सैतानाआ येसु धान्मा लाप्तुओ
४
येसु सेङ्लावाआ भेप्तुकि यर्दन याङ्वामादाङ्का म़लोन्ता खोन्कि सेङ्लावाआ खो लेक्लेक्लेक्वाओदा अ़खात्ता।
२ मोदा aसैतानाआ चालिस्कालेन्तारि येसु धान्मा लाप्तु।
मो चालिस्कालेन्तारिङा येसुआ दित्छाङ मान्चामाङ म़युङाचिआकिना खोक्को साम़सुवाङा।
३ मोन्ग़रिङा सैतानाआ येसु लो,
“खानानिन निनाम्हाङ्ओ अ़चुछाङा त़युङिन्येन्नालो ओक्को लुङ पेम्पाक लिसानि लोवानुम।”
४ येसुआ य़ङ अ़लासा,
“साम्कालिन्दा ओवात्नि छाप्तायुङ्सा,
‘पेम्पाक्आ ओन्ङा म़ना अ़ह़ङ्निन।’”
५ खोन्किना सैतानाआ येसु झोन्ताङाओदु खात्तुकि अ़क्दुदाङा हेन्खामादाओ झारा हेन्कोप्चि खाङ्मेत्तु।
६ खोन्कि मोसाआ येसु लो,
“अ़ङ्का खानानिन ओ झारा हेन्कोप्चि खोन्कि चासुम्छेन्बिचिओ अ़चुहाङ्पा मुनानिन।
देकिनालो ओ झारा अ़ङ्का ऩपुवाङ्युङ्साङ खोन्कि अ़ङ्का साङ प़मा स़ङा,
अ़ङ्का खोङे प़ङ।
७ खानानिन्आ अ़ङ्काएदा त़बोम्सिन्चिन्कि त़ब़क्ङाऩङ्नालो ओ झारा आम्नुओङा म़लि।”
८ येसुआ य़ङ अ़लासा,
“साम्कालिन्दा ओवात्नि छाप्तायुङ्सा,
‘खाना हाङ्पा आम्निनाम्हाङ्एदा ओन्ङा बोम्सान्चिन खोन्कि खो ओन्ङा ब़रु।’”
९ हान सैतानाआ येसु यरुसलेम्दा खात्तुकि निनाम्हाङ ब़क्खाखिम्ओ अ़छोङ्दु एप्मेत्तुकि लो,
“खानानिन निनाम्हाङ्ओ अ़चुछाओनालो ओदाङ्का छुक्तानिन,
१० देकिनालो साम्कालिन्दा छाप्याङ,
‘निनाम्हाङ्आ खोक्को काफाचि आम्नुओ निकि म़लोचिकि खाना नुलोक ऩरात।
११ खोन्कि आम्लाङ लुङ्दुङ्दा अ़धुङ्निन्ने निकिना मोचिआ अ़चुओ छुक-छुक्आ खाना ऩक़क।’”
१२ येसुआ य़ङ अ़लासा,
“साम्कालिन्दा ‘हाङ्पा आम्निनाम्हाङ मान्चिन्खाङ्दो’नि छाप्तायुङ्सा।”
१३ सैतानाआ झाराकापाराआ येसु धान्मा लाप्तुचिउकि मोसोओ खोप्ताङाओ अ़ग़रि मान्तायुक्तातारि छिरुदोकि खारा।
येसुआ गालिल धिखाहुप्दा अ़चुकाचि अ़पुङ्साओ
१४ येसु सेङ्लावाओ अ़चुसावाआ म़भेप्ताकि गालिल्ह्यात्नि म़लासा।
खोन्कि खोक्कोसोओ अ़चुतुक्वादाओ य़ङ झारा मोदाओ ऱङ्कोप्नि धिखाहुप्चिदा फेसा।
१५ खोन्कि खोक्कोसाआ मोचिओ अ़चुयावायोक्खिम्चिदा म़चिन्तुचि खोन्कि झारासाआ खोक्को अ़चोन्ता।
नासरत्दाओ म़नाचिआ येसु ऩङाअ़छिराओ
१६ येसु म़पोयाओ नासरत तेन्दा म़तादिसाकि अ़धुन्वात्निङा यहुदिचिओ bसावातोम्खा-लेन्दा cयावायोक्खिम्दा म़खारा खोन्कि साम्कालिन खिप्सि म़एवा।
१७ खोन्किना निनाम्हाङ्य़ङ खाकालु dयसैयाओ अ़छाप्लाखा येसु अ़पुवा।
येसुआ मो छाप्लाखा अ़फेसाकि ओवात्नि छाप्ताङाओ अ़धाङ अ़लामा लोइसा:
१८ e “हाङ्पाओ सेङ्लावा अ़ङ्काएदा याक्याङ।
देकिनालो मान्तोक्कादाचि नुय़ङ्खान खाएत्सि अ़ङ्का ऩछेन्ताङ्युङ्साङ।
म़छेक्याङ्ओचि लेत्लोइसि,
दोप्म़क्चि खाकाखाङ मुसि,
तिम्माछ़न्मादा म़छुक्ताओचि फोङ्लोइसि,
१९ खोन्कि निनाम्हाङ्आ आन्कान अ़चुसोम्तुक्मा ग़रि तायुङ्सा निकिना खालुसि खोक्कोसाआ अ़ङ्का ऩछुत्ताङ्युङ्साङ।”
२० खोन्कि येसुआ साम्कालिन अ़रिप्ताकि अ़क्छा काफा अ़लासापुवाकि म़युङा।
मो यावायोक्खिम्दा कायुङ्चि झारासाआ येसु होन्नि अ़चोआदिसा।
२१ खोन्कि “ओक्को साम्कालिन्दा छाप्याङ्ओ य़ङ आय़ ओन्ग़रि खानानिन्आ त़एनुम्योम्हिदाङा तालायुङ्सा” नि खोक्कोसाआ मोचि लोमा म़पुङ्सुचि।
२२ खोक्कोसोओ अ़चुय़ङ काएन्चि झारासाआ खोक्कोसोओ अ़चुतुक्वादा “अ़नुवाक”नि अ़लोवा।
मेन खोक्को एन्नुलो म़चेवाओ अ़एनाकि मोचि दोम्तुदोचि खोन्कि “दि ओक्को योसेफ्ओङा अ़छा माआङ कि?”
नि मोचि म़य़ङा।
२३ खोन्कि येसुआ मोचि म़लोचि,
“हान ब़द्धे म़नाचिआ अ़एनाओ ओ दोय़ङ्ला नुछ्याङा खानानिन्आ अ़ङ्का त़लोङाऩङ,
‘ओक्तोकामेत!
खाना आप्पि नुसान्चिन।
कफर्नहुम तेन्दा खाना त़मुओ सावा काचि आन्कान्काआ एनुम्युङ्सुम्का,
मो काचि ओक्को आम्तेन्दाछाङ मु।’”
२४ खोन्कि खोक्कोसाआ म़लोचि,
“अ़ङ्का अ़नुछ्या खानानिन लोनाङ्नानिन,
खाक्कोछाङ निनाम्हाङ्य़ङ खाकालु अ़तेन्दा ऩलोउन।
२५ नुछ्याङा fएलिया युङाङाओ ग़रिदा सुम्कादोङ अ़क्धाङ्तारि वा मान्ताकि झारा हेन्कोप्दा अ़धिवाङ स़ङ्साक्वा छुक्ताहिदा इस्राएल्दा ब़द्धे मेन्मित्माचि म़युङाङा।
२६ खोन्नुछाङ निनाम्हाङ्आ एलिया मोचिएदा मान्खान्माङ सिदोन धिखाहुप्दाओ सारपत तेन्दा कायुङ अ़क्छा निरावा मेन्मित्माएदा ओन्ङा अ़खाइसा।
२७ मोवात्निङा निनाम्हाङ्य़ङ खाकालु एलिसा युङाङाओ ग़रिदा इस्राएल्दा ब़द्धे क़माधामा सारिमाआ लाउचिओचि म़युङाङा।
खोन्नुछाङ निनाम्हाङ्आ मोचि साङ्छाङ मान्नुमाङ सिरिया हेन्कोप्दाओ निरावा म़ना नामान ओन्ङा अ़नुसा।”
२८ ओक्को य़ङ अ़एनाकि यावायोक्खिम्दा म़युङाङाओ झाराकापाङ म़नाचि अ़चुमाइसुङ्आ पुन्तुदोचि।
२९ खोन्कि मोचि म़पुवालोन्ताकि येसु सात्याङ्सा अ़चुतेन्दाङ्का बुङ्खाया अ़लोइसा।
मोचिआ खोक्को हुवाल़ङ्माओ अ़छोङ्दा अ़बात्ताकि मोदाङ्का वेन्माधान्मा अ़लाप्ता।
देकिनालो मोचिओ अ़चुतेन भ़ऱदु छुक्ताङा।
३० मेन खो म़ना मुक्लादाङ्का म़खुन्तान्लोत्तान्चिन्कि म़खारालावा।
येसुआ चाकावालावाआ लाउओ म़ना अ़नुसाओ
३१ खोन्कि येसु गालिल्ओ कफर्नहुम सहरादा म़धा।
मोदा यहुदिचिओ सावातोम्खा-लेन्दा खोक्कोसाआ मोचि म़चिन्तुङुचि।
३२ खोक्कोसोओ अ़चुचिन्माय़ङ अ़एनाकि म़नाचि दोम्तुदोचि।
देकिनालो खोक्को पाङ्एनान म़चेवाङा।
३३ यावायोक्खिम्दा अ़क्छा पोप्ताओ चाकावालावाआ लाउओ म़ना युङाङा।
मो म़ना ओवात्नि चिलिलिवा पारा,
३४ “नासरत्ओ येसु,
खानानिन्आ आन्कान्का दे मुमा त़लाप्निङ्निओ?
दि खानानिन आन्कान्का लुक्सि त़तान्ओ?
खानानिन साङ ओ,
अ़ङ्का सिन्नाङ्नानिन,
खानानिन निनाम्हाङ्आ ऩछुत्तिन्ओ अ़चुसेङ्ताङ्पा ओ!”
३५ ओ अ़एनाकि येसुआ मो चाकावालावा रेन्याङ्सा अ़लोवा,
“वाइवेत युङा,
खोन्कि ओ म़नादाङ्का लोन्ताखारा!”
खोन्कि चाकावालावाआ मो म़ना झारासोओ अ़चुबुदा धाम्सुकि खेन्मान्वान्माङ लोन्ताखारा।
३६ खोन्कि झाराकापाङ दोम्तुदोचिकि “ओ दियाको य़ङ ए खा?
ओसाआ ना सावाएनान्ओ पाङ्आ लोङुचिहिदा म़पोप्ताओ चाकावालावाचिछाङ म़लोन्खात्याङ!”
नि अ़क्छा निएदा लोकालो म़मुवा।
३७ खोन्कि येसुआ अ़मुवाओ अ़तुक्वादाओ य़ङ्खान्चि धिखाहुप्ओ झारा तेन्चिदात्नि फेसा।
येसुआ ब़द्धेकापाङ म़नाचि म़नुसुचिओ
३८ येसु यावायोक्खिम अ़छिरादाकि सिमोन्ओ अ़खिम्दा म़वाङा।
मोन्ग़रि सिमोन्ओ अ़छादिमा चाअ़त्लो माङ्धिन्आ तुआङा।
खोन्कि म़नाचिआ “मो नुनिप़नि”निकिना येसु अ़बुआ।
३९ येसु मोसोओ अ़च़क्दा म़एवाकि माङ्धिन अ़रेन्ता खोन्कि मो माङ्धिन्आ लेरु,
खोन्किना च़क्नि मो पुवालोन्ताकि खोचि ब़रुचि।
४० नाम लुन्माखात्मा मुवाङाहिदा म़नाचिआ झारा कातुक्चि येसुएदा म़तारुचि।
येसुआ मोचि अ़क्छा-अ़क्छाएदा अ़चुछुक युङ्याङ्सा म़नुसुचि।
४१ चाकावालावाचिछाङ “खानानिन निनाम्हाङ्ओ अ़छा त़युङिन्येन!”
निकिना पात्याङ्सा ब़द्धेकापाङ्दाङ्का म़लोन्ता।
मेन येसुआ मो चाकावालावाचि म़रेन्तुचिकि चेप्मा मान्प़म़दोचि।
देकिनालो खोक्को ख्रिस्त म़युङ्याङ निकिना मो चाकावालावाचिआ अ़सिन्ताङा।
येसुआ नुय़ङ्खान खाएत्याङ्सा म़कोलाओ
४२ अ़वाय़ङ खादाराङावा येसु म़लोन्ताकि सुकुलादा म़खारा।
मेन म़नाचिआ खोक्को अ़लामा।
खोन्कि खोक्को अ़धिराकि मोचिआ,
“आन्कान्का मान्छित्दादानि”नि य़ङ्याङ्सा खोक्को मोदाङा युङ्मेत्मा अ़बुआ।
४३ मेन येसुआ मोचि म़लोचि,
“अ़ङ्का निनाम्हाङ्ओ अ़चुहाङ्होन्ओ अ़तुक्वादा नुय़ङ्खान नितेन्चिदाछाङ खालुमादोत।
देकिनालो निनाम्हाङ्आ अ़ङ्का ओ काचि मुसि ऩय़साङ्ओ।”
४४ खोन्कि खोक्कोसाआ झारा यहुदियादाओ यावायोक्खिम्चिदा म़खाराकि खाअ़लुसा।
लुका ४:१-३०
लुका ४:३१-४४