Hyang Yesus Sumber Urip
Indik I Lasarus Padem
(Yohanes 11:1-57)
4
1-2 Ring desa Betania,
wenten adiri anak sane mapesengan I Lasarus.
Irika ipun meneng sareng semetonnyane sane mapesengan Ni Maria lan Ni Marta.
(Ni Maria puniki nenten tios anak istri sane taen ngaminyakin cokor Hyang Yesuse nganggen minyak miyik,
raris nyusutin nganggen rambutnyane.)
Ritatkala rahina anu,
I Lasarus sungkan.
3 Irika raris makakalih semeton I Lasaruse ngutus pabesen ring Hyang Yesus sane sedek ring dangin Tukad Yordane sapuniki,
“Ratu,
semeton titiange,
inggih punika sawitra sane Iratu tresnain sedek sungkan.”
4 Ritatkala Hyang Yesus mirengin paindikane punika,
Ida ngandika sapuniki,
“Penyakitne ento tusing ja bakal ngranayang ia ngalain iraga.
Nanging ulian paundukan ento Sang Hyang Pengardi jagi kaagungang,
samaliha Putran Sang Hyang Pengardi jagi kaagungang.”
5 Hyang Yesus tresna asih kapining Ni Maria,
Ni Marta sareng I Lasarus.
6 Nanging ritatkala Hyang Yesus polih orti indik I Lasarus sungkan,
Ida nyelapang meneng ring dangin Tukad Yordane punika malih kalih rahina.
7 Sasampune sapunika,
raris Ida ngandika ring para sisian Idane sapuniki,
“Lan ja iraga mabalik ka Yudea.”
8 Raris sisiane matur sapuniki,
“Guru,
dugas nika para anak Yahudine negarang nimpugin Guru nganggen batua.
Ngudake Guru kayun mawali malih mrika?”
9 Raris Hyang Yesus nyaurin sapuniki,
“Boyake roras jam matan aine masinar tatkala lemah?
Anake ane majalan di lemahe tusing bakal kena sengkala krana ia ningalin galang gumine ene.
10 Sakewala anake ane majalan di petenge bakal kena sengkala krana tusing ada galang Tiange di idupne.”
11 Sasampune ngandika sapunika,
Hyang Yesus malih nglanturang sekadi puniki,
“I Lasarus semeton iragane suba sirep,
sakewala Tiang bakal kemu mangunang ia.”
12 Raris para sisian Idane matur sapuniki,
“Ratu,
yening I Lasarus sirep,
ipun jagi kenak.”
13 Pengandikan Hyang Yesuse punika maarti I Lasarus sampun padem.
Nanging para sisiane ngaden Hyang Yesus ngamaosang I Lasarus sirep sekadi biasa.
14 Punika mawinan Hyang Yesus ngandika ring ipun sami indik sane sujati sapuniki,
“I Lasarus suba ngalain mati.
15 Sakewala Tiang liang krana Tiang tusing ada ditu.
Buina unduke ento melah buat ragane apanga ragane sida malajah pracaya.
Lan ja jani kemu nelokin I Lasarus.”
16 Irika wenten sisian Hyang Yesuse sane mapesengan I Tomas.
Ipun taler kaparadin I Kembar.
Ipun mabaos kapining para sisiane sane lianan sapuniki,
“Lan ja iraga nugtug Guru,
apanga iraga padem bareng ajak Guru!”
Hyang Yesus Sumber Urip
17 Ritatkala Hyang Yesus rauh ring desa Betania,
Ida manggihin sawan I Lasaruse sampun petang rahina suene kagenahang ring kuburan guaneb.
18 Adoh desa Betania punika kirang langkung tigang kilometer saking Kota Yerusalem.
19 Duk punika,
akeh anak Yahudine ngrauhin Ni Marta sareng Ni Maria mangda ngibur ipun krana I Lasarus padem.
20 Ritatkala Ni Marta mirengin indik Hyang Yesus rauh,
ipun luas jagi nyambut Hyang Yesus,
nanging Ni Maria meneng ring umahnyane.
21 Raris Ni Marta matur ring Hyang Yesus sapuniki,
“Ratu,
yening Iratu wenten iriki duk punika,
pastika nyaman titiange nenten ja padem.
22 Nanging sane mangkin titiang uning Sang Hyang Pengardi jagi micayang saluirin pinunas Iratune.”
23 Raris Hyang Yesus ngandika sapuniki,
“Nyaman ragane bakal buin idup.”
24 Ni Marta matur sapuniki,
“Titiang uning I Lasarus jagi urip malih ritatkala anake sane sampun padem kauripang malih duk dinane pamuput,
inggih punika dinane manusane jagi kaakimin.”
25 Raris Hyang Yesus ngandika sapuniki,
“Tiang ene ane ngidupin anake ane suba mati,
lan Tiang ene sumber idup.
Anake ane pracaya tekening Tiang bakal maan idup yadiapin ia suba mati.
26 Lan anake ane idup,
pracaya tekening Tiang tusing bakal mati salamin-laminne.
Pracayake ragane tekening paundukane ene?”
27 Irika raris Ni Marta masaur sapuniki,
“Duh Ratu,
titiang pracaya Iratu nenten tios Putran Sang Hyang Pengardi sane jagi rauh ring jagate puniki,
inggih punika,
Sang Prabu sane kajanjiang olih Sang Hyang Pengardi.”
Hyang Yesus Nangis
28 Sasampune Ni Marta matur sapunika,
ipun luas nikain Ni Maria semeton ipune tur ngraos kisi-kisi sapuniki,
“Guru ada dini.
Ida nakenang ragane.”
29 Mirengin paindikane punika,
Ni Maria gelis-gelis matangi raris ngrauhin Hyang Yesus.
30 (Nanging duk punika Hyang Yesus dereng ngranjing ka desa.
Ida kari ring genah matemu sareng Ni Marta.)
31 Wenten pada anak Yahudine sane sedek ngibur Ni Maria ring umahnyane.
Ipun sami nyingakin Ni Maria gelis-gelis matangi tur luas.
Punika mawinan ipun sami pada nugtug Ni Maria krana ipun ngaden Ni Maria luas ka kuburan jagi nangis.
32 Sasampune Maria kacunduk sareng Hyang Yesus,
Ni Maria nyingakin Hyang Yesus tur matimpuh ring arepan Hyang Yesus saha matur sapuniki,
“Ratu,
yening Iratu wenten iriki duk punika,
pastika nyaman titiange nenten ja padem.”
33 Ritatkala Hyang Yesus nyingakin Ni Maria lan para anak Yahudine sane nyarengin ipun pada nangis,
manah Idane biyut tur kalintang sedih.
34 Raris Hyang Yesus mataken kapining ipun sami sapuniki,
“Dijake sawan I Lasaruse kagenahang?”
Raris ipun matur sapuniki,
“Ratu,
ngiring ja cingakin mrika.”
35 Raris Hyang Yesus nangis.
36 Punika mawinan anak Yahudine mabaos,
“Cingakin ja,
tresna asih pisan Gurune punika kapining I Lasarus.”
37 Nanging wenten sane mabaos sapuniki,
“Guru punika sampun nyegerin anak buta mangda prasida nyingak.
Nentenke Gurune punika mresidayang mangdane I Lasarus nenten padem?”
Hyang Yesus Nguripin I Lasarus
38 Duk punika,
manah Idane kalintang sedih malih,
raris Ida luas ka kuburan guane.
Kuburan guane punika katekepin nganggen batu sane ageng.
39 Raris Hyang Yesus ngandika sapuniki,
“Glibegang ja batune ento!”
Raris Ni Marta,
semeton I Lasaruse sane padem punika,
matur sapuniki,
“Ratu,
ipun sampun petang rahina kagenahang ring kuburan guane.
Pastika sampun mebo!”
40 Hyang Yesus ngandika kapining Ni Marta sapuniki,
“Boyake Tiang suba ngandikayang teken ragane?
Yening ragane pracaya,
ragane bakal ningalin kaagungan Sang Hyang Pengardi!”
41 Irika raris anake akeh nglibegang batune punika.
Raris Hyang Yesus nyengenget ka langite saha matur sapuniki,
“Titiang matur suksma,
duh Ajin Titiang,
krana Aji sampun mirengin Titiang.
42 Titiang uning Aji setata mirengin Titiang.
Nanging Titiang matur sekadi puniki,
mangdane anake sami sane wenten iriki,
dados pracaya indik Aji sane ngutus Titiang.”
43 Sasampune Hyang Yesus ngandika sekadi punika,
Ida majeritan antuk suara sane keras,
“Lasarus!
Pesu ja!”
44 Raris anake sane padem punika pesu.
Tangan lan batisne kari makaput antuk kain kasa.
Tur Hyang Yesus ngandika ring anake irika sapuniki,
“Kelesang ja kain kasane apanga ia nyidang majalan.”
Para Pemimpin Bangsa Yahudine Pada Adung jagi Ngamademang Hyang Yesus
45 Duk punika,
saking anak Yahudine sane rauh ring Ni Maria,
wenten akeh sane pracaya ring Hyang Yesus krana nyaksiang paindikan sane kalaksanayang olih Ida.
46 Nanging wenten pada sane luas nyeritayang paindikane punika ring para anak Parisine.
47 Punika mawinan para pemimpin rsi miwah para anak Parisine sangkep sareng anak saking seka pengadilan agama Yahudine.
Irika wenten sane ngamaosang sapuniki,
“Napike sane musti iraga laksanayang?
Krana Anake punika akeh makarya paindikan sane ngangobin!
48 Yening Anake puniki banggiang iraga,
pastika makasami anake dados pracaya ring Ipun kantos Ipun kadadosang Raja.
Punika mawinan pengede Bangsa Romane rauh jagi ngenyagang Genah Agung mabakti ring Sang Hyang Pengardic saha ngenyagang bangsan iragane!”
49 Saking para pemimpin rsine punika,
wenten rsi sane mapesengan dane Kayapas.
Duk tahun punika,
dane dados rsi penglingsir agung agama Yahudine.
Irika dane ngandika sapuniki,
“Ragane makasami nenten uning napi-napi.
50 Nentenke ragane sami eling,
becikan asiki sane padem bandingang kapining makasami bangsane enyag?”
51 (Dane nrawang sekadi punika boya ja mawit saking manah danene praragan.
Nanging krana dane dados rsi penglingsir agung tahune punika,
dane nrawang indik Hyang Yesus jagi padem buat Bangsa Yahudine.
52 Kenten pada Hyang Yesus padem nenten ja buat Bangsa Yahudine kamanten,
samaliha Ida padem mangda munduhang lan nyikiang saluirin krama druen Sang Hyang Pengardine sane sambrag maideh-idehan.)
53 Saking dinane punika,
para pemimpin Yahudine pada adung jagi ngamademang Hyang Yesus.
54 Punika mawinan Hyang Yesus nenten kayun kacingak ring arepan anak Yahudine.
Ida matilar saking Yudea tur luas nuju Kota Epraim nampek genah embangd.
Irika Ida meneng kasarengin para sisian Idane.
55 Duk punika sampun nampek rarainan Paskahe anak Yahudine.
Akeh anake saking negerine punika luas ka Yerusalem,
jagi nglaksanayang upacara mabersih raga sadereng rarainan Paskah.
56 Ring Yerusalem,
anake akeh punika ngrereh Hyang Yesus.
Ritatkala anake akeh punika mapunduh ring genah agung mabakti kapining Sang Hyang Pengardi,
ipun mabaos sapuniki,
“Sapunapike manut ragane?
Napike Hyang Yesus jagi rauh ring rarainan Paskahe puniki?”
57 Nanging,
para pemimpin rsine sareng para anak Parisi sampun ngicenin prentah sapuniki,
“Sapa sira ja sane uning ring dija Hyang Yesus meneng,
musti matur kapining para pemimpin Yahudine.”
Prentahe punika kicen mangdane ipun sami prasida ngejuk Hyang Yesus.