Paplajahan indik Pengantenan lan Kaluarga
Paplajahan 1: Asal Usul Pengantenan
(Purwakaning Dadi 2:4-9,15-25)
Pengawitne, wantah Sang Hyang Tunggal, nenten tios Sang Hyang Pengardi. Ida ngardi langit miwah jagat lan sekancan dagingnyane kantos nem rahina. Duk punika, Ida pada ngardi manusa lanang wiadin istri.
1
4b Ritatkala Sang Hyang Tunggal, nenten tios Sang Hyang Pengardi, ngardi langit miwah jagate, 5 duk punika dereng wenten bet-bet lan entik-entikan ring jagate, krana Sang Hyang Tunggala dereng nedunang sabeh ring jagate; samaliha dereng wenten anak sane ngarap tanahe punika. 6 Nanging wenten toya sane nrebes saking tanahe sane mawinan tanahe sami beseg.7 Raris Sang Hyang Tunggal ngambil tanah buk akidik, jagi ngrupa manusa. Irika Ida ngupin song irungnyane tur manusa punika dados urip.
8 Salanturnyane Sang Hyang Tunggal makarya taman ring Eden sane wenten bedangin. Irika kagenahang manusane sane sampun karupa olih Ida. 9 Lan Sang Hyang Tunggal numbuhang sekancan punyan-punyanan asri sane ngasilang woh-wohan sane becik kaajeng. Taler ring tengah-tengah tamane punika tumbuh kalih punyan woh-wohan, inggih punika sane kapertama ngicen urip lan sane kakalih ngicen mangdane uning napi sane melah wiadin sane jaat.
15 Raris Sang Hyang Tunggal, ngenahang manusane punika ring Taman Eden mangdane ngarap tanahe lan miara tamane punika. 16 Irika Sang Hyang Tunggal masabda ring manusane sapuniki, “Buah uli makejang punyan ane ada di tamane ene dadi cening naar, 17 nanging unduk punyan ane ngicen apanga nawang paundukan melah lan jaat, tusing dadi cening naar buahne. Yening cening naar buahe ento, ditu cening pasti lakar mati.”
18 Raris malih Sang Hyang Tunggal masabda praragan sapuniki, “Tusing luung manusane idup padidiane. Nira lakar ngaenang timpal ane cocok apanga nulungin ia.” 19 Irika raris Sang Hyang Tunggal ngambil tanah akidik, tur ngrupa saluirin beburon darat miwah beburon akasa. Saluirin beburone punika raris kabakta ring manusane, mangda Ida nyingakin sekadi napi manusane ngadanin saluirin beburone. Tur adan sane kakaryanin olih manusa ring saluirin beburone punika dados adan beburone salanturnyane. 20 Sekadi punika manusane ngadanin saluirin ubuh-ubuhan, beburon darat miwah beburon akasa. Nanging saking saluirin beburon sane wenten, asiki ja nenten wenten sane cocok mangda nulungin ipun.
21 Raris Sang Hyang Tunggal ngawinang manusane sirep aris. Risedek ipun sirep aris, Sang Hyang Tunggal ngambil asiki tulang iga manusane punika, raris katekepin daging sekadi jati mula. 22 Lan saking tulang iga punika, Sang Hyang Tunggal ngrupa anak istri tur ipun kabakta ring manusane. 23 Raris manusane punika mabaos sapuniki,
“Nah ene suba ia,
anak ane cocok sajan ajak dewek tiange,
tulangnyane uling tulang tiange,
tur dagingnyane uling daging tiange.
Tiang bakal ngadanin ia anak luhb,
sawireh ia kajemak uli anak muani.”
24 Punika mawinan anak lanang jagi nilar reramannyane tur jangkep sareng rabinnyane mangda makakalih dados siki.
25 Duk punika, manusane lanang istri nenten mapengangge, nanging ipun nenten ja marasa kimud.
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii. “Napi sane plajahin iraga indik pajangkepan anak lanang sareng anak istri ring ceritane puniki?”
iv. “Sekadi napike sapatutne iraga nyalanang idup manut pengajahane puniki?"
v. “Kapining sirake sapatutne iraga nyeritayang malih ceritane puniki?”