Titah 4: Indik Ngaturang Bakti kapining Sang Hyang Pengardi
(Matius 6:5-15)
4
5 Salanturnyane Hyang Yesus ngandika ring para sisian Idane sapuniki,
“Ritatkala ragane ngaturang bakti kapining Sang Hyang Pengardi,
eda ja buka anake ane mapi-mapi patut.
Krana ritatkala ngaturang bakti,
anake ento demen majujuk di bale wantilan agama Yahudine,
keto masih di sisin jalanne,
apang ajumanga tekening anak lenan.
Keto mawinan anake ento suba maan walesan.
6 Nanging ritatkala ragane ngaturang bakti kapining Sang Hyang Pengardi,
macelep ja ka tengah kamare tur ubetang korine laut ngaturang bakti kapining Sang Hyang Aji,
Pengardin ragane sane wenten ring genah sane ilid.
Keto mawinan Ajin ragane sane nyingakin apa ane kalaksanayang di tongose ane silib,
jagi mapaica walesan tekening ragane.
7 “Tur ritatkala ragane ngaturang bakti kapining Sang Hyang Pengardi,
eda ja buka anake ane tusing nawang Ida.
Anake ento liu ngraos tatkala ngaturang bakti.
Ia ngaden ulian liu raosne ento,
pinunasne jagi kapicayang olih Ida.
8 Eda ja ragane nuutin anake ento,
krana Sang Hyang Aji,
Pengardin ragane sampun uning apa ane saratang ragane,
satonden ragane mapinunas kapining Ida.
9 Keto mawinan,
matur ja buka kene:
Inggih Ajin titiang sane ring swarga,
mangdane parab Aji sane suci punika kaagungang.
10 Dumogi ja Sang Prabu sane kajanjiang kapining Aji,
yakti mamrentah ring jagate,
lan arsan Aji mamargi ring jagate sekadi ring swarga.
11 Picayang ja titiang sami dadaaran sane saratang titiang rahinane mangkin.
12 Lan ampurayang ja kaiwangan titiange sami,
sekadi titiang ngampurayang anake sane malaksana iwang ring titiang.
13 Lan piara ja titiang mangda nenten keni gagodan,
nanging bebasang ja titiang sami saking kuasan ratun para setan.
[Krana Aji sane madue karajaan lan kuasa taler kaagungan kantos salamin-laminne.
Amina.]b”
14 Raris Hyang Yesus ngandika malih sapuniki,
“Ampurayang ja anake ane malaksana iwang tekening ragane apanga Ajin ragane sane ring swarga ngampurayang pada dosan-dosan ragane.
15 Nanging yening ragane tusing ngampurayang anake ane malaksana iwang tekening ragane,
Ajin ragane pada nenten jagi ngampurayang dosan-dosan ragane.”