येसु लाप्माय़ङ
१८
येसु याम़माराचिआकि अ़चुकाखेङ्पाचिएनान किद्रोन खोङ्पाओ अ़ह्याउधेत्या म़खारा।
मोदा अ़क्तात स़ङ्सिबात्बुङ्खा याआङा।
येसु अ़चुकाखेङ्पाचिएनान मोदा म़वाङा।
२ खोक्को कालाप्प़पा यहुदाआछाङ मो स़ङ्सिबात्बुङ्खा सिन्तुङु,
देकिनालो येसु अ़चुकाखेङ्पाचिएनान मोदा अ़धुन म़कोवान्यान्चिन।
३ मोन्ग़रि मुलो काब़क्पाचिआ खोन्कि फरिसिचिआ म़छुत्तुचिओ रोमि रात्खामिचिओ अ़क रुहुप खोन्कि निनाम्हाङ ब़क्खाखिम्दाओ काहुङ्चि तारुचिकि यहुदा मोदा तादिसा।
मोचि कुपि,
बास़ङ मि खोन्कि बान्छुबिछुचि म़खुयाङा।
४ खोन्कि खोक्कोएदा लिमा मुवाङाओ झारा य़ङ अ़सिन्ताकि येसु मोचिओ अ़चुबुदा म़खारा खोन्कि म़सेनुचि,
“खानानिन्आ साङ त़लामुम्योम?”
५ मोचिआ खोक्को अ़लासालोवा,
“नासरत्ओ येसु।”
येसुआ मोचि म़लासुलोचि,
“अ़ङ्का खोङा ओ।”
खोक्को कालाप्प़पा यहुदाछाङ मोचिएनान एवाङा।
६ खोन्कि खोक्कोसाआ मोचि “अ़ङ्काङा ओ” नि म़लोचि,
मोन्ग़रि मोचि देङ म़लासा,
खोन्किना बाखादा म़धुवाखारा।
७ खोक्कोसाआ मोचि म़लासुसेनुचि,
“खानानिन साङ त़लामुम्योम ओ?”
मोचि म़य़ङा,
“नासरत्ओ येसु।”
८ येसुआ म़लासुलोचि,
“अ़ङ्का खानानिन लोनालाप्नानिन,
अ़ङ्काङा येसु ओ।
खोन्ओसा खानानिन अ़ङ्का त़लाम्ङाङाऩङ्ओनालो ओ म़नाचि खात्मा पुवानुम्च़म।”
९ “खानानिन्आ अ़ङ्का त़पुवाङ्ऩङ्ओदाओ अ़क्छाछाङ मान्माङाच़ङ” नि खोक्को म़य़ङाओ य़ङ तालाने निकिना ओ लिसाओ।
१० खोन्किना सिमोन पत्रुस्आ अ़बान्छोन लारुकि मुलो काब़क्पाओ अ़हारुक्ओ अ़चुप्ताङ नाबाक छोपेक्नि पेक्तुखाइसुप़।
मो हारुक्ओ अ़ऩङ मालखस याआङा।
११ येसुआ पत्रुस अ़लोवा,
“आम्बान्छोन अ़सिप्दा पाउ।
दि अ़ङ्पापाआ अ़ङ्का ऩपुवाङ्ओ दुखाओ लाङ्चोक्खुङ अ़ङ्का मान्दुङ्दामा?”
येसु हन्नास्ओ अ़बुदा
१२ खोन्किना रात्खामिचिओ अ़चुरुहुप,
मोचिओ अ़चुमुकुधुम,
खोन्कि यहुदिचिओ अ़चुब़क्खाखिम काहुङ्चिआ येसु अ़लावाकि खोक्को अ़छ़सा।
१३ बुया मोचिआ खोक्को हन्नास्एदा अ़खात्ता,
खो कैयाफाओ अ़छादिवा याआङा।
मो कैयाफा मो दोङ्दाओ मुलो काब़क्पा याआङा।
१४ ओ मो कैयाफाङा ओ,
खोसाआ “म़नाचिओ निम्पाङ अ़क्छा म़ना स़मा नुलोक लि”नि यहुदि बुसुवाचि यायोक प़चिओ।
पत्रुस्आ बुयाओदु ऩङाछिरुओ
१५ सिमोन पत्रुस खोन्कि येसुओ नि अ़क्छा अ़चुकाखेङ्पाआ येसु त़ङ्मा अ़पुङ्साचु।
मो नितात काखेङ्पाआ मुलो काब़क्पा सिन्तुङु,
खोन्कि येसुएनान मुलो काब़क्पाओ अ़बुक्लुङ्दा वाङा।
१६ मेन पत्रुस बुङ्खायाओ लाप्तिखोप्दाङा एवा।
मो नि काखेङ्पाआ मुलो काब़क्पा सिन्तुङु,
बुङ्खाया लोन्ताकि वाङ्खा लाम काहुङ मेत्छाछा लो कि पत्रुस बुक्लुङ्दा वाक्तु।
१७ खोन्कि मो वाङ्खा लाम काहुङ मेत्छाछा छाआ पत्रुस सेनु,
“दि खानाछाङ ओ म़नाओ अ़काखेङ्पाचिएदाओ अ़क्छा माआङ कि?”
खो य़ङा,
“अ़ङ्का माआङ।”
१८ मोदा हारुक्चि खोन्कि काहुङ्चि मि भुक्याङ्सा म़एवाङा,
देकिनालो चुङा लुवाङा।
खोन्कि पत्रुस्छाङ मोचिएनान एप्याङ्सा मि भुक्ताङा।
येसु मुलो काब़क्पाआ सेनुओ
१९ मुलो काब़क्पा हन्नास्आ येसु खोक्कोसोओ अ़चुकाखेङ्पाचि खोन्कि खोक्कोसोओ अ़चुचिन्माय़ङ्ओ अ़तुक्वादा सेनु।
२० येसुआ खो अ़लासालोवा,
“अ़ङ्का हेन्खामादाओ झारा म़नाचि मान्कुम्माङ लोङ्युङ्सुङ्च़ङ।
अ़ङ्का अ़धुन यावायोक्खिम्चिदा खोन्कि निनाम्हाङ ब़क्खाखिम्दा चिन्तुङ्च़ङ,
मोदा झारा यहुदिचि म़कोवान्चिन।
अ़ङ्का सुकुलादा दित्छाङ मान्य़ङ्युक्ङा।
२१ अ़ङ्का देकि त़सेन्ङाङाऩङ?
अ़ङ्का मोचि दे लोङ्च़ङ मो काएन्चिङा सेनानुम्च़म।
अ़ङ्का दे य़ङाङ्ओ मोचिआङा अ़सिन्याङ।”
२२ येसु ओवात्नि म़य़ङाहिदा अ़चुच़क्दा काएप काहुङ्चिएदाओ अ़क्छाआ ओवात्नि य़ङ्सा फेङ्सु,
“दि मुलो काब़क्पाओ अ़य़ङ ओवात्नि त़लासुङु?”
२३ येसुआ मो लासुलो,
“अ़ङ्का मान्तोङ्लो य़ङाङ्नालो मोसोओ अ़सालुम्स़ङ प़,
मेन अ़ङ्का तोङालो य़ङाङ्नालो देकि अ़ङ्का त़धात्ङाङा?”
२४ खोन्कि हन्नास्आ खोक्को छुम्साङाओङा मुलो काब़क्पा कैयाफाएदा खाइसु।
पत्रुस्आ ह्वादुओदु खोन्कि सुम्कादुओदु ऩङाछिरुओ
२५ सिमोन पत्रुस एप्याङ्सा मि भुक्ताङा।
मोचिआ खो अ़सेना,
“दि खोक्कोसोओ अ़चुकाखेङ्पाचिएदाओ अ़क्छा खानाछाङ माआङ?”
खोसाआ ओ य़ङ अ़ऩङाछिरुकि लोचि,
“अ़ङ्का ना माआङ।”
२६ मुलो काब़क्पाओ अ़हारुक्चिएदाओ अ़क्छाआ,
खोसोओ अ़दाक्मित्ओ अ़नाबाक पत्रुस्आ पेक्तुखाइसुप़ओ,
मोसाआ सेनु,
“दि अ़ङ्का खाना खोक्कोएनान स़ङ्सिबात्बुङ्खादा मान्खाङ्दाना कि?”
२७ खोन्कि पत्रुस्आ लासुऩङाछिरु।
खोन्किना मोन्ग़रिङा वापापा ओक्ता।
पिलातस्ओ अ़बुदा येसु
२८ खोन्किना मोचिआ येसु कैयाफास्ओ अ़खिम्दाङ्का रोमि हाङ्मुखा खिम्ह्यात्नि अ़खात्ता।
मोन्ग़रि अ़वाय़ङ्साऱङ लिसायुङ्सा।
पोप्तिन्कि काक्माखात्मा चानुचा चामा अ़तोक्तिमिन निकिना मोचि रोमि हाङ्मुखा खिम्दा मान्वाङ्चि।
२९ खोन्ओसा पिलातस मोचिएदा बुङ्खादा लोन्ताकि सेनुचि,
“ओक्को म़नाओ अ़चुदेङ्सालाप्पादा खानानिन्आ दि लाहि त़पाक्तुम?”
३० मोचिआ खो अ़लासालोवा,
“ओ मान्फिकादाओदे आन्कान्का ओक्को खानानिन्एदा मान्तात्दोम्काओ।”
३१ पिलातस्आ मोचि लोचि,
“खानानिन ओक्को आप्पि खात्तानुम,
खोन्कि आम्नुओ य़ङ्हुप्वा ओसोओ अ़छ़ङ छेन्तानुम।”
मेन यहुदि बुसुवाचिआ खो अ़लोवा,
“खाक्कोछाङ म़ना सेत्मा आन्कान्का आम्नुओ य़ङ्हुप्आ अ़प़न्मिन्का।”
३२ खोक्कोसोओ अ़चुस़मा खाउ पाराआ लिओ मोसोओ अ़तुक्वा खाङ्मुयाङ्सा येसु म़चेवाओ य़ङ तालाने निकिना ओवात्नि लिसाओ।
३३ पिलातस हाङ्मुखा खिम्हुत्दा लासावाङा,
खोन्कि खोसाआ येसु बुत्तुकि सेनु,
“दि खाना यहुदिचिओ अ़चुहाङ ओ?”
३४ येसुआ अ़लासालोवा,
“दि खानानिन आप्पि आम्नुओ मिन्माआ त़य़ङिन्येन्ओ हे,
अ़ङ्तुक्वादा खानानिन निचिआ ऩलोन ओ?”
३५ पिलातस्आ लासुलो,
“दि अ़ङ्का यहुदि ओ कि?
आम्रावाचि खोन्कि मुलो काब़क्पाचिआ खाना अ़ङ्छुक्दा ऩपाक्ताङ्पुवाङ्युङ्साङ।
खाना अ़त्लो दे त़चुवायुङ्सा?”
३६ येसुआ लासुलो,
“अ़ङ्हेन्कोप ओ हेन्खामादाओ माआङ।
अ़ङ्हेन्कोप ओ हेन्खामादाओदे अ़ङ्का कात़ङ्चि अ़ङ्को निम्पाङ म़म्हुवाओ,
खोन्कि अ़ङ्का यहुदिचिओ अ़चुछुक्दा मान्छुक्ङाओ।
अ़ङ्हेन्कोप ओ हेन्खामादाओ माआङ।”
३७ पिलातस्आ खोक्को सेनु,
“दि खाना हाङ्ङा ओ म़ल़क?”
येसुआ लासुलो,
“खानानिन्ङा खोवात्नि त़य़ङिन्युङ्सिन म़ल़क।
ओसोओ निम्पाङ अ़ङ्का लिसाङ ओ,
खोन्कि ओ अ़छ़ङ य़ङ्ओ निकिना सालुम्स़ङ प़सि अ़ङ्का ओ हेन्खामादा ताङ्ओ।
झारा साङ्आ अ़छ़ङ य़ङ त़ङ्तु,
मोसाआ अ़ङ्य़ङ एनु।”
३८ पिलातस य़ङा,
“अ़छ़ङ दि ओ?”
येसु क्रुस्दा ख़न्मा दन्दा प़माय़ङ
ओन य़ङाकि खो यहुदिचिएदा बुङ्खाया लासालोन्ता,
खोन्कि मोचि लोचि,
“अ़ङ्का ओसोओ अ़देङ्सालाप्पादा दित्छाङ लाहि पाक्मायु फिसुओ अ़धित्ऩङ।
३९ काक्माखात्मा चानुचादा अ़ङ्का आम्नुओ निम्पाङ अ़क्छा छेक्याङ्ओ लेत्माप़मा च़माथाङ्मा युङ्याङ।
दि खानानिन,
‘यहुदिचिओ अ़चुहाङ’ लेत्नाप़नानिन्नेनि त़मिनिन्येन?”
४० मेन मोचि ओवात्नि य़ङ्सा म़पारा,
“ओ म़ना माआङ!
आन्कान्का बारब्बा लेत्निप़नि!”
बारब्बा ना काङाप्खात मुवाङा।