Paindikan sane Ngangobin 6: Kuasan Hyang Yesus Kalintang Agung
(Lukas 9:28-36)
Kaagungan Hyang Yesuse Kasaksiang Ring Gunung
6
28 Kirang langkung kutus dina sasampun Hyang Yesus ngajahin paindikane punika,
Ida raris munggah ka salah tunggal gunung jagi mabakti kasarengin antuk I Petrus,
I Yohanes lan I Yakobus.
29 Ritatkala Hyang Yesus mabakti ring gununge punika,
jeg maseh prarain Idane lan busanan Idane dados putih masinar.
30-31 Jeg saget kacingak sareng kalih anak masinar ritatkala ngedengang raga.
Anake punika nenten tios dane Musa lan dane Elia,
sinoman Sang Hyang Pengardi idumun.
Dane makakalih mawicara sareng Hyang Yesus indik sedan Idane sane jagi gelis kamargiang irika ring Kota Yerusalem.
32 Irika I Petrus lan kakalih sisiane sane lianan sedek sirep.
Ritatkala ipun matangi,
ipun nyingakin Hyang Yesus masinar kasarengin olih dane Musa lan dane Elia ngadeg ring sisin Idane.
33 Duk dane Musa lan dane Elia jagi matilar,
I Petrus matur ring Hyang Yesus sapuniki,
“Guru,
seneng pisan iraga iriki.
Banggiang ja titiang sami nyujukang rompok:
siki kaanggen Guru,
siki kaanggen dane Musa,
lan malih siki kaanggen dane Elia.”
I Petrus ngamaosang sapunika,
nanging ipun nenten uning napi sane kabaosang.
34 Risedek I Petrus ngraos,
tedun ambu nglingkubin ipun makasami.
Ritatkala ipun sami kalingkubin ambune punika,
makatiga sisiane pada jejeh.
35 Raris saking ambune punika wenten sabdan Sang Hyang Pengardi sapuniki,
“Ene Putran Nirane ane pilih Nira.
Padingehang ja Ida!”
36 Sasampune suarane punika mendep,
irika ipun nyingakin Hyang Yesus kamanten.
Duk punika para sisiane mendep,
nenten ja nyeritayang kapining sapa sira indik napi sane saksiang ipun.