युहन्‍ना 8

मेन येसु जैतुन भ़ऱदु म़खारा।२ खोक्‍को अ़वाय़ङ निनाम्‍हाङ्‌ओ अ़चुब़क्‍खाखिम्‌दा म़लासाखारा। झारा म़नाचि खोक्‍कोएदा म़ता, खोन्‍कि खोक्‍को म़युङाकि मोचि म़चिन्‍तुचि।३ य़ङ्‌हुप काचिन्‍पाचि खोन्‍कि फरिसिचिआ ताङ्‌लान्‌दा लाप्‍खावाचाओ अ़क्‍छा मेत्‍छामा अ़तारा, खोन्‍कि मो झारासोओ अ़चुबुदा एप्‌अ़मेत्‍ता।४ मोचिआ येसु अ़लोवा, “काचिन्‍पो, ओ मेत्‍छामा ताङ्‌लान मुवाङाहिदा लाउम्‍का।५ निनाम्‍हाङ्‌य़ङ खाकालु मोसाओ अ़य़ङ्‌हुप्‌दा ओवाकोचि लुङ्‍आ वेन्‍मासेत्‍मानि आन्‍कान म़लोवायुङ्‌सा। खानानिन ओसोओ अ़तुक्‌वादा दे त़य़ङिन?”

६ मोचिआ खोक्‍को चिन्‍खाङ्‌सि निकिना खोक्‍कोसोओ अ़चुदेङ्‌सालाप्‍पादा लाहिपाक्‍मा ऱम हे निकिना ओवात्‍नि म़य़ङाओ। येसु म़पोम्‍सान्‍चिन्‌कि अ़चुछुक्‍कुसिप्‌आ बाखादा अ़छाप्‍ता। ७ मेन मोचिआ खोक्‍को अ़सेनायुङ्‌सा, खोन्‍कि खोक्‍को म़पुवालोन्‍ताकि मोचि म़लोचि, “खानानिन साङ्‍एदा हेवा मात्‍द़ङ, मोसाआ मो मेत्‍छामा बुया लुङ्‍आ वेरुने।” ८ खोन्‍किना म़लासा पोम्‍सान्‍चिन्‌्‌कि खोक्‍कोसाआ अ़चुछुक्‍कुसिप्‌आ बाखादा अ़छाप्‍ता। ९ मोचिआ ओ य़ङ अ़एनाकिना अ़धिवादाङ्‌का म़पुङ्‌सान्‍चिन्‌कि अ़-अ़क्‍छा लियाङ्‌सा म़खारा। खोन्‍कि येसु ओन्‍ङा मो मेत्‍छामाएनान अ़छिरादा, खोन्‍कि मो मेत्‍छामा मोदाङा अ़चुबुदा एवायुङ्‌सा।

१० येसु म़एवाकि मो मेत्‍छामा अ़खा खोन्‍कि अ़लोवा, “मेत्‍छामा ओ, खाना लाहि कापाक्‌चि खात्‍नि म़खारा? साङ्‌आछाङ खाना दन्‍दा मान्‍प़ऩदा?”

११ मो मेत्‍छामा य़ङा, “हाङ्‌पो, साङ्‌आछाङ मान्‍प़ऩदाङ।”

येसुआ अ़लोवा, “अ़ङ्‌काछाङ खाना दन्‍दा अ़प़नान। खारा, खोन्‍कि हेवा मान्‍लामुदा।”]

येसु हेन्‍खामादाओ साम

१२ येसुआ म़नाचि म़लासुलोचि, “अ़ङ्‌का हेन्‍खामादाओ साम ओ। अ़ङ्‌का कात़ङ कुइयामादा देम्‍खाछाङ अ़कोन्‍निन, मेन मोसाआ ह़ङ्‌म़ङ काप़ साम तोक्‍तु।”

१३ खोन्‍किना फरिसिचिआ खोक्‍को अ़लोवा, “खाना आप्‍पि आम्‍तुक्‌वादा सालुम्‍स़ङ त़प़ङु। आम्‍सालुम्‍स़ङ अ़छ़ङ अ़कान्‍निन।”

१४ येसुआ म़लासुलोचि, “अ़ङ्‌का आप्‍पि अ़ङ्‌तुक्‌वादा सालुम्‍स़ङ प़ङ्‌नुछाङ अ़ङ्‌सालुम्‍स़ङ अ़छ़ङ मुयाङ। देकिनालो अ़ङ्‌का सिन्‍तुङ्‌योङ, अ़ङ्‌का खादाङ्‌का ताङ्‌ओ खोन्‍कि अ़ङ्‌का खादा खात्‍ङाङा। मेन खानानिन त़सिन्‍तिमिन, अ़ङ्‌का खादाङ्‌का ताङ माङ्‌लो खादा खात्‍ङाङा। १५ खानानिन म़नाओ अ़खाङ्‌माआ छ़ङ त़छेन्‍तिन, मेन अ़ङ्‌का साङ्‌कोछाङ मोवात्‍नि अ़छ़ङ अ़छेन्‍ऩङ। १६ अ़ङ्‌का छ़ङ छेन्‍ङाहिदा अ़ङ्‌छ़ङ छेन्‍माय़ङ अ़छ़ङ कान। देकिनालो छ़ङ्‌काछेन अ़ङ्‌का आप्‍पि ओन्‍ङा माआङ, मेन अ़ङ्‌का काछुत अ़ङ्‌पापा अ़ङ्‌काएनान म़युङ्‌याङ। १७ आम्‍नुओ य़ङ्‌हुप्‌दाछाङ ह़वाङ म़नाचिओ अ़चुसालुम्‍स़ङ अ़छ़ङ कान्‍नि छाप्‍तायुङ्‌सा। १८ अ़ङ्‌तुक्‌वादा अ़ङ्‌का आप्‍पि सालुम्‍स़ङ प़ङ, खोन्‍कि अ़ङ्‌का काछुत पापा निनाम्‍हाङ्‌आछाङ अ़ङ्‌तुक्‌वादा सालुम्‍स़ङ अ़प़।”

१९ मोचिआ खोक्‍को अ़सेना, “आम्‍पा खादा युङ्‌याङ?”

येसुआ म़लोचि, “खानानिन्‌आ ना अ़ङ्‌का त़सिन्‍ङाऩङ ना अ़ङ्‌पापा त़सिन्‍तुम। खानानिन्‌आ त़सिन्‍ताङ्‌ऩङ्‌ओदे अ़ङ्‌पापाछाङ त़सिन्‍तुम्‌ओ।” २० ओ य़ङ्‌चि खोक्‍कोसाआ निनाम्‍हाङ ब़क्‍खाखिम्‌दा म़चिन्‍तुङुचिहिदा छुक्‍दाम पाक्‍खाओ अ़च़क्‌दा म़लोचिओ। मेन साङ्‌आछाङ खोक्‍को मान्‍लाप्‌अ़दा, देकिनालो हान्‍छाङ खोक्‍कोसोओ अ़चुग़रि मान्‍तायुक्‍ता।

२१ येसुआ मोचि हान्‍छाङ म़लोचि, “अ़ङ्‌का खात्‍ङालोन्‍ङा, खोन्‍कि खानानिन्‌आ अ़ङ्‌का त़लाम्‍ङाऩङ, खोन्‍कि खानानिन आम्‍नुओ हेवादा त़स़न। खादा अ़ङ्‌का खात्‍ङाङा, खानानिन तामा त़ऱन्‍मिन।”

२२ खोन्‍किना यहुदिचि म़य़ङा, “ओ ना आप्‍पि सेत्‍नान्‍चिन हे देत्‍नि? देकिनालो ओसाआ ‘खादा अ़ङ्‌का खात्‍ङाङा खानानिन तामा त़ऱन्‍मिन’नि य़ङ्‌याङ।”

२३ खोन्‍किना खोक्‍कोसाआ मोचि म़लोचि, “खानानिन ह्‍युनाओचि ओ, अ़ङ्‌का धानाओ ओ। खानानिन ओ हेन्‍खामादाओचि ओ, अ़ङ्‌का ओ हेन्‍खामादाओ माआङ। २४ अ़ङ्‌का खानानिन लोनानिन, ‘खानानिन आम्‍नुओ हेवाचिदा त़स़न।’ देकिनालो ‘अ़ङ्‌का खोक्‍कोङा ओ।’ निकिना खानानिन साकोङ्‌छ़ङ त़मुन्‍मिन्‌नालो आम्‍नुओ हेवादा त़स़न।”

२५ मोचिआ खोक्‍को अ़सेना, “खाना साङ ओ म़ल़क?”

येसुआ मोचि म़लासुलोचि, “अ़ङ्‌का साङ ओ निकिना बुयादाङ्‌काङा लोयाङ्‌सा मुनाङ्‌नानिन्‌ओ, अ़ङ्‌का खोक्‍कोङा ओ। २६ अ़ङ्‌का आम्‍नुओ तुक्‌वादा य़ङ्‌मा खोन्‍कि छ़ङ्‌छेन्‍मा ब़द्‍धे युङ्‌याङ। मेन अ़ङ्‌का काछुत्‌लाम्‍पा अ़ङ्‌का दि एनुङ, मो य़ङ ओन्‍ङा अ़ङ्‌का हेन्‍खामादा य़ङ्‌ङा। देकिनालो खोक्‍को अ़छ़ङ म़मुयाङ।”

२७ पापा निनाम्‍हाङ्‌ओ अ़चुतुक्‌वादा खोक्‍को म़य़ङाओ मोचिआ मान्‍तुप्‌अ़दा। २८ खोन्‌ओसा येसुआ म़लोचि, “खाउग़रि खानानिन्‌आ म़नाओ अ़छा धाना त़थेन्‍तुम, मोन्‍ग़रि अ़ङ्‌का खोक्‍कोङा ओ निकिना खानानिन्‌आ त़सिन्‍तुम। खोन्‍कि अ़ङ्‌का अ़ङ्‌पाङ्‍आ दित्‍छाङ अ़मुऩङ, मेन अ़ङ्‌पापाआ ऩचिन्‍ताङ्‍ओ य़ङ्‌चि ओन्‍ङा चेउङ्‌च़ङ। २९ अ़ङ्‌का काछुत अ़ङ्‌काएदा म़युङ्‌याङ। खोक्‍कोसाआ अ़ङ्‌का अ़ङ्‌दाप्‍म़ङ मान्‍छित्‌दाऩयुक्‍ङा, देकिनालो अ़ङ्‌का अ़धुन खोक्‍कोसोओ अ़चुऩङानुसुङ।” ३० खोक्‍कोसाआ ओ य़ङ म़चेवाङाहिदा ब़द्‍धेसाआ खोक्‍कोएदा साकोङ्‌छ़ङ म़मुवा।

येसु खोन्‍कि अब्राहाम

३१ येसुआ खोक्‍कोएदा साकोङ्‌छ़ङ कामु यहुदिचि म़लोचि, “खानानिन अ़ङ्‌चिन्‍माय़ङ्‌दा त़युङिन्‌नालो खानानिन अ़नुछ्‍या अ़ङ्‌काखेङ्‌चि ओ। ३२ खोन्‍किना खानानिन्‌आ अ़छ़ङ त़सिन्‍तुम, खोन्‍कि अ़छ़ङ्‌आ खानानिन त़फोङ्‌सिन।”

३३ मोचिआ खोक्‍को अ़लोवा, “आन्‍कान्‍का अब्राहाम्‌ओ अ़छाचि ओ, खोन्‍कि ओन्‍ग़रितारि साङ्‌कोछाङ अ़हारुक मान्‍लियुक्‍तिन्‍का। देत्‍नि खानानिन आन्‍कान्‍का ‘फोङ्‌सिन’नि त़य़ङिन्‌येन?”

३४ येसुआ मोचि म़लासुलोचि, “अ़नुछ्‍याङा अ़ङ्‌का खानानिन लोनानिन, हेवा कामु झारा हेवाओ अ़हारुक ओ। ३५ हारुक अ़धुन खिम्‍लुम्‍पादा अ़युङ्‌निन्‌युङ्‌निन, मेन निनाम्‍हाङ्‌ओ अ़चुछा अ़धुन खिम्‍लुम्‍पादा युङ्‌युङ। ३६ खोन्‌ओसा अ़चुछाआ खानानिन ऩफोङ्‌सिन्‌नालो खानानिन अ़नुछ्‍या त़फोङ्‌सिन। ३७ अ़ङ्‌का सिन्‍तुङ्‌योङ, खानानिन अब्राहाम्‌ओ अ़छाचि ओ, खोन्‍नुछाङ खानानिन्‌आ अ़ङ्‌का सेत्‍मा त़लाप्‍ङाङाऩङ, देकिनालो अ़ङ्‌चिन्‍माय़ङ खानानिन त़लोइमिन। ३८ दि अ़ङ्‌का अ़ङ्‌पापाओ अ़चुबुदा खाङ्‌युङ्‌सुङ, मो अ़ङ्‌का खानानिन लोनानिन। खानानिन्‌आछाङ दि आम्‍नुओ पाएदाङ्‌का त़एनुम्‌युङ्‌सुम, मोत्‍निङा त़च़न।”

३९ मोचिआ खोक्‍को अ़लासालोवा, “आन्‍काओ पा ना अब्राहाम ओ।” येसुआ मोचि म़लोचि, “खानानिन अब्राहाम्‌ओ अ़छाचिओनालो अब्राहाम्‌आ मुओ काचि त़मुम्‌ओ। ४० अ़ङ्‌का निनाम्‍हाङ्‌दाङ्‌का एनुङ्‌ओ अ़छ़ङ खानानिन लोनायुङ्‌नानिन, मेन ओन्‍ग़रि अ़ङ्‌का सेत्‍मा त़लाप्‍ङाङाऩङ। अब्राहाम ओवाको काचि मान्‍मु।

४१ आम्‍नुओ पापा दे चुवा, खानानिन मो काचिङा त़मुम।” मोचिआ खोक्‍को अ़लोवा, “आन्‍कान्‍का ताङ्‌लान्‌दा पुक्‍तिन्‍चिन्‍काओ माआङ! आन्‍काओ पा अ़क्‍छाङा म़युङ्‌याङ, खोक्‍को निनाम्‍हाङ ओ।”

४२ येसुआ मोचि म़लोचि, “निनाम्‍हाङ आम्‍नुओ पाओनालो ना खानानिन्‌आ अ़ङ्‌का सोमात़तुक्‍ताङ्‌ऩङ्‌ओ। देकिनालो अ़ङ्‌का निनाम्‍हाङ्‌एदाङ्‌का ताङ्‌ओ। अ़ङ्‌का अ़ङ्‌मिन्‍माआ ताङ्‌ओ माआङ, मेन खोक्‍कोसाआ अ़ङ्‌का ऩछुत्‍ताङ्‍ओ। ४३ अ़ङ्‌का य़ङ्‌ङाङाओ खानानिन्‌आ देकि त़तुप्‍तिमिन्‌येन? देकिनालो खानानिन्‌आ अ़ङ्‌य़ङ लोक्‍मा त़ऱन्‍मिन। ४४ खानानिन आम्‍नुओ पापा सैतानाओ अ़छाचि ओ, खोन्‍कि आम्‍नुओ पापाओ अ़चुमिन्‍माचि तामालामानि खानानिन त़मिनिन। मो ना बुयादाङ्‌काङा कासेत्‍पा ओ, खोन्‍कि अ़छ़ङ्‌लिप्‍पा देम्‍खाछाङ अ़वाङ्‌निन, देकिनालो मोएदा अ़छ़ङ मात्‍द़ङ। मो सोज्‍जे चेप्‌हिदा मो अ़मिन्‍मालाम्‍पा चेप, देकिनालो मो सोज्‍जेओ खोन्‍कि झारा सोज्‍जेओसोओ अ़पा ओ। ४५ अ़ङ्‌का अ़छ़ङ चेप्‍ङाओसा खानानिन्‌आ अ़ङ्‌का साकोङ्‌छ़ङ त़मुऩङ्‌ऩम़ङ। ४६ खानानिन्‌एदाओ साङ्‌आ अ़ङ्‌का हेवाओ लाहिपाक्‍मा अ़ऱङा कि? अ़ङ्‌का अ़छ़ङ चेप्‍ङाङानुछाङ देकि खानानिन्‌आ अ़ङ्‌का साकोङ्‌छ़ङ त़मुऩङ्‌ऩम़ङ? ४७ साङ निनाम्‍हाङ्‌ओ ओ, मोसाआ निनाम्‍हाङ्‌ओ अ़चुय़ङ एनु। खानानिन निनाम्‍हाङ्‌ओ माआङ, खोन्‌ओसा खानानिन खोक्‍कोसोओ अ़चुय़ङ त़एनिमिन।”

४८ यहुदिचिआ खोक्‍को अ़लासालोवा, “खाना सामरि ओ, खोन्‍कि खाना चाकावालावाआ त़लावायुङ्‌सा निकिना आन्‍कान्‍का य़ङिन्‍काओ ना अ़नुछ्‍याङा ओ!”

४९ येसुआ म़लासुलोचि, “अ़ङ्‌का चाकावालावाआ मान्‍लाप्‌अ़युक्‍ङा। अ़ङ्‌का अ़ङ्‌पापा साया मेत्‍तुङ, मेन खानानिन्‌आ अ़ङ्‌साया त़पेप्‍ङाङाऩङ। ५० अ़ङ्‌का आप्‍पि साया मेत्‌अ़लुऩङ। मेन अ़क्‍छा म़युङ्‌याङ खोक्‍कोसाआ अ़ङ्‌का निचिलाम्‍पा साया ऩमेत्‍ङानेनि म़मिन्‌याङ, खोन्‍कि खोक्‍कोङा छ़ङ्‌काछेन म़युङ्‌याङ। ५१ अ़नुछ्‍या अ़ङ्‌का खानानिन लोनानिन, साङ अ़ङ्‌य़ङ्‌वा च़नालो खो देम्‍खाछाङ अ़स़निन।”

५२ यहुदिचिआ खोक्‍को अ़लोवा, “हान आन्‍कान्‍का नुछ्‍या सिन्‍तुम्‍का, खाना चाकावालावाआ त़लावाओङा ओ। अब्राहाम सुवादा, निनाम्‍हाङ्‌य़ङ खाकालुचिछाङ म़सुवादा, मेन खाना त़य़ङ्‌याङ, ‘साङ अ़ङ्‌य़ङ्‌वा च़नालो मो देम्‍खाछाङ अ़स़निन्‍दानिन।’ ५३ दि आन्‍काओ सुन्‍तुम अब्राहाम्‌दाङ्‌का खाना तोक्‍पो ओ कि? खो सुवादा, खोन्‍कि निनाम्‍हाङ्‌य़ङ खाकालुचिछाङ म़सुवादा। खाना साङ ओनि त़मित्‍नानान्‍चिन?”

५४ येसुआ म़लासुलोचि, “अ़ङ्‌का आप्‍पि अ़ङ्‌ऩङ लोङ्‌सुङ्‌नालो अ़ङ्‌ऩङ लोङ्‌माय़ङ सोज्‍जे लि। अ़ङ्‌ऩङ कालोङ अ़ङ्‌पापा म़युङ्‌याङ, खोक्‍को खानानिन्‌आ ‘आन्‍काओ निनाम्‍हाङ’नि त़लोम्‌योम। ५५ खानानिन्‌आ खोक्‍को मान्‍सिन्‍त़युक्‍तुम, मेन अ़ङ्‌का खोक्‍को सिन्‍तुङ। अ़ङ्‌का खोक्‍को ‘मान्‍सिन्‌युक्‍तुङ’नि य़ङ्‌ङानालो अ़ङ्‌का खानानिन्‌वा सोज्‍जेओ लिङा। मेन अ़ङ्‌का खोक्‍को सिन्‍तुङ, खोन्‍कि खोक्‍कोसोओ अ़चुय़ङ्‌वा च़ङा। ५६ आम्‍नुओ सुन्‍तुम अब्राहाम अ़ङ्‌लेन खाङ्‌मा मुङुओसा खोसोओ अ़ऩङानुवाङा, खोन्‍कि खोसाआ खा, खोन्‍कि अ़ऩङानुवा।”

५७ खोन्‍किना यहुदिचिआ खोक्‍को अ़लोवा, “खाना पचास्‌कादोङ्‌छाङ मान्‍बात्‍त़युक, दि खाना अब्राहाम त़खा कि?”

५८ येसुआ मोचि म़लासुलोचि, “अ़नुछ्‍या अ़ङ्‌का खानानिन लोनानिन, अब्राहाम लिमा बुयाङा अ़ङ्‌का युङाङ्‌याङ।” ५९ खोन्‍किना मोचिआ खोक्‍को वेन्‍मा निकिना लुङ म़कुआ, मेन येसु म़कुमाकि निनाम्‍हाङ ब़क्‍खाखिम्‌दाङ्‌का बुङ्‌खाह्‍यात्‍नि म़लोन्‍ताखारा।