Paplajahan 4: (Satya Nandang Sengsara krana Ngiring Sang Hyang Yesus)
1 Petrus 4:12-19
4
12 Para semeton sane tresnain tiang,
sampunang ja makesiab yening ragane kauji,
krana pakewehe punika biasa buat pengiring Sang Hyang Yesus.
13 Samaliha,
masukarena ja krana semeton polih nandang sengsara sareng-sareng Sang Hyang Kristus.
Punika mawinan,
riwekasan tatkala kaagungan Sang Hyang Kristuse kaedengang,
ragane jagi masukarena.
14 Bagia ja ragane yening ragane kanistayang ulian dados pengiring Sang Hyang Kristus.
Punika artine Roh sane luih,
inggih punika Roh Sang Hyang Pengardi,
wenten ring ragane.
15 Nanging sampunang ja asiki saking ragane sami nandang sengsara ulian ngamademang anak,
dados maling,
anak jaat,
utawi seneng ngaduk-aduk masalah anak.
16 Nanging yening ragane nandang sengsara ulian dados pengiring Sang Hyang Kristus,
sampunang ja ragane kimud krana indike punika.
Samaliha agungang ja Sang Hyang Pengardi krana ragane polih kaagungan dados anak Kristen.
17 Sampun rauh galah Sang Hyang Pengardi ngakimin jagate.
Irika krama druen Idane sane jagi kaakimin dumunan.
Nah yening kraman Idane sane kaakimin dumunan,
pinehang ja amongken baatne ukuman anake sane nenten pracaya ring Orti Rahayu saking Sang Hyang Pengardi.
18 Ring Cakepan Sucine katulis sekadi puniki,
"Yening para anake sane dharma kari keweh kaslametang,
napi malih sane jagi mamargi ring para anake madosa sane nenten uning Sang Hyang Pengardi?" .
19 Punika mawinan sapatutne anake sane nerima sengsara krana pikayunan Sang Hyang Pengardi,
ipun musti nyerahang jiwatmannyane kapining Sang Hyang Pengardi sane satya,
saha setata maparilaksana becik.
Matius 5:10-12
Raris Hyang Yesus ngandika sapuniki,
10 "Bagia ja anake sane kasengsarain krana malaksana napi sane patut, sawireh anake punika sane dados warga Karajaan Swarga.
11 "Bagia ja cening, yening ulian Tiang, cening kanistayang, kasengsarain, tur kapisunayang indik sekancan sane jaat.
12 "Masukarena tur bagia ja, krana upah ceninge gede ring swarga. Ingetang ja, para sinoman idumun pada kasengsarain sekadi punika."
Penuntun mabligbagan ring pasamuan
1.
Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii “Napi sane plajahin iraga indik anake sane kasengsarain krana ngiring Sang Hyang Yesus ring ceritane puniki?”
iv. “Punapike carane iraga nglaksanayang pengajahane puniki ring urip iragane suang-suang?”
v. “Kapining sirake sapatutne iraga nyeritayang malih ceritane puniki?”