Paplajahan 1: Sang Hyang Yesus Ngicen Tugas Raris Munggah ka Swarga
Sasampune Sang Hyang Yesus maurip malih sekadi jati mula, Ida matemu sareng para sisian Idane.
Lukas 24:44-49
1
44 Kaceritayang mangkin Sang Hyang Yesus ngandika sapuniki, “Ingetang ja! Cerita unduk Nira suba katulis imalu di Cakepan Sucine, sing ada len ane katulis olih dane Musa lan olih para sinoman Sang Hyang Pengardi tur ane katulis di Cakepan Kidung. Makejang unduke ento musti kalaksanayang buka ane suba orahang Nira tatkala Nira bareng-bareng ajak cening.”45 Raris Sang Hyang Yesus nyunarin papineh ipune sami mangda prasida ngresepang daging Cakepan Sucine. 46 Samaliha Ida ngandika sapuniki, “Di Cakepan Sucine ada katulis Sang Prabu sane Kajanjiang musti kalara-lara tur seda, raris malih puane maurip sekadi jati mula. 47 Ane jani orti indik Sang Prabu punika buka kene: Nyen ja ane masalin uli idup ane madosa bakal kaampurayang olih Sang Hyang Pengardi. Ortine ento bakal kaortiang uli Kota Yerusalem ka sekancan bangsa-bangsane. 48 Cening makejang dadi saksi unduke ento. 49 Lan Nira bakal ngutus Roh Sang Hyang Pengardi sid ceninge. Rohe punika sampun kajanjiang olih Ajin Nirane. Sakewala cening makejang musti nyantosang janjine punika di Kota Yerusalem kanti cening nerima kuasa saking Sang Hyang Pengardi.”
Para Utusan 1:8
8 Sakewala cening bakal nerima kuasa tatkala Roh Sang Hyang Pengardi tedun sid ceninge apanga cening nyeritayang unduk Nirane di Kota Yerusalem, di saluirin Wawidangan Yudea, di wawidangan anak Samaria, kanti saluirin jagat.”
Matius 28:18-20
18 Sang Hyang Yesus raris nampekin ipun sami saha ngandika sapuniki, “Sang Hyang Pengardi sampun nyerahang saluirin kuasa diswarga lan di gumine kapining Nira. 19 Ento mawinan luas ja cening ka saluirin bangsa di jagate, tur ajahin ja ia makejang apanga dadi murid Nirane. Tur lukat ja ia makejang antuk kuasa Sang Hyang Aji, lan Sang Hyang Putra, lan Roh Sang Hyang Pengardi dadi tanda masalin uling idup ane madosa. 20 Tur ajahin ja ia makejang ninutin saluirin ane suba titahang Nira tekening Cening. Lan pracaya ja! Nira bakal setata nyarengin cening kanti pamuput jamane.”
Lukas 24:50-53
50 Sane mangkin, Sang Hyang Yesus nuntun ipun sami medal saking Kota Yerusalem kantos nampek ring Desa Betania. Irika Ida ngangkat tangan Idane ngamertanin ipun makasami. 51 Duk Ida ngamertanin ipun makasami, Ida kaunggahang ka swarga palas saking para sisiane sami. 52 Para sisiane makasami matimpuh nyembah Sang Hyang Yesus laut mawali ka Yerusalem antuk manah sane girang. 53 Raris ipun sami sadina-dina ngagungang Sang Hyang Pengardi ring Genah Agung Mabakti kapining Sang Hyang Pengardia.
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii. “Sekadi napike sapatutne iraga nyalanang idup manut pengajahane puniki?"
iv. “Kapining sirake sapatutne iraga nyeritayang malih ceritane puniki?”