Paindikan sane Ngangobin 2: Kuasan Hyang Yesus Ngicen Ulam sane Akeh
(Lukas 5:1-11)
Juru Pencar Dados Sisian Hyang Yesuse
2
Ring dina anu,
Hyang Yesus ngadeg ring sisin Danu Galileanea.
Akeh anake ngrunyung Ida jagi mirengin pengajahan saking Sang Hyang Pengardi.
2 Risedek punika,
Hyang Yesus nyingakin wenten kalih jukung ring sisin danune.
Para juru pencare sampun tedun saking jukunge punika lan sedek ngumbah pencar ipune.
3 Hyang Yesus munggah ring salah tunggal jukunge,
inggih punika jukungne I Simon.
Raris Hyang Yesus mrentahang I Simon mangda jukunge kasogok akidik ka tengah.
Raris Hyang Yesus malinggih saha ngajahin anake akeh saking jukunge punika.
4 Sasampune wusan ngajahin,
Hyang Yesus ngandika ring I Simon,
“Dayung ja ka tongos ane dalem,
tur pulang ja pencar ragane apanga maan be.”
5 Raris I Simon masaur,
“Guru,
sampun apeteng titiang makasami magimeh makarya lan nenten polih napi-napi!
Nanging titiang jagi mulang malih pencare krana guru sane mrentahang titiang.”
6 Sasampune mulang pencare,
ipun polih ulam akeh kantos pencarnyane das uek.
7 Punika mawinan ipun nunas tulung ring sawitrannyane sane wenten ring jukunge sane malih siki.
Raris sawitrannyane nampekin jukunge saha mempen ulame ring makakalih jukunge kantos das kelem.
8-10 Duk punika I Simon lan para sawitrannyane pada angob nyingakin ulam sane akeh polihin ipun.
Sawitran I Simone punika mapesengan I Yakobus lan I Yohanes,
inggih punika pianak-pianak I Sebedeus.
Ritatkala I Simon nyaksiang kawisesan Hyang Yesuse,
ipun matimpuh ring arepan Hyang Yesus raris matur,
“Ratu,
matilar ja saking titiang!
Krana titiang jadma sane madosa.”