बुसुहोन्याङ्का येसु तुप्सि म़ताओ
२
हेरोद हाङ मुवाङाओ ग़रिदा यहुदियादाओ बेथलेहेम तेन्दा येसु म़लिसा।
मोन्ग़रि बुसुहोन्याङ्का सालुत्लिचि यरुसलेम्दा म़ताकि मोचि म़य़ङा,
२ “यहुदिचिओ अ़चुहाङ म़लिसाओ अ़ऩङ्वा छा खादा म़युङ्याङ?
आन्कान्का खोक्कोसोओ अ़चुसाङ्केन्मा बुसुहोन्या खाम्का,
खोन्कि खोक्को ब़क्सि तान्युङ्सिन्का।”
३ मोन्ग़रि हेरोद हाङ्आ ओ य़ङ एनुकि खो अ़न्नुनु मिन्राक्दा छुक्ता,
खोन्कि खोएनान यरुसलेम्दाओ झारा म़नाचिछाङ मिन्राक्दा म़छुक्ता।
४ खोन्किना खोसाआ झारा मुलो काब़क्पाचि खोन्कि अ़चुय़ङ्हुप काचिन्पाचि कोउचि,
खोन्कि “ख्रिस्त खादा म़लिओ?”
नि सेनुचि।
५ मोचिआ खो अ़लोवा,
“यहुदियाओ बेथलेहेम्दा।
देकिनालो निनाम्हाङ्य़ङ खाकालुआ छाप्तुयुङ्सु:
६ ‘खोन्कि खाना बेथलेहेम,
यहुदियाओ थाम्पुक्दा,
खाना यहुदादाओ हाङ्कामुचिओ अ़चुरादा देत्निकिछाङ अ़चुप्पो त़मुनानान,
देकिनालो खानाएदाङ्का अ़क्छा हाङ्कामु लोन,
खोन्कि खोक्कोसाआ इस्राएलि अ़ङ्म़नाचि म़तित्तुचि।’”a
७ खोन्किना हेरोद्आ मो सालुत्लिचि सुकुलादा बुत्तुचि खोन्कि साङ्केन्मा खाउग़रि खाङ्मुसान्चिन्ओ,
मो मोचि सेनुचि।
८ खोन्किना खोसाआ मोचि ओवात्नि लोसा बेथलेहेम छुत्तुचि,
“खारानिन,
खोन्कि नुलोक मो छा लामानुम।
मो छा त़धिरुम्छाङ अ़ङ्का मो य़ङ बानानिन्कि लोवाङ्ऩङ,
खोन्कि अ़ङ्काछाङ खोक्को ब़क्तुङ।”
९ खोन्कि हेरोद हाङ्ओ अ़य़ङ अ़एनाकि खोचि लाम म़वाङा।
खानुम!
खोचिआ बुसुहोन्या अ़खाओ साङ्केन्मा खोचिआ अ़लासाखा,
खोन्कि मो खोचिओ अ़चुबु-बु खारा खोन्कि नुनु युङाङाओदा तालाकिना मो साङ्केन्मा मोदाङा एवादिसा।
१० खोचिआ मो साङ्केन्मा अ़खाकि खोचिओ अ़न्नुनु अ़चुऩङानुवा।
११ खोन्किना खिम्हुत्दा म़वाङाकि खोचिआ नुनु अ़चुमा मरियम्एनान अ़खा,
खोन्कि म़बोम्सान्चिन्कि खोक्को अ़ब़क्ता।
खोन्किना मोचिआ अ़चुबेखाचि अ़होराकि खोक्को हाराक्वा,
धुपा खोन्कि नाम्नुओ सुङ छुक्तुप्मा अ़पुवा।
१२ खोन्किना हेरोद्एदा मान्लाखात्दानिन निकिना अ़चुसेन्मुयुदा चाप्चेत्माय़ङ अ़तोक्ताकि नि लाम लियाङ्सा मोचि अ़चुहेन्कोप म़लासा।
योसेफ अ़खिम्लुम्पाएनान मिस्र हेन्कोप फुङ्साओ
१३ मो सालुत्लिचि म़खाराचिआकि निनाम्हाङ्ओ अ़क्छा अ़चुकाफा अ़चुसेन्मुयुदा योसेफ्एदा खाङ्मुसान्चिन खोन्कि लो,
“पुवालोन्ता,
नुनु खोन्कि खोक्कोसोओ अ़चुमा खात्तुचिकि मिस्र हेन्कोप फुङ्सा,
खोन्कि अ़ङ्का खाना मान्लोयुक्नातारि मोयाङा युङा,
देकिनालो हेरोद्आ नुनु सेत्मा निम्पाङ खोक्को लाम्मा मुङु।”
१४ खोन्किना योसेफ पुवालोन्ताकि नुनु खोन्कि खोक्कोसोओ अ़चुमा खात्तुचिकि मो खाखुत्ङा मिस्र हेन्कोप खारा।
१५ खोन्कि हेरोद मान्स़दायुक्तातारि मिस्रदाङा खो युङा।
निनाम्हाङ्य़ङ खाकालुलाम्पा हाङ्पा निनाम्हाङ म़चेवाओ य़ङ ओवात्नि ताला,
“अ़ङ्का अ़ङ्छा मिस्र हेन्कोप्दाङ्का बुत्तुङ।”b
हेरोद्आ नुनुचि सेत्मेत्तुचिओ
१६ खोन्किना सालुत्लिचिआ अ़म़प्ताओ य़ङ हेरोद्आ सिन्तुकि अ़माइसुङ्आ पुन्तुदो।
खोन्कि सालुत्लिचिदाङ्का सिन्तुओ ग़रिदा बेथलेहेम खोन्कि मोसोओ अ़च़क्दाओ तेन्दाओ ह्वा दोङ खोन्कि ह्वा दोङ्दाङ्का अ़चुप्पो झारा दुवाछा छाचि सेत्मेत्तुचि।
१७ मोवात्नि यर्मिया निनाम्हाङ्य़ङ खाकालुआ चेउओ य़ङ ताला:
१८ “रामादा अ़क्तात य़ङ एना,
ओत्ओत्ओत्वा खोन्कि रुवाङ-रुवाङ म़खावाङाओ
राहेल अ़छाचिओ निम्पाङ ओत्ओत्ओत्वा खाप्याङ,
सोम्सेत्माय़ङ ऩङाछिरु,
देकिनालो मोसोओ अ़छाचि म़सुवादा।”c
१९ हेरोद सुवादाकिना निनाम्हाङ्ओ अ़क्छा अ़चुकाफा सेन्मुयुदा योसेफ्एदा मिस्रदा खाङ्मुसान्चिन खोन्कि ओवात्नि लो,
२० “पुवालोन्ता,
नुनु खोन्कि खोक्कोसोओ अ़चुमा खात्तुचिकि इस्राएल हेन्कोप खारा,
देकिनालो नुनु सेत्मा कालाम्चि म़सुवादाचिआ।”
२१ योसेफ पुवालोन्ता खोन्कि नुनु खोन्कि खोक्कोसोओ अ़चुमा खात्तुचिकि इस्राएल हेन्कोप खारा।
२२ मेन यहुदियादा हेरोद हाङ्ओ अ़फान्दा अ़छा अर्खिलाउस हाङ मुयाङ्नि योसेफ्आ एनुकि मोह्यात्नि खात्मा योसेफ क़सा,
खोन्कि अ़सेन्मुयुदा चाप्चेत्माय़ङ तोक्तुकि योसेफ गालिल धिखाहुप्ह्यात्नि खारा।
२३ खो खाराकि नासरत्निओ सहरादा युङा।
ओवात्नि निनाम्हाङ्य़ङ खाकालुचि म़चेवाओ य़ङ ताला: “खोक्को नासरिनि लो।”