Paindikan sane Ngangobin 5: Kuasan Hyang Yesus Ngicen Ajengan
(Lukas 9:10-17)
Ring rahina anu, Hyang Yesus ngutus para sisian Idane luas ka desa-desa mangda ngortiang Orti Rahayu lan nyegerin anake sane sungkan.
Hyang Yesus Ngicen Ajengan Ring Anake Akeh
5
10 Sasampune para utusan Hyang Yesuse mawali,
ipun nyeritayang ring Ida saluirin sane sampun laksanayang ipun.
Raris Hyang Yesus ngajak ipun sinarengan ka genah sane suung nampek Kota Betsaida.
11 Nanging ritatkala anake akeh uning paindikane punika,
raris ipun nugtug Hyang Yesus.
Tur Ida nyambut ipun sami saha nyeritayang ring ipun indik Sang Hyang Pengardi jagi gelis mamrentah dados Raja ring jagate.
Tur Hyang Yesus nyegerin anak sane sungkan.
12 Ritatkala engseb surya,
rauh makaroras diri sisian Hyang Yesuse saha matur,
“Guru,
tunden ja anake akeh punika mangda ngrereh ajengan lan penginepan ka desa-desa wiadin kampung-kampung sane nampek iriki krana genahe puniki suung.”
13 Nanging Hyang Yesus ngandika,
“Tuah ragane makejang ane sapatutne maang anake liu ento dadaaran!”
Para sisian Idane masaur,
“Titiang wantah madue rotia limang bungkul lan ulam kalih ukud.
Nenten wenten malih ajengan iriki yening iraga nenten numbas.”
14 Sawireh irika wenten sawetara limang tali (5.000) diri anak lanang,
dereng kapetek anak istri lan alit-alit.
Raris Hyang Yesus ngandika ring para sisian Idane sapuniki,
“Tunden ja anake liu ento negak matempek-tempekan,
sawetara seket (50) diri atempek.”
15 Para sisian Hyang Yesuse nglaksanayang prentah Idane ring anake akeh punika.
16 Raris Hyang Yesus ngambil makalima roti lan makakalih ulame punika.
Raris Ida nulengek ka langite ngaturang penyuksma ring Sang Hyang Pengardi.
Sasampune punika,
Ida ngompes-ngompes roti lan ulame punika.
Raris ngicenin ring para sisian Idane mangda kaedum-edumang ring anake akeh punika.
17 Makasami anake punika ngajeng kantos wareg.
Raris para sisian Hyang Yesuse munduhang sisan ajengane sane kaedumang punika kantos polih sisa roras penarak.