सावल्ओ अ़ह़ङ्म़ङ फान्ताओ
९
मोन्हिदा हाङ्पाओ अ़काखेङ्चि सेत्माचि मिन्माआ दुङ्तिम मुयाङ्सा सावल मुलो काब़क्पाएदा खारा।
२ खोन्कि खोसाआ येसु ख्रिस्तदा साकोङ्छ़ङ कामु दुवाछानेकि मेत्छाछाने साङ धिरुचिनुछाङ लाप्माचिकि यरुसलेम्दा तात्माचि पाङ तोक्तुने निकिना खोसाआ दमस्कस्दाओ यावायोक्खिम्चिएदाओ बुसुवाचिओ अ़चुऩङ्दा छाप्लावा छाप्प़लुवा।
३ खोन्किना सावल कोन्याङ्सा दमस्कस सहराओ अ़च़क्दा तालाहिदा म़प्च़क़क्दा निनाम्मादुङ्का छोक्छोक्छोक्वाओ साम धाकि खोसोओ अ़ऱङ्कोप्नि उप्तुदिसु।
४ खो बाखादा धुवाधा,
खोन्कि खोसाआ ओवात्नि य़ङाङाओ अ़क्तात य़ङ एनु,
“सावल!
सावल!
खाना अ़ङ्का देकि दुखा त़प़ङाङा?”
५ खोन्किना खोसाआ सेनु,
“हाङ्पो,
खानानिन साङ ओ?”
खोन्कि खोक्कोसाआ ऩलोवाङ,
“अ़ङ्का येसु ओ,
खोङा खाना दुखा त़प़ङु!
६ हान पुवालोन्ताकि सहरादा खारा,
खोन्कि खाना दि मुमादोत,
मोदा खाना खाऩएत।”
७ सावल्एनान काखात म़नाचिआ अ़क्छा चेवाङाओ ना अ़एना,
मेन साङ्छाङ मान्खाङ्अ़दाओसा मान्चेप्माङ म़एवायुङ्सा।
८ सावल बाखादाङ्का पुवालोन्ता,
मेन अ़म़क होउहिदा खो खाङामान्खाङ।
खोन्ओसा म़नाचिआ खोसोओ अ़छुक्दा अ़क़क्ताकि दमस्कस्दा अ़खात्ता।
९ खो सुम्कालेन्तारि खामान्खाङ्कादा लिसाकि ना चाङा चा,
ना चाक्वाङा दुङा।
१० हननिया अ़ऩङ मुवाङाओ येसुओ अ़क्छा अ़चुकाखेङ दमस्कस्दा युङाङा।
हाङ्पाआ खो सेन्चिदा “हननिया!”
नि अ़बुत्ता।
खोसाआ लो,
“ओदा युङ्ङाङा हाङ्पो।”
११ खोन्कि हाङ्पाआ खो अ़लोवा,
“पुवालोन्ताकि द़क्बानिओ अ़धिवा लाम्दा खारा,
खोन्कि यहुदाओ अ़खिम्दा सावल अ़ऩङ मुयाङ्ओ तार्सस सहरादाओ अ़क्छा म़ना सेनु,
देकिनालो खो ओन्ग़रि यामात्याङ।
१२ खोसाआ हननिया अ़ऩङ मुवाङाओ अ़क्छा म़ना ताकि खो लामाखाङ्मा ऱने निकिना खोएदा अ़छुक युङ्सुओ अ़सेन्चिदा अ़ङ्का खाङ्मेत्तुङ्युङ्सुङ।”
१३ मेन हननियाआ लासुलो,
“हाङ्पो,
मो म़नाआ यरुसलेम्दाओ आम्नुओ म़नाचि च़लोक अ़त्लो मुचिओ अ़ङ्का ब़द्धेकापाङ्दाङ्का ओसोओ अ़तुक्वादा एनुङ्युङ्सुङ।
१४ खोन्कि झारा खानानिन साकोङ्छ़ङ कामुचि लाप्माचि निकिना मुलो काब़क्पाचिदाङ्का पाङ तोक्तुकि ओदा तायुङ्सा।”
१५ मेन हाङ्पाआ हननिया अ़लोवा,
“खारा!
देकिनालो निरावाचि,
हाङ्चि खोन्कि इस्राएलि म़नाचिओ अ़चुबुदा अ़ङ्ऩङ खालुमा निकि खो अ़ङ्का छेन्तुङ्युङ्सुङ।
१६ देकिनालो अ़ङ्ऩङ्ओ निम्पाङ खोसाआ देम दुखा आङ्मादोत,
अ़ङ्का खो खाङ्मेत्तुङ।”
१७ खोन्किना हननिया खाराकि यहुदाओ अ़खिम्दा वाङा।
खोन्कि सावल्एदा अ़छुक युङ्सुकि लो,
“सावल निछा,
हाङ्पा येसु खाना त़बानाङाओ लाम्दा खानाएदा खाङ्म़मुसान्चिन,
खोसाआङा अ़ङ्का खाना लामाखाखाङ्मा त़ऱने खोन्कि सेङ्लावाआ त़भेप्ने निकिना अ़ङ्का ऩछुत्ताङ्युङ्साङ।”
१८ खोन्कि च़क्नि सावल्ओ अ़म़क्दाङ्का ङाओ अ़चिम्चिवाको दि-दिचि म़धा,
खोन्कि खो लामाखाखाङ्मा रुवा।
खोन्किना खो पुवालोन्ताकि बप्तिस्मा लोआ।
१९ खोन्कि चा-चाचिआकिना खोसाआ सावा तोक्तु।
सावल अ़क्चित लेन्तारि दमस्कस्दाओ काखेङ्चिएनान युङा।
सावल्आ दमस्कस्दा खालुमाय़ङ
सावल अ़क्चित लेन्तारि दमस्कस्दाओ काखेङ्चिएनान युङा।
२० खोसाआ मोन्ग़रिङा aयावायोक्खिम्चिदा “येसुङा निनाम्हाङ्ओ अ़चुछा ओ” निकिना खालुमा पुङ्सु।
२१ खोन्कि झारा खोसोओ अ़य़ङ काएन्चि दोम्तुदोचिकि मोचि,
“ओ म़ना येसुएदा साकोङ्छ़ङ कामुचि यरुसलेम्दा कालुक खोन्कि ओदाछाङ मोचि छ़माचिकि मुलो काब़क्पाचिएदा खात्माचि मिन्माआ बानाओ माआङ कि?”
नि म़य़ङा।
२२ मेन सावल्ओ अ़खालुमा च़लोक सावापोरि लियाङ्साखारा,
खोन्कि “येसुङा ख्रिस्त ओ” निकिना सालुम्स़ङ प़चिकि दमस्कस्दा कायुङ यहुदिचि दोम्पुवाचिचि मुचि।
२३ ब़द्धेकालेन खाराकिना सावल सेत्मा निकि यहुदिचि थालि म़बाङ्ता।
२४ मेन मोचिआ खो सेत्मा अ़लाप्ताङाओ य़ङ सावल्आ सिन्तु धिरु।
अ़खाखुत अ़खोलेन खो सेत्मा निकिना दमस्कस सहरादाओ वाङ्खा लाम्चिदा खोचिआ अ़सुक्तायुङ्साङा।
२५ खोन्ओसा खोसोओ अ़काखेङ्चिआ सावल अ़खाखुत्ङा अ़धिवा खेङ्दा अ़पाआकि कुदारिदुङ्का अ़धान्ता।
सावल यरुसलेम सहरादा
२६ सावल यरुसलेम्दा तालाकि काखेङ्चिएनान होन्मान्चिन लामा,
मेन मो काखेङ्चि सावल्दाङ्का म़क़सा,
देकिनालो मोचिआ खो अ़नुछ्याओ काखेङ निकिना साकोङ्छ़ङ मान्मुअ़दा।
२७ मेन बारनाबास्आ सावल छाम्माय़ङ्चिएदा खात्तु।
खोन्कि सावल्आ लाम्दा येसु देत्नि खाओ,
खोन्कि हाङ्पा खोएनान म़हान्ताओ,
खोन्कि खो दमस्कस्दा राक्एनान येसुओ अ़चुतुक्वादा खालुसुओ य़ङ मोचि खाएत्तुचि।
२८ खोन्किना सावल काखेङ्चिएनान अ़क्नि युङाकि झारा यरुसलेम्दा राक्एनान हाङ्पा येसुओ अ़चुतुक्वादा नुय़ङ्खान खालुवायुङ्साङा।
२९ सावल ग्रिक य़ङ काचेप यहुदिचिएनान चेप्याङ्सा दुम्तुसा,
खोन्ओसा मोचिआ खो सेत्मा अ़लाप्ताङा।
३० मेन हाङ्पाएदा साकोङ्छ़ङ कामुचिआ मो य़ङ्ओ अ़तुक्वादा अ़सिन्तातोक्ताकि खो कैसरिया सहराह्युत्नि अ़धान्ता,
खोन्कि मोदाङ्का तार्सस सहराह्यात्नि खो अ़छुत्ताखाइसा।
३१ खोन्किना झारा यहुदिया,
गालिल खोन्कि सामरियादाओ साम्भुङ्दा सेवाङ्नि लिसा।
साम्भुङ छोयाङ्सा खाराकि हाङ्पा सायामेत्याङ्सा म़युङाङाओसा सेङ्लावाआ सावा प़चिकिना अ़चुखिप्मा पोन्याङ्सा खारा।
पत्रुस लुद्दा खोन्कि योप्पा सहरादा
३२ अ़क्दु पत्रुस झारा साकोङ्छ़ङ कामुचि तुप्याङ्सा कोलालुक्ताङाहिदा लुद्दा सहरादा कायुङ निनाम्हाङ्ओ अ़चुम़नाचिछाङ तुप्सि धा।
३३ खोसाआ मोदा एनियास अ़ऩङ मुवाङाओ अ़क्छा म़ना धिरु।
मो आथ्कादोङ बुयादाङ्का अ़लाङ अ़छुक ख़न्माखात्मा सारिमाआ लाउयुङ्सुओसा अ़इम्खादाङा धुवायुङ्साङा।
३४ पत्रुस्आ खो लो,
“एनियास,
येसु ख्रिस्तआ खाना त़नु।
पुवालोन्ताकि आम्इम्खा ओक्तु।”
खोन्कि एनियास च़क्नि पुवालोन्ता।
३५ खोन्किना लुद्दाकिना सारोन्दा कायुङ झारा म़नाचिआ एनियास कोलाङाओ अ़खाकि हाङ्पाएदा साकोङ्छ़ङ म़मुवा।
३६ योप्पा सहरादा तबिता अ़ऩङ मुवाङाओ अ़क्छा काखेङ्मा युङाङा।
मोसोओ ग्रिक अ़ऩङ दोरकास ओ,
अ़तुप्माय़ङ “ख़स्सामा”।
मो अ़धुन निचिओ निकि अ़नुवाक काचि मुवाङा,
खोन्कि मान्तोक्कादाचि फासुङुचि।
३७ पत्रुस लुद्दा सहरादा युङाङाहिदा मो तबिता तुआकि सुवादा,
खोन्कि म़नाचिआ अ़स़पोक वाअ़सुवाकि धाक्को छान्दुओ अ़क खोप्दा अ़युङ्सा।
३८ लुद्दा योप्पाओ अ़च़क्दा छुक्ताङा,
खोन्ओसा काखेङ्चिआ पत्रुस मोदा युङ्याङ्नि अ़एनाकिना मोचिआ खोएदा ह़वाङ म़नाचि “आन्कान्काएदा च़क्नि बानानिन” निकिना छुक फाङ्सि म़छुत्तुचि।
३९ खोन्किना पत्रुस चुम्सान्चिन्कि मोचिएनान खारा।
मोया तालाकि म़नाचिआ खो खिम्ओ धाक्कोछान्दु अ़वाक्ता।
झारा मेन्मित्माचिआ खो अ़कोम्ताखात्ताकिना दोरकास खोचिएनान युङाङाहिदा बोचिओ बोप्खुचि खोन्कि नि तित्चि खाप्याङ्सा खो खाङ्अ़मेत्ता।
४० मेन पत्रुस्आ मोचि झारा बुङ्खाह्यात्नि लोइसुचि,
खोन्किना अ़तुम्प़छ़क तोम्तुकि यामारा।
खोन्कि मो स़पोक्ह्यात्नि हुसान्चिन्कि य़ङा,
“तबिता,
पुवालोन्ता!”
खोन्कि मोसाआ अ़म़क होउ,
खोन्कि पत्रुस खाकिना पुवालोन्ताकि युङा।
४१ खोन्कि पत्रुस्आ मोसोओ अ़छुक्दा लाउकि पुउलोइसु।
खोन्किना खोसाआ साकोङ्छ़ङ कामुचि खोन्कि मेन्मित्माचि बुत्तुचिकि मो लासाह़ङाओ मोचि खाङ्मेत्तुचि।
४२ ओ य़ङ झारा योप्पा सहरादा थ़ङा,
खोन्कि ब़द्धे म़नाचिआ हाङ्पा साकोङ्छ़ङ अ़मुवा।
४३ खोन्कि पत्रुस अ़क्छा साहोक्वाओ काचि कामु सिमोन्एनान योप्पादा ब़द्धेकालेन्तारि युङा।