Paplajahan 2: (Kapracayaane Kauji ring Genine)
Daniel 3:1-30
2
Kaceritayang,
duk punika Raja Nebukadnesar ngaryanin patung emas sane tegehne pitu likur (27) meter lan lebarne sawetara telung meter.
Patung punika kawangun ring dataran Dura,
ring Propinsi Babel.
2 Raris Raja Nebukadnesar ngundang para gubernur,
para wakil gubernur,
bupati,
pamiteket negara,
bendahara,
akim,
ahli ukum,
lan makasami pemimpin wawidangane mangda rauh ring upacara pemlaspasan patung sane sampun kawangun punika.
3 Raris sasampune jangkep mapunduh sekancan para pengedene sane kaundang punika,
irika ipun sami ngadeg ring arep patunge punika.
4 Irika parekan rajane mageluran antuk suara keras,
“Inggih para semeton saking sekancan bangsa,
soroh bangsa lan basa!
Pirengin ja prentah sang raja puniki:
5 Yening sompret tanduk masuara tur wenten suaran suling,
gitar kecapi,
rebab,
gitar gambus,
suling serdam,
miwah tatabuhan sane lianan,
artine para semeton iriki musti matimpuh nyembah patung emas sane sampun kawangun olih Raja Nebukadnesar.
6 Sapa sira ja sane nenten satinut ring prentahe puniki,
pramangkin jagi kaentungang ring kamare sane madaging geni ngendih ageng.”
Kamar punika kangen nglebur logam.
7 Punika mawinan tatkala mirengin suaran tatabuhane,
para anake irika sane saking sekancan bangsa,
soroh bangsa,
miwah basa,
matimpuh lan nyembah patung emase punika.
8 Duk punika,
wenten makudang anak Babel ngutsahayang nyengsarain anak Yahudine punika.
9 Ipun sami matur ring Raja Nebukadnesar,
“Maurip ja iratu salamin-laminne!
10 Iratu praragan sampun mrentahang yening mirengin suaran tatabuhane,
makasami anake musti matimpuh lan nyembah patung emase punika,
11 tur sapa sira ja sane nenten satinut ring prentahe punika jagi kaentungang ring kamare sane madaging geni ngendih ageng.
12 Nanging,
wenten makudang anak Yahudine sane sampun kaangkat olih iratu ring pemrentahan Propinsi Babel,
nenten tios Sadrak,
Mesak,
lan Abednego.
Ipun sami nenten satinut ring prentah iratune;
ipun nenten ngagungang para dewan iratune lan nenten nyembah patung emas sane sampun wangun iratu.”
13 Mirengin indike punika raja dados duka pisan,
raris ngicen prentah mangdane makatiga anake punika kabakta ka arepan idane.
14 Raja mataken ring dane makatiga,
“Sadrak,
Mesak lan Abednego!
Saja ke ragane tusing nyak nyembah dewa-dewan nirane tur tusing nyak matimpuh ring ajeng patung emas sane wangun nira ento?
15 Nah jani,
misadya ke ragane matimpuh lan nyembah patunge ento tatkala mirengin suaran sekancan tatabuhane?
Yening ragane tusing nyak,
ragane bakal kaentungang ring kamare sane madaging geni ngendih ageng.
Sasubane keto,
dewa ane nyenan ke ane nyidang nylametang ragane saking kuasan nirane?”
16 Raris dane Sadrak,
Mesak lan Abednego masaur,
“Duh ratu,
titiang sareng tiga nenten ja jagi mabela raga.
17 Yening mamargi sekadi asapunika,
Sang Hyang Pengardi sane sembah titiang sami,
mresidayang nylametang titiang saking genine sane kalintang ageng puniki.
Tur Ida jagi mebasang titiang saking kuasan iratune.
18 Nanging,
umpamane Ida nenten mebasang titiang,
titiang matur kapining iratu yening titiang nenten ja jagi ngagungang dewan iratune,
lan nenten ja jagi nyembah patung emas sane wangun iratu punika.”
19 Punika mawinan raja Nebukadnesar dados duka pisan kapining dane Sadrak,
Mesak lan Abednego,
kantos prarain idane dados baak biing.
Irika ida mrentahang mangda genine punika kapanesang pitung kali lipet lebih panes bandingang biasane.
20 Raris ida nunden makudang anak sane siteng saking tentaran idane mangda negul dane Sadrak,
Mesak lan Abednego,
turmaning ngentungang ipun ring kamare sane madaging geni ngendih ageng punika.
21 Pramangkin dane makatiga kategul tatkala dane kari mapengangge sane jangkep,
minakadi;
baju jubah,
celana,
topong miwah sane lianan.
Irika raris dane makatiga kaentungang ka tengah kamar apine punika.
22 Krana prentah rajane punika keras pisan,
genine punika sampun kapanesang sanget,
kantos endih genine punika muunang tur ngamademang para anake sane ngosong menek dane Sadrak,
Mesak lan Abednego.
23 Sekadi asapunika,
dane makatiga sane kategul,
katuludang ka tengah kamar genine punika.
24 Sasampune kenten,
saget tengkejut Raja Nebukadnesar.
Ida gelis-gelis ngadeg tur ngandika ring para menterine,
“Boyake ada tatelu anak ane kategul tur kaentungang di apine ento?”
Ipun masaur,
“Inggih ratu,
yakti!”
25 Raja ngandika,
“Tolih ja!
Adi papat ane cingakin nira majalan bebas di tengah-tengah apine ento?
Ia tusing kenapa-napa!
Buinan anak ane kaping pat ento ngenahne buka dewa.”
26 Raris Raja Nebukadnesar nampekin kori genah apine punika tur ngamanggil antuk suara keras,
“Sadrak,
Mesak lan Abednego,
pengayah-pengayah Sang Hyang Pengardi Sane Maha Luhur!
Pesu tur mai ja!”
Raris dane makatiga medal saking genine punika.
27 Makasami para gubernur,
wakil gubernur,
para bupati,
lan pegawe-pegawe sane lianan ngiterin dane makatiga.
Kacingak makatigane nenten ja wenten laad geni neng akidik.
Rambutnyane nenten ja puun,
penganggennyane nenten ja puun,
miwah dane makatiga nenten ja mabo puun.
28 Irika raris raja ngandika,
“Agungang ja Sasembahan sane kasembah olih Sadrak,
Mesak lan Abednego.
Ida sampun ngutus malekat Idane mangda nylametang makatelu pengayah Idane ane pracaya ring Ida.
Makatelune suba nglanggar prentah nirane tur lebih misadya mati bandingang teken nyembah lan ngagungang dewa lianan,
malianan kapining Sasembahan ipune.
29 “Ento makada,
nira mrentahang:
nyen ja,
bangsa apa ja,
tur mabasa uling dija ja ane nganistayang Sasembahane Sadrak,
Mesak lan Abednego,
bakal katugel-tugel.
Keto masih umahne bakal kauug kadadiang rerongsokan.
Krana tusing ja ada dewa ane nyidang nylametang sekadi Sasembahane ipune.”
30 Sasampune kenten,
jabatan dane Sadrak,
Mesak lan Abednego kapenekang olih raja,
kantos dane makatiga dados pejabat-pejabat ageng ring Propinsi Babel.
1 Petrus 1:5-7
5 Makasamine punika buat ragane, krana ragane pracaya kapining Sang Hyang Pengardi. Penadosne ragane kajaga olih kuasan Sang Hyang Pengardi mangda nerima kaslametan sane jagi kaedengang ring pamuput jamane.
6 Punika sane ngranayang ragane masukarena,
yadiastun mangkin ragane musti nandang sengsara ring saluirin gagodan.
Krana ragane nandang sengsara wantah ajebos kamanten.
7 Tatujone buat muktiang,
napike ragane seken-seken pracaya kapining Sang Hyang Pengardi napi nenten.
Emas sane jagi usak pada kauji nganggen api.
Nah,
kapracayaan ragane lebih maaji bandingang teken emas; punika mawinan kapracayaan ragane musti taler kauji mangdane dados kukuh. Tur sekadi asapunika ragane jagi kapuji, kaluihang, miwah kaajiang ring dinane Sang Hyang Yesus Kristus rauh mawali.
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii “Napi sane plajahin iraga indik pageh kapining kapracayan iragene ring ceritane puniki?”
iv. “Punapike carane iraga nglaksanayang pengajahane puniki ring urip iragane suang-suang?”
v. “Kapining sirake sapatutne iraga nyeritayang malih ceritane puniki?”