Paplajahan 2: Pengajahan Hyang Yesus Indik Palas Makurenan
(Matius 19:1-12)
2
Sasampune Hyang Yesus wusan ngajahin makasami punika, raris Ida luas saking Galilea nuju wawidangan Yudea ring dangin tukad Yordane. 2 Akeh anake nyarengin Ida mrika, tur Ida nyegerin anake sane sungkan irika. 3 Raris para anak Parisinea nampekin Hyang Yesus mangda prasida nguji Ida saha mataken sapuniki, “Manut ukum agaman iragane, dados ke anake lanang malasang kurenannyane manut sakita keneh?”4 Raris Hyang Yesus nyaurin ipun sapuniki, “Sinah ragane sampun ngwacen ring Cakepan Sucine wantah saking pengawitne Sang Hyang Pengardi ngardi manusane lanang lan istri. 5 Sang Hyang Pengardi masabda sapuniki, ‘Punika mawinan anak lanang jagi nilar reramannyane tur jangkep sareng kurenannyane mangda makakalih dados siki.’ 6 Kadi asapunika ipun nenten ja kalih, nanging asiki. Sane mangkin napi sane sampun kajangkepang olih Sang Hyang Pengardi nenten dados kapalasang olih manusa.”
7 Raris para anak Parisine mataken ring Hyang Yesus sapuniki, “Yening kenten kenapike dane Musa ngicenin prentah mangda anake lanang ngicenin surat palas ring kurenannyane sane jagi kapalasang ipun?”
8 Hyang Yesus nyaurin ipun sapuniki, “Dane Musa nadosang paindikan punika krana ragane makasami kalintang bengkung. Nanging saking pengawitne nenten ja sekadi punika. 9 Mangkin Tiang nikain ragane makasami. Sira ja sane malasang kurenannyane, lan ipun makurenan sareng anak istri lianan, ipun malaksana mamitra. Nanging yening kurenannyane saja mamitra sareng anak lianan, anak lanang punika dados malasang kurenannyane.”
10 Raris para sisian Idane matur sapuniki, “Yening sekadi punika kawentenan anake makurenan, becikan yening nenten makurenan.”
11 Irika raris Hyang Yesus ngandika sapuniki, “Nenten samian anake prasida urip tanpa makurenan, nanging wantah anake sane sampun kalugrahin olih Sang Hyang Pengardi. 12 Wenten anak sane nenten prasida makurenan krana palekadane sekadi punika. Wenten taler sane nenten prasida makurenan krana anak liananb. Kenten pada wenten sane milih manut manahnyane praragan; ipun nenten makurenan mangda prasida ngayah ring Karajaan Swarga. Anak sane misadya ninutin pengajahane puniki, becik yening ipun nglaksanayang sekadi punika.”
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal saking ceritane puniki?”
ii. “Napi sane plajahin iraga indik manusa saking ceritane puniki?”
iii. “Napi sane plajahin iraga indik pajangkepan anak lanang sareng anak istri iriki?”
iv. “Napi sane plajahin iraga indik mamitra wiadin mapalasan?”
v. “Sekadi napike sapatutne iraga nyalanang idup manut pengajahane puniki?"
vi. “Kapining sirake sapatutne iraga nyeritayang malih ceritane puniki?”