मर्कुस्आ छाप्तुओ नुय़ङ्खान
बप्तिस्मा काप़ युहन्नाआ खालुसुओ
१
निनाम्हाङ्ओ अ़चुछा येसु aख्रिस्तओ अ़चुतुक्वादा नुय़ङ्खान पुङ्माय़ङ।
२ निनाम्हाङ्य़ङ खाकालु यसैयाओ अ़छाप्लाखादा ओवात्नि छाप्याङ,
“खाखो,
अ़ङ्का अ़ङ्य़ङ काखुन आम्बु-आम्बु छुत्तुङ,
मोसाआ आम्नुओ लाम चुम्सु।
३ लेक्लेक्लेक्वाओदा अ़क्छा पात्याङ,
‘हाङ्पाओ अ़चुलाम चुम्सानुम,
खोक्कोसोओ अ़चुलाम्चि त़ऩऩवा मुवानुम्च़म!’”b
४ खोन्किना बप्तिस्मा काप़ युहन्नाआ “आम्नुओ हेवाचि छिरानुम्च़म्कि बप्तिस्मा लोआनिन।
खोन्कि निनाम्हाङ्आ आम्नुओ हेवाचि ऩलेत्तिन्प़न!”
नि य़ङ्याङ्सा लेक्लेक्लेक्वाओदा ता।
५ झारा यहुदिया धिखाहुप्दाओचि खोन्कि झारा यरुसलेम्दाओ म़नाचि बप्तिस्मा काप़ युहन्नाओ अ़य़ङ एन्सि म़खाराङा।
खोन्कि “आन्कान्का हेवा मुन्युङ्सिन्का”नि य़ङ्सा खोलाम्पा यर्दन याङ्वामादा मोचि बप्तिस्मा म़लोआ।
६ युहन्ना उताओ अ़मुवाआ बामाय़ङ्ओ तित हुम्साङा,
खोन्कि अ़छुमाय़क्दा साहोक्वाओ छिप्माय़ङ छिआङा,
खोन्कि रुइचि खोन्कि खोक्लि खुदो चाङा।
७ खोन्कि खोसाआ खाएत्तुचि,
“अ़ङ्कादाङ्का आदेङ काता अ़ङ्कादाङ्का च़लोक सावापोरिओ म़मुयाङ,
अ़ङ्का ना पोम्माकि खोक्कोसोओ अ़चुफेङ्ताओ अ़छुम्खाचि हुत्माछाङ अ़ङ्का अ़खान्ऩङ।
८ अ़ङ्का खानानिन चाक्वाआ बप्तिस्मा प़नानिन,
मेन खोक्कोसाआ खानानिन सेङ्लावाआ बप्तिस्मा ऩप़न।”
येसुओ अ़चुबप्तिस्मा
९ मो लेन्चिदा येसु गालिल्ओ नासरत्दाङ्का म़ता,
खोन्कि यर्दन याङ्वामादा युहन्नालाम्पा बप्तिस्मा म़लोआ।
१० खोन्कि चाक्वादाङ्का बुङ्खाया म़लोन्ताहिदा मोन्ग़रिङा येसुआ निनाम्मा होराङाओ खोन्कि सेङ्लावा साप्दुकुत्वावात्नि खोक्कोएदा म़धाङाओ अ़खा।
११ खोन्कि निनाम्मादुङ्का अ़क्तात य़ङ ता,
“खाना अ़ङ्को अ़ङ्छा ओ।
अ़ङ्का खाना सोमातुक्नाङ्ना।
खानाएदा अ़ङ्को ब़द्धे अ़ङ्ऩङानुयाङ।”
१२ खोन्कि मोन्ग़रिङा सेङ्लावाआ येसु लेक्लेक्लेक्वाओदा अ़खात्ता।
१३ खोन्कि खोक्को सैतानाओ अ़धान्मा लाप्मादा छुक्याङ्सा चालिस्का लेन्तारि लेक्लेक्लेक्वाओदा म़युङा।
खोक्को साक्स़ङ्चिएनान म़युङा,
खोन्कि निनाम्हाङ काफाचिआ खोक्को अ़ब़रा।
येसुआ चारकापाङ ङा कालाप्चि म़बुत्तुचिओ
१४ आदेङ्माङ युहन्ना छेक्खाखिम्दा अ़छेक्ताकिना निनाम्हाङ्ओ अ़चुनुय़ङ्खान खालुयाङ्सा येसु गालिल्ह्यात्नि म़लासा।
१५ खोन्कि खोक्कोसाआ म़लोचि,
“ग़रि तालायुङ्सा,
खोन्कि निनाम्हाङ्ओ अ़चुहाङ्होन च़क्दा तायुङ्सा,
हेवादाङ्का लासानिन्कि नुय़ङ्खान्दा साकोङ्छ़ङ मुवानिन!”
१६ येसु गालिल धियाङ्वामाओ अ़केम-अ़केम म़खाराङाहिदा सिमोन खोन्कि खोसोओ अ़निछा अन्द्रियास धियाङ्वामादा बोप्छ़क वेत्ताङाचिओ खोक्कोसाआ म़खाचि,
देकिनालो खोचि ङा कालाप्चि ओ।
१७ खोन्कि येसुआ मोचि म़लोचि,
“अ़ङ्का त़ङ्ताङ्च़ङ,
खोन्कि अ़ङ्का खानाचि म़नाचि कालाप बोप्छ़क कावेत मुनाचि।”
१८ मोचिआ मोन्ग़रिङा अ़चुबोप्छ़क्चि अ़छिरादाचुचि खोन्कि येसु अ़त़ङ्ताचु।
१९ खोन्कि अ़क्चित ह्यात्नि येसु म़खाराहिदा जब्दियाओ अ़छा याकुब खोन्कि अ़निछा युहन्नाआ अ़चुनावादा अ़चुबोप्छ़क्चि अ़थुआङाचुओ म़खाचि।
२० खोक्कोसाआ च़क्नि खोचि म़बुत्तुचि,
खोन्कि खोचिआ अ़चुपा जब्दिया काफाचिएनान नावादा अ़छिरादाचु खोन्कि येसु अ़त़ङ्ताचु।
अ़अ़त्पा लावा याआङाओ अ़क्छा म़ना
२१ खोन्कि येसु अ़चुकाखेङ्पाचिएनान कफर्नहुम म़खारा,
खोन्कि सावातोम्खा-लेन यावायोक्खिम्दा म़वाङाकिना म़चिन्तुचि।
२२ खोन्कि खोक्कोसोओ अ़चुचिन्माय़ङ अ़एनाकि म़नाचि दोम्तुदोचि।
देकिनालो खोक्कोसाआ मोचि य़ङ्हुप काचिन्पाचिआ म़चिन्तुचिवा माआङ,
मेन पाङ्एनान म़चिन्तुङुचि।
२३ मोन्ग़रिङा मोचिओ अ़चुयावायोक्खिम्दा अ़क्छा पोप्ताओ लावाआ लाउओ म़ना पारालोन्ता,
२४ “नासरत्ओ येसु,
खानानिन्आ आन्कान्का दे मुमा त़लाप्निङ्निओ?
दि खानानिन आन्कान्का लुक्सि त़तान्ओ?
खानानिन साङ ओ,
अ़ङ्का सिन्नाङ्नानिन,
खानानिन निनाम्हाङ्आ ऩछुत्तिन्ओ अ़चुसेङ्ताङ्पा ओ।”
२५ मेन येसुआ मो चाकावालावा रेन्याङ्सा अ़लोवा,
“वाइवेत युङा,
खोन्कि ओ म़नादाङ्का लोन्ताखारा!”
२६ खोन्कि पोप्ताओ लावाआ मो म़ना चात्लो रुङ्सुकि अ़धिवाङ य़ङ्आ पात्याङ्सा मो म़नादाङ्का लोन्ताखारा।
२७ खोन्कि झारा म़नाचि दोम्तुदोचि,
खोन्किना मोचि अ़क्छा निएदा सेन्कासेन मुमा अ़पुक्ता,
“ओ दि ओ?
ओ ना अ़ऩङ्वा चिन्माय़ङ ए!
ओसाआ ना पाङ्एनान अ़अ़त्पा पोप्ताओ लावाचिछाङ लोन्तानिन्नि लोचिहिदा मोचि म़काङ्याङ!”
२८ खोन्कि च़क्निङा येसुआ अ़मुवाओ अ़तुक्वादाओ य़ङ्खान्चि गालिल धिखाहुप्ओ झारादात्नि फेसा।
येसुआ ब़द्धे कातुक्चि म़नुसुचिओ
२९ खोन्कि येसु मोन्ग़रिङा यावायोक्खिम अ़छिरादाकि याकुब खोन्कि युहन्नाएनान सिमोन खोन्कि अन्द्रियास्ओ अ़चुखिम्दा म़खारा।
३० सिमोन्ओ अ़छादिमा चाअ़त्लो माङ्धिन्आ अ़इम्खादाङा धुवाङा,
खोन्कि मोदाओ म़नाचिआ मोन्ग़रि येसु मोसोओ अ़तुक्वादा खाअ़एत्ता।
३१ खोन्किना येसु मोसोओ अ़च़क्दा म़खाराकिना अ़छुक अ़लावाकि अ़पुआलोइसा।
खोन्किना अ़माङ्धिन्आ मो लेरु,
खोन्कि मोसाआ खोचि ब़रुचि।
३२ मो अ़नाम्प़क,
नाम लुन्ताखाराकिना म़नाचिआ झारा कातुक्चि खोन्कि चाकावालावाआ लाउचिओचि येसुएदा म़तारुचि।
३३ खोन्कि झारा सहरादाओ म़नाचि खिम्ओ अ़बुक्लुङ्दा म़कोवान्चिन।
३४ खोन्किना येसुआ ब़द्धेकाखालाओ सारिमाचिआ म़लाउचिओचि झारा कातुक्चि म़नुसुचि,
खोन्कि ब़द्धे चाकावालावाचि म़लोइसुखाइसुचि।
मेन येसु साङ ओ निकिना मो चाकावालावाचिआ अ़सिन्ताङाओसा खोक्कोसाआ मोचि चेप्मा मान्प़म़दोचि।
येसुआ गालिल्दा चिन्मा म़पुङ्सुचिओ
३५ अ़वाय़ङ खामान्दात्युक्ताहिदाङा येसु म़पुवालोन्ताकि सुकुलादा म़खारा,
खोन्कि मोदा खोक्को याम़मारा।
३६ सिमोन खोन्कि खोसोओ अ़यावाचि खोक्को लाम्सि म़खारा।
३७ खोन्कि खोचिआ खोक्को अ़धिराकि मोचिआ अ़लोवा,
“झारासा खानानिन ऩलामिन्येन!”
३८ खोन्कि येसुआ मोचि म़लोचि,
“आन्कान च़क्दाओ नि तेन्चिदात्नि खारिन्ने,
खोन्किना मोदाछाङ अ़ङ्का निनाम्हाङ्य़ङ खालुसुङ्ने,
देकिनालो ओ काचिओ निकिङा अ़ङ्का ताङ्ओ।”
३९ खोन्किना येसु झारा गालिल्दा मोचिओ अ़चुयावायोक्खिम्चिदा खालुयाङ्सा खोन्कि चाकावालावाचि लोन्याङ्सा म़कोला।
येसुआ अ़क्छा क़माधामा सारिमाआ लाउओ म़ना अ़नुसाओ
४० अ़क्छा क़माधामा सारिमाआ लाउओ म़ना येसुएदा ताकि खोक्कोसोओ अ़चुबुदा अ़तुम्प़छ़क तोम्तु खोन्कि लो,
“हाङ्पो,
खानानिन त़मिनिन्नालो अ़ङ्का सेङ्मा त़ऱङाऩङ।”
४१ येसु अ़चुसोम्तुक्माआ भेप्तु,
खोन्कि अ़चुछुक अ़फेसाकि खो अ़नोप्ता,
खोन्कि अ़लोवा,
“अ़ङ्का मिन्ङाङा,
खाना नुवालावा!”
४२ मोन्ग़रिङा खोसोओ अ़क़माधामा सारिमाआ लेरु,
खोन्कि खो नुवाखारा।
४३ खोन्कि येसुआ मो अ़न्नुनु चाप्अ़चेत्ताकि खो च़क्नि अ़छुत्ताखाइसा,
४४ “एनु खो,
साङ्छाङ खामान्एत्दोचि!
मेन खारा,
खोन्कि आप्पि काब़क्पाएदा खाङ्मुसान्चिन,
खोन्कि निनाम्हाङ्य़ङ खाकालु मोसाआ लोमाय़ङ्ओ हेन्खोक्वा प़,
खोन्कि म़नाचिओ निम्पाङ सालुम्स़ङ लिने।”c
४५ मेन खो खाराकि मो य़ङ्ओ अ़तुक्वादा झारा म़नाचि खाएत्मा पुक्तुचि,
खोन्कि य़ङ्खान फेमा पुङ्सु।
खोन्ओसा येसु मो सहरादा नुलोक वाङ्मा मान्ऱ,
मेन अ़कुय़ङ्चिदात्नि म़युङा,
खोन्नुछाङ म़नाचि झारादात्निङ्का खोक्कोएदा म़ता।