Pengajahan Sang Hyang Yesus 8

Paplajahan 8: Iraga Musti Masalin Saking Urip Madosa

(Lukas 13:1-9)

Ring rahina anu, Hyang Yesus sedek ngajahin para sisian Idane lan anak lianan sane akeh. Ida mapiteges mangdane ipun sami masalin saking urip madosa.

Ritatkala punika, wenten anak sane nyeritayang ring Hyang Yesus, indik para warga Galileane sane kapademang olih gubernur Pilatus saking pemrentahan Roma. Risedek kapademang, ipun sami ngaturang aturan marupa beburon kapining . 2 Mirengin baos anake punika, Hyang Yesus ngandika sapuniki, “Napike ragane ngaden ulah pati punika muktiang ipun lebih bandingang kapining anak Galileane sane lianan? 3 Nenten ja sekadi punika! Nanging elingin ja: yening ragane nenten saking urip sane madosa, ragane makasami taler jagi padem. 4 Ragane pastika eling wenten plekutus diri sane padem ring Siloam krana tepen menara uug. Napike ragane ngaden salah pati punika muktiang ipun lebih madosa bandingang kapining anake lianan sane meneng ring Kota Yerusalem? 5 Nenten ja sekadi punika! Tiang negesin malih: yening ragane nenten masalin saking urip sane madosa, ragane makasami taler jagi padem.”

6 Raris Hyang Yesus nyeritayang pada pengumpamian sekadi puniki, “Wenten anak madue abian anggur. Ring abian anggure punika masih wenten punyan delima. Sedek dina anu, ipun mrika ngrereh buah delimane, nanging asiki ja ipun nenten polih buahnyane. 7 Raris ipun mabaos kapining tukang abiane sapuniki, ‘Suba telung tiban tiang ngalih buah delimane ene, sakewala tusing ja taen maan apa-apa. Ebah ja punyan delimane ene! Tusing ja ada gunane punyane ene mentik di tanah tiange.’

8 “Nanging tukang abiane punika mabaos sapuniki, ‘Ratu, banggiang ja dumun punyan delimane niki mentik malih atiban. Titiang jagi ngiterin numbegin lan nagingin lemekan punyane niki. 9 Minab malih atiban mabuah. Yening tetep nenten mabuah, ebah ja!’”

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”