्ताओ झारा य़ङ्चि आन्कान चिन्माओ निम्पाङ म़छाप्ता ओ,
खोन्कि साम्कालिन्आ आन्कान तामामित्मा म़प़,
खोन्ओसा नुलोक आन्कान निनाम्हाङ्आ म़हिप्ताओ य़ङ्चि हुङुम्च़म।
५ हुङ्मा खोन्कि राक काप़ निनाम्हाङ्आ खानानिन ख्रिस्त येसुएनान अ़क्तात लिमाकि अ़क्छा निएदा अ़क्मिन्मादा ह़ङ्मा ऩप़न्ने।
६ खोन्किना अ़क्मिन्माओ लियाङ्सा अ़क्य़ङ्आ आन्हाङ्पा येसु ख्रिस्तओ अ़चुनिनाम्हाङ पापाओ अ़चुऩङ लोङ्मा खानानिन रुवानुम।
नुय़ङ्खान निरावाचि खोन्कि यहुदिचिओ निम्पाङ
७ खोन्ओसा निनाम्हाङ्ओ अ़चुऩङ लोङ्माओ निम्पाङ ख्रिस्तआ खानानिन ऩलोइन्युङ्सिन्वा खानानिन्छाङ अ़क्छा निएदा लोक्मुवानिन।
८ अ़ङ्का खानानिन लोनानिन,
ख्रिस्त देकि सिप्मायाम्बुन म़लिसाओचिओ अ़चुहारुक म़लिसाओनालो,
आन्सुन्तुम्चिएदा खोक्कोसाआ अ़मुवाओ हिप्माय़ङ्चिदा निनाम्हाङ अ़छ़ङ म़मुयाङ निकिना खाङ्मुमा ख्रिस्त सिप्मायाम्बुन म़लिसाओ।
९ खोन्कि खोक्कोसोओ अ़चुसोम्तुक्माआ निरावाचिआ निनाम्हाङ्ओ अ़चुऩङ अ़चोन्ने।
साम्कालिन्दा ओवात्नि छाप्तायुङ्सा,
“खोन्ओसा निरावाचिओ अ़चुरादा अ़ङ्का खानानिन चोन्नानिन,
खोन्कि आम्नुओ ऩङ्दा साम्ऱङ लुङा।”b
१० खोन्कि ओवात्नि लाय़ङ्याङ,
“निरावाचि ओ,
खोक्कोसोओ अ़चुम़नाचिएनान ऩङानुसानिन्चिन।”c
११ खोन्कि हान्छाङ,
“झारा निरावाचि ओ,
हाङ्पा चोन्तानुम,
खोन्कि झारा म़नाचिआ खोक्को अ़चोन्ने।”d
१२ खोन्कि यसैया हान्छाङ य़ङ्याङ,
“यिसैओ अ़भुङ्दाङ्का अ़क्छा म़ता,
खोक्को निरावाचिदा हाङ्म़मु,
खोक्कोएदा निरावाचि सोम्कुवा म़मु।”e
१३ सोम्कुवा मुमा खान्तुओ निनाम्हाङ्आ झारा मिन्माचानुमा खोन्कि सेवाङ्निआ ऩभेम्सिन्ने,
देकिनालो खानानिन खोक्को साकोङ्छ़ङ त़मुम।
खोन्ओसा सेङ्लावाओ अ़चुसावाआ आम्नुओ सोम्कुवा पोन्याङ्सा खात।
निरावाचिएदा पावल्ओ अ़काचि
१४ अ़ङ्ब़ब़,
नाना खोन्कि निछाचि ओ,
अ़ङ्का आप्पि आम्नुओ तुक्वादा अ़ङ्सोम सुवायुङ्सा,
खानानिन आप्पि अ़नुवाक नुमाआ त़भेप्तिन्युङ्सिन खोन्कि झारा ताया खानानिन्एदा याआयुङ्सा,
खोन्कि अ़क्छा निएदा चिन्मा काऱ त़लिसिन्युङ्सिन।
१५ मेन निनाम्हाङ्ओ अ़चुआसिखा अ़ङ्का ऩपुवाङ्युङ्साङ्ओसा अ़ङ्का राक्एनान खानानिन देम य़ङ्चि मित्मेत्मा निम्पाङ छाप्तुङ्युङ्सुङ।
१६ निनाम्हाङ्ओ अ़चुआसिखालाम्पा अ़ङ्का येसु ख्रिस्तओ अ़चुतुक्वादा निरावा म़नाचि नुय़ङ्खान खाएत्तुङ्च़ङ।
ओवात्नि,
अ़ङ्का अ़क्छा काब़क्पा लिसाङ्किना निनाम्हाङ्ओ अ़चुऩङानुओ हेन्खोक्वा प़सि निरावाचि खोक्कोसोओ अ़चुबुदा बात्तुङ्च़ङ।
मोचि सेङ्लावाआ सेङ्लो म़मुयुङ्सुचिओ।
१७ निनाम्हाङ्ओ निम्पाङ ख्रिस्त येसुआ अ़ङ्काचिदा दे अ़मुवायुङ्सा,
मोसोओ अ़तुक्वादा अ़ङ्ऩङानुयाङ।
१८ अ़ङ्का खालुसुङ्ओ य़ङ्चि खोन्कि मुङ्ओ काचिचिलाम्पा देत्नि ख्रिस्तआ निरावाचि लोमावा काच़चि म़मुयुङ्सुचि,
मो य़ङ्चिदाङ्का दित्छाङ चेप्मा अ़ङ्का राक अ़मुऩङ।
१९ ओ म़दोम्दाओ काचिचि,
सावापोरिओ बुन्चि,
सेङ्लावाओ अ़चुसावालाम्पा अ़ङ्का मुङ्युङ्सुङ।
ओवात्नि यरुसलेम्दाङ्का इल्लुरिकन भेप्लो झारादात्नि ख्रिस्तओ अ़चुनुय़ङ्खान अ़ङ्का खालुसुङ्युङ्सुङ।
२० नि म़नाचिआ नुय़ङ्खान खाअ़लुसाचिआओदा अ़ङ्का ख्रिस्तओ अ़चुऩङ खामान्लुदामा निम्पाङ मान्एन्अ़युक्ओदा नुय़ङ्खान खालुमानि अ़ङ्मिन्मा पाक्तुङ्युङ्सुङ।
२१ देकिनालो ओवात्नि छाप्तायुङ्सा,
“खोक्कोसोओ अ़चुतुक्वादा साङ्चि देम्खाछाङ खामान्एत्म़युक,
मोचिआ खोक्को अ़खाङ,
खोन्कि खोक्कोसोओ अ़तुक्वादा साङ्चिआ देम्खाछाङ मान्एन्अ़युक
मोचिआ अ़तुप।”f
रोम खात्मा पावल्ओ अ़मित्चिऩङ
२२ खोन्ओसाआङा,
अ़ङ्का खानानिन्एदा बान्मा ब़द्धेकादु छेक्ताङ्युङ्साङ।
२३ मेन ओन्ग़रि ओ खाहुप्चिदा नुय़ङ्खान खालुमा अ़ङ्काचि अ़ङ्का चिउङ्युङ्सुङ।
ब़द्धेकादोङ्दाङ्का खानानिन्एदा बान्मानि मिनाङ्याङ्ओ।
२४ खोन्किना अ़ङ्का स्पेन खात्ङाङाहिदा खानानिन तुप्मानि मिन्ङाङा।
अ़चित लेन्तारि अ़ङ्का खानानिन्एनान यावायोक्दा ऩङानुङाचिन्ङान्च़ङ्कि खानानिन्आ अ़ङ्को अ़ङ्कोन्खादा त़फाङाऩङ्हेनि मिन्ङाङा।
२५ मेन हान,
निनाम्हाङ्ओ अ़चुम़नाचि फामायु छोक्सि अ़ङ्का यरुसलेम खात्ङाङा।
२६ देकिनालो यरुसलेम्दाओ निनाम्हाङ्ओ अ़चुम़नाचिओ रादा मान्तोक्कादाचिओ निम्पाङ माकेदोनिया खोन्कि अखैयादाओ साम्भुङ्चिआ अ़चिलोक छुक्दाम प़मा अ़छ़ङ अ़मुवायुङ्सा।
२७ ओ छुक्दाम निरावाचिआ अ़चुऩङानुयाङ्सा अ़कोआ खोन्कि मोचिआ अ़नुछ्याङा मो काचि मुमादोत,
देकिनालो निरावाचि यहुदिचिओ अ़चुलावामि आसिखाचिदा म़होलायुङ्सानालो निरावाचिआछाङ हेन्खामादाओ आसिखाचिलाम्पा यहुदिचि फामाचिदोत।
२८ खोन्ओसा देम्खा ओ काचि चिउङ,
मोचिओ निम्पाङ कोप्माय़ङ ओ फेक्वा प़ङ्चिउङ्च़ङ्कि खानानिन तुप्नानिन,
खोन्कि अ़ङ्का स्पेन खात्ङा।
२९ अ़ङ्का सिन्तुङ्योङ,
अ़ङ्का खानानिन्एदा बान्ङाहिदा ख्रिस्तओ च़लोक अ़चुआसिखादा बान्ङा।
३० ब़ब़,
नाना खोन्कि निछाचि ओ,
आन्हाङ्पा येसु ख्रिस्त खोन्कि सेङ्लावाओ अ़चुसोम्तुक्मालाम्पा अ़ङ्को निम्पाङ निनाम्हाङ्एदा चात्लो यामारानिन खोन्कि अ़ङ्दुखादा वाङायुङ्सानिन्नि अ़ङ्का खानानिन यायोक प़नाङ्नानिन।
३१ यामारानिन खोन्ओसा अ़ङ्का यहुदियादाओ साकोङ्छ़ङ मान्मुकादाचिएदाङ्का रात्मान्चिन ऱङाने,
खोन्कि यरुसलेम्दाओ अ़ङ्फामायु काचि निनाम्हाङ्ओ अ़चुम़नाचिआ लोक्माखान्तुओ लिने।
३२ मोवात्नि निनाम्हाङ्ओ अ़चुमिन्मालाम्पा अ़ङ्ऩङानुयाङ्सा खानानिन्एदा बान्माकि आम्नुओ यावायोक्दा अ़ङ्का अ़ऩङ्वा लामालिमा ऱङाने।
३३ सेवाङ्नि काप़ निनाम्हाङ खानानिन झाराएनान अ़धुन म़युङ्ने।
मोवात्निङा लिने।