येसुओ अ़चुकात्मा फान्ताओ
९
येसुआ मोचि म़लोचि,
“अ़नुछ्या अ़ङ्का खानानिन लोनानिन,
ओदा खा-खाक्को काएप्चिदाङ्का निनाम्हाङ्ओ अ़चुहाङ्होन अ़धिवो सावादा तायाङ्ओ बुया मान्खाङ्माङ्तारि ऩस़निन्दानिन।”
२ छकालेन्कि येसुआ पत्रुस,
याकुब खोन्कि युहन्ना खोक्कोएनान म़खात्तुचिकि अ़क्तात झोन्ताङाओ भ़ऱदु म़लोन्ता,
मोदु खोचि ओन्ङा म़याआङा।
खोन्कि अ़चुकाखेङ्पाचिओ अ़चुबुदा खोक्कोसोओ अ़चुकात्मा फान्ता।
३ खोन्कि खोक्कोसोओ अ़चुतित छोक्छोक्छोक्वा खोन्कि ओम्पुवाचिचि लेरा,
ओ हेन्खामादाओ खाक्कोछाङ तित वाकाधाप्आ मोन्तेका चात्लो छोक्छोक्छोक्वाओ मुमा अ़ऱन।
४ खोन्किना निनाम्हाङ्य़ङ खाकालु मोसा खोन्कि एलिया खोचिएदा खाङ्मुसाचिचिन,
खोन्कि खोचि येसुएनान चेप्मा अ़पुङ्साचु।
५ खोन्कि पत्रुस्आ येसु लो,
“काचिन्पो,
आन्कान ओदा युङ्मा अ़नुवाक लि!
आन्कान्का सुम्कातात याक्साचि मुम्च़म्काने,
अ़क्तात आम्नुओ निम्पाङ,
खोन्कि अ़क्तात मोसाओ निम्पाङ खोन्कि अ़क्तात एलियाओ निम्पाङ!”
६ खो दे य़ङ्मा दोराङाओ खोसाआ मान्सिन्दो।
देकिनालो खोचिओ अ़न्नुनु अ़चुक़माकारा।
७ खोन्किना य़वारिआ मोचि भुक्तुखात्तुचि,
खोन्कि य़वारिदाङ्का अ़क्तात य़ङ ता,
“ओक्को अ़ङ्का सोमातुक्तुङ्योङ्ओ अ़ङ्छा ओ,
खोक्कोसाआ ऩलोन्ओ एनानुम!”
८ च़क्नि खोचिआ ओह्यात्नि-मोह्यात्नि अ़खा,
खोचिआ साङ्छाङ मान्खाङ्अ़दा,
मेन येसु ओन्ङा खोचिएनान म़युङाङा।
९ खोचि भ़ऱदुङ्का म़धान्तान्यान्चिन्हिदा येसुआ अ़चुकाखेङ्पाचि “देम्खातारि म़नाओ अ़छा स़दाओदाङ्का अ़लानिन्खोन्निन्लोन्निन,
मोन्तारि त़खाम्ओ य़ङ साङ्छाङ खामान्एत्दानुम्च़म”नि म़लोचि।
१० खोन्किना खोचिआ मो य़ङ अ़चुकोङ्दाङा अ़युङ्सा,
मेन खोचि-खोचिएदा “स़मादामादाङ्का लामाखोन्मालोन्मानिओसो अ़तुप्माय़ङ दि ओ निकिना सेन्कासेन मुमा अ़पुङ्सा।”
११ खोन्किना खोचिआ येसु अ़सेना,
“खोन्नालो देकि य़ङ्हुप काचिन्पाचिआ बुया एलिया तामादोत्नि म़य़ङ्याङ?”a
१२ येसुआ मोचि म़लासुलोचि,
“अ़नुछ्या,
एलिया बुया ता,
खोन्कि झारा य़ङ्चि लासुतोङ्सुचि।
खोन्नुछाङ म़नाओ अ़छाआ चाअ़त्लो दुखा आङ्मा खोन्कि झारासा ऩङाअ़छित निकिना साम्कालिन्दा देत्नि छाप्याङ?b
१३ मेन अ़ङ्का खानानिन लोनानिन,
एलिया बुयाङा ताचिआयुङ्सा,
खोन्कि म़नाचिआ खोसोओ अ़तुक्वादा छाप्ताङाओवात्निङा देमुमानि म़मिना,
खोवात्निङा खो अ़मुवायुङ्सा।”
चाकावालावाआ लाउओ दुवाछा अ़नुसाओ
१४ खोचि नि काखेङ्चिएदा म़लासाताहिदा खोचिआ अ़धिवाङ म़ना मुक्लाचि अ़चुऱङ्कोप्नि म़खाचि,
खोन्कि य़ङ्हुप काचिन्पाचि खोचिएनान दुम म़छ़राङा।
१५ झारा म़नाचिआ येसु अ़खाकिना मोचि अ़न्नुनु दोम्तुदोचि,
खोन्कि खोक्को साऩङ्वा मेत्सि म़लोरा।
१६ खोन्कि येसुआ अ़चुकाखेङ्चि म़सेनुचि,
“दिसोओ अ़तुक्वादा मोचिएनान दुम त़तुसिन्येन?”
१७ म़ना मुक्लादाङ्का अ़क्छा म़नाआ लासुलो,
“काचिन्पो,
अ़ङ्का अ़ङ्दुवाछा छा खानानिन्एदा तारुङ्युङ्सुङ,
देकिनालो खो चाकावालावाआ लाउकिना भोवा मु।
१८ खाउग़रि चाकावालावाआ खो लाउ,
खोन्ग़रि मोसाआ खो बाखादा धाम्सु,
खोन्कि खोसाआ अ़दोदाङ्का अ़छोम्पुत्वा लोइसु,
खोन्कि खोसाआ अ़क़ङ ऱउकि ख़न्खात।
अ़ङ्का आम्नुओ काखेङ्पाचि चाकावालावा लोइसाखाइसानुम्नि लोङ्च़ङ,
मेन मोचिआ मो मुमा मान्ऱअ़दा।”
१९ खोन्कि येसुआ मोचि म़लोचि,
“साकोङ्छ़ङ मात्द़ङ्ओ म़नाचि ओ!
देम्खातारि अ़ङ्का खानानिन्एनान युङ्ङा?
देम्खातारि अ़ङ्का खानानिन आङ्नानिन?
आम्छा अ़ङ्काएदा बात्तु।”
२० खोन्किना मोचिआ मो छा येसुएदा अ़बात्ता।
चाकावालावाआ येसु खाकिना मोन्ग़रिङा मो छा ङाङ्सु खोन्कि बाखादा तियाकि अ़दोदाङ्का अ़छोम्पुत्वा लोन्याङ्सा ओह्यात्नि-मोह्यात्नि पुलिनाम्ताङ मेत्ता।
२१ खोन्कि येसुआ छाओ अ़पा अ़सेना,
“खो ओवात्नि लियाङ्ओ देम लिसा?”
खोसाआ लासुलो,
“अ़छायुङ्काङा।”
२२ “ओ चाकावालावाआ अ़धुन खो लुक्मा निकिना मिदा खोन्कि चाक्वादा वेइसुदिसु।
खानानिन मुमा त़ऱम्नालो आन्कान्का सोमातुक्निकि फानि!”
२३ खोन्किना येसुआ खो अ़लोवा,
“देकि त़ऱम्नालोनि त़य़ङ्याङ ओ?
साङ साकोङ्छ़ङ मु,
खोसोओ निकि झारा य़ङ्चि लिमा म़ऱ।”
२४ च़क्नि मो छाओ अ़पा पाराकि य़ङा,
“अ़ङ्का साकोङ्छ़ङ मुङा,
अ़ङ्साकोङ्छ़ङ मात्द़ङ्ओदा फासाङ्ऩङ!”
२५ येसुआ म़ना मुक्ला म़कोवान्यान्चिन्ओ म़खाचिकि खोक्कोसाआ पोप्ताओ लावा अ़रेन्ता,
“भोवा खोन्कि खामान्एन्कादा कामु चाकावालावा,
अ़ङ्का खाना लोना,
ओ छाएदाङ्का लोन्ताखारा,
खोन्कि ओएदा देम्खाछाङ मान्लावाङ्दा।”
२६ खोन्किना मो चाकावालावा पात्याङ्सा खोन्कि मो छा चाअ़त्सालो रुङ्सुकि लोन्ताखारा।
मो छा अ़खाङ्मादा स़पोक्वा लिसा,
खोन्ओसा झारा म़य़ङा,
“मो ना सुवादा।”
२७ मेन येसुआ खोसोओ अ़छुक अ़क़क्ताकि अ़पुआलोइसा,
खोन्कि खो पुवालोन्ता।
२८ खोन्कि खोक्को खिम्हुत्दा म़वाङा,
खोन्किना अ़चुकाखेङ्चिआ सुकुलादा येसु अ़सेना,
“आन्कान्का मो चाकावालावा देकि लोन्मा मान्ऱदोम्का?”
२९ खोक्कोसाआ मोचि म़लोचि,
“ओवाको ना यामात्मालाम्पा ओन्ङा लोन।”
येसु अ़चुस़माओ अ़तुक्वादा म़लासाय़ङाओ
३० खोचि मोदाङ्का म़लोन्ताकि गालिल्ओ लाम लियाङ्सा म़खारा।
मेन खोचि खादा म़युङाङाओ मो य़ङ साङ्चिआछाङ ऩसिन्तुन्नेनि येसु म़मिनाङा।
३१ देकिनालो खोक्कोसाआ अ़चुओ काखेङ्पाचि म़चिन्तुचि खोन्कि म़लोचि,
“म़नाओ अ़छा अ़लाप्कि म़नाचिओ अ़चुछुक्दा अ़पाक।
मोचिआ खो अ़सेत,
मेन सुम्कालेन्दा खो लाखोन्लोन।”
३२ मेन अ़चुकाखेङ्पाचिआ खोक्को म़य़ङाओ य़ङ मान्तुप्अ़दा,
खोन्कि मोसोओ अ़तुक्वादा खोक्को सेन्मा अ़चुक़माकारा।
साङ अ़धिवाङ?
३३ खोन्किना खोचि कफर्नहुम्दा म़ताला।
खोन्कि येसु खिम्हुत्दा म़युङाङाहिदा खोक्कोसाआ अ़चुकाखेङ्चि म़सेनुचि,
“लाम्दा खानानिन दिसोओ अ़तुक्वादा दुम त़छ़रिन्येन्ओ?”
३४ मेन खोचि वाइवेत म़लिसा,
देकिनालो खोचिआ अ़क्छा निएदा साङ तोक्पो ओ निकिना दुम म़छ़रायुङ्सा।
३५ येसु म़युङाकिना बारकापाङ अ़चुकाखेङ्पाचि म़बुत्तुचि,
खोन्कि खोचि म़लोचि,
“साङ बुदाओ लिमा लाम,
खो झारादाङ्का देङ्दाओ खोन्कि हारुक लिमादोत।”
३६ खोन्किना खोक्कोसाआ अ़क्छा अ़चुप्पो छा अ़क़क्ता,
खोन्कि मोचिओ अ़चुरादा एप्अ़मेत्ता,
खोन्कि खो अ़भेम्साकि खोक्कोसाआ अ़चुकाखेङ्पाचि म़लोचि।
३७ “साङ्आ अ़ङ्ऩङ्दा अ़क्छा ओवाको छा लोउ,
मोसाआ अ़ङ्का अ़लोक्ङा।
खोन्कि साङ्आ अ़ङ्का अ़लोक्ङा,
खोसाआ अ़ङ्का माआङ,
मेन अ़ङ्का काछुत्पा लोउ।”
साङ आन्देङ्सालाप्पादा मात्द़ङ मो आन्लिप्पादा याक
३८ युहन्नाआ येसु लो,
“काचिन्पो,
आम्नुओ ऩङ्दा अ़क्छा म़नाआ चाकावालावाचि लोइसुङुचिओ आन्कान्का खाम्का,
मेन आन्कान्का खो लोन्मा मान्प़दोम्का,
देकिनालो खो आन्कान्एनान अ़क्नि मात्द़ङ्याङ।”
३९ मेन येसुआ म़लोचि,
“खो मान्छेक्दानुम।
देकिनालो साङ्आ अ़ङ्ऩङ्दा सावापोरिओ काचि मु,
खो च़क्नि अ़ङ्तुक्वादा अ़त्लो य़ङ अ़चेप्निन।
४० देकिनालो साङ आन्देङ्सालाप्पादा मात्द़ङ,
खो आन्लिप्पाङा याक्याङ।
४१ अ़नुछ्या,
अ़ङ्का खानानिन लोनानिन,
साङ्आ खानानिन ख्रिस्तओ निकिना अ़ङ्ऩङ्दा अ़क खुङ चाक्वा दुङ्मा ऩप़न,
देम्खाछाङ खोसाआ अ़सिरिफा अ़मासुन।”
हेवादाङ्का देत्नि ह़ङ्मा?
४२ “साङ्आ अ़ङ्काएदा साकोङ्छ़ङ कामु ओ अ़चुप्पोचिदाङ्का अ़क्छा हेवा मुमेत्तुनालो मोसोओ अ़पोत्दा अ़धिवा चाचेम्खालुङ क़ङ्माकि धियाङ्वामादा वेन्मादिमा नुलोक लिओ।
४३ आम्छुक्आ खाना हेवा मुत़मेत्नालो मो क़प्तुखाइसु।
ह्वातात्माङ आम्छुक्चि म़याक्कि देम्खाछाङ अ़स़निन्ओ सित्म़ङ दुखा तोक्खायु cवेन्दिलुमादाङ्का ना अ़क्तात आम्छुक्एनान अ़लुक्निन्ओ ह़ङ्म़ङ्दा वाङ्मा नुलोक लि।
४४ [मो मिराक्दा ना भेवाचिङा म़स़,
ना मिङा स़दा।]
४५ खोन्कि आम्लाङ्आ खाना हेवा मुत़मेत्नालो मो क़प्तुखाइसु।
ह्वातात्माङ आम्लाङ्चि म़याक्कि सित्म़ङ दुखा तोक्खायु वेन्दिलुमादाङ्का ना अ़क्तात एक्सोक्वा आम्लाङ्एनान अ़लुक्निन्ओ ह़ङ्म़ङ्दा वाङ्मा नुलोक लि।
४६ [मो मिराक्दा ना भेवाचिङा म़स़,
ना मिङा स़दा।]
४७ आम्म़क्आ खाना हेवा मुत़मेत्नालो मो लारुखाइसु।
ह्वातात्माङ आम्म़क्एनान सित्म़ङ दुखा तोक्खायु वेन्दिलुमादाङ्का ना अ़क्तात आम्म़क्एनान निनाम्हाङ्ओ अ़चुहाङ्होन्दा वाङ्मा नुलोक लि।
४८ मोदा देम्खाछाङ भेवाचि नस़निन,
खोन्कि मि देम्खाछाङ अ़स़निन्दानिन।