Satya Nandang Pakeweh
Paplajahan 1: Anak sane Pageh
Daniel 1:1-21
1
Ring tahun katiga pemrentahan Raja Yoyakim ring Yehuda,
irika rauh raja saking karajaan Babel sane mapesengan Nebukadnesar.
Raja sareng pasukane punika nyerbu tur nyerung Kota Yerusaleme.
2 Sang Hyang Pengardi nglugrahin Raja Nebukadnesar dados menang nglawan Raja Yoyakim.
Irika prabotan sane mael saking Genah Agung Mabaktine karampas.
Raris Raja Nebukadnesar makta barang-barang rampasane punika tur nyimpen ring kuil dewannyane.
Kenten pada,
anake sane dados tawanan kabakta ka Kota Babel.
3 Sasampune kenten,
Raja Nebukadnesar mrentahang dane Aspenas,
pemimpin pegawe purine,
mangda milih saking para tawanan Israele,
inggih punika truna-truna sane maasal saking soroh sentanan raja lan pengede.
4 Para trunane punika musti anak sane tanpa cacat,
anak sane bagus,
uning ring sekancan kawicaksanaan,
madue kawikanan,
miwah becik mangda makarya ring puri.
Dane Aspenas musti ngajahin ipun sami maca lan nulis basa Babel.
5 Raja Nebukadnesar taler netepang mangda para trunane punika kasajiang ajengan sane pateh sekadi kaluargan rajane miwah kasajiang inuman anggur sane biasa kainum olih raja.
Tur ipun sami musti kaajahin kantos tigang tiban suene,
tur sasampune kenten ipun musti kaicen ngayahin raja ring puri.
6 Saking para trunane punika wenten taler Daniel,
Hananya,
Misael lan Asaryaa;
ipun sami saking soroh Yehuda.
7 Irika pemimpin pegawe purine ngicen ipun sami pesengan sane lianan minakadi:
Daniel kawastanin Beltasasar,
Hananya kawastanin Sadrak,
Misael kawastanin Mesak,
tur Asarya kawastanin Abednegob.
8 Dane Daniel sampun majanji ring manah,
nenten manggiang ragannyane cemer ulian ngajeng ajengan raja lan nginum minuman anggur sane biasa kainum olih raja;
dane raris nunas ring dane Aspenas,
sampunang ja ngranayang ragan danene cemer.
9 Irika Sang Hyang Pengardi ngicen wara nugraha kapining dane Daniel mangdane dane sayanganga lan olasina olih dane Aspenas.
10 Irika raris dane Aspenas masaur kapining dane Daniel sekadi puniki,
“Tiang jejeh krana raja sampun netepang ajengan lan inuman ragane,
tur manut ida,
yening manian ragane kacingak nenten seger bandingang kapining truna-trunane sane lianan,
pastika tiang jagi kapademang.”
11 Raris dane Daniel mligbagang indike punika sareng penjaga sane kaangkat olih dane Aspenas.
Penjagane punika polih tugas ngawasin dane Daniel,
Hananya,
Misael,
lan Asarya.
Sekadi puniki dane Daniel mabaos,
12 “Jerone dados nguji tiang sareng para sawitran tiange kantos dasa lemeng;
banggiang ja tiang sami ngajeng janganan lan nginum toya kamanten.
13 Sasampune dasa lemeng,
bandingang ja ragan tiange makapapat sareng truna-trunane sane ngajeng ajengan raja.
Raris putusang ja sekadi sane cingakin jero benjangan.”
14 Penjagane punika setuju tur ipun ngwentenang pengujiane punika kantos dasa lemeng suene.
15 Sasampune liwat dasa lemeng,
kacingak dane makapapat lebih kenak lan sitengan bandingang para trunane sane sampun ngajeng ajengan raja.
16 Ngawit punika,
penjagane nenten malih nyajiang ajengan lan inuman anggur kapining dane makapapat,
nanging nyajiang janganan lan toya kamanten.
17 Sang Hyang Pengardi nglugrahin kawikanan ring makapapat para trunane punika mangda ipun uning sekancan sastra lan kawicaksanaan,
tur dane Daniel taler ngresep indik sekancan pelawatan lan ipian.
18 Sasampune liwat galah sane katetepang olih Raja Nebukadnesar,
irika raris ipun makasami kabakta olih dane Aspenas ring arepan rajane.
19 Irika raja mabligbagan sareng ipun sami;
ring sekancan para trunane,
nenten ja kapanggihin sane sekadi dane Daniel,
Hananya,
Misael,
lan Asarya.
Irika raris dane makapapat ngawitin makarya ring purin rajane.
20 Sebilang Raja Nebukadnesar nyeritayang pakeweh idane sane ngamerluang piteket lan tatimbangan,
ida nyingak yening makapapat para trunane punika dasa lipet lebih wikan bandingang para wikan lan para balian tenung ring sekancan karajaannyane.
21 Dane Daniel tetep meneng irika,
kantos Raja Kores saking Wawidangan Persia ngalahang Karajaan Babel.
Roma 12:2
2 Sampunang ja ragane ninutin paindikan sekala sane jaat ring jagate puniki. Nanging banggiang ja papineh ragane kadadosang anyar olih Sang Hyang Pengardi, mangda ragane uning pikayunan Idane. Ida mapikayun mangda ragane malaksana napi sane becik tur sempurna, inggih punika napi sane ngranayang Ida seneng.
Penuntun mabligbagan ring pasamuan
1.
Ngaturang penyuksma.
“Ngiring ja iraga ngaturang suksma mangkin.
Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii “Napi sane plajahin iraga indik pageh kapining kapracayan iragane ring ceritane puniki?”
iv. “Punapike carane iraga nglaksanayang pengajahane puniki ring urip iragane suang-suang?”
v. “Kapining sirake sapatutne iraga nyeritayang malih ceritane puniki?”