Titah 7: Ngortiang lan Ngajahin Sabdan Sang Hyang Yesus
(Yohanes 4:1-42)
Hyang Yesus Mabligbagan Sareng Anak Istri Saking Samaria
7
Risedek Hyang Yesus ngajahin ring wawengkon Yudea,
irika para anak Parisinea mirengin indik Hyang Yesus nerima lan ngicen penglukatanb ring pengiring sane akehan kapining dane Yohanesc.
2 (Sujatine nenten ja Hyang Yesus sane ngicen penglukatan,
nanging para sisian Idane.)
3 Tur ritatkala Hyang Yesus tangeh wantah para Parisine uning paindikane punika,
Hyang Yesus sareng sisian Idane matilar saking Yudea tur luas mawali ka wawengkon Galilea.
4 Pamargine sane nuju Galileane punika musti ngliwatin wawengkon Samaria.
5 Risedek ngentasin Samaria,
Hyang Yesus rauh ring Kota Sikar.
Kotane punika nenten ja adoh saking tanah druen leluhur anak Yahudine sane mapesengan dane Yakub.
(Tanahe punika dados warisan sane katerima olih dane Yusup,
okan dane Yakub.)
6 Irika wenten sumur druen dane Yakub idumun.
Krana Hyang Yesus leleh saking pamargin Idane,
Ida malinggih ring sumure punika.
Duk punika sawetara jam roras tengai.
7-8 Ritatkala para sisian Hyang Yesuse luas ka Kota jagi numbas ajengan,
raris rauh anak istri saking Samaria jagi nimba toya.
Hyang Yesus raris ngandika ring anake istri punika sapuniki,
“Dadike Tiang ngidih yeh bakal inem Tiang?”
9 Anak istri punika nyaurin sapuniki,
“Boyake jerone anak Yahudi,
lan titiang anak Samariad;
punapike jerone nunas inuman ring dewek titiange?”
(Anak Yahudi nenten macapatan sareng anak Samariane.)
10 Raris Hyang Yesus ngandika sapuniki,
“Ragane tusing nawang apake wara nugraha saking Sang Hyang Pengardi tekening i manusa lan sirake Tiang ane ngidih inuman teken ragane.
Yening ragane nawang paundukane ento,
pastika ragane ngidih inuman kapining Tiang.
Turmaning Tiang lakar ngicenin ragane yeh idup.”
11 Anake istri punika matur sapuniki,
“Jerone nenten madue timba,
lan sumure puniki kalintang dalem.
Dijake jerone polih toya urip punika?
12 Dane Yakub leluhur iraga,
ngicen sumure puniki kapining iraga.
Tur dane ngambil toya iriki sane kainum sareng okan-okan danene,
kenten pada ingon-ingon danene.
Napike jerone ngrasa agengan kapining dane Yakub?”
13 Raris Hyang Yesus nyaurin sapuniki,
“Nyen ja ane nginem yeh sumure ene bakal bedak buin.
14 Sakewala nyen ja nginem yeh ane bakal icen Tiang,
anake ento tusing ja bakal bedak buin kanti salamin-laminne.
Krana yehe ane kicenin Tiang ento buka yeh klebutan di idupne.
Yehe ento lakar ngicenin idup sujati salamin-laminne.”
15 Raris anak istri punika matur sapuniki,
“Jero,
icen ja titiang toyane punika,
mangda titiang nenten bedak malih lan nenten musti malih mriki ngambil toya.”
16 Hyang Yesus ngandika sapuniki,
“Kemu ja,
kaukin kurenan ragane tur ajak ja mai.”
17 Anak istri punika nyaurin sapuniki,
“Titiang nenten madue kurenan.”
Raris Hyang Yesus ngandika malih,
“Raos ragane tuah saja.
18 Sujatine ragane suba ping lima makurenan,
tur anake muani ane idup ajak ragane jani boya ja kurenan ragane.
Raos ragane ento mula saja.”
19 Anake istri punika matur sapuniki,
“Jero,
sane mangkin titiang tatas uning jerone puniki Sinoman Sang Hyang Pengardi.
20 Leluhur titiange mabakti kapining Sang Hyang Pengardi ring gununge puniki,
nanging Bangsa Yahudine ngamaosang wantah ring Kota Yerusalem kamanten genah anake mabakti.”
21 Raris Hyang Yesus ngandika sapuniki,
“Wih ibu,
pracaya ja kapining pengandikan Tiange!
Dinane lakar teka.
Nah,
ditu anake bakal mabakti kapining Sang Hyang Aji tusing ja di gununge ene lan tusing ja di Yerusalem.
22 Ragane anak Samaria mabakti kapining Sang Hyang Pengardi,
nanging ragane tusing ja nawang Ida.
Tiang makejang anak Yahudi mabakti kapining Sang Hyang Pengardi,
lan Tiang nawang Ida,
krana Sang Hyang Pengardi jagi nylametang manusane malantaran adiri saking anak Yahudi.
23 Nanging dinane lakar teka,
sujatine suba teka jani:
penyungsung ane sujati lakar mabakti kapining Sang Hyang Aji uling kenehne ane suba nerima kapatutan saking Ida.
Krana Ida mikayunang penyungsung ane sujati buka keto.
24 Sang Hyang Pengardi wantah Roh.
Anake ane dadi penyungsung ane sujati musti mabakti kapining Sang Hyang Aji uling kenehne ane suba nerima kapatutan saking Ida.”
25 Anake istri punika matur sapuniki,
“Titiang uning Sang Prabu sane kajanjiang olih Sang Hyang Pengardi punika jagi rauh.
Ritatkala Ida rauh,
Ida jagi midartayang saluirin paindikane saking Sang Hyang Pengardi kapining tiang sami.”
(Sang Prabu sane kajanjiang punika taler kaucap ‘Kristus’.)
26 Raris Hyang Yesus ngandika sapuniki,
“Tiang ane sedek ngraos tekening ragane tuah Sang Prabu sane kajanjiang ento.”
27 Duk punika para sisian Hyang Yesus mawali saking Kota.
Ipun sami ngon santukan Hyang Yesus mawicara sareng anak istri.
Nanging ipun sami nenten purun mataken ring Ida sapuniki,
“Napi sane perluang guru?”
utawi “Napi mawinan guru mabligbagan sareng anak istri punika?”
28 Raris anak istri punika ngalain junnyane ring sumure punika,
tur ipun malaib ka Kota nyeritayang ring anake irika sapuniki,
29 “Mriki ja cingakin anake sane midartayang ring dewek tiange saluirin paindikan sane laksanayang tiang.
Punapi manut jerone sami?
Napike anake punika wantah Sang Prabu sane kajanjiang olih Sang Hyang Pengardi?”
30 Raris anake akeh saking kotane punika rauh nyingakin Hyang Yesus.
31 Duk punika para sisian Hyang Yesus melid matur sapuniki,
“Guru,
ngiring ja ngajeng.”
32 Nanging Hyang Yesus nyaurin sapuniki,
“Tiang ngelah dadaaran ane ragane tusing nawang.”
33 Raris para sisian Idane saling takenang,
“Adake anak len ane ngaturang ajengan kapining guru?”
34 Hyang Yesus ngandika sapuniki,
“Dadaaran Tiange tuah nglaksanayang pikayunan Sang Hyang Aji sane ngutus Tiang.
Dadaarane ento sing ada len mragatang tugas sane kaprentah olih Ida.
35 Buka sasonggane,
‘Sebilang petang bulan masan manyine.’
Nanging Tiang ngorahang tekening ragane:
Tingalin ja padi-padine suba kuning,
sadya bakal kaanyi!
36 Anake ane manyi suba maan upahne lan ipun pada munduhang asil manyine.
Asil manyine ento tuah anak lenan ane maan idup sujati salamin-laminne.
Ento mawinan anake ane nyambehang bibit lan anake ane manyi,
bareng-bareng masukarena.
37 Sujatine sasonggane ene beneh,
‘Ane aukud nanem,
ane len manyi.’
38 Tiang nunden ragane makejang luas manyi di tegale ane ragane tusing ngarap;
anake len suba magarapan ditu,
tur ragane manyi uling garapan anake ento.”
39 Kaceritayang mangkin,
akeh warga Kota Samariane pracaya ring Hyang Yesus krana anak istri punika nyeritayang sapuniki,
“Gurune punika nyeritayang kapining tiang saluirin paindikane sane laksanayang tiang.”
40 Punika mawinan ritatkala warga Samariane punika kacunduk sareng Hyang Yesus,
ipun makasami mapinunas banget mangda Ida meneng ring kotane punika.
Raris Hyang Yesus meneng irika kalih rahina.
41 Lan krana pengajahan Idane,
ngancan ngakehang anak Samariane pracaya ring Ida.
42 Raris ipun sami ngraos kapining anake istri punika sapuniki,
“Dumun tiang makasami pracaya krana tutur ragane kamanten.
Nanging mangkin tiang makasami pracaya krana tiang sampun mirengang guru,
lan uning guru wantah juru rahayun jagate sane sujati.”