निचि छ़ङ्मान्छेन्दानुम्च़म
१४
साकोङ्छ़ङ्दा नुलोक मान्पोन्युक्ओ म़ना लोआनुम,
खोन्कि मोचिओ अ़चुमिन्माओ अ़तुक्वादा दुम मान्तुदानिन।
२ अ़मात्ऩङ्ओ निम्पाङ,
अ़क्छा म़नाआ झारा चामायु चामा नु निकिना साकोङ्छ़ङ मु,
मेन साकोङ्छ़ङ्दा नुलोक मान्पोन्युक्ओ म़नाआ लिम्खान ओन्ङा चा।
३ काचाआ मान्चाकादा म़ना अ़सुङ्तुन्ने,
खोन्कि मान्चाकादाआ काचा छ़ङ्अ़छेन्तुन्ने।
देकिनालो निनाम्हाङ्आ झारा म़लोउयुङ्सुचि।
४ निओ अ़हारुक्ओ अ़छ़ङ्काछेन खाना साङ ओ?
अ़हाङ्पाआ ए म़ल़क अ़हारुक नुलोक काचि मुवाओ हे फिसुओ,
अ़छ़ङ मु।
खोन्कि अ़हारुक तोङ्लो काचि मुमा ऱ,
देकिनालो अ़हाङ्पाआ मो फामा ऱ।
५ अ़क्छा म़नाआ अ़क लेन नि लेन्दाङ्का अ़च़वाङ लेन्नि मित्तु,
नि म़नाआ झारा लेन अ़क्निवा मित्तु।
मेन झारासाआ आप्पिओ मिन्मादा नुलोक अ़छ़ङ मुमादोत।
६ साङ्आ खाउ लेन अ़च़वाङ लेन्नि मित्तु,
मोसाआ हाङ्पा साया मेत्माओ निम्पाङ मु।
साङ्आ झारा चामायु चा,
मोसाआ हाङ्पा साया मेत्माओ निम्पाङ चा,
देकिनालो खोसाआ निनाम्हाङ आलाङ प़।
साङ्आ अ़चान,
खोसाआ निनाम्हाङ साया मेत्माओ निम्पाङ अ़चान खोन्कि निनाम्हाङ आलाङ प़।
७ आन्कान साङ्छाङ आप्पि ऩङानुमान्चिन्ओ निम्पाङ अ़ह़ङिमिन खोन्कि आन्कान साङ्छाङ आप्पिओ निम्पाङ अ़स़न्मिन।
८ आन्कान ह़ङिन्नुछाङ हाङ्पाओ निम्पाङ्ङा आन्कान ह़ङिन खोन्कि आन्कान स़न्दान्नुछाङ आन्कान हाङ्पाओ निम्पाङ स़न्दान।
आन्कान स़न्दान ने कि ह़ङिन्ने,
आन्कान निनाम्हाङ्ओङा ओ।
९ देकिनालो म़सुवादाओचि खोन्कि काह़ङ्चि ह्वातात्माङ्सोओ अ़चुहाङ्पा लिमा निम्पाङ ख्रिस्त म़सुवादा खोन्कि म़लासाखोन्तालोन्ता।
१० देकि खानाएनान्ओ साकोङ्छ़ङ कामुचिओ अ़चुछ़ङ त़छेन्तुङुचि?
माङ्लो देकि खाना मोचि त़सुङ्तुङुचि?
देकिनालो आन्कान झारा निनाम्हाङ्ओ अ़चुछ़ङ्छेन्खा बुदा एप्मादोत।
११ देकिनालो छाप्तायुङ्सा,
“हाङ्पा म़य़ङ्याङ,
‘देत्नि अ़ङ्का अ़ह़ङ मुङाङा,
झारा तुम्प़छ़क अ़ङ्बुदा तोम्मादोत,
खोन्कि झारा लेम्आ निनाम्हाङ्ओ अ़चुऩङ चोन्मादोत।’”a
१२ खोन्ओसा आन्कान झारासाआ आ-आप्पि मुम्ओ आन्काचिओ अ़खिप निनाम्हाङ प़मादोत।
अ़क्छा निएदा धुङ्काधुङ मान्मुदानिन
१३ खोन्ओसा आन्कान अ़क्छा निएदा हान्दाङ्का छ़ङ अ़छेन्तिमिन्ने।
मेन आन्निछाओ अ़लाम्दा धुङ्मायु माङ्लो लाम काछेक य़ङ देम्खाछाङ मान्युङ्दामा अ़छ़ङ मुम्ने।
१४ अ़ङ्का सिन्तुङ्योङ खोन्कि हाङ्पा येसुआ अ़ङ्का अ़छ़ङ ऩमुवाङ्युङ्साङ,
खाक्कोछाङ चामायु आप्पि अ़पोप्निन,
मेन साङ्आ मो पोप्ताओनि मित्तुनालो मोसोओ निम्पाङ मो पोप्ओङा लि।
१५ खाना दि त़चा मोसाआ आम्निछाओ अ़मिन्मा त़तुक्तुप़नालो खाना सोम्तुक्मादा त़तुङ्नानान।
मो आम्निछाओ निम्पाङ ख्रिस्त म़सुवा,
आम्चामायुआ खो अ़लुक्निन्ने।
१६ खोन्ओसा खाना दि अ़नुवाक्नि त़मित्तु,
मोसाआ नि म़नाचि अ़त्लो चेप्माओ अ़लाम लिनालो मो मान्मुदो।
१७ देकिनालो निनाम्हाङ्ओ अ़चुहाङ्होन चामा खोन्कि दुङ्माओ अ़तुक्वा माआङ,
मेन सेङ्लावादा,
साम्योक्मि तोक्मायु,
सेवाङ्नि खोन्कि ऩङानुमान्चिन्ओ।
१८ साङ्आ ओवात्नि ख्रिस्त ब़रु,
मो य़ङ्आ निनाम्हाङ्ओ अ़चुऩङानु खोन्कि म़नाचिआ अ़नुवाक अ़कान।
१९ खोन्ओसा आन्कान दिसाआ सेवाङ्नि म़प़,
मो य़ङ्चि त़ङ्तुम्च़म्ने खोन्कि मोसाआ अ़क्छा निएदा सोम्कुवा पोइसु।
२० चामायुओ निम्पाङ निनाम्हाङ्ओ अ़चुकाचि मान्लुक्दो।
अ़नुछ्याङा झारा चामायु सेङ्याङ,
मेन खाना त़चाओसाआ निचि धुङ्मा अ़नुवाक माआङ।
२१ सा चामाआ,
अङ्गुरा माङ्वा दुङ्माआ,
माङ्लो खाक्कोछाङ चामायुआ आम्निछा धुङ्नालो मोचि मान्चादामा,
मान्दुङ्दामाङा अ़नुवाक लि।
२२ खाना साकोङ्छ़ङ त़मुओ मो य़ङ्चिओ अ़तुक्वादा निनाम्हाङ खोन्कि खाना आप्पिदा युङ्सु।
आप्पि तोङ्नि काइसुओ य़ङ अ़त्लो मान्मित्कादा म़ना आसिखा कातोक ओ।
२३ मेन साङ मान्केङ मुकि चामायु चानालो मो निनाम्हाङ्आ लाहि अ़पाक,
देकिनालो मोसाआ साकोङ्छ़ङ्एनान मान्चायुक्तु।
साकोङ्छ़ङ्एदाङ्का अ़लोन्निन्ओ झारा य़ङ हेवा ओ।