स़मा खोन्कि ख्रिस्तदा ह़ङ्मा
६
खोन्नालो आन्कान दे य़ङिन?
दि निनाम्हाङ्ओ अ़चुसोम्तुक्मा पोन्ने निम्पाङ आन्कान हेवा मुमायुङ्मा म़ल़क?
२ देम्खाछाङ माआङ!
आन्कान्एदा हेवाओ अ़सावा मात्द़ङ,
देत्नि आन्कान हान्छाङ मोदाङा ह़ङ्मा?
३ आन्कान बप्तिस्मा लोउम्कि ख्रिस्त येसुएनान अक्निवा लिसिन्हिदा खोक्कोएनान अ़क्नि आन्कान स़न्युङ्सिन।
ओ य़ङ खानानिन त़सिन्तिमिन्येन?
४ खोन्ओसा बप्तिस्मालाम्पा आन्कान खोक्कोएनान अ़क्नि खुम्तिन।
देत्नि निनाम्हाङ पापाओ साम्स़रिओ अ़चुसावालाम्पा ख्रिस्त म़सुवादाओदाङ्का म़खोन्तालोन्ता,
मोवात्निङा आन्कान्छाङ अ़ऩङ्वा ह़ङ्म़ङ्ओ लाम्दा कोलिन्ने।
५ खोक्कोसोओ अ़चुस़मादा आन्कान खोक्कोएनान अ़क्तात लिसिन्युङ्सिन्ओसा अ़नुछ्याङा खोक्को म़खोन्तालोन्तावात्निङा आन्कान्छाङ खोन्तिन्लोन्तिन।
६ आन्कान सिन्तुम्योम बुयाओ हेवामि आन्ह़ङ्म़ङ क्रुस्दा ख्रिस्तएनान ख़न्तायुङ्सा।
खोन्ओसा आन्ह़ङ्म़ङ्चिदा हेवाओ अ़सावाआ अ़क़म्तुन्ने।
हान्दाङ्का ह्यात्नि आन्कान हेवाओ अ़हारुक माआङ।
७ देकिनालो साङ सुवादायुङ्सा,
मो हेवादाङ्का लेइसायुङ्सा।
८ ख्रिस्तएनान आन्कान स़न्युङ्सिन्नालो ना खोक्कोएनान आन्कान ह़ङिन निकिना साकोङ्छ़ङ्छाङ आन्कान मुन।
९ आन्कान सिन्तुम्योम ख्रिस्त म़सुवादाओदाङ्का म़खोन्तालोन्तायुङ्साओसा खोक्को देम्खाछाङ ऩलानिन्स़निन।
हान्दाङ्का ह्यात्नि खोक्कोएदा स़मा सावाआ देम्खाछाङ हाङ अ़मुन।
१० खोक्को म़सुवाओसा,
हेवाओ अ़सावा खोक्कोएदा मात्द़ङ,
खोन्कि ओन्ग़रि खोक्को निनाम्हाङ्एनान्ओ यावायोक्दा म़युङ्याङ।
११ मोवात्नि खानानिन्एदाछाङ हेवाओ अ़सावा मात्द़ङ,
मेन ख्रिस्त येसुएदा निनाम्हाङ्ओ निम्पाङ अ़ह़ङ त़लिसिन्ओ मित्मान्चिन्दोत।
१२ खोन्ओसा पोक मित्मावात्नि तुङ्मा अ़दोत्निन्ने निकिना आम्नुओ स़दाओ पोक्दा हेवा हाङ मुमा मान्प़दानुम।
१३ आम्नुओ पोक्ओ खाक्कोछाङ अ़फुत्चि हेवा मुमा निम्पाङ अ़अ़त्पाओ मित्चिऩङ्चिदा मान्याङ्दानुम्च़म।
मेन स़मादाङ्का ह़ङ्म़ङ्दा काफान्नान्चिन म़नाचिवात्नि निनाम्हाङ्ओ अ़नुवाक अ़चुकाचि मुसि पुवालावानिन्चिन खोन्कि झारा आम्नुओ पोक्फुत्चि साम्योक्मिओ अ़मित्चिऩङ्चिओ निम्पाङ याङानुम्च़म।
१४ हेवा खानानिन्एदा हाङ अ़मुनिन,
देकिनालो खानानिन य़ङ्हुप्ओ अ़क़म्मादा त़याइमिन्येन,
मेन सोम्तुक्माओ अ़क़म्मादा त़याइन्येन।
साम्योक्मिओ अ़हारुक्चि
१५ हान दि म़ल़क?
दि आन्कान य़ङ्हुप्ओ अ़क़म्मादा अ़याइमिन्येन,
मेन सोम्तुक्माओ अ़क़म्मादा आन्कान याइन्येन्ओसा हेवा मुमा म़ल़क?
देम्खाछाङ माआङ।
१६ दि खानानिन त़सिन्तिमिन्येन,
लोमाय़ङ हारुक्चिवात्नि खानानिन साङ आप्पि त़प़न्लाविन्चिन,
खानानिन लोन्ओवा त़च़न्ओ आम्नुओ हाङ्पाओ अ़चुहारुक्चि ओ।
खानानिन हेवाओ अ़हारुक लिमा त़ऱन,
मोसाआ स़मादा त़खात्तिन।
माङ्लो खानानिन निनाम्हाङ्आ लोमाय़ङ छेन्मा त़ऱम,
मोसाआ साम्योक्मि ह़ङ्म़ङ्दा त़खात्तिन।
१७ मेन निनाम्हाङ आलाङ्ने,
देकिनालो खानानिन अ़क्दु हेवाओ अ़हारुक त़मुन्येन,
हान खाक्को अ़छ़ङ चिन्माय़ङ खानानिन्आ त़तोक्तुम,
मो झारा साकोङ्वाआ त़लोउम्युङ्सुम।
१८ खानानिन हेवादाङ्का त़फोङ्सिन्युङ्सिन खोन्कि साम्योक्मिओ अ़हारुक त़लिसिन्युङ्सिन।
१९ खानानिन्आ तुप्मा त़ऱम्ने,
अ़ङ्का अ़मात्ऩङ्चिदा चेप्ङाङा।
खानानिन्आ अ़क्दु आम्नुओ पोक्फुत्चि पोप्माय़ङ खोन्कि च़लोक हेवाओ निम्पाङ त़याङुम्च़म,
हान मोवात्निङा खानानिन सेङ्लो त़लिनिन्ओसा झारा आम्नुओ पोक्फुत्चि साम्योक्मि काचिदा याङानुम्च़म।
२० खानानिन हेवाओ अ़हारुक त़मुन्येन्हिदा खानानिन निनाम्हाङ्ओ अ़चुसाम्योक्मि मित्मादा मान्प़त़दानिन्चिन।
२१ मोन्ग़रि त़मुम्ओ य़ङ्चिदा आइमित आम्नुओ लेजो कात,
मो य़ङ्चिदाङ्का खानानिन्आ दि त़तोक्तुम?
मोसोओ अ़सिवा स़मा ओ।
२२ मेन हान आम्नुओ हेवादाङ्का त़फोङ्सिन्किना निनाम्हाङ्ओ अ़चुहारुक त़लिसिन्युङ्सिन।
खोन्कि खानानिन्आ त़तोक्तुम्ओ काचि सिवाआ सेङ्माय़ङ्दा त़तित्तिन।
ओसोओ अ़सिवा अ़लुक्निन्ओ ह़ङ्म़ङ ओ।
२३ देकिनालो हेवाओ अ़लुङ स़मा ओ,
मेन निनाम्हाङ्आ मोहा प़माय़ङ्ओ अ़चुआसिखा ख्रिस्त येसु आन्हाङ्पाएदा अ़लुक्निन्ओ ह़ङ्म़ङ ओ।