Paplajahan 9: Indik Anake sane Dados Pengawas Pasamuan Sang Hyang Yesus
1 Timotius 3:1-3, 4:13
Duk idumun dane Timotius sareng-sareng dane Paulus midartayang Orti Rahayune maideh-idehan. Raris dane Paulus nikain dane Timotius mangda ngayahin para krama druen Sang Hyang Yesuse sane wenten ring Kota Epesus. Santukan dane Paulus nenten mresidayang mawali ka Kota Epesus, irika raris dane Paulus nulis surate puniki buat miteketin dane Timotius. Surate puniki kasalin nganggen basa Bali sane lumrah, krana dane Timotius punika kari nguda tur sampun kaanggep sekadi okan dane Pauluse.
9
Raose ene saja: anake ane dot dadi pengawas krama druen Sang Hyang Yesuse, sujatine ia demen maan tugas ane luih. 2 Pengawas kramane ento musti anak ane dharma tanpa cacad, tusing dadi ngelah kurenan lebihan teken abesik tur musti satya tekening kurenannyane. Tur ia musti nyidang ngeret indria, wicaksana, maparisolah ayu, lan demen maang anak len tongos numpang. Keto masih ia musti dueg ngajahin anak len. 3 Buina ia tusing ja anak ane demen mamunyah utawi anak ane enggal mamedih, nanging anak ane parisolahne alus, demen dame, lan tusing loba teken pipis.13 Ritatkala ngantiang tiang teka sid ceninge, satya ja cening macaang Cakepan Sucine lan miteketin anake ane suba pracaya, saha ngajahin ia ajaka makejang.
2 Timotius 2:2-5, 4:1-5
Surat puniki katulis olih dane Paulus majeng ring dane Timotius sane ring Kota Epesus. Pidaging surate puniki nenten tios negesin mangda dane Timotius waspada kapining pengajahan sane palsu. Samaliha mangda dane Timotius rauh ka Kota Roma nyingakin dane Paulus sane sedek kakrangkeng ring buine. Surate puniki kasalin nganggen basa Bali sane lumrah, krana dane Timotius punika kari nguda tur sampun kaanggep sekadi okan dane Pauluse.
2 Cening suba ningehang pengajahan tiange di aepan anake liu. Ane jani, warisin ja pengajahane ento tekening anake ane cager lan dueg ngajahin anak len.
3 Tegen ja kasengsarane ajak tiang makejang buka tentaran Sang Hyang Kristus Yesuse ane satya. 4 Tentara ane sedek maperang tusing ja repot ngurus urusan ane lenan, krana ia meled apanga komandannyane liang. 5 Tur anake ane malomba tusing ja bakal menang yening tusing nuutin awig-awignyane.
1 Sang Hyang Kristus Yesus jagi rauh ring jagate apanga ngakimin anake ane idup wiadin ane suba mati, raris Ida jagi mamrentah dados Raja. Ento makada tiang ngidih ping banget tekening cening ring ajeng Sang Hyang Pengardi lan Sang Hyang Kristus Yesus: 2 Sapatutne cening setata ngortiang Orti Rahayune tur setata siaga nglaksanayang unduke ento di sebilang galah, melah utawi tusing melah galahe ento. Pitujuhin ja apa ane pelih lan tuturin ja apanga anake tusing malaksana dosa. Tur antuk manah ane sabar, desek ja ia ajaka makejang apanga malaksana ane melah. 3 Krana bakal teka dinane anake tusing nyak nerima pengajahan ane beneh, nanging ia bakal nuutin manahnyane padidi. Ento makada ia bakal munduhang guru-guru palsu ane ngajahin pengajahan buat nyenengin kupingnyane dogen. 4 Anake ento tusing nyak ningehang pengajahan ane beneh nanging dot ningehang satua-satua ane tusing beneh. 5 Nanging uleh-ulehang ja basang ceninge di sekancan paundukan; sabar ja nandang sengsara. Laksanayang ja ayah-ayahane antuk ngortiang Orti Rahayune, tur puputang ja tugase ento.
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii. “Sekadi napike sapatutne iraga nyalanang idup manut pengajahane puniki?"
iv. “Kapining sirake sapatutne iraga nyeritayang malih ceritane puniki?”