Hyang Yesus puniki Margi Nuju Sang Hyang Aji
(Yohanes 14:1-14)
Ritatkala rarainan Paskah, sampun rauh galah Hyang Yesus jagi mawali ring Sang Hyang Aji, nenten tios Sang Hyang Pengardi. Punika mawinan Ida ngajahin para sisiane mangda ipun siaga ritatkala Ida luas.
5
Raris Hyang Yesus ngandika sapuniki,
“Eda ja ragane makejang ngelah keneh sengsaya.
Pracaya ja kapining Sang Hyang Pengardi,
tur pracaya ja pada kapining Tiang.
2 Ring purin Ajin Tiange di swarga liu ada tongos ngoyong.
Yening tusing saja buka keto,
Tiang tusing ja ngorahin unduk Tiange luas kemu bakal nyadyayang tongos buat ragane makejang.
3 Disubane Tiang luas nyadyayang tongos buat ragane,
Tiang bakal malipetan ngalih ragane,
apanga dija ja Tiang ngoyong,
ragane makejang masih bareng ada ditu.
4 Lan ragane nawang jalane,
kijake Tiang luas.”
5 Raris I Tomas matur ring Hyang Yesus sapuniki,
“Ratu,
titiang sami nenten uning kijake Iratu luas.
Punapike titiang sami prasida uning margine mrika?”
6 Raris Hyang Yesus nyaurin sapuniki,
“Tiang ene jalan nuju Sang Hyang Aji,
krana Tiang kasujatian saking Ida tur sumber idup manusane.
Tusing ja ada anake ane nyidayang neked sid Sang Hyang Aji yening tusing malantaran Tiang.
7 Yening saja ragane makejang nawang Tiang,
pastika ragane masih nawang Sang Hyang Aji.
Uli jani ragane suba nawang Ida,
lan suba ningalin Ida.”
8 Raris I Pilipus matur ring Hyang Yesus sapuniki,
“Ratu,
dadosang ja mangda titiang sami prasida nyingakin Sang Hyang Aji.
Nika manten sane tunas titiang.”
9 Raris Hyang Yesus nyaurin sapuniki,
“Wih Pilipus,
suba mekelo Tiang bareng-bareng ajak ragane makejang,
nanging ragane tonden masih nawang Tiang.
Anake ane suba ningalin Tiang,
artine ia suba ningalin Sang Hyang Aji.
Ngudake ragane ngraos buka kene,
‘Dadosang ja mangda titiang sami prasida nyingakin Sang Hyang Aji?’
10 Wih Pilipus!
Tusingke ragane pracaya,
Tiang masikian sareng Sang Hyang Aji,
lan Sang Hyang Aji masikian sareng Tiang?
Apa ja ane pidartayang Tiang teken ragane makejang,
tusing ja maasal uling ragan Tiange.
Nanging Ajin Tiange setata masikian sareng Tiang.
Ida nglaksanayang paindikane sane laksanayang Tiang puniki.
11 Pracaya ja kapining Tiang,
indik Tiang masikian sareng Sang Hyang Aji lan Sang Hyang Aji masikian sareng Tiang.
Yening ragane tusing pracaya pengandikan Tiange ene,
lamen keto pracaya ja tekening paundukan ngangobin ane laksanayang Tiang.
12 Tiang ngandikayang ane patut,
sujatine nyen ja ane pracaya kapining Tiang,
ia bakal nglaksanayang pakaryan buka pakaryan ane laksanayang Tiang.
Buina,
anake ento bakal nglaksanayang pakaryan ane gedenan kapining Tiang,
krana Tiang luas mrika ring Sang Hyang Aji.
13 Turmaning,
apa ja ane tunas ragane,
krana ragane gelah Tiange,
Tiang jagi ngicen.
Buka keto Sang Hyang Aji kaagungang olih Sang Putra.
14 Yening ragane mapinunas,
krana ragane gelah Tiange,
pinunas ragane jagi icenin Tiang.”