Titah 5: Painget indik Sedan Sang Hyang Yesus
(Lukas 22:7-20)
Pidabdab Rarainan Paskah
5
7 Ring rahina rairan Roti Tanpa Ragi,
sane pada kaucap rarainan Paskaha,
irika Bangsa Yahudine musti nampah panak biri-birib mangda kadadosang ajengan rarainan Paskah.
8 Punika mawinan Hyang Yesus mrentahang I Petrus sareng I Yohanes sapuniki,
“Kemu ja dabdabang dadaaran anggon iraga marainan Paskah.”
9 Raris I Petrus sareng I Yohanes matur sapuniki,
“Ring dijake Guru mapikayun mangda dabdabang titiang?”
10 Hyang Yesus nyaurin sapuniki,
“Ritatkala ragane macelep ka kota,
ragane lakar kacunduk ajak anak muani ane sedek ngaba jun misi yeh.
Tugtug ja anake ento ka umah ane celepina,
11 tur orahang tekening ane ngelahang umahe ento kene,
‘Guru mataken:
Ring dijake Tiang sareng para sisian Tiange ngajeng tatkala rarainan Paskahe?’
12 Anake ane ngelahang umahe ento bakal mitujuhin kamar ane linggah di baduur,
ane suba jangkep misi prabot.
Dabdabang ja ditu.”
13 Raris I Petrus sareng I Yohanes mamargi ka kotane punika tur makasami kapanggihin sekadi sane kanikayang olih Hyang Yesus.
Tur ipun nabdabang ajengan rarainan Paskahe.
Pinget Indik Paskah
14 Ritatkala sampun rauh galahe jagi ngajeng ajengan rarainan Paskah,
Hyang Yesus malinggih ngajeng kasarengin para utusan Idane.
15 Irika raris Hyang Yesus ngandika sapuniki,
“Uling pidan Tiang meled sajan naar dadaaran Paskahe bareng-bareng ajak ragane satondene Tiang kasiksa.
16 Apa kranane keto?
Padingehang ja Tiang!
Tiang tusing ja bakal naar buin dadaaran Paskahe ene kanti artin Paskahe sujati mamargi.
Tatkala ento Sang Hyang Pengardi seken mamrentah dadi Raja di jagate.”
17 Raris Hyang Yesus ngambil cawan sane madaging anggur saha ngaturang penyuksma ring Sang Hyang Pengardi.
Raris Ida ngandika ring para utusan Idane sapuniki,
“Jemak ja cawane ene tur edum-edumang ja.
18 Padingehang ja Tiang:
uling jani,
Tiang tusing ja bakal nginum buin anggure ene kanti Sang Hyang Pengardi seken mamrentah dadi Raja di jagate.”
19 Raris Hyang Yesus ngambil roti,
tur Ida ngaturang penyuksma ring Sang Hyang Pengardi.
Ida ngepeh-ngepeh roti punika tur Ida ngicenin ring para utusan Idane saha ngandika sapuniki,
“Rotine ene ngambarang awak Tiange ane kapicayang sid ragane;
daar ja rotine ene dadi pinget unduk Tiange.”
20 Kenten pada sasampune wusan ngajeng,
Ida ngicen cawan sane madaging anggur ring para utusan saha ngandika sapuniki,
“Anggure ene satmaka getih Tiange ane bakal kabriokang buat ragane.
Getih Tiange ento bakal dadi janjic ane anyar saking Sang Hyang Pengardi.”