येसुओ अ़चुलिमा
२
मोन्ग़रि रोम हेन्कोप्दाओ तोक्पोहाङ कैसर अगस्तस्आ ब़द्धे हेन्कोप्चिदा हाङ मुवाङा।
खोसाआ हाङ मुवाङाओ हेन्कोप्चिदाओ झारा म़नाचि देम्कापाङ म़युङ्याङ निकिना सिन्माओ निम्पाङ अ़चुऩङ छाप्मादोत्नि लोचि।
२ कुरेनियस सिरिया धिखाहुप्दाओ हाङ्काचि मुवाङाहिदा ओवात्नि ऩङ छाप्म़मेत्तुचिओ बुयाओदु ओ।
३ झाराकापाङ अ़चुओ ऩङ छाप्सि अ़चुतेन सहरादा म़खारा।
४ मोन्ग़रि योसेफ अ़ऩङ छाप्सि गालिल धिखाहुप्दाओ नासरत तेन्दाङ्का लोन्ताकि यहुदिया धिखाहुप्दाओ दाउद्ओ अ़तेन बेथलेहेम्दुत्नि खारा।
देकिनालो खोक्को बुयाओ हाङ दाउद्ओ अ़छावारि याआङा।
५ खोन्कि योसेफ्एनान मरियम्ओ अ़सायाकाम्मा अ़छ़ङ लिसाचिआओसा मरियम्ओछाङ अ़ऩङ छाप्सि खोचि अ़क्नि खाराचि।
मोन्ग़रि मरियम छा वारायुङ्सा।
६ खोन्कि खोचि बेतलेहेम्या युङाङाचिहिदाङा मरियम्ओ अ़छा तोक्मा ग़रि लिसा।
७ खोन्कि मरियम्आ बुयाओ दुवाछा तोक्तुकि तित्आ फेप्तु खोन्कि पित्खुङ्दा इप्तु।
देकिनालो खोचिआ खादाछाङ याक्सादा युङ्खा मान्तोक्चि।
भेरा काखाङ्चि खोन्कि निनाम्हाङ काफाचि
८ बेथलेहेम तेन च़क्दाओ चान्खादा भेरा काखाङ्चिआ अ़खाखुत भेराचि म़हुङुङुचि।
९ निनाम्हाङ काफा मोचिएदा खाङ म़मुसान्चिन।
खोन्कि निनाम्हाङ्ओ अ़चुसाम्आ मोचिओ झारादात्नि उप्तुदिसुचि।
मो अ़खाकि भेरा काखाङ्चिओ ब़द्धे अ़चुक़माकारा।
१० खोन्कि निनाम्हाङ काफाआ मोचि लोचि,
“मान्क़दानिन!
एनानुम,
अ़ङ्का झारा म़नाचिओ निकि अ़न्नुनु ऩङानुमाओ य़ङ्खान तारुङ्कि आम्नुओ बुदा ताङ्युङ्साङ।
११ आय़ दाउद्ओ अ़तेन्दा कालेन्पा आम्नुओ निकि म़पुक्तान्युङ्सान्चिन।
खो ख्रिस्त हाङ्पा म़युङ्याङ।
१२ खानानिन्आ नुनु तित्आ फेप्कि पित्खुङ्दा इप्युङ्ओ त़धिरुम।
खोन्कि ओदाङ्काङा खानानिन्आ खोक्को त़सिन्तुम।”
१३ अ़क्धुवा मो निनाम्हाङ काफाएनान ब़द्धे निनाम रात्खामिचि खाङ्म़मुसान्चिन्किना निनाम्हाङ्ओ अ़चुऩङ चोन्याङ्सा ओवात्नि छाम लुमा अ़पुङ्सा,
१४ “झारादाङ्का धानि निनाम्मादु निनाम्हाङ्ओ अ़चुऩङ लोङ्ने,
खोन्कि हेन्खामादा खाक्को म़नाचिएनान निनाम्हाङ्ओ अ़चुऩङानुयाङ,
मोचिओ अ़चुमिन्मा चानुलो लिने।”
१५ निनाम्हाङ काफाचि मोचिदाङ्का म़हासान्चिन्कि निनाम्मादुत्नि म़लासा।
खोन्कि भेरा काचान्चि खोचिखोचिएदा म़य़ङा,
“लु,
हान बेथलेहेम्या खारिन्ने खोन्कि निनाम्हाङ्आ आन्कान म़लोवाओ य़ङ तालाओ खाम्ने।”
१६ खोन्कि मोचि हेङ्याङ्सा म़खाराकि मोदा मरियम,
योसेफ खोन्कि पित्खुङ्दा अ़इप्तायुङ्साओ नुनु अ़धिरा।
१७ भेरा काखाङ्चिआ खोचि म़खाचिकि नुनुओ अ़तुक्वादा निनाम्हाङ काफाआ य़ङाओ य़ङ खाम़एत्तुचि।
१८ भेरा काखाङ्चिआ म़य़ङाओ य़ङ काएन्चि झाराकापाङ दोम्तुदोचि।
१९ मेन मरियम्आओन ओ झारा य़ङ्चि अ़मिन्मादा नुलोक युङ्सुकि मित्तुचि।
२० भेरा काखाङ्चिआ निनाम्हाङ काफाआ य़ङाओवात्निङा झारा एन्मा खाङ्मा अ़तोक्ताओसा निनाम्हाङ्ओ अ़चुऩङ लोङ्याङ्सा खोन्कि निनाम्हाङ चोन्याङ्सा म़लासा।
२१ आथ्कालेन्दा नुनु सिप्मायाम्बुन मुवाहिदा खोक्कोसोओ अ़चुऩङ येसु अ़वात्ताचु।
मो ऩङ मरियम्आ छा वात्मा बुयाङा निनाम्हाङ काफाआ खाएत्तुयुङ्सुओ।
निनाम्हाङ ब़क्खाखिम्दा येसु खाङ्अ़मुसाओ
२२ aमोसाओ अ़य़ङ्हुप्वात्नि खोचिओ सेङ्मा लेन चिआकि खोचिआ अ़चुनुनु निनाम्हाङ्ओङा निकिना खाङ मेत्सि यरुसलेम्दाओ निनाम्हाङ ब़क्खाखिम्दा अ़बात्ताचु।
२३ देकिनालो निनाम्हाङ्ओ अ़चुय़ङ्हुप्दा “बुयाओ दुवाछा झारा निनाम्हाङ्ओ निम्पाङ सेङ्सायुङ्साओ”नि छाप्तायुङ्सा।
२४ खोन्कि निनाम्हाङ्ओ अ़चुय़ङ्हुप्आ य़ङ्याङ्वात्नि अ़क्खोम साप्दुकुत्वा माङ्नालो ह्वातात परेवाओ अ़छाचि हेन्खोक्वा धान्मा प़मादोराङाओसा खोचि यरुसलेम खाराचि।
२५ मोन्ग़रि यरुसलेम्दा अ़क्छा सिमियोन अ़ऩङ मुवाङाओ म़ना युङाङा।
खो साम्योक्मि खोन्कि निनाम्हाङ कामित म़ना युङाङा।
खोसाआ इस्राएलिचिओ कालेन्पा म़ना तामा ग़रि हुङुयुङ्सुङु,
खोन्कि सेङ्लावा खोएदा याआङा।
२६ हाङ्पाआ अ़य़ओ कालेन्पा ख्रिस्त मान्खाङ्माङ खो अ़स़निन्दानिन निकिना सेङ्लावाआ बुयाङा खोक्को अ़लोवायुङ्साओ।
२७ खोन्कि सेङ्लावाआ सिमियोन निनाम्हाङ ब़क्खाखिम्दा तित्तु तारु।
मोन्ग़रिङा साम्योक्मि य़ङ्हुप्वात्नि काचि मुसि मरियम खोन्कि योसेफ्छाङ येसु अ़बात्ताचुकि निनाम्हाङ ब़क्खाखिम्दा तादिसाचि।
२८ खोन्कि सिमियोन्आ नुनु क़क्तुकि निनाम्हाङ्ओ अ़चुऩङ लोङ्याङ्सा य़ङा,
२९ “निनाम्हाङ,
खानानिन्आ आम्नुओ हिप्माय़ङ त़तासुम्लोम्युङ्सुम।
हान आम्नुओ हारुक नुलोक लेत्नि।
३० देकिनालो खानानिन्आ त़य़सुम्ओ कालेन्पा अ़ङ्का आप्पि अ़ङ्म़क्आङा खाङ्युङ्सुङ।
३१ खानानिन्आ झारा रावाओ म़नाचिओ निकि कालेन्पा त़य़सुम्ओ।
३२ खोक्कोङा निरावा म़नाचिओ निकि आम्नुओ लाम खाङ कामेत साम म़युङ्याङ,
खोन्कि खोक्को आम्नुओ रावा इस्राएलिचिओ अ़चुऩङ तोक्पो कामु म़लि।”
३३ नुनुओ अ़तुक्वादा सिमियोन्आ य़ङाओ य़ङ अ़एनाचुकि येसुओ अ़चुमामा खोन्कि अ़चुपापा दोम्तुदोचि।
३४ खोन्कि सिमियोन्आ खोचि आसिखा प़चिकि नुनुओ अ़मा मरियम लो,
“एनु,
ओक्को नुनुआ इस्राएल्दाओ ब़द्धे म़नाचि सिम्धाइसि खोन्कि झोन्लोइसि निनाम्हाङ्आ अ़छेन्तायुङ्सा।
खोक्कोसाआ म़नाचि चाप्म़चेत्तुचि,
मेन म़नाचि खोक्कोसोओ अ़चुय़ङ लोक्मा म़छुन।
३५ खोन्कि ब़द्धेसोओ साकोङ्वाहुत्दाओ अ़चुमिन्माचि म़दात।
खोन्कि आम्साकोङ्वा बान्छोन्आ धुविन्वात्नि दुखाआ योक्तु।”
३६ मोदा हन्नानिओ अ़क्छा निनाम्हाङ्य़ङ खाकालुमाछाङ युङाङा।
खोक्को आसेर भुङ्ओ फनुएल्ओ अ़छा ओ।
खो ब़द्धे खोक्मा लिसाचिआयुङ्सा।
खोसोओ अ़साया काम्साकि खो सात्कादोङ ओन्ङा अ़खिम्हाङ्पाएनान युङ्मा तोक्तु।
३७ खोन्किना खो चौरासिकादोङ बात्तुङुओन मेन्मित्मा लिसाकि युङाङा।
खोसाआ निनाम्हाङ ब़क्खाखिम देम्खाछाङ मान्छित्दादोङु,
मेन अ़खोलेन अ़खाखुत निनाम्हाङ ब़क्याङ्सा मोदा युङाङा।
खोन्कि मान्चामाङ युङाकिछाङ यामाराङा।
३८ मोन्ग़रिङा खोछाङ मोचिएदा बानाकि निनाम्हाङ आलाङ प़,
खोन्कि निनाम्हाङ्आ यरुसलेम्दाओ म़नाचि लेन्मा ग़रि काहुङ्चि झारा मोक्को नुनुओ अ़तुक्वादा खाएत्तुचि।
३९ निनाम्हाङ्ओ अ़चुय़ङ्हुप्दा छाप्ताङावात्नि मुमादोराङाओ झारा काचिचि अ़मुवाचिआचुचिकि योसेफ खोन्कि मरियम गालिल्दाओ अ़चुतेन नासरत्दा लासाचि।
४० छा येसुओ अ़चुपोक्दा पोन्याङ्सा म़खाराकि अ़चुसावा पोया,
खोन्कि अ़चुखारु चारु।
निनाम्हाङ्आ खोक्को सोमाअ़तुक्ताङा।
छा येसु निनाम्हाङ ब़क्खाखिम्दा म़युङालाराओ
४१ येसुओ अ़चुमापाचि अ़दोङ्खिन्तुम bकाक्माखात्मा चानुचा मुसि यरुसलेम खात्याङ्सा मुवाङाचि।
४२ येसु बारकादोङ बात्तुङुहिदा मो चानुचाओ च़माथाङ्मावात्नि खोचिआ येसु अ़क्नि अ़खात्ताचुकि काक्माखात्मा चानुचा चासि यरुसलेम्दु म़लोन्ता।
४३ चानुचा म़चाचिआकि येसुओ अ़चुमापाचि अ़चुखिम्ह्यात्नि लासाचि।
मेन छा येसुओन यरुसलेम्दाङा युङालारानुछाङ खोचिआ ओ य़ङ मान्सिन्अ़दाचु।
४४ अ़क्नि म़खाराङाओ रुहुप्दा येसुछाङ याक्याङ्नि मिनाचिकिना खोचि नाम्प़क्लो कोलाचि।
खोन्किना खोचिआ अ़चुम़नाचि खोन्कि यावाकुवाचिएदा खोक्को लाम्मा अ़पुक्ताचु।
४५ अ़चुछा खादाछाङ मान्धित्अ़दाचुओसा येसु लाम्सि खोचि यरुसलेम्दुत्नि लासाचि।
४६ यरुसलेम्दाङ्का म़लोन्ताओ सुम्कालेन्दा खोचिआ अ़चुछा निनाम्हाङ ब़क्खाखिम्ओ अ़बुक्लुङ्दा अ़धिराचु।
खोक्को साम्योक काचिन्पाचिएनान म़युङाङा।
खोक्को मोचिओ अ़चुय़ङ एन्याङ्सा खोन्कि सेन्याङ्सा म़युङाङा।
४७ खोक्कोसोओ अ़ताया ब़द्धे याआङाओ खोन्कि खोक्कोसाआ य़ङ नुलोक अ़लासाङाओ अ़एनाकि झाराकापाङ दोम्तुदोङुचि।
४८ अ़चुछा अ़खाचुकि अ़चुमापाचि दोम्तुदोचि।
खोन्किना अ़चुमाआ सेनु,
“छाओ,
खाना आन्काच्या देकि ओवात्नि त़मुनिओ?
खाखो,
आम्पा खोन्कि अ़ङ्का सोखा मुयाङ्सा खाना लाम्निलुक्निङ्निओ।”
४९ खोन्कि येसुआ खोचि म़लोचि,
“खानानिन्आ अ़ङ्का देकि त़लाम्निङ्निओ?
अ़ङ्का अ़ङ्पापाओ अ़चुखिम्दा युङ्मादोत्निओ य़ङ दि खानानिन्आ मान्सिन्त़दोम्योम कि?”
५० मेन खोक्कोसाआ लोचिओ अ़तुप्माय़ङ खोचिआ तुप्माङा मान्ऱअ़दाचु।
५१ खोन्किना येसु अ़चुमापाचिएनान नासरत्दा म़धाकि खोचिआ अ़लोवाचुओ काङ्याङ्सा युङा।
खोन्कि खोक्कोसोओ अ़चुमा मरियम्आ ओ झारा य़ङ्चि अ़मिन्मादा नुलोक युङ्सुचि।
५२ येसु अ़चुखारु खोन्कि अ़चुपोक्दा पोन्याङ्सा म़खाराकि खोक्कोएदाङ्का निनाम्हाङ खोन्कि म़नाचिओ अ़चुऩङानुवा।
लुका २:१-२४
लुका २:२५-५२