येसुआ बारकापाङ अ़चुकाखेङ्पाचि म़छुत्तुचि ओ
९
येसुआ बारकापाङ अ़चुकाखेङ्पाचि अ़क्नि म़बुत्तुचिकि झारा चाकावालावाचि लोन्माखान्मा खोन्कि झारा सारिमाचि नुमा सावा खोन्कि पाङ मोचि म़प़चि।
२ खोक्कोसाआ मोचि निनाम्हाङ्ओ अ़चुहाङ्होन खालुमा खोन्कि कातुक्चि नुसि पाङ्एनान म़छुत्तुचि।
३ खोक्कोसाआ मोचि म़लोचि,
“आम्नुओ हुमाओ निम्पाङ दित्छाङ मान्खुन्दानिन,
ना तोप्मालि,
ना बेखा,
ना पेम्पाक,
ना फेक्वा ना ह्वातात लोक्छुम्चि खुयानिन।
४ खाक्को खिम्दा खानानिन त़वाङिन,
त़हासिमिन्चिन्तारि मोदाङा युङानिन।
५ खादा खानानिन साऩङ्वा ऩमेत्तिमिन खानानिन मो सहरा त़छिरुम्दाम्योम्हिदा मोचिओ अ़चुदेङ्सालाप्पादा सालुम्स़ङ्ओ निम्पाङ आम्नुओ लाङ्दाओ बाखा थुलि धाम्साधान्तादानुम।”
६ मोवात्नि मोचि म़हासान्चिन्कि नुय़ङ्खान खालुयाङ्सा खोन्कि झारादात्नि सारिमाआ लाउचिओचि नुयाङ्सा तेन-तेन म़खारा।
हेरोद हाक्हाक्किरा लिसाओ
७ मोन्ग़रि गालिल हेन्कोप्दाओ धिखाहुप्दा हाङ्कामु हेरोद हाङ एन्तिपास्आ झारा म़मुङुचिओ येसुओ अ़चुकाचिचिओ अ़तुक्वादा एनुकिना हेरोद हाक्हाक्किरा लिसा।
देकिनालो “युहन्ना सुवादाओदाङ्का खोन्तालोन्तायुङ्सा”नि खा-खाक्कोचि म़य़ङाङा।
८ खोन्कि खा-खाक्कोचि म़य़ङाङा,
a“एलिया खाङ मुसान्युङ्सान्चिन।”
खोन्कि निचि म़य़ङाङा,
“आराङ्ओ निनाम्हाङ्य़ङ खाकालुचिदाङ्का अ़क्छा म़खोन्तालोन्तायुङ्सा।”
९ हेरोद ओवात्नि य़ङा,
“युहन्नाओ अ़ताङ अ़ङ्का क़प्मेतुङ्च़ङ्ओ,
मेन ओ साङ्को अ़तुक्वादा अ़ङ्का ओवाको य़ङ्चि एनुङ्योङ्च़ङ?”
खोन्कि खो येसुएनान तुप्मा लामा।
येसुआ पाच हजाराकापाङ म़चान्तुचिओ
१० बारकापाङ छाम्माय़ङ्चि येसुएदा म़लासाता खोन्कि झारा खोचिआ अ़मुवाओ काचि येसु खाअ़एत्ता।
खोसाआ मोचि म़खात्तुचिकि बेथसेदानिओ तेन्दा नि म़नाचिआ मान्सिन्माङ म़खारा।
११ मेन ओ य़ङ अ़सिन्ताकि म़ना मुक्लाचिआ येसुओ अ़चुदेङ्देङ अ़त़ङ्ता।
खोक्कोसाआ मोचि साया म़मेत्तुचि,
खोन्कि निनाम्हाङ्ओ अ़चुहाङ्होन्ओ अ़तुक्वादा खाम़एत्तुचि,
खोन्कि खा-खाक्कोचि नुमा म़दोराङा,
मोचि म़नुसुचि।
१२ हान अ़नाम्प़क्साऱङ बारकापाङ खोक्कोसोओ अ़चुकाखेङ्पाचि खोक्कोएदा म़ताकि अ़लोवा,
“म़ना मुक्लाचि छुत्ताखाइसानुम्च़म,
खोन्कि मोचि ओह्यात्नि-मोह्यात्निओ तेन्चिदा खोन्कि याक्साचिदा म़खात्कि इम्खा खोन्कि चामायु म़धित्ने।
देकिनालो ओदा आन्कान दित्छाङ अ़तोक्तिमिन्ओ अ़कुय़ङ्दा युङिन्येन।”
१३ मेन येसुआ मोचि म़लोचि,
“खानानिन्आ मोचि चामा पुवानुम्च़म।”
मोचि ओवात्नि म़य़ङा,
“आन्कान्काएदा पाच्कातात पेम्पाक खोन्कि ह्वातात ङाचि म़युङ्याङ,
माङ्नालो आन्कान्का खात्माकि ओ झारा म़नाचिओ निकि चामायु खित्मादोत।”
१४ मोदा आप्फात पाच हजारा दुवाछाचि म़याआङा।
खोन्कि येसुआ अ़चुकाखेङ्पाचि म़लोचि,
“मोचि पचास-पचास्कापाङ्ओ भुङ्दा युङ्सानुम्च़म।”
१५ मोचि मोवात्नि म़चुवाकि झारा म़नाचि युङ्म़मेत्तुचि।
१६ येसुआ मो पाच्कातात पेम्पाक्चि खोन्कि ह्वातात ङाचि अ़क़क्ताकि निनाम्मादुत्नि चोप्याङ्सा आलाङ अ़पुवा,
खोन्कि मोचि म़धाङ्सुचिकि “म़नाचि हात्तानुम्च़म”निकिना अ़चुकाखेङ्पाचि म़प़चि।
१७ खोन्कि मोचि झारासा अ़चाकि अ़चुबुक खासा,
खोन्कि हेनाओ अ़चेत्वाचि अ़चुकाखेङ्पाचिआ बारकाखेङ म़कोउचि।
पत्रुस्आ येसु ख्रिस्तओ निकिना य़ङाओ
१८ अ़क्दु येसु अ़चुदाप्म़ङ्ङा याम़माराङाहिदा अ़चुकाखेङ्पाचि खोक्कोएनान म़युङाङा,
खोन्कि खोक्कोसाआ मोचि म़सेनुचि,
“म़नाचिआ अ़ङ्का साङ्नि ऩलोङाङा?”
१९ मोचि म़य़ङा,
“खा-खाक्को य़ङ्याङ बप्तिस्मा काप़ युहन्नानि,
मेन खा-खाक्को एलियानि खोन्कि मोदाङ्का निचिआ बुयाओ निनाम्हाङ्य़ङ खाकालुचिएदाओ खाक्को अ़क्छा खोन्तालोन्तायुङ्सानि म़य़ङ्याङ।”
२० खोक्कोसाआ मोचि म़सेनुचि,
“मेन खानानिन अ़ङ्का साङ्नि त़लोङाङाऩङ?”
खोन्किना पत्रुस्आ लासुलो,
“खानानिन निनाम्हाङ्ओ bअ़चुख्रिस्त ओ!”
२१ “मेन ओ य़ङ साङ्छाङ खामान्एत्दानुम्च़म”नि येसुआ अ़चुकाखेङ्पाचि चाप्म़चेत्तुचि।
२२ खोन्कि खोक्को म़य़ङा,
“अ़ङ्का म़नाओ अ़छाआ ब़द्धे दुखा आङ्मादोत खोन्कि अ़धुवाचि,
मुलो काब़क्पाचि खोन्कि य़ङ्हुप काचिन्पाचिआ ऩङाअ़छित,
खोन्कि अ़सेत मेन खो सुम्कालेन्दा स़दाओदाङ्का लाखोन्लोन।”
काखेङ्पा लिसि म़बुत्तुचिओ
२३ खोन्किना खोक्कोसाआ झारा म़लोचि,
“साङ अ़ङ्का त़ङ्मा स़याङ्नालो खो आप्पि अ़मित्चिऩङ छित्मादोत,
खोन्कि लेन-लेन cअ़क्रुस खुन्माकि अ़ङ्का त़ङ्मादोत।
२४ देकिनालो साङ्आ अ़ह़ङ्म़ङ लेन्मा लाप्तु,
मोसाआ मो मासु।
मेन साङ्आ अ़ङ्को निम्पाङ अ़ह़ङ्म़ङ मासु,
मोसाआ अ़नुछ्याओ ह़ङ्म़ङ तोक्तु।
२५ झारा हेन्खामा तोक्तुकिछाङ आप्पि लुक्नान्चिन माङ्नालो मानान्चिन्नालो मो म़नाआ दि तोक्तु कि?
२६ मेन खाक्को म़ना अ़ङ्कादाङ्का खोन्कि अ़ङ्य़ङ्दाङ्का अ़लेजो कात,
अ़ङ्का म़नाओ अ़छाओ अ़साम,
अ़चुपापाओ अ़साम्दा खोन्कि म़सेङ्याङ्ओ निनाम्हाङ काफाचिएनान साम्स़रि लिकि लाय़हिदा मोएदा खोसोओछाङ अ़लेजो कात।
२७ मेन अ़नुछ्या अ़ङ्का खानानिन लोनानिन,
ओदा खा-खाक्को काएप्चिदाङ्का निनाम्हाङ्ओ अ़चुहाङ्होन बुया मान्खाङ्माङ्तारि ऩस़निन्दानिन।”
येसुओ अ़चुकात्मा फान्ताओ
२८ ओ य़ङ्ओ आफ्फात आथ्कालेन देङ्दा पत्रुस,
युहन्ना खोन्कि याकुब येसुआ म़खात्तुचिकि यामात्सि भ़ऱदु म़लोन्ता।
२९ येसु याम़माराङाहिदा खोक्कोसोओ अ़चुङाइवाओ अ़चुकात्मा फान्ता,
खोन्कि खोक्कोसोओ अ़चुतित नाम्चिम्पेलेक्वात्नि छोक्छोक्छोक्वा खोन्कि ओम्पुवाचिचि लेरा।
३० म़प्च़क़क्दा ह़वाङ म़नाचि मोसा खोन्कि एलिया खाङ्मुसाचिचिन,
खोन्कि येसुएनान चेप्मा अ़पुङ्साचु।
३१ मोचि अ़चुसाम्स़रि खाङ मुसाचिचिन्कि येसुओ अ़चुस़माओ अ़तुक्वादा म़हान्ताङा।
ओ स़माओ य़ङ यरुसलेम्दा तामालामा दोराङा।
३२ मोन्ग़रि पत्रुस खोन्कि अ़यावाचिओ चाअ़त्लो अ़चुदुखुप युवाङा।
मेन मोचि म़थिन्तालोन्ताकि येसु अ़चुसाम्स़रि म़लिसाओ खोन्कि खोक्कोएनान ह़वाङ म़नाचि म़एवाङाओ म़खाचि।
३३ मोसा खोन्कि एलिया येसुएनान म़हासान्यान्चिन्हिदा पत्रुस्आ येसु लो,
“काचिन्पो,
आन्कान ओदा युङ्मा अ़नुवाक लि!
आन्कान्का सुम्कातात याक्साचि मुम्च़म्काने।
अ़क्तात आम्नुओ निम्पाङ,
अ़क्तात मोसाओ निम्पाङ खोन्कि अ़क्तात एलियाओ निम्पाङ।”
खो आप्पि दि चेवाङाओ मान्सिन्दो।
३४ खो ओ य़ङ चेवाङाहिदा य़वारि युवाकि मोचि भुक्तुखात्तुचि।
य़वारिआ काखेङ्पाचि भुक्मा मुङुचिहिदा खोचि म़क़सा।
३५ मोन्ग़रि य़वारिदाङ्का अ़क्तात य़ङ ता,
“ओक्को अ़ङ्छा ओ।
ओक्को अ़ङ्का छेन्तुङ्ओ।
खोक्कोसाआ ऩलोन्ओ एनानुम!”
३६ मो य़ङ ताचिआकि मोदा येसु ओन्ङा म़युङाङा।
अ़काखेङ्पाचि वाइवेत म़युङाकि मोचिआ अ़खाओ खाक्कोछाङ काचिचि अ़क्चित्तारि साङ्छाङ खामान्एत्म़दोचि।
येसुआ चाकावालावाआ लाउओ छा अ़नुसाओ
३७ अ़माङ्कोलेन येसु खोन्कि अ़चुकाखेङ्पाचि भ़ऱदुङ्का म़धान्तान्चिन्हिदा,
अ़धिवाङ म़ना मुक्लाचि येसु तुप्सि म़ता।
३८ मोन्ग़रि म़ना मुक्लादाङ्का अ़क्छा म़ना पात्याङ्सा य़ङा,
“काचिन्पो,
अ़ङ्का खानानिन बुक्नाङ्नानिन,
अ़ङ्छा नुनिप़नि।
देकिनालो मो अ़क्छा ओन्ङा अ़ङ्छा ओ।
३९ अ़क्तात चाकावालावाआ मो लाउकि खोक्को म़प्च़क़क्दा चिलिलिवा पात,
खोन्कि मो छाओ अ़दोदाङ्का अ़छोम्पुत्वा लोन्लो धुन्मेत्तु।
मो खेन्मान्वान्माङ्तारि लेत्माइ अ़लेरुन।
४० मो चाकावालावा लोन्निप़निनि अ़ङ्का आम्नुओ काखेङ्पाचि बुउङ्च़ङ,
मेन मोचिआ मो मुमा मान्ऱअ़दा।”
४१ येसुआ म़लोचि,
“साकोङ्छ़ङ मान्मुकादा म़नाचि खोन्कि ऱक्याङ्ओ लाम्दा काकोन्चि ओ!
देम्खातारि अ़ङ्का खानानिन आङ्नानिन?
आम्दुवाछा छा ओदा बात्तु।”
४२ मेन मो बानाङाहिदाङा पोप्ताओ लावा मो धाम्सुकि धुन्मेत्तु,
खोन्कि येसुआ मो पोप्ताओ लावा अ़रेन्ता,
मोवात्नि मो छा अ़नुसाकि मोसोओ अ़पा अ़लासापुवा।
४३ निनाम्हाङ्ओ अ़धिवा सावा अ़खाकि झारा म़नाचि दोम्तुदोचि।
येसुआ अ़मुवाओ अ़क्तात काचिदा झाराकापाङ दोम्तुदोचिओ ग़रि खोक्कोसाआ अ़चुकाखेङ्पाचि म़लोचि।
४४ “अ़ङ्का य़ङ्मा मुङाङाओ य़ङ्चि नुलोक एनानुम्च़म।
अ़ङ्का म़नाओ अ़छा म़नाचिओ अ़चुछुक्दा पाक्मा ऩमुङाङा।”
४५ मेन अ़चुकाखेङ्पाचिआ ओ य़ङ मान्तुप्अ़दा।
देकिनालो मो य़ङ मोचिएदाङ्का कुम्सायुङ्सा।
खोन्ओसा मोचिआ मो य़ङ तुम्मा मान्ऱअ़दा।
खोन्कि मोचिआ मोसोओ अ़तुक्वादा खोक्को सेन्मा अ़चुक़माकारा।
झारादाङ्का अ़धिवाङ साङ?
४६ काखेङ्पाचिएदा “झारादाङ्का तोक्पो साङ लि?”
निओ अ़तुक्वादा अ़क्छा निएदा दुम्तुमा अ़पुक्ता।
४७ मेन येसुआ मोचिओ अ़चुसाकोङ्वादाओ मिन्मा अ़सिन्ताकि अ़क्छा अ़चुप्पो छा अ़क़क्ता खोन्कि अ़चुच़क्दा एप्अ़मेत्ता।
४८ खोन्कि मोचि म़लोचि,
“साङ्आ अ़ङ्ऩङ्दा ओवाको छा लोउ,
मोसाआ अ़ङ्का अ़लोक्ङा।
खोन्कि साङ्आ अ़ङ्का अ़लोक्ङा,
मोसाआ अ़ङ्का काछुत्पा लोउ।
खानानिन्एदा झारादाङ्का अ़चुप्पो झारादाङ्का अ़धुवा ओ।”
४९ खोन्कि युहन्नाआ येसु लो,
“काचिन्पो,
अ़क्छा म़नाआ आम्नुओ ऩङ्दा चाकावालावाचि लोइसुङुचिओ आन्कान्का खाम्का,
खोन्कि मेन आन्कान्का खो लोन्मा मान्प़दोम्का।
देकिनालो खो आन्कान्एनान्ओ अ़क्निओ माआङ।”
५० मेन येसुआ मो अ़लोवा,
“मो मुमा पुवानुम।
देकिनालो साङ आम्देङ्सालाप्पादा मात्द़ङ,
मो आम्लिप्पाङा ओ।”
सामरिचिआ येसु ऩङाअ़छिराओ
५१ येसु निनाम्मादुत्नि खात्मा लेन तामादिमा मुवाङाहिदा खोक्कोसाआ यरुसलेम्ह्यात्निङा खात्मा अ़छ़ङ अ़मुवा।
५२ येसुआ य़ङ्काछोङ्चि बुयाङा म़खाइसुचि।
खोन्कि खोसोओ निकि झारा सामाचि चुम्सि सामरिचिओ अ़क्तात अ़चुतेन्दा मोचि म़वाङा।
५३ मेन मोचिआ अ़चुतेन्दा येसु वाङ्मा मान्प़अ़दा देकिनालो येसु यरुसलेम्ह्यात्नि म़खाराङा।d
५४ ओवात्नि ओ अ़खाचुकि खोक्कोसोओ अ़चुकाखेङ्पाचि याकुब खोन्कि युहन्नाआ अ़सेनाचु,
“हाङ्पो,
निनाम्मादुङ्का मि धाकि ओचि म़ह़त्खात्नेनि आन्काच्या लोचुच्या?”
५५ मेन येसु म़हुसान्चिन्कि मोचि म़रेन्तुचि,
[खोन्कि ओवात्नि म़लोचि,
“खानाचि देत्नि त़मिन्चिकि ओवात्नि त़य़ङ्चिङ्चिओ खानाचि त़सिन्चुन्चुन।
५६ अ़ङ्का म़नाओ अ़छा ना म़नाचि लुक्सि युवाङ्ओ माआङ,
मेन मोचि लेइसि युवाङ्ओ।”]e
खोन्कि खोचि नि तेन्ह्यात्नि म़खारा।
काखेङ्चिआ अ़लुङ छोन्मादोत
५७ मोचि लाम्दा म़खाराङाहिदा अ़क्छा म़नाआ येसु लो,
“खानानिन खादा त़खारिन्नुछाङ अ़ङ्का त़ङ्नानिन।”
५८ खोन्कि येसुआ मो अ़लोवा,
“हाप्सुचिओ अ़चुयुङ्खा बुक्ताङ्चि खोन्कि नाम्छ़ऱदु कापेन छोङ्वाचिओ अ़चुयाङ्चि म़याक्याङ,
मेन म़नाओ अ़छाओ ना अ़ताङ नान्खाछाङ मात्द़ङ।”
५९ खोक्कोसाआ नितात म़ना अ़लोवा,
“अ़ङ्का त़ङ्ताङ” मेन खोसाआ लासुलो,
“हाङ्पो,
बुया अ़ङ्का खात्माकि अ़ङ्पा खुम्मा प़नि।”
६० येसुआ मो अ़लोवा,
“म़सुवादाओचि म़सुवादाओचिआ आप्पिङा म़खुम्तुचिने,
मेन खाना खाराकि निनाम्हाङ्ओ अ़चुहाङ्होन्ओ अ़तुक्वादा खालुसु।”
६१ नितात्साआ लो,
“हाङ्पो,
अ़ङ्का खानानिन त़ङ्नानिन,
मेन बुया अ़ङ्खिम्दा कायुङ्चिदाङ्का हामान्लामान्चिन पुवाङ्ऩङ।”
६२ मेन येसुआ मो अ़लोवा,
“हाराओ अ़लादा अ़छुक पाउकि अ़देङ्ह्यात्नि खाकाखाङ साङ्छाङ निनाम्हाङ्ओ अ़चुहाङ्होन्ओ काचि मुमा अ़खान्तुन।”
लुका ९:१-२७
लुका ९:२८-५६
लुका ९:५७-६२